សម្តេចអគ្គមហាសេនាបតីតេជោ ហ៊ុន សែន
បានយល់ព្រមនាថ្ងៃទី១៩ ខែមករា ឆ្នាំ២០១២ តាមការអញ្ជើញរបស់លោក DATO
MTCHAEL YACH មន្ត្រីជាន់ខ្ពស់ នៃវិទ្យាស្ថានយុទ្ធសាស្ត្រ និង
ភាពជាអ្នកដឹកនាំប្រទេសម៉ាឡេស៊ីថា សម្តេចនឹងអញ្ជើញចូលរួមថ្លែងសុន្ទរកថាមួយនៅក្នុងវេទិកាថ្នាក់ដឹកនាំអាស៊ាននាពេលខាងមុខ
។
ឯកឧត្តម អ៊ាង សុផល្លែត ជំនួយការសម្តេចតេជោនាយរដ្ឋមន្ត្រីឲ្យដឹងថា
ក្នុងឱកាសចូលជួបសំដែងការគួរសមនៅវិមានសន្តិភាព ក្នុងរាជធានីភ្នំពេញ លោក
DATO MTCHAEL YACH បានគោរពថ្លែងអំណរគុណជូនចំពោះរាជរដ្ឋាភិបាលកម្ពុជា
ដែលបានគាំទ្រទៅដល់ការរៀបចំនូវវេទិកាថ្នាក់ដឹកនាំអាស៊ាន ហើយលោក DATO
MTCHAEL YACH បានគោរពអញ្ជើញសម្តេចតេជោនាយករដ្ឋមន្ត្រីថ្លែងសុន្ទរកថានៅក្នុងវេទិកានោះ។
លោក DATO MTCHAEL YACH បានជំរាបជូនសម្តេចតេជោថា
វេទិកានេះបានរៀបចំឡើងដោយមានប្រធានបទចំនួន ៣ ទី១ គឺពង្រឹង សមាហរណកម្ម ទី២
គឺតួនាទីរបស់វិស័យឯកជនពាក់ព័ន្ធនឹងការតភ្ជាប់អាស៊ាន និង ទី៣
គឺថ្នាក់ដឹកនាំអាស៊ានវ័យក្មេង។
សម្តេចនាយករដ្ឋមន្ត្រីបានយល់ព្រមចូលរួមថ្លែងសុន្ទរកថានៅក្នុងវេទិកានេះ
និង បានយល់ស្របជាមួយសារៈសំខាន់ប្រធានបទទាំង ៣ ដោយសម្តេចតេជោនាយករដ្ឋមន្ត្រី បានស្នើឲ្យលោក DATO MTCHAEL YACH ធ្វើការស្រាវជ្រាវពិចារណាទៅលើប្រធានបទ
និង តួនាទីរបស់អាស៊ានជាមួយដៃគូក្រៅពីតំបន់អាស៊ាន
ពិចារណាទៅលើការតភ្ជាប់ហេដ្ឋារចនាសម្ព័ន្ធ ទាំងផ្នែកទន់ និង ផ្នែករឹង ព្រោះថា
ប្រព័ន្ធច្បាប់ ក៏ដូចជាប្រព័ន្ធតុលាការនៅក្នុងបណ្តាប្រទេសអាស៊ាននិមួយៗនៅក្នុងអាស៊ានមិនដូចគ្នានោះទេ។
សម្តេចតេជោក៏បានស្នើឲ្យ
មានការសិក្សាអនាគតអាស៊ាននៅឆ្នាំ ២០១៥ ដែលជាឆ្នាំលំហូរធនធានមនុស្ស និង
ទំនិញរវាង អាស៊ានដោយគ្មានរបាំង និង បានស្នើឲ្យលោក DATO MTCHAEL YACH
សិក្សាអំពីការបញ្ចប់របាំងពីការទទួល សញ្ញាបត្រពីប្រទេសមួយ
ហើយមិនទទួលស្គាល់សញ្ញាបត្រពីប្រទេសមួយទៀតក្នុងប្លុកអាស៊ានដូចគ្នា៕