ជាមួយនឹងមោទនភាព
ចំពោះការរីកចម្រើនកីឡាប៊ូល-ប៉េតង់ នៅកម្ពុជា ឯកឧត្តមបណ្ឌិត សុខ អាន ឧបនាយករដ្ឋមន្រ្តី
រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី នៅព្រឹកថ្ងៃទី ១៧ ខែមករា
ឆ្នាំ ២០១២បានជម្រុញឲ្យសហព័ន្ធកីឡាប៉េតង់កម្ពុជារៀបចំការប្រកួត
ឲ្យបានញឹកញាប់ យ៉ាងហោច ៣ ខែម្តង ដើម្បីលើកកម្ពស់គុណភាព សមត្ថភាព
និងការចូលរួមក្នុងកីឡាប៉េតង់ពីមហាជនឲ្យបានច្រើន។ ឯកឧត្តមបណ្ឌិត សុខ អាន បានកំណត់យកខេត្តតាកែវ
ដើម្បីរៀបចំការប្រកួតជាគំរូមុនគេ
ដោយអញ្ជើញយកអ្នកដែលឈ្នះក្នុងកម្រិតជាតិទៅចូលរួម និងបង្ហាត់បង្ហាញផង
។ អ្នកឈ្នះក្នុងការប្រកួតកីឡាប៉េតង់នេះត្រូវចាត់ទុកថាជាជើងឯកប្រចាំត្រីមាស
ដោយត្រូវផ្សព្វផ្សាយឲ្យបានដឹងទូទាំងប្រទេស។
នៅក្នុងឱកាសចូលរួមជាអធិបតីក្នុងពិធីបិទការប្រកួតកីឡាប៉េតង់ថ្នាក់ជាតិ
ដណ្តើមពានរង្វាន់សុខអានលើកទី ៤ នៅពហុកីឡាដ្ឋានជាតិអូឡាំពិក
ឯកឧត្តមបណ្ឌិត សុខ អាន បានមានប្រសាសន៍ឲ្យដឹងថា
ដោយទទួលបានការយកចិត្តទុកដាក់
និងគាំទ្រពីសម្តេចអគ្គមហាសេនាបតីតេជោ
ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ចាប់តាំងពីឆ្នាំ
១៩៩១ ដែលឯកឧត្តមបានបង្កើតសហព័ន្ធកីឡាប៉េតង់
ព្រះរាជាណាចក្រកម្ពុជាមានមោទនភាព ដោយសារក្រុមកីឡាប៉េតង់កម្ពុជា
ដណ្តើមបានមេដាយជាង១៣០ក្នុងកម្រិតការប្រកួតថា្នក់តំបន់
និងកម្រិតពិភពលោក ដែលក្នុងនោះមានមេដាយមាសចំនួន ២៧ និងពានរង្វាន់មាសចំនួន៥
។
ឯកឧត្តម
មាស សារិន អគ្គលេខាធិការសហព័ន្ធកីឡាប៉េតង់កម្ពុជា
បានមានប្រសាសន៍ឲ្យដឹងថា ក្នុងកម្មវិធីប្រកួតរយៈពេល ៣ ថ្ងៃ (១៤-១៧
ខែមករា ឆ្នាំ ២០១២) ដើម្បីដណ្តើមពានរង្វាន់សុខអាន លើកទី៤ នេះ
មានកីឡាករចូលរួមចំនួន ១៨២ នាក់ ក្នុងនោះកីឡាការិនី ១៧ នាក់
មកពីក្លឹបចំនួន ២៤ នៅទូទាំងប្រទេស។ ជាលទ្ធផលក្នុងការប្រកួតផ្តាច់ព្រ័ត្រ
៣ ទល់នឹង ៣ ដណ្តើមពានរង្វាន់ធំ គឺ ម៉ូតូ ហុងដា វ៉េវ ចំនួន ៣ គ្រឿង
ពានរង្វាន់ និងខោអាវកីឡា ក្រុមកីឡាករប៉េតង់មកពីក្លឹបរដ្ឋាករទឹកស្វយ័តរាជធានីភ្នំពេញទទួលបានជោគជ័យ។
ឯចំណាត់ថ្នាក់លេខ ២ បានទៅក្រុមមកពីក្លឹបយោធាយោធភូមិភាពពិសេស ទទួលបានថវិកា
៩០០ ដុល្លារអាមេរិក និងខោអាវកីឡា ។ ចំណាត់ថ្នាក់លេខ ៣
បានទៅក្រុមកីឡាករមកពីក្លឹប ក្រសួងការពារជាតិ បានទទួលថវិកាចំនួន
៦០០ ដុល្លារអាមេរិក និងខោអាវកីឡា។ ចំណែកការប្រកួតផ្នែកនារីម្នាក់ៗ
ដែលមានកីឡាការិនីចូលរួម ១៧ នាក់ ចំណាត់ថ្នាក់លេខ ១ បានទៅ អ្នកស្រី កែ លេង ទទួលបានម៉ូតូមួយគ្រឿង លេខ ២ បានទៅកីឡាការិនី អ៊ុក ស្រីមុំ ទទួលបានថវិកា ៤០០
ដុល្លារអាមេរិក និងលេខ ៣ បានទៅកីឡាការិនី ឌុច សោភ័ណ ទទួលបានថវិការ ៣០០ ដុល្លារអាមេរិក។ អ្នកទាំង៣ មកពីក្លឹបក្រសួងការពារជាតិ។
ក្រៅពីនេះក៏មានការជូនរង្វាន់ដល់ការប្រកួតជាក្រុមផងដែរ។