ឯកឧត្តម
ផៃ ស៊ីផាន រដ្ឋលេខាធិការទីស្តីការគណៈរដ្ឋមន្រ្តី
និងជាអ្នកនាំពាក្យ បានឲ្យដឹងថា នៅស្រុកត្បែងមានជ័យ ខេត្តព្រះវិហារ
នាព្រឹកថ្ងៃទី ៣១ ខែមករា ឆ្នាំ ២០១២ នេះ អាជ្ញាធរប្រេងកាតកម្ពុជា និង ក្រុមហ៊ុន
JOGMEC ក្រុមហ៊ុន MOECO
បានប្រារព្ធពិធីក្រុងពាលីតាមប្រពៃណីសាសនា ដើម្បីចាប់ផ្តើមសិក្សាអង្កេតស៊ីស្មិក(Seismic)
នៅប្លុក ១៧ ដែលស្ថិតនៅក្នុងទឹកដីនៃខេត្តចំនួន ៣ គឺ កំពុងធំ
ព្រះវិហារ និង សៀមរាប ។
ពិធីបើកការដ្ឋានសិក្សាស្រាវជ្រាវរុករកប្រេងកាតក្នុងដំណាក់កាលដំបូងនេះ
គឺមានការចូលរួមដោយ ឯកឧត្តម ហូ
វិចិត្រ អនុប្រធានអាជ្ញាធរប្រេងកាតជាតិកម្ពុជា ឯកឧត្តម អ៊ុំ ម៉ារ៉ា អភិបាលខេត្តព្រះវិហារ
លោក អាគីរ៉ា ស៊ុយហ្សុយគី (AKIRA SUZUKI)
នាយកប្រតិបត្តិក្រុមហ៊ុន JOGMEC
ព្រមទាំងមន្រ្តីអ្នកមុខអ្នកការមួយចំនួនទៀត។
ឯកឧត្តម
ផៃ ស៊ីផាន បានពន្យល់ថា
ការសិក្សាអង្កេតស៊ីស្មិកជាវិធីសាស្រ្តមួយនៃការសិក្សាស្រាវជា្រវរុករកប្រេងកាតក្នុងដំណាក់កាលដំបូង។
ការសិក្សានេះរួមមាន ការថតរលករំញ័រ ការខួងរន្ធតូចៗ
ដើម្បីទទួលបាននូវទិន្នន័យមួយសម្រាប់យកទៅធ្វើការវិភាគបកស្រាយស្វែងយល់
ពីលក្ខណៈស្រទាប់ដីនៅខាងក្រោម។ ឯកឧត្តម ផៃ ស៊ីផាន ក៏ដូចជាឯកឧត្តម ហូ
វិចិត្រ បានអះអាងថា ការប្រតិបត្តិការធ្វើស៊ីស្មិកពុំបង្កឲ្យមានការព្រួយបារម្ភដល់ការប៉ះពាល់បរិស្ថានទេ។
ឯកឧត្តម ហូ វិចិត្រ តំណាងដ៏ខ្ពង់ខ្ពស់ឯកឧត្តមបណ្ឌិត
សុខ អាន ឧបនាយករដ្ឋមន្រ្តី
រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី
និងជាប្រធានអាជ្ញាធរប្រេងកាតជាតិកម្ពុជា
បានថ្លែងនៅក្នុងពិធីក្រុងពាលីថា ការបើកការដ្ឋានសិក្សាអង្កេតស៊ីស្មិកនៅពេលនេះ
បានបង្ហាញឲ្យឃើញកាន់តែច្បាស់ថែមទៀតនូវជោគជ័យនៃការអនុវត្តគោលនយោបាយរបស់រាជរដ្ឋាភិបាលកម្ពុជា
ដែលមានសម្តេចអគ្គមហាសេនាបតីតេជោ
ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ជាប្រមុខដឹកនាំប្រកបដោយគតិបណ្ឌិតក្នុងការទាក់ទាញវិនិយោគិនទាំងក្នុង
និងក្រៅប្រទេស ឲ្យមកធ្វើវិនិយោគនៅកម្ពុជា
ដើម្បីឲ្យធ្វើឲ្យមានកំណើនសេដ្ឋកិច្ចខ្ពស់ បង្កើតការងារជូនប្រជាពលរដ្ឋ
និងឈានទៅកាត់បន្ថយភាពក្រីក្រ។
សេចក្តីប្រកាសព័ត៌មានរបស់អាជ្ញាធរប្រេងកាតជាតិកម្ពុជា
បានឲ្យដឹងថា នៅឆ្នាំ ១៩៩៦ ក្រុមហ៊ុន JOGMEC ដែលពីមុនមានឈ្មោះថា
សាជីវកម្មប្រេងកាតជាតិជប៉ុន Japan
National Oil Corporation (JNOC) ធ្លាប់បានធ្វើការសិក្សាវាស់ស្ទង់ម៉ាញ៉េទិក
និងក្រាវីតេតាមអាកាស (Airborne
Magnetic Survey) ។ នៅថ្ងៃទី ៤ ខែ ឧសភា ឆ្នាំ ២០១០ ក្រុមហ៊ុន JOGMEC បានចុះហត្ថលេខាជាមួយអាជ្ញាធរប្រេងកាតជាតិកម្ពុជា
លើអនុស្សរណៈ និងកិច្ចព្រមព្រៀងគោលលើប្លុក ១៧
ដែនគោកនៃព្រះរាជាណាចក្រកម្ពុជា ដែលស្ថិតនៅក្នុងខេត្តកំពង់ធំ ខេត្តសៀមរាប
និងខេត្តព្រះវិហារ ដើម្បីសិក្សាអង្កេតទិន្នន័យប្រេងកាត។
បន្ទាប់មកក្រុមហ៊ុន
JOGMEC បានចុះកិច្ចព្រមព្រៀងជាមួយក្រុមហ៊ុន MOECO ក្នុងការអនុវត្តគម្រោងសិក្សាស្រាវជ្រាវប្រេងកាតក្នុងប្លុក
១៧ ។ ទន្ទឹមគ្នានេះក្រុមហ៊ុន MOECO ក៏បានសិក្សាស្រាវជាវជាបន្តបន្ទាប់រហូតសម្រេចធ្វើការសិក្សាអង្កេតស៊ីស្មិនៅក្នុងប្លុកនេះ៕