សម្តេចអគ្គមហាសេនាបតីតេជោ ហ៊ុន សែន បានស្នើនារសៀលថ្ងៃទី១
ខែ កុម្ភៈ ឆ្នាំ ២០១២ ឲ្យលោក LI RUOGU ពិនិត្យមើលគម្រោងចំនួន ៧
ដែលសុទ្ធសឹងតែជាគម្រោងហេដ្ឋារចនាសម្ព័ន្ធ និងគម្រោងធារាសាស្ត្រ ដែលភាគីកម្ពុជាបានលើកជូនភាគីចិនរួចមកហើយនោះ។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីឲ្យដឹងថា
មានគម្រោង ១ នៅក្នុងគម្រោងទាំង ៧ នោះ ជាគម្រោងអាទិភាពជាងគេ នោះគឺគម្រោងផ្លូវជាតិលេខ
៦ ពីថ្នល់កែវដល់ខេត្តសៀមរាប ដែលមានផលប្រយោជន៍ខាងសេដ្ឋកិច្ច ទេសចរណ៍ និង
ជាគម្រោងផ្លូវមុខមាត់របស់កម្ពុជា ដែលសម្តេចតេជោនាយករដ្ឋមន្ត្រីបានស្នើឲ្យលោក
LI RUOGU ពិនិត្យផ្តល់អាទិភាពទៅលើគម្រោងនេះ។
ឆ្លើយតបនឹងសំណើនេះ
លោក LI RUOGU ប្រធានធនាគារនីហរ័ណ អាហរ័ណ នៃសាធារណរដ្ឋប្រជាមានិតចិន
បានថ្លែងថា លោកនឹងចាត់ទុកគម្រោងផ្លូវជាតិលេខ ៦ នេះជាគម្រោងអាទិភាព
ហើយនឹងពិនិត្យមើលគម្រោងនេះ នៅពេលវិលត្រឡប់ទៅវិញ ដោយលោកបានធានាអះអាងថា
នៅក្នុងឆ្នាំ ២០១២ នេះនៅក្នុងគម្រោងទាំង ៧ ដែលបានលើកឡើងនោះនឹងមិនមានបញ្ហាទេសម្រាប់ការផ្តល់ជូនដល់កម្ពុជានោះ។
លោក LI RUOGU បានជំរាបជូនសម្តេចតេជោនាយករដ្ឋមន្ត្រីថា
ដំណើរទស្សនកិច្ចរបស់លោកមកកាន់ព្រះរាជាណាចក្រកម្ពុជា នាពេលនេះ
គឺដើម្បីចុះហត្ថលេខាលើគម្រោងចំនួន ៣ រួមមានគឺគម្រោងផ្លូវលេខ ២១៤
ផ្លូវលេខ ៧៦ ខាងជើង និង គម្រោងប្រព័ន្ធធារាសាស្ត្រ។
លោក LI RUOGU បានជម្រាបជូនសម្តេចតេជោនាយករដ្ឋមន្ត្រីថា
មូលនិធិចិន-អាស៊ាន ដែលមានទឹកប្រាក់ចំនួន ៤ ពាន់លានដុល្លារសហរដ្ឋអាមេរិកនោះ
ដើមឡើយមានការកំណត់សម្រាប់ប្រទេសនិមួយៗសម្រាប់លើកគម្រោងស្នើសុំ
ប៉ុន្តែនៅពេលនេះគឺពុំមានការកំណត់ទៀតទេ ដែលប្រទេសនិមួយៗ
អាចលើកគម្រោងស្នើសុំបាន។ លោក LI RUOGU បានជម្រាបជូនសម្តេចតេជោនាយករដ្ឋមន្ត្រីថា
កម្ពុជាអាចលើកគម្រោងបន្ថែមដើម្បីស្នើទាក់ទាញយកឥណទានសម្បទាននេះ។
ឯកឧត្តម អ៊ាង សុផល្លែត ថ្លែងថា សម្តេចតេជោនាយករដ្ឋមន្ត្រីបានថ្លែងអំណរគុណចំពោះព័ត៌មានពាក់ព័ន្ធនឹងការដកកំណត់នៃឥណទានសម្បទានផ្តល់ដល់ប្រទេសអាស៊ាននេះ
និងមានប្រសាសន៍ថា កន្លងមកកំណើនសេដ្ឋកិច្ចនៅកម្ពុជា មួយចំណែកធំគឺដោយសារមានជំនួយរបស់ចិន
ហើយបច្ចុប្បន្ននេះកម្ពុជា ជាប្រទេសមួយដែលនៅមានហេដ្ឋារចនាសម្ព័ន្ធទន់ខ្សោយជាងគេបំផុតនៅក្នុងអាស៊ាន
ដូច្នេះសម្តេចបានលោក LI RUOGU ឲ្យជួយពិនិត្យគម្រោងទាំង ៧ នេះ។ សម្តេចតេជោនាយករដ្ឋមន្រ្តី បានអនុញ្ញាតឲ្យលោក
LI RUOGU ប្រធានធនាគារនីហរ័ណ អាហរ័ណ នៃសាធារណរដ្ឋប្រជាមានិតចិន ចូលជួបសំដែងការគួរសមនៅវិមានសន្តិភាពនារសៀលថ្ងៃទី
១ ខែកុម្ភៈ ឆ្នាំ ២០១២។