សម្តេចអគ្គមហាសេនាបតីតេជោ ហ៊ុន សែន
បានផ្តល់ការណែនាំជាច្រើននាព្រឹកថ្ងៃទី ២ ខែ កុម្ភៈ ឆ្នាំ២០១២ ដល់មន្រ្តីនគរបាលជាតិឲ្យបង្កើនសមត្ថភាព
ដើម្បីទប់ស្កាត់ និងបង្ក្រាបបទល្មើសសំដៅរក្សាឲ្យគត់មត់នូវសន្តិសុខជាតិនៅក្នុងយុគសម័យ
ដែលប្រទេសជាតិកំពុងស្ថិតក្នុងចរន្តនៃសកលភាវូបនីយកម្ម។
នៅក្នុងពិធីប្រគល់សញ្ញាបត្រនិស្សិតនៃបណ្ឌិត្យសភា
នគរបាលកម្ពុជា នៅបណ្ឌិត្យសភានគរបាលកម្ពុជាក្នុងស្រុកកៀនស្វាយ ខេត្តកណ្តាល សម្តេចតេជោនាយរដ្ឋមន្ត្រីមានប្រសាសន៍ថា
បច្ចុប្បន្ននេះយើងកំពុងស្ថិតនៅក្នុងចរន្ត នៃសកលភាវូបនីយកម្ម
ដែលមានការវិវត្តន៍ឥត ឈប់ឈរ ហើយចរន្តនេះបានជះឥទ្ធិពលក្នុងលក្ខណៈជាវិជ្ជមានផង
និង អវិជ្ជមានផង មកលើការអភិ វឌ្ឍន៍សេដ្ឋកិច្ចសង្គម និង
ការរក្សាសន្តិសុខសណ្តាប់ធ្នាប់សាធារណៈ ក្នុងប្រទេសរបស់យើង។
សម្តេចតេជោថ្លែងបញ្ជាក់ថា
ជាការពិតភាពជឿនលឿន នៃបច្ចេកវិទ្យាព័ត៌មានបានបង្កលក្ខណៈ
ងាយស្រួលដល់សង្គមក្នុងប្រព័ន្ធទំនាក់ទំនង ការផ្សព្វផ្សាយ និង
ការទទួលបានព័ត៌មាន ប៉ុន្តែភាព ជឿនលឿននេះ
ក៏បានបង្កភាពងាយស្រួលដល់ពួកឧក្រិដ្ឋជនក្នុងការប្រើប្រាស់បច្ចេកវិទ្យាព័ត៌មាននេះ
ក្នុងលក្ខណៈអវិជ្ជមាន ដើម្បីអនុវត្តបទល្មើសនានា ដូចជាបញ្ហាភេរវកម្ម
ឧក្រិដ្ឋកម្មឆ្លងដែន បញ្ហាគ្រឿង ញៀន ការរត់ពន្ធជួញដូរមនុស្សជាដើម
ដែលក្នុងស្មារតីនេះក្រសួងមហាផ្ទៃត្រូវយកចិត្តទុកដាក់ក្នុងការ
តស៊ូប្រយុទ្ធប្រឆាំងចំពោះបញ្ហាទាំងអស់នេះឲ្យបានខ្លាំងក្លា
ដោយមិនទុកឲ្យកម្ពុជាក្លាយទៅជាទីសុខ សាន្តរបស់ឧក្រិដ្ឋជន និង ត្រូវបង្ក្រាបបណ្តាករណីដែលកើតមានឡើងឲ្យដល់ឬសគល់ចប់ចុងចប់ដើម
ប្រកបដោយជំហរម៉ឹងម៉ាត់ដាច់ខាត
ហើយក៏មិនត្រូវបណ្តោយទុកឲ្យមានអំពើអសកម្មណាមួយកើត
ឡើងនៅក្នុងជួរកងកម្លាំងនោះទេ។
ក្នុងគោលដៅទប់ស្កាត់ និង
បង្ក្រាបបទល្មើសសំដៅ រក្សាឲ្យគត់មត់នូវសន្តិសុខជាតិ សណ្តាប់ធ្នាប់
សង្គមក្នុងចរន្តនៃសកលភាវូបនីយកម្ម និង ការអភិវឌ្ឍន៍ សង្គមសេដ្ឋកិច្ច
ដែលមានការវិវត្តន៍ទៅមុខជារៀងរាល់ថ្ងៃ សម្តេចតេជោនាយករដ្ឋមន្ត្រីមានប្រសាសន៍ថា
ក្នុងទិស ដៅកសាងសមត្ថភាពធនធានមនុស្សក្នុងជួរនគរបាលជាតិ និង ការលើកកម្ពស់ប្រសិទ្ធភាពការងារ
របស់នគរបាលជាតិដែលរួមមានជាអាទិ៍ ត្រូវបន្តខិតខំពង្រឹងជំហរសមត្ថភាពនគរបាលជាតិគ្រប់ថ្នាក់គ្រប់ផ្នែក
ដែលជាកម្លាំងអនុវត្តច្បាប់ឲ្យមានជំនាញវិជ្ជាជីវៈខ្ពស់ ជាមួយនិងការគោរពឲ្យបានត្រឹម
ត្រូវនូវច្បាប់របស់រដ្ឋ។លើកកម្ពស់ការគោរពសិទ្ធិមនុស្ស ការការពារសិទ្ធិសេរីភាពរបស់ប្រជាពលរដ្ឋ
ដោយត្រូវគោរពម៉ឹងម៉ាត់ក្រមសីលធម៌វិជ្ជាជីវៈ ត្រូវមានភាពស្មោះត្រង់ក្នុងវិជ្ជាជីវៈរបស់ខ្លួន
ត្រូវប្រកាន់ ខ្ជាប់នូវវិន័យសេចក្តីថ្លៃថ្នូរ និង
ភាពស្អាតស្អំក្នុងការបំរើប្រជាពលរដ្ឋដោយស្មើភាព។ជាមួយគ្នានេះ
ត្រូវខិតខំពុះពាររួមគ្នាក្នុងការលុបបំបាត់បាតុភាពអសកម្មផ្សេងៗក្នុងជួរនគរបាល
ដើម្បីថែរក្សា និង លើកកម្ពស់ជាប្រចាំនូវជំនឿរបស់ប្រជាពលរដ្ឋមកលើកងកម្លាំងនគរបាលជាតិ
សំដៅធានាឲ្យមាន ការចូលរួម របស់ប្រជាពលរដ្ឋក្នុងការការពារសន្តិសុខ និង
សណ្តាប់ធ្នាប់សង្គម។
ក្នុងគោលដៅធានាឲ្យបាននូវប្រសិទ្ធភាពការងារ
សម្តេចតេជោផ្តល់ការណែនាំថា ត្រូវបន្តលើកកម្ពស់សមត្ថភាពជំនាញវិជ្ជាជីវៈ
ក្នុងជួរនគរបាលជាតិ ទាំងមូល ដោយធ្វើឲ្យប្រាកដថា កំលាំងនគរបាលទាំងអស់ត្រូវតែទទួលបានការបណ្តុះបណ្តាល
កសាងសមត្ថភាពទាំងក្នុងគ្រឹះស្ថានបណ្តុះបណ្តាលនានាដល់នគរបាល
ទាំងក្នុងការអនុវត្តការងារ ជាក់ស្តែង និង ការសិក្សាដកពិសោធន៍អំពីករណីនានា
ជាបទល្មើសឬហេតុការណ៍នានា ដែលបាន និង កំពុងកើតឡើងក្នុងសង្គមក្នុងតំបន់ និង
ក្នុងពិភពលោកនោះ។ជារួមយើងបង្កើតបាននូវប្រព័ន្ធ បណ្តុះបណ្តាល កសាងសមត្ថភាព
ធនធានមនុស្សសម្រាប់នគរបាលជាតិ តាមរយៈការបង្កើតឡើងនូវ បណ្ឌិត្យសភានគរបាល
សាលានគរបាលតាមភូមិភាគ និង សាលាជំនាញវិជ្ជាជីៈមួយចំនួនទៀតៀត
ដូច្នេះបញ្ហាដែលត្រូវយកចិត្តទូកដាក់ជាបន្តទៀតគឺការពង្រឹងគុណភាពនៃការបណ្តុះបណ្តាលទាំងក្នុង
បណ្ឌិត្យសភានគរបាលកម្ពុជា និង សាលានគរបាលផ្សេងៗទៀត និង
ការផ្គត់ផ្គង់ជីវភាពប្រចាំថ្ងៃឲ្យ បានគ្រប់គ្រាន់ និង សមស្រប។
សម្តេចនាយករដ្ឋមន្ត្រីថ្លែងថា
ការជ្រើសរើសសិក្ខាកាមឲ្យចូលរួមក្នុងវគ្គបណ្តុះបណ្តាលនានា នោះ
នគរបាលទាំងអស់ក្នុងមុខតំណែងត្រូវទទួលបានការបណ្តុះបណ្តាលមួយច្បាស់លាស់ សំដៅ
លើកកម្ពស់ជំនាញវិជ្ជាជីវៈ ដែលខ្លួនកំពុងអនុវត្ត ដែលក្នុងន័យនេះ
អគ្គស្នងការនគរបាលជាតិត្រូវ
សហការជាមួយគ្រឹះស្ថានបណ្តុះបណ្តាលនានារបស់នគរបាលជាតិ
សំដៅពិនិត្យវាយតម្លៃឡើងវិញនូវ មន្ត្រីនគរបាលតាមអង្គភាពនិមួយៗ
ដែលមិនទាន់ទទួលបានការបណ្តុះបណ្តាល ដើម្បីរៀបចំផែនការ
ចាត់តាំងបញ្ជូនមន្ត្រីទាំងនោះឲ្យចូលរួមក្នុងវគ្គបណ្តុះបណ្តាលតាមវិធីសាស្ត្ររៀនសូត្រផង
ធ្វើការផង ឬការបណ្តុះបណ្តាលពេញម៉ោងឬវគ្គតម្រង់ទិសខ្លី។
សម្តេចតេជោថ្លែងបញ្ជាក់ថា ការបណ្តុះបណ្តាលកសាង
សមត្ថភាពនគរបាលគឺជាកិច្ចការដ៏មានសារៈសំខាន់ តែបញ្ហាដែលមានសារៈសំខាន់ជាងទៀតគឺ
ការប្រើប្រាស់សមត្ថភាពជំនាញ ដែលបានទទួលការបណ្តុះបណ្តាល ប្រកបដោយភាពស្មោះត្រង់
និង មានមនសិការវិជ្ជាជីវៈខ្ពស់បំផុត ដើម្បីការពារ និង
បំរើផលប្រយោជន៍របស់ប្រជាពលរដ្ឋដោយស្មើភាព និង
បំរើផលប្រយោជន៍សង្គមទាំងមូលប្រកបដោយយុត្តិធម៌។
សម្តេចតេជោនាយករដ្ឋមន្រ្តីមានប្រសាសន៍លើកឡើងថា
ចំពោះមុខនេះបញ្ហាប្រឈម ដែលគួរឲ្យព្រួយបារម្ភអំពី សន្តិសុខ និង
សណ្តាប់ធ្នាប់សង្គមគឺបញ្ហាគ្រោះថ្នាក់ចរាចរ គ្រោះថ្នាក់នានាក្នុងសង្គម និង
បញ្ហាគ្រឿង ញៀន ដែលបញ្ហាទាំងនេះបានធ្វើឲ្យបាត់បង់ជីវិត
ទ្រព្យសម្បត្តិប្រជាពលរដ្ឋ ព្រមទាំងសមត្ថភាព និង
ធនធានសង្គមយ៉ាងច្រើន។ដើម្បីដោះស្រាយបញ្ហាប្រឈមនេះ ក្រសួងស្ថាប័ន
អាជ្ញាធរពាក់ព័ន្ធ កង កម្លាំងនគរបាលជាតិ និង កម្លាំងអនុវត្តច្បាប់នានា
ត្រូវសហការគ្នាបង្កើនវិធានការអប់រំ ណែនាំអំពី វិធានការ បង្ការទប់ស្កាត់គ្រោះថ្នាក់ក្នុងសង្គម
គ្រោះថ្នាក់ចរាចរ ផលវិបាកនៃគ្រឿងញៀន និង ត្រូវ
ពង្រឹងការអនុវត្តច្បាប់ឲ្យបានម៉ឹងម៉ាត់ជាប់ជាប្រចាំ គ្រប់ទីកន្លែង។
សម្តេចតេជោមានប្រសាសន៍បញ្ជាក់បន្ថែមថា
ដើម្បីលើកកម្ពស់ការផ្តល់សេវានគរបាលជាតិឲ្យបាន ២៤ ម៉ោងលើ ២៤ ម៉ោង
និងការចូលរួមពីប្រជា ពលរដ្ឋក្នុងការរក្សាសន្តិសុខ
សណ្តាប់ធ្នាប់សាធារណៈនៅមូលដ្ឋាន គ្រប់គ្រសួង ស្ថាប័ន អាជ្ញាធរគ្រប់
លំដាប់ថ្នាក់ទាំងអស់ ត្រូវបន្តជំរុញការអនុវត្តគោលនយោបាយភូមិ
ឃុំមានសុវត្ថិភាពឲ្យបានជាប់ជាប្រ ចាំ នៅគ្រប់ភូមិ ឃុំ
សង្កាត់ទូទាំងប្រទេស ស្រមតាមស្មារតី និង ភារកិច្ចថែរក្សាសន្តិសុខ
សណ្តាប់ធ្នាប់ សាធារណៈជូនជាតិ និង ប្រជាពលរដ្ឋនោះ។
ជាមួយនឹងប្រសាសន៍ណែនាំខាងលើនេះ សម្តេចតេជោនាយករដ្ឋមន្ត្រី ហ៊ុន សែន
ក៏បានប្រកាសចេញលុយផ្ទាល់ខ្លួនសម្តេច ដើម្បីកសាងអគារសាលប្រជុំ នៅបណ្ឌិត្យសភានគរបាលកម្ពុជា
ដែលមានតម្លៃរហូតដល់ ៤៧ ម៉ឺនដុល្លារ។ អគារសាលប្រជុំនោះ ដាក់ឈ្មោះថា
"សម្តេចអគ្គមហាធម្មពោធិសាល ជា
ស៊ីម" ដើម្បីឧទ្ទិសដល់អ្នកបង្កើតនគរបាលលើកដំបូង នោះគឺសម្តេច ជា ស៊ីម
អតីតរដ្ឋមន្ត្រីក្រសួងមហាផ្ទៃសម័យសាធារណៈរដ្ឋប្រជាមានិតកម្ពុជា
ជាអ្នកបង្កើតនគរបាលជាតិ។
នៅក្នុងពិធី ប្រគល់សញ្ញាបត្រនិស្សិតនៃបណ្ឌិត្យសភា
នគរបាលកម្ពុជា នៅបណ្ឌិត្យសភានគរបាលកម្ពុជានោះដែរ សម្តេចអគ្គមហាសេនាបតីតេជោ ហ៊ុន សែន ក៏បានមានប្រសាសន៍រំលឹកឡើងវិញអំពីព្រឹត្តិការណ៍នៃការផ្ទុះអាវុធនា
ថ្ងៃទី ៥-៦ កក្កដា ឆ្នាំ ១៩៩៧ ដោយសម្តេចតេជោ
បានបដិសេធថា ព្រឹត្តិការណ៍ ៥-៦ កក្កដា ឆ្នាំ ១៩៩៧ មិនមែនជាការធ្វើរដ្ឋប្រហារទម្លាក់សម្តេចក្រុមព្រះ
នរោត្តម រណឫទ្ធិ
ពីនាយករដ្ឋមន្រ្តីទី១ នោះឡើយ។
នៅចំពោះមុខវត្តមានក្នុងពិធីរបស់ឯកឧត្តម
សេរី កុសល ទេសរដ្ឋមន្រ្តី
អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ ដែលជាអតីតមេទ័ពមួយរូប
នៃភាគីប្រដាប់អាវុធគណបក្សហ្វ៊ុនស៊ីនប៉ិច ក្នុងអំឡុង ថ្ងៃ៥-៦ កក្កដា
ឆ្នាំ ១៩៩៧ ក្រៅពីឯកឧត្តម ញឹក ប៊ុនឆៃ ឧបនាយករដ្ឋមន្រ្តី ឯកឧត្តម លី ធុច ដែលជាសាក្សីរស់ សម្តេចតេជោនាយករដ្ឋមន្រ្តី
បានមានប្រសាសន៍ថា «កុំមកចោទខ្ញុំថាធ្វើរដ្ឋប្រហារឲ្យសោះ
អារឿងហ្នឹងមួយ ឥឡូវមើលរូបភាព រូបភាពនៅបានទាំងអស់ ព្រោះពួកហ្នឹងថត មិនដឹងជាយ៉ាងម៉េចរូបធ្លាក់
ដល់អញ្ចឹងទៅយើងមើលរូបភាពដែលគេអង្គុយដូចជា បង គៀង វ៉ាង ហើយហៅបងគៀងវ៉ាង
មកសួរមើល បញ្ចាំងឲ្យមើលហើយប្រាប់ទៅទៀត»។
សម្តេចតេជោបញ្ជាក់ទៀតថា
«ថ្ងៃហ្នឹង បងគៀងវ៉ាង ពាក់ខៀវអាវទៅអង្គុយលើឡាន ទំនងនោះមិនមែនគេដេញវាយទេ
គឺបញ្ជាឲ្យវាយគេ ហើយ ហ៊ូ សុខ
គេបញ្ជាអាយកូមម្ខាងទូរស័ព្ទម្ខាង សម្បើមណាស់ ហើយប្រសិនបើថ្ងៃហ្នឹង ខ្ញុំបញ្ជាឲ្យវាយគឺគ្រប់
ខ្ញុំត្រូវការ១៥នាទីទេ អត់វាយយូរទេ ព្រោះប្រមូលផ្តុំទីតាំងបែបត្រង់ហ្នុងអត់មានអីយូរទេ»។
សម្តេចតេជោនាយករដ្ឋមន្ត្រី ក៏បានលើកឡើងថា
ការសម្រេចចិត្តរបស់សម្តេច វ៉ៃបកលើកងកម្លាំងប្រដាប់អាវុធគណបក្សហ្វ៊ុនស៊ិនប៉ិច
ដែលមានសម្តេចក្រុមព្រះ នរោត្តម រណឫទ្ធិ
ជាប្រធាន ដោយសារតែហ្វ៊ុនស៊ិនប៉ិច បាននាំកងទ័ពខ្មែរក្រហមពីសំឡូត
និងតាសាញ់ ចូលភ្នំពេញ។ សម្តេចតេជោ បានឲ្យដឹងថា
គ្រាន់តែពីរកន្លែង នៅដំណាក់សម្តេចក្រុមព្រះ ផ្លូវសម្តេចប៉ាន
និងនៅទីស្នាក់ការគណបក្សហ្វ៊ុនស៊ិនប៉ិច នៅគល់ស្ពានជ្រោយចង្វារ
ក្នុងរាជធានីភ្នំពេញ មានកងទ័ពខ្មែរក្រហមប្រមាណ ២៧០ នាក់។ ក្រៅពីនោះ
នៅមានកងទ័ពខ្មែរក្រហម នៅជាមួយលោក ញឹក ប៊ុនឆៃ
និងនៅកន្លែងដទៃជាច្រើនទៀត។
សម្តេចតេជោ បានបញ្ជាក់ថា
"អីចឹងគ្រាន់តែពីរកន្លែងហ្នឹង កងទ័ពខ្មែរក្រហមឡើងដល់ ២៧០ នាក់ ទៅហើយ។
អីចឹងនៅជាមួយឆៃ (ញឹក ប៊ុនឆៃ) ប៉ុន្មានទៀត? នៅវត្តផ្នៀតប៉ុន្មានទៀត?
នៅស្អីប៉ុន្មានទៀត? មិនមែនរឿងលេងទេ លេងម្ខាងធ្វើរដ្ឋាភិបាល ម្ខាងទៅធ្វើអ៊ីចឹង?។
ឥឡូវរឿងវាហួសទៅហើយ ក៏ប៉ុន្តែសុំឲ្យអ្នកខ្លះ ត្រូវប្រយ័ត្នប្រយែងដែរ
កុំចេះតែនិយាយ។ តែនិយាយ...គេ (សម្តេចតេជោ) មានឯកសារគ្រប់គ្រាន់
ដើម្បីបញ្ជាក់ត្រឡប់ទៅវិញ ហើយរឿងទាំងអស់ហ្នឹង
វាទាក់ទងនឹងអតីតកាលនៃសន្តិសុខជាតិ បានជាខ្ញុំត្រូវនិយាយបន្តិចទៅចុះ"៕