ថ្នាក់ដឹកនាំគណបក្ស សម រង្ស៊ី
បានថ្លែងប្រមាថយ៉ាងខ្លាំងទៅលើអ្នកតំណាងរាស្ត្រ និង
សមាជិកក្រុមប្រឹក្សាឃុំ សង្កាត់១៧៩រូប ក្រោយពីពួកគេបោះឆ្នោតគាំទ្រគណបក្សប្រជាជនកម្ពុជាកាលពីពេលថ្មីៗនេះ
ដោយគណបក្សសម រង្ស៊ី បានហៅអ្នកទាំងអស់នោះថា ជាស្លឹកឈើងាប់
ដែលពីមុនគណបក្ស សម រង្ស៊ី ធ្លាប់បានចាត់ទុកថា
ជាដុំមាសដ៏មានតម្លៃបំផុត ខណៈពេលដែលគេទទួលបានចំណេញផលប្រយោជន៍ខាង
នយោបាយ។
ប៉ុន្តែ បន្ទាប់ពីលទ្ធផលបណ្តោះអាសន្ន
នៃការបោះឆ្នោតជ្រើសតាំងសមាជិកព្រឹទ្ធសភា បានបង្ហាញ
ឱ្យដឹងអំពីការបាត់សំឡេងរបស់សមាជិកគណបក្ស សម រង្ស៊ី
រហូតដល់ចំនួន១៧៩នាក់ ដែលជាអង្គបោះ ឆ្នោត
និងជាជនបង្គោលដ៏មានឥទ្ធិពលនោះមក ត្រូវបានលោក យឹម សុវណ្ណ
អ្នកតំណាងរាស្ត្រ និងជាអ្នកនាំ ពាក្យគណបក្សប្រឆាំង ថ្លែងប្រមាថថា អ្នកទាំងអស់នោះ
គឺជាស្លឹកឈើងាប់ទៅវិញ។
ប្រតិកម្មរបស់លោក យឹម សុវណ្ណ បែបនេះ
ត្រូវបានចុះផ្សាយតាមរយៈសារព័ត៌មាន ខេមបូឌា ដេលី កាលពីថ្ងៃទី១ ខែ កុម្ភៈ
ឆ្នាំ ២០១២ ដោយ លោក យឹម សុវណ្ណ
បានហៅអ្នកមិនគាំទ្រខ្លួនប្រដូចទៅនឹងជនក្បត់ ក្នុងន័យប្រមាថថា « លោកមិនខ្លាចរអានឹងភាពមិនស្មោះត្រង់របស់សមាជិកមួយចំនួននោះឡើយ
និងបាននិយាយសំដៅដល់អ្នកដែលបោះឆ្នោតគាំទ្រគណបក្សប្រជាជនកម្ពុជាថា
ជាស្លឹកឈើងាប់ ហើយថែមទាំងបាននិយាយចំអកមកលើសម្តេចតេជោ ហ៊ុន សែន ថា
អរគុណលោកហ៊ុន សែន ចំពោះការប្រមូលយកស្លឹកឈើងាប់ទាំងនោះ»។
ចំណែកលោកសម រង្ស៊ី ដែលកំពុងនីរទេសខ្លួននៅឯក្រៅប្រទេស តាមរយៈវីដេអូ
ខន់ហ្វើរិន មកកាន់ទីស្នាក់ការគណបក្សសម រង្ស៊ី កាលពីល្ងាចថ្ងៃទី១ ខែ
កុម្ភៈ ឆ្នាំ ២០១២នេះ
ក៏បានធ្វើការចោទប្រកាន់យ៉ាងអយុត្តិធម៌ផងដែរមកលើសមាជិកមួយចំនួនដែលលាលែងចេញពីបក្ស
និងមន្ត្រីដែលបានបោះឆ្នោតជូនគណ បក្សប្រជាជនកម្ពុជា ថា ជាអ្នកលក់ខ្លួន
ដោយសារតែគាត់អត់លុយ និងត្រូវបានគេគាបសង្កត់។
នេះ គឺជាសារប្រមាថផ្ទួនៗ ម្តងហើយម្តងទៀត បន្ទាប់ពីលោកសម រង្ស៊ី
បានបង្ខំឱ្យសមាជិក សមាជិកាក្រុមប្រឹក្សាឃុំ
សង្កាត់ទូទាំងប្រទេសនៅមួយថ្ងៃមុនបោះឆ្នោតជ្រើសតាំងសមាជិកព្រឹទ្ធសភាត្រូវតែ
បោះឆ្នោតឱ្យគណបក្សសម រង្ស៊ី និងការគាបសង្កត់ បំបិទសិទ្ធិមនុស្សជាសកល តាមរយៈការតម្រូវឱ្យសមាជិក ទាំងនោះ
ត្រូវតែដកហូតទូរស័ព្ទដៃ ដើម្បីបង្ហាញពីភាពស្មោះត្រង់ចំពោះបក្ស។
ទង្វើនោះ គឺត្រូវបានទទួលរងនូវការស្តីបន្ទោសយ៉ាងខ្លាំងពីសាធារណជន
ដោយគេបានចាត់ទុកថា វាជាបទបញ្ជាផ្តាច់ការ ដែលធ្លាប់ត្រូវបានប្រើនៅក្នុងរបបប៉ុល ពត ។
អ្នកតាមដានស្ថានការណ៍នយោបាយនៅកម្ពុជា
គេបានយល់ឃើញថា ការបង្ហាញនូវឥរិយាបថពីការសរសើរ និងលើកតម្កើង
មកជាបន្ទាបបន្ថោកតម្លៃមនុស្សបែបនេះ បានធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់មន្ត្រីទាំង១៧៩នាក់នោះយ៉ាងខ្លាំង
បន្ទាប់ពីបក្សសម រង្ស៊ី អស់ឱកាសកេងចំណេញពីពួកគេ បានតទៅទៀត។ ការពិត សមាជិកសភា
ក៏ដូចជាសមាជិកក្រុមប្រឹក្សាឃុំ សង្កាត់ទាំង១៧៩ រូប
គឺជាមន្ត្រីដែលគ្មានកំហុសក្នុងការសំរេចចិត្តនោះឡើយ ពួកគាត់ទាំងនោះ
គឺពោរពេញទៅដោយឥស្សរភាព មាននូវមនសិការជាតិខ្ពស់
ស្គាល់អំពីសច្ចភាពនៃការអភិវឌ្ឍរបស់គណបក្សប្រជាជនកម្ពុជា
ក៏ដូចជាស្គាល់ច្បាស់អំពីតំលៃនៃសន្តិភាព។ ប៉ុន្តែ ពួកគាត់ធ្លាប់បានរងគ្រោះដោយបក្សប្រឆាំងគាបសង្កត់ ហើយចុងក្រោយនេះមិនអាចទ្រាំទ្រ
និងសហការជាមួយបក្សប្រឆាំងតទៅទៀតបាន
ទើបនាំគ្នាធ្វើការសំរេចចិត្តផ្លាស់ប្តូរជំហរនយោបាយដោយភាពអង់អាចដាច់ខាតថា
ត្រូវតែបោះឆ្នោតជូនគណបក្សប្រជាជនកម្ពុជា
ទើបគេចផុតពីនឹមត្រួតត្រា និងការបង្ខិតបង្ខំទាំងនោះ។
ការចេញមកបដិសេធអំពីគុណបំណាច់របស់មន្ត្រីបក្សដែលធ្លាប់គាំទ្រខ្លួន
នឹងទាត់ចោលនូវតម្លៃរបស់មនុស្ស
គឺជាការបើកយុទ្ធនាការឃោសនាអំពើអាក្រក់របស់ខ្លួនឯងដោយថ្នាក់ដឹកនាំគណបក្សសម
រង្ស៊ី និងអាចនិយាយបានថា ជាការត្រៀមរៀបចំខ្លួនដើម្បីទទួលយកនូវទណ្ឌកម្មត្រឡប់វិញ។
ឧបាយកលរបស់ថ្នាក់ដឹកនាំគណបក្សប្រឆាំងមួយចំនួន គឺគេអាចសន្និដ្ឋានបានថា
គ្រប់ឥរិយាបថ ដេក ដើរ ឈរអង្គុយ គិតតែពីការគាប
ចំរាញ់យកផលប្រយោជន៍ចំពោះមុខ ហើយនៅពេលគេដើរចេញ
ក៏ចាត់ទុកអ្នកគ្រប់គ្នានោះដូចជាកាកអំពៅដែលអស់ទឹក
និងគ្មានរស់ជាតិផ្អែម។
របៀបដឹកនាំរបស់មេបក្ស
និងតំណាងរាស្ត្រមួយចំនួន ក្នុងគណបក្សប្រឆាំង
ដែលមិនមាននូវការប្រមូលផ្តុំ មិនមានការកែទម្រង់
និងមានលក្ខណៈសម្បត្តិជាមេដឹកនាំ ត្រូវបានគេសង័្សយថា ផ្ទៃក្នុងគណបក្សប្រឆាំងមួយនេះកំពុងបែកបាក់ដ៏ធ្ងន់ធ្ងរ
និងការមិនជឿទុកចិត្តគ្នា។ ដោយឡែកការជួបនូវវិបត្តិដ៏ធំ
ហើយថ្នាក់ដឹកនាំក្នុងបក្សអសមត្ថភាពក្នុងការដោះស្រាយ
គឺប្រៀបបានដូចជាអ្នកកាន់ចង្កូតនយោបាយមិនស្គាល់ទិសដៅ វង្វេងផ្លូវ
ហើយអាចនឹងដឹកនាំអ្នកជិះក្នុងនាវាទាំងអស់ជួបនឹងមហាព្យុះកំណាច
បោកបក់ លិចលុងកណ្តាលមហាសមុទ្រដោយជៀសមិនផុត
និងគ្មានមធ្យោបាយសង្គ្រោះទាន់ឡើយ។
ដូច្នេះ ជនដែលបានគេចចេញទាន់ពេលវេលាពីនាវា
ដែលបញ្ជាចង្កូតដោយមេបក្សរមឹលគុណ នោះ នឹងជួបនូវសំណាង និងជោគវាសនាល្អ
ផុតពីគ្រោះភ័យអន្តរាយ។ ក្នុងន័យនេះ គឺចង់បង្ហាញថា សមាជិកទាំង១៧៩រូបនោះ មានឱកាសគ្រប់គ្រាន់ក្នុងការចូលរួមចំណែកជាមួយរាជរដ្ឋាភិបាល
និយាយដោយឡែក និងនិយាយជារួម គឺបានចូលរួមជាមួយគណបក្សប្រជាជនកម្ពុជា
ក្នុងការលើកកម្ពស់ តម្លៃ កិត្តិយស និងសេចក្តីថ្លៃថ្នូរបស់មនុស្ស
និងការអភិវឌ្ឍន៍ដោយផ្ទាល់ជាមួយប្រជាពលរដ្ឋដើម្បីការរីកចំរើនរុងរឿងសំរាប់ជីវភាពគ្រួសារ
និងសង្គមជាតិទាំងមូល។
មន្ត្រីគណបក្សសម រង្ស៊ី
ទាំង១៧៩រូប មិនមែនជាជនដែលមានកំហុស ឬជាស្លឹកឈើងាប់ ដូចការប្រមាថ
មាក់ងាយពីមេដឹកនាំគណបក្សប្រឆាំងបានលើកឡើងនោះទេ ផ្ទុយទៅវិញពួកគាត់ គឺជាគ្រាប់ពេជ្រដ៏មានតម្លៃកាត់ថ្លៃមិនបាន
ដែលបានឆ្លងកាត់ការពិចារណាល្អិតល្អន់បំផុត
និងជឿជាក់មកលើគណបក្សប្រជាជនកម្ពុជា ទើបបានជាសំរេចចិត្តថា
ត្រូវតែបោះឆ្នោតគាំទ្រដោយខានមិនបាន ។
សំឡេងឆ្នោតគាំទ្រជិត២០០សំឡេង
ដែលបានមកពីគណបក្ស សម រង្ស៊ី
និងការកើនសំឡេងបន្ថែមចំនួន៧៩៧សំឡេងរបស់គណបក្សប្រជាជនកម្ពុជា
បន្ថែមពីលើការរក្សាបាននូវសំឡេងឆ្នោត១០០ភាគរយពីសមាជិករបស់ខ្លួនដែលបានបោះឆ្នោតគាំទ្រ
គឺជាការឈ្នះដាច់ជាង៨១ភាគរយ ។ សំរាប់ការបោះឆ្នោត ព្រឹទ្ធ
សភានីតិកាលទី៣នេះ គណបក្សប្រជាជនកម្ពុជាកើនអាសនៈ
ដោយទទួលបានចំនួន៤៦ អាសនៈ ចំណែកគណបក្សសម រង្ស៊ី បានទទួល១១អាសនៈ
នេះបើតាមការគណនាតាមរូបមន្តគណិតវិទ្យា។
សមាជិកគណបក្ស សម រង្ស៊ី
ដែលចាកចេញពីបក្សដ៏ច្រើនភ្លូកទឹកភ្លូកដី
គឺជាសញ្ញាវិជ្ជមានឈានទៅរកការសំរេចបាននូវជោគជ័យបន្ថែមទៀត
សំរាប់ការរំពឹងទុករបស់គណបក្សប្រជាជនកម្ពុជានាឱកាសបោះឆ្នោតជ្រើសរើសក្រុមប្រឹក្សាឃុំ
សង្កាត់ នាខែមិថុនា ឆ្នាំ ២០១២ខាងមុខ។
មិនដូចការបោកប្រាស់សាធារណមតិដោយ
លោក សម រង្ស៊ី និងអ្នកនាំពាក្យរបស់ខ្លួននោះទេ។ ការពិត សមាជិកគណបក្សសម រង្ស៊ី
ដែលបានលាលែងពីបក្ស និងបានបោះឆ្នោតជូនគណបក្សប្រជាជនកម្ពុជា
គឺពួកគាត់មិនត្រូវបានសម្លុត បង្ខិតបង្ខំ
ឬក៏ត្រូវបានទិញទឹកចិត្តដោយលុយកាក់នោះឡើយ ពីព្រោះថ្នាក់ដឹកនាំ របស់គណបក្សប្រជាជនកម្ពុជាជាច្រើនរូប
ធ្លាប់បានចេញមកបដិសេធនូវព័ត៌មានបំភ្លើសទាំងនោះ ជាច្រើនដងមក ហើយ
ជាមួយនឹងការបញ្ជាក់ថា មន្ត្រីរបស់គណបក្សសម រង្ស៊ី
ដែលមានភក្តីភាពជាមួយគណបក្សប្រជាជន គឺជា មនុស្ស មិនមែនជាទំនិញ
ឬសត្វធាតុសំរាប់ការទិញដូរដូចអ្វីដែលគេបានចោទប្រកាន់ទេ។
ជារួម មេបក្ស សម រង្ស៊ី
ក៏ដូចជាមន្ត្រីអ្នកនាំពាក្យគណបក្សប្រឆាំងមួយនេះ ហាក់ដូចជាបាន
និងកំពុងប្រកាសខ្លួនធ្វើជាសត្រូវជាមួយនឹងប្រជាពលរដ្ឋរាប់សែន
រាប់លាននាក់ ដែលបានបោះឆ្នោតជូនគណបក្សប្រជាជនកម្ពុជា។
សិទ្ធិសេរីភាពរបស់មន្ត្រីគណបក្សសម រង្ស៊ី
ដែលត្រូវបានគេប្រដូចជាស្លឹកឈើងាប់ គឺត្រូវបានការពារដោយច្បាប់រដ្ឋធម្មនុញ្ញ
ដែលបានចែងថា
ពលរដ្ឋខ្មែរគ្រប់រូបមានសិទ្ធិគាំទ្រនយោបាយទៅតាមឆន្ទៈរបស់ខ្លួនជាម្ចាស់អំណាច
ហើយពួកគេមិនអាចត្រូវបានជនណាមួយប្រមាថ ឬដកហូតសិទ្ធិនោះបានឡើយ។
ម៉្យាងទៀត មន្ត្រីទាំងនោះមិនអាចរងនូវការដាក់គំនាបណាមួយ ថា ពួកគាត់ត្រូវតែស្មោះត្រង់អស់មួយជីវិតជាមួយជនផ្តាច់ការមួយចំនួនក្នុងគណបក្សសម
រង្ស៊ី ជារៀងរហូតនោះឡើយ។
ដូច្នេះ
ការប្រដូចមន្ត្រីទាំង១៧៩រូប « ជាស្លឹកឈើងាប់ » គឺជាការមើលងាយមនុស្ស
ពីសំណាក់អ្នកតំណាងរាស្ត្របក្សប្រឆាំង ដែលទង្វើនេះ
គឺជាសារសំរាប់ជូនពលរដ្ឋខ្មែរម្ចាស់ឆ្នោតពិចារណាសំរាប់ការបោះឆ្នោតនាពេលខាងមុខបន្តទៀត៕
ពូន សំរេច