ប្រសាសន៍របស់
ឯកឧត្តម សុខ អាន ឧបនាយករដ្ឋមន្ត្រី
និងជាប្រធានក្រុមការងារនៃរាជរដ្ឋាភិបាលទទួលបន្ទុកកិច្ចការសាលាក្តី
ខ្មែរក្រហម
ស្តីពីការប្រកាសសាលដីកាស្ថាពររបស់អង្គជំនុំជម្រះតុលាការកំពូល
នៃអ.វ.ត.ក. ក្នុងសំណុំរឿង កាំង ហ្កេកអ៊ាវ ហៅឌុច
ថ្ងៃទី ៣ ខែកុម្ភៈ ឆ្នាំ ២០១២
ថ្ងៃនេះ
គឺជាថ្ងៃប្រវត្តិសាស្ត្រសម្រាប់ប្រទេសជាតិរបស់យើង
និងសម្រាប់មនុស្សជាតិទាំងមូល។ ចាប់តាំង
ពីរបបខ្មែរក្រហមត្រូវបានផ្តួលរំលំនៅថ្ងៃទី៧ ខែមករា ឆ្នាំ ១៩៧៩
រួចមក គឺអស់រយៈពេល ៣៣ ឆ្នាំមកហើយ
គឺយើងបានខិតខំកសាងប្រទេសជាតិយើងឡើងវិញ ពោលគឺ
ដៃម្ខាងទប់ស្កាត់ការវិលត្រឡប់មកវិញនៃរបបប្រល័យពូជសាសន៍ ប៉ុល ពត
ហើយដៃម្ខាងទៀត គឺកសាងប្រទេសជាតិយើងឡើងវិញ។ ទន្ទឹមនឹងនេះ
យើងក៏មិនបានភ្លេចនូវតម្រូវការចាំបាច់
នៅក្នុងការស្វែងរកយុត្តិធម៌ចំពោះឧក្រិដ្ឋកម្ម
ដែលបានប្រព្រឹត្តឡើងក្នុងអំឡុងសម័យកាល ៣ ឆ្នាំ ៨ ខែ និង ២០ ថ្ងៃ
សម្រាប់ជនរងគ្រោះផង មិនភ្លេចការចងចាំដល់ជនរងគ្រោះ
និងមិនភ្លេចការធ្វើឲ្យប្រាកដថា សោកនាដកម្មបែបនេះ
នឹងមិនអាចវិលត្រឡប់មកវិញឡើយ។
ជនរងគ្រោះ
និងជនដៃដល់ជាច្រើននៃឧក្រិដ្ឋកម្មទាំងនេះ
មិនបានរស់ទាន់ការប្រកាសសាលដីកានេះទេ។ យើងទាំងអស់គ្នា ជនរងគ្រោះ
និងសាច់ញាតិរបស់ជនរងគ្រោះដែលបានរស់រានមានជីវិត និងប្រជាជន៧០%ដែល
បានចាប់កំណើតចាប់តាំងពីឆ្នាំ ១៩៧៩ បាន
និងកំពុងទន្ទឹងរង់ចាំសាលដីកាថ្ងៃនេះយ៉ាងអន្ទះសា។ ទម្រាំមកដល់
ពេលចេញសាលដីកាស្ថាពរលើសំណុំរឿង ០០១ ប្រឆាំង កាំង ហ្កេកអ៊ាវ ហៅឌុច
អតីតប្រធានមន្ទីរស-២១ ដោយ អង្គជំនុំជម្រះតុលាការកំពូលនៅថ្ងៃនេះ
គឺត្រូវធ្វើដំណើរឆ្លងកាត់នៅលើផ្លូវដ៏វែងឆ្ងាយ និងយ៉ាងលំបាកលំបិន។
នេះគឺជាភាពជោគជ័យមួយ។
នៅ
ប្រទេសកម្ពុជាយើងនេះ
សាលាក្តីប្រភេទថ្មីមួយត្រូវបានបង្កើតឡើងដែលមិនធ្លាប់មានក្នុង
ប្រវត្តិយុត្តិធម៌ អន្តរជាតិ
ពោលគឺតុលាការជាតិដែលមានកិច្ចសហប្រតិបត្តិការ ការចូលរួម
និងជួយឧបត្ថម្ភពីអង្គការសហប្រជាជាតិ ពីសហគមន៍អន្តរជាតិ។
អ.វ.ត.កបានប្រព្រឹត្តទៅបានយ៉ាងត្រឹមត្រូវតាមនីតិវិធីច្បាប់ជាធរ
មានទាំងអស់ និងបានជំនុំ ជម្រះសេចក្តីដោយយុត្តិធម៌ក្នុងសំណុំរឿង០០១
ទៅលើប្រធានគុក ស-២១ ដែលគេដឹងឮគ្រប់ៗគ្នាពីបទឧក្រិដ្ឋកម្ម
ប្រឆាំងនឹងមនុស្សជាតិ និងឧក្រិដ្ឋកម្មសង្គ្រាម។
ប្រជាជនជាង១០ម៉ឺននាក់បានមកទស្សនាសាលាក្តីនេះដោយផ្ទាល់
ខណៈដែលមានប្រជាជនរាប់លាននាក់ផ្សេងទៀត តាមដានដំណើរការសវនាការ
តាមរយៈការផ្សាយបន្តផ្ទាល់តាមវិទ្យុ និងទូរទស្សន៍។ អ.វ.ត.ក
អនុញ្ញាតឲ្យជនរងគ្រោះចូលរួមក្នុងឋានៈជាដើមបណ្តឹងរដ្ឋប្បវេណីដែលមិន
ធ្លាប់មាន ពីមុនមក។
ថ្ងៃនេះ
ចៅក្រមទាំង ៧
រូបនៃអង្គជំនុំជម្រះតុលាការកំពូលបានឈានដល់សេចក្តីសម្រេចជាស្ថាពរ
និងបិទ ផ្លូវតវ៉ាចំពោះសំណុំរឿងដ៏សំខាន់នេះ។ ខ្ញុំសូមឆ្លៀតឱកាសនេះ
សម្តែងនូវការកោតសរសើរដ៏ជ្រៀលជ្រៅជូនចំពោះ លោក លោកស្រី
នាងកញ្ញាទាំងអស់ ដែលបានចូលរួមចំណែកបំពេញកិច្ចការទាំងនេះ ពោលគឺលោក
និងលោកស្រី ចៅក្រម សហព្រះរាជអាជ្ញា
មេធាវីតំណាងដើមបណ្តឹងរដ្ឋប្បវេណី ក៏ដូចមេធាវីការពារក្តី
មន្ត្រីតុលាការ និងបុគ្គលិក ទាំងអស់ គឺទាំងជាតិ និងអន្តរជាតិ
ព្រមទាំងប្រជាជន និងរដ្ឋាភិបាលនានា ជាអាទិ៍ គឺមិត្តរបស់ អ.វ.ត.ក
ដែលបាន ផ្តល់ថវិកាសម្រាប់ដំណើរការសាលាក្តីនេះ។
ហើយ
ជាទីបញ្ចប់នេះ ខ្ញុំសូមនិយាយទៅកាន់អ្នករស់រានមានជីវិតពីគុក ស-២១
និងបងប្អូន ព្រមទាំងមិត្ត ភក្តិនៃអ្នកដែលត្រូវបានឃុំខ្លួន
មិនមានភ័ព្វសំណាងរស់រានមានជីវិតរហូតមកដល់សព្វថ្ងៃ
ដើម្បីឃើញពីការកាត់ទោសនេះឲ្យបានជ្រាបថា
ថ្ងៃនេះប្រជាជនកម្ពុជានិងពិភពលោកទាំងមូល
សូមរំលឹកដល់អ្នកដែលបានបាត់បង់ជីវិតហើយសង្ឃឹមថា
ការសម្រេចសេចក្តីចុងក្រោយរបស់អង្គជំនុំជម្រះតុលាការកំពូលនៃ អ.វ.ត.ក
របស់យើងនេះពិតជា បានរំលែកនូវការឈឺចាប់ និងការសោកសង្រេង
និងទុក្ខលំបាកវេទនាដែលជនរងគ្រោះបានឆ្លងកាត់ជាក់ជាមិនខាន។