សន្ទរកថា ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី
រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានកាយរឹទ្ធិជាតិកម្ពុជា (កជក)
ក្នុងពិធីបំពាក់កន្សែងជូននវកាយរឹទ្ធិ នៃកាយរឹទ្ធិជាតិកម្ពុជាខេត្តក្រចេះ
ថ្ងៃទី២០ ខែកុម្ភៈ ឆ្នាំ២០១២
- សូមក្រាបថ្វាយបង្គំព្រះថេរានុត្ថេរៈគ្រប់ព្រះអង្គជាទីគោរពសក្ការៈ
- ឯកឧត្តម ទេសរដ្ឋមន្រ្តី រដ្ឋមន្រ្តី រដ្ឋលេខាធិការ
- ឯកឧត្តម អភិបាល អភិបាលរងនៃគណៈអភិបាលខេត្ត
- ឯកឧត្តម លោកជំទាវ លោកឧកញ៉ា លោក លោកស្រី ភ្ញៀវកិត្តិយសទាំងអស់
- ថ្នាក់ដឹកនាំ និងក្មួយៗកាយរឹទិ្ធនៃកាយរឹទិ្ធជាតិកម្ពុជាទាំងអស់ជាទីមេត្រី !
ថ្ងៃនេះ
តាងនាមថ្នាក់ដឹកនាំកាយរឹទ្ធិជាតិកម្ពុជា ខ្ញុំព្រះករុណាខ្ញុំ
មានសេចក្តីសោមនស្សរីករាយក្រៃលែង
ដោយបានចូលរួមក្នុងពិធីសច្ចាប្រណិធាន
និងបំពាក់កន្សែងជាផ្លូវការជូន
នវកាយរឹទ្ធិនៃកាយរឹទ្ធិជាតិកម្ពុជាខេត្តក្រចេះ
ដែលកំពុងប្រព្រឹត្តទៅយ៉ាងមហោឡារិកនាពេលនេះ។
ខ្ញុំសូមស្វាគមន៍យ៉ាងកក់ក្តៅ
ចំពោះវត្តមានរបស់ឯកឧត្តម លោកជំទាវ លោកឧកញ៉ា លោក លោកស្រីទាំងអស់
ក្នុងពិធីបំពាក់កន្សែងដ៏មានសារៈសំខាន់នាពេលនេះ ដែលញ៉ាំងឱ្យពិធី
ទាំងមូលកាន់តែអធិកអធម និងមានអត្ថន័យយ៉ាងជ្រាលជ្រៅ
និងបានលើកទឹកចិត្តក្មួយៗ
ជាសមាជិកនៃកាយរឹទ្ធិជាតិកម្ពុជាខេត្តក្រចេះទាំងមូលឱ្យខិត
ខំអប់រំខ្លួននិងបង្កើនការប្រព្រឹត្តអំពើ ល្អឲ្យកាន់តែទូលំទូលាយ
ប្រកបដោយក្តីមោទនភាពបំផុត
ដែលនឹងរួមចំណែកធ្វើឱ្យកិត្យានុភាពរបស់កាយរឹទ្ធិជាតិកម្ពុជា
កាន់តែខ្ពង់ខ្ពស់ឡើងថែមទៀត។
ស្ថិតក្នុងបរិយាកាសដ៏សែនមរីករាយនេះ
ខ្ញុំព្រះករុណាខ្ញុំ សូមពាំនាំនូវការនឹករលឹកនិង
ការផ្តាំផ្ញើសួរសុខទុក្ខពីសម្តេចអគ្គមហាសេនាបតីតេជោ ហ៊ុន សែន
នាយករដ្ឋមន្ត្រីនៃព្រះរាជា-ណាចក្រម្ពុជា
និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ប្រធានកាកបាទក្រហមកម្ពុជា ជាគរុគណនៃកាយរឹទ្ធិជាតិកម្ពុជា
ប្រគេនព្រះថេរានុត្ថេរៈគ្រប់ព្រះអង្គ និងជូនឯកឧត្តម លោកជំទាវ
លោកឧកញ៉ា លោក លោកស្រី និងថ្នាក់ដឹកនាំកាយរឹទ្ធិគ្រប់លំដាប់ថ្នាក់
ព្រមទាំង ក្មួយៗកាយរឹទ្ធិនៃកាយរឹទ្ធិជាតិកម្ពុជាខេត្តក្រចេះ
ក៏ដូចជាថ្នាក់ដឹកនាំ និងសមាជិក សមាជិកា
ទាំងអស់នៃកាយរឹទ្ធិជាតិកម្ពុជា នៅទូទាំងព្រះរាជាណាចក្រកម្ពុជា។
- ព្រះថេរានុត្ថេរៈគ្រប់ព្រះអង្គ
- ឯកឧត្តម លោកជំទាវ លោកឧកញ៉ា លោក លោកស្រី និងក្មួយៗកាយរឹទ្ធិទាំងអស់ !
ដោយអនុវត្តតាមស្មារតីសេចក្តីសម្រេច
នៃមហាសន្និបាតលើកទី២ និងផែនការយុទ្ធសាស្ត្រ ឆ្នាំ២០១០-២០២០
របស់កាយរឹទិ្ធជាតិកម្ពុជា កាយរឹទ្ធិជាតិកម្ពុជារាជធានី-ខេត្ត
បានជំរុញយ៉ាងខ្លាំងក្លាក្នុងការពង្រីកកម្លាំងកាយរឹទ្ធិប្អូន
កាយរឹទិ្ធ និងកាយរឹទ្ធិរៀមច្បង នៅតាមគ្រឹះស្ថានសិក្សានានា
នៅទូទាំងប្រទេស ដែលធ្វើឱ្យយុវជនទទួលស្គាល់ច្បាស់ថា
ការអប់រំតាមរយៈចលនាកាយរឹទ្ធិ គឺពិតជាមានសារៈសំខាន់
និងមិនអាចខ្វះបាន ដោយផ្តល់នូវសក្តានុពលពេញលេញខាងផ្លូវកាយ
ផ្លូវបញ្ញា ផ្លូវសង្គម ផ្លូវចិត្ត និងផ្លូវអវេគ
និងធ្វើឱ្យយុវជនបានអភិវឌ្ឍខ្លួន ប្រកប ដោយឆន្ទៈ វិរយៈ
មនសិកាវិជ្ជាជីវៈ ថាមពល កំលាំងកាយ ប្រាជ្ញា ស្មារតី ចំណេះដឹង ចំណេះធ្វើ
ជំនាញ និមិត្តកម្ម និងនវានុវត្ត
ដែលជាកត្តាធ្វើឱ្យមានការប្រែប្រួលផ្នែកសេដ្ឋកិច្ច និងសង្គមកិច្ច
នាពេលបច្ចុប្បន្ន និង ទៅអនាគតប្រកបដោយនិរន្តរភាព។
ជាក់ស្តែងគិតមកត្រឹមថ្ងៃនេះ
គណៈកម្មាធិការប្រតិបត្តិកាយរឹទិ្ធជាតិកម្ពុជាខេត្តក្រចេះ
បានបណ្តុះបណ្តាល និងកសាងកម្លាំងកាយរឹទ្ធិនៅតាមវិទ្យាល័យនានា
ក្នុងក្រុង-ស្រុកទាំង០៦ បានចំនួន ៤.២២៥ នាក់ ក្នុងនោះយុវតីមានចំនួន
២.០៣៧ នាក់
ដែលធ្វើឱ្យកាយរឹទ្ធិជាតិកម្ពុជាខេត្តក្រចេះកាន់តែមានភាពរឹងមាំ
ស័ក្កិសមជាកម្លាំងស្នូលសម្រាប់បុព្វហេតុអភិវឌ្ឍខេត្ត ក៏ដូចជា
សង្គមជាតិយើងទាំងមូល។
ខ្ញុំព្រះករុណាខ្ញុំ សូមសម្តែងនូវការអបអរសាទរ និងកោតសរសើរចំពោះឯកឧត្តម ខាំ ភឿន
អភិបាលនៃគណៈអភិបាលខេត្ត
និងជាប្រធានកាយរឹទិ្ធជាតិកម្ពុជាខេត្តក្រចេះ និង
ថ្នាក់ដឹកនាំខេត្តគ្រប់លំដាប់ថ្នាក់
ដែលបានយកអស់កម្លាំងកាយចិត្តប្រមូលផ្តុំកម្លាំងគ្រប់ផ្នែកបន្ត
កសាងអភិវឌ្ឍខេត្ត លើកកម្ពស់វិស័យកសិកម្ម
អភិវឌ្ឍតំបន់រមណីយដ្ឋានទេសចរធម្មជាតិកាំពីរ និងរមណីដ្ឋានវប្បធម៌នានា
និងបានធ្វើឱ្យភ្ញៀវទេសចរជាតិនិងអន្តរជាតិមានការកើនឡើង ជាបន្ត
បន្ទាប់ ដែលជាកត្តារួមចំណែកលើកកម្ពស់ជីវភាពរស់នៅរបស់ប្រជាជន
ឲ្យកាន់តែប្រសើរឡើង ជាលំដាប់។ ទន្ទឹមនឹងការកសាងនូវសមិទ្ធផលទាំងនេះ
ឯកឧត្តមក៏បានយកចិត្តទុកដាក់ផងដែរ
ក្នុងការជំរុញឲ្យស្នងការកាយរឹទ្ធិជាតិកម្ពុជាខេត្តក្រចេះ
បង្កើនការលើកទឹកចិត្តឲ្យក្មួយៗ សិស្សា
នុសិស្សតាមក្រុង-ស្រុកក្នុងខេត្ត
ស្ម័គ្រចិត្តចូលរួមយ៉ាងសកម្មនិងយ៉ាងច្រើនកុះករក្នុងចលនា
កាយរឹទ្ធិជាតិកម្ពុជា។
ឆ្លៀតក្នុងឱកាសដ៏ប្រសើរនេះ
ខ្ញុំសូមកោតសរសើរ និងវាយតម្លៃខ្ពស់ចំពោះក្មួយៗ
កាយរឹទិ្ធជាតិកម្ពុជាខេត្តក្រចេះ
ក៏ដូចជាក្មួយៗកាយរឹទ្ធិនៅតាមបណ្តាខេត្តនានា
ដែលបានចូលរួមជួយបោសសំអាតសាលារៀន
និងជួយជួសជុលលំនៅដ្ឋានរបស់ប្រជាជន ដែលទទួលរងការ
ខូចខាតដោយសារទឹកជំនន់នាពេលថ្មីៗកន្លងទៅនេះ
ព្រមទាំងបានចូលរួមក្នុងសកម្មភាពចាំបាច់ ដទៃទៀតជាមួយអាជ្ញាធរ
និងកាកបាទក្រហមកម្ពុជាគ្រប់លំដាប់ថ្នាក់យ៉ាងសកម្ម និងទាន់ពេល វេលា។
ជាមួយគ្នានេះដែរ
ខ្ញុំសូមសម្តែងនូវការកោតសរសើរ
និងថ្លែងអំណរគុណយ៉ាងជ្រាលជ្រៅចំពោះមាតា បិតា អាណាព្យាបាល លោកគ្រូ
អ្នកគ្រូ នៅទូទាំងប្រទេសដែលបានជំរុញ និង លើកទឹកចិត្តក្មួយៗជាកូន
ជាក្មួយ ជាសិស្សឲ្យមកទទួលការបណ្តុះបណ្តាល និងចូលជាសមាជិក
កាយរឹទ្ធិជាតិកម្ពុជាប្រកបដោយស្មារតីអង់អាចក្លាហាន
សំដៅរួមចំណែកអភិវឌ្ឍធនធានមនុស្ស ប្រកបដោយឆន្ទៈ និងឧត្តមគតិខ្ពស់
ដើម្បីបុព្វហេតុកសាង និងអភវឌ្ឍជាតិមាតុភូមិ។
- ព្រះថេរានុត្ថេរៈគ្រប់ព្រះអង្គ
- ឯកឧត្តម លោកជំទាវ លោកឧកញ៉ា លោក លោកស្រី និងក្មួយៗកាយរឹទ្ធិទាំងអស់ !
ពីអង្គវេទិកាដ៏ឧត្តុងឧត្តមនេះ
ខ្ញុំសូមសម្តែងនូវការគោរពដឹងគុណដ៏ខ្ពង់ខ្ពស់ និងជ្រាល
ជ្រៅបំផុតចំពោះសម្តេចអគ្គមហាសេនាបតីតេជោ ហ៊ុន សែន
នាយរដ្ឋមន្ត្រីនៃព្រះរាជាណាចក្រ កម្ពុជា
និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលកន្លងមក
ក៏ដូចជាពេល បច្ចុប្បន្ន បានយកអស់កម្លាំងកាយចិត្ត និងបញ្ញាញាណ
បំពេញបេសកកម្មដ៏ឧត្តុង្គឧត្តម និង វិសេសវិសាលបំផុត
ដោយធ្វើឲ្យមានការផ្សះផ្សានិងបង្រួបបង្រួមជាតិ មានសុខសន្តិភាព
ស្ថិរភាពនយោបាយ លទ្ធិប្រជាធិតេយ្យ កំណើនសេដ្ឋកិច្ច និងការអភិវឌ្ឍ
ព្រមទាំងបានធ្វើសមាហរណកម្មកម្ពុជាទៅក្នុងតំបន់និងពិភពលោក។
សម្តេចតេជោ និងលោកជំទាវកិត្តិព្រឹទ្ធបណ្ឌិត
តែងតែយកចិត្តទុកដាក់ខ្ពស់បំផុតចំពោះសុខទុក្ខរបស់ប្រជាជន
ដោយស្ថិតនៅជាប់ជាមួយ ប្រជាជន និងជួយប្រជាជនគ្រប់កាលៈទេសៈ
រួមទាំងបានជួយឲ្យកុមារនិងយុវជនកម្ពុជាទទួលបាននូវសិទ្ធិគ្រប់បែបយ៉ាង
រួមមាន សិទ្ធិរស់រានមានជីវិត សិទ្ធិក្នុងការអភិវឌ្ឍ សិទិ្ធទទួលការ
ការពារ និងសិទ្ធិទទួលបានការអប់រំ
ប្រកបដោយសមធម៌ដើម្បីសម្រេចឱ្យបាននូវចំណេះដឹង ចំណេះធ្វើ មានសីលធម៌ល្អ
និងចេះរស់នៅរួមគ្នាក្នុងស្មារតីសន្តិសហវិជ្ផមាន និងមានវិធានការ
ទប់ស្កាត់អំពើអសកម្មនានា ដូចជា ការសេពគ្រឿងញៀន ការសេពគ្រឿងស្រវឹង
ការលេង ល្បែងស៊ីសង សកម្មភាពក្មេងទំនើង ការលួច ឆក់ ប្លន់ ជាដើម។ល។
នៅក្នុងឆ្នាំ២០១១កន្លងទៅ រាជរដ្ឋាភិបាល ដែលមានសម្តេចតេជោជាប្រមុខ
បាន អនុម័តគោលនយោបាយជាតិស្តីពីការអភិវឌ្ឍយុវជនកម្ពុជា
ក្នុងគោលបំណងជំរុញឲ្យគ្រប់ ក្រសួង ស្ថាប័នសាធារណៈ ផ្នែកឯកជន
អង្គការសង្គមស៊ីវិលជាតិ និងអន្តរជាតិ យកចិត្តទុកដាក់
លើកកម្ពស់ការអភិវឌ្ឍយុវជនដើម្បីឲ្យយុវជនគ្រប់រូប
ជាពិសេសយុវជនដែលបាត់បង់ឱកាស ទទួលបាននូវការបណ្តុះបណ្តាលសមត្ថភាព
និងជំនាញ សម្រាប់រួមចំណែកក្នុងដំណើរការ អភិវឌ្ឍប្រទេសជាតិ។
ទន្ទឹមនឹងនេះ សម្តេច និងលោកជំទាវ
បានឧបត្ថម្ភ
និងគាំទ្រជានិច្ចដល់ដំណើរការកាយរឹទិ្ធជាតិកម្ពុជា
ក្នុងការពង្រីកតួនាទីគំរូរបស់ខ្លួននៅក្នុងសង្គមជាតិ
ដោយធ្វើឲ្យមានការប្រែប្រួល
ឥរិយាបថរបស់យុវជនឆ្ពោះទៅរកភាពជឿនលឿនប្រកបដោយភាពក្លាហាន
ដើម្បីផ្សាភ្ផាប់ខ្លួន ទៅនឹងភារកិច្ចអភិវឌ្ឍខ្លួនឯង ជួយអ្នកដទៃ
និងភារកិច្ចចំពោះជាតិ សាសនា ព្រះមហាក្សត្រ
និងដើម្បីរួមចំណែកលើកកម្ពស់ការអនុវត្តបេសកកម្មជាប្រវត្តិសាស្ត្រ
របស់កាយរឹទ្ធិជាតិកម្ពុជា ឲ្យ
ទទួលបាននូវតម្លៃជាសាកលសំដៅជំរុញចលនាកាយរឹទ្ធិឱ្យកាន់តែរឹងមាំជាលំដាប់
ទាំងបរិមាណ និងគុណភាព។
ជាការឆ្លើយតបទៅនឹងគុណូបការៈដ៏ធំធេង
របស់សម្តេចតេជោនិងលោកជំទាវ និងដើម្បី
ឲ្យស័ក្តិសមជាសមាជិករបស់អង្គការពិភពលោកនៃចលនាកាយរឹទ្ធិ
ខ្ញុំព្រះករុណាខ្ញុំ សូមអំពាវនាវ ដល់ឯកឧត្តម លោកជំទាវ លោកឧកញ៉ា លោក
លោកស្រី និងក្មួយៗទាំងអស់ ឲ្យបង្កើនការពង្រឹង
និងពង្រីកចលនាកាយរឹទ្ធិជាតិកម្ពុជាឱ្យបានខ្លាំងក្លាជាងនេះថែមទៀត
តាមរយៈ សកម្មភាពចាំបាច់មួយចំនួនដូចខាងក្រោម៖
១- អគ្គលេខាធិការដ្ឋាន
និងស្នងការដ្ឋានជាតិនៃកាយរឹទ្ធិជាតិកម្ពុជា
ត្រូវបន្តរៀបចំសៀវភៅស្តីពីកាយរឹទ្ធិប្អូន កាយរឹទ្ធិ
និងកាយរិទ្ធិរៀមច្បង
និងសេចក្តីណែនាំពាក់ព័ន្ធនឹងការរៀបចំក្រុមប្រឹក្សាកាយរឹទិ្ធ
រៀមច្បងថ្នាក់ជាតិ ឲ្យបានចប់សព្វគ្រប់នៅពាក់កណ្តាលឆ្នាំ២០១២នេះ។
ត្រូវបន្តរៀបចំកងឯកភាព កង និងល្បាតរៀមច្បង ឲ្យមានឯកភាពនៅទូទាំងប្រទេស
និង ស្របតាមស្តង់ដាអន្តរជាតិ។
ត្រូវបន្តធ្វើប្រវត្តិរូបនិងអត្តសញ្ញាណប័ណ្ណកាយរឹទិ្ធដល់សមាជិក
គ្រប់រូប និងរៀបចំវគ្គបណ្តុះបណ្តាលគ្រូបង្គោល និងស្នងការ
សម្រាប់រាជធានី-ខេត្ត ឱ្យបានទាន់ពេលវេលា
ពិសេសត្រូវជំរុញការរៀបចំកម្មវិធីធ្វើតេស្តតម្លើងឋានន្តរស័ក្កិដល់ស
មាជិកកាយរឹទ្ធិ
ឱ្យបានត្រឹមត្រូវទៅតាមបែបបទទាំង៦កម្រិតនៃឋានន្តរស័កិ្កកាយរឹទិ្ធដែល
ក្នុងនោះរួមមានៈ
១- ឋានន្តរស័ក្តិកាយរឹទ្ធិថ្នាក់ដំបូង
២- ឋានន្តរស័ក្តិកាយរឹទ្ធិថ្នាក់លេខ២
៣- ឋានន្តរស័ក្តិកាយរឹទ្ធិថ្នាក់លេខ១
៤- ឋានន្តរស័ក្តិកាយរឹទ្ធិថ្នាក់ផ្កាយ
៥- ឋានន្តរស័ក្តិថ្នាក់វរកាយរឹទ្ធិ និង
៦- ឋានន្តរស័ក្តិថ្នាក់អង្គរ ។
ការធ្វើឲ្យសម្រេចនូវកម្មវិធីតម្លើងឋានន្តរស័ក្កិនេះជាការចាំបាច់
ណាស់ដើម្បីឱ្យកាយរឹទ្ធិគ្រប់រូបមានការយល់ដឹងអំពីលំដាប់បច្ចេកទេស
កាយរឹទ្ធិបានយ៉ាងត្រឹមត្រូវ។
២-
កាយរឹទ្ធិជាតិកម្ពុជារាជធានី-ខេត្ត ត្រូវរៀបចំឱ្យមានបទបញ្ជាផ្ទៃក្នុង
និងផែនការសកម្មភាពរបស់ខ្លួនដោយផ្អែកលើមូលដ្ឋានធម្មនុញ្ញនិង
បទបញ្ជាផ្ទៃក្នុងរបស់កាយរឹទ្ធិជាតិកម្ពុជា
ដើម្បីធានាប្រសិទ្ធភាពការងារ
និងត្រូវបន្តរៀបចំកាយរឹទ្ធិកម្ពុជាថ្នាក់ក្រុង-ស្រុក-ខណ្ឌ
ឱ្យបាននៅពាក់កណ្តាលឆ្នាំ២០១២នេះ
ដើម្បីឈានទៅបង្កើនប្រសិទ្ធភាពនៃការគ្រប់គ្រងសមាជិកកាយរឹទ្ធិទាំង
អស់កាន់តែល្អប្រសើរ
និងសហការជាមួយស្នងការជាតិរៀបចំបណ្តុះបណ្តាលសមត្ថភាពមេកងប្អូន មេកង
និងមេកងរៀមច្បង ដើម្បីឆ្លើយតបទៅនឹងតម្រូវការរបស់មូលដ្ឋាន
ពិសេសត្រូវគិតអំពីការរៀបចំទីស្នាក់ការកាយរឹទ្ធិជាតិកម្ពុជារា
ជធានី-ខេត្ត ឱ្យបានសមស្រប នៅដំណាច់ឆ្នាំ២០១២ ខាងមុខនេះ។
៣-
ស្នងការកាយរឹទ្ធិជាតិកម្ពុជារាជធានី-ខេត្ត ក្រុង-ស្រុក-ខណ្ឌ ទាំងអស់
ត្រូវរៀបចំកងឯកភាពកាយរឹទ្ធិប្អូននៅតាមសាលាបឋមសិក្សា
ដោយយកសាលារៀនណាមួយធ្វើជាគំរូ នៅថ្នាក់រាជធានី-ខេត្ត ក្រុង-ស្រុក-ខណ្ឌ
នៅចុងឆ្នាំ២០១២ នេះ ដោយហេតុថា ការបណ្តុះ ស្មារតីកាយរឹទ្ធិពីកុមារភាព
គឺមានភាពចាំបាច់ និងមានសារៈសំខាន់បំផុតសម្រាប់កាយរឹទ្ធិ ជាតិកម្ពុជា។
ទន្ទឹមនោះ
ត្រូវយកចិត្តទុកដាក់រៀបចំការបោះជំរុំកាយរឹទ្ធិថ្នាក់ខេត្តឱ្យបានទៀង
ទាត់ជារៀងរាល់ឆ្នាំ
ដើម្បីឱ្យក្មួយៗកាយរឹទ្ធិទាំងអស់មានឱកាសផ្សាភ្ជាប់ខ្លួនជាមួយនឹង
ធម្មជាតិ និងអាចអនុវត្តបច្ចេកទេសកាយរឹទិ្ធនៅតាមទីវាល
ព្រមទាំងបង្កើនការរឹតចំណងមិត្តភាព សាមគ្គីភាពឱ្យកាន់តែរឹងមាំថែមទៀត។
៤-
មេកងឯកភាពកាយរឹទិ្ធប្អូន កាយរឹទ្ធិ និងកាយរឹទ្ធិរៀមច្បង
ត្រូវជួយបង្កលក្ខណៈឱ្យកង និងល្បាត ចេះរៀបចំ
និងអនុវត្តផែនការប្រចាំសប្តាហ៍ ដើម្បីឱ្យសមាជិកកាយរឹទ្ធិប្អូន កាយរឹទ្ធិ
និងកាយរឹទ្ធិរៀមច្បងគ្រប់រូបបានយល់ដឹងអំពីតួនាទីរបស់ខ្លួននៅក្នុងកង
ឯកភាព កង និងល្បាត
និងចេះចាំនូវពាក្យសច្ចាប្រណិធាននិងច្បាប់កាយរឹទ្ធិយ៉ាងស្ទាត់ជំនាញ
និងមានឆន្ទៈ ធ្វើអំពើល្អ ទោះជាបុគ្គលក្តី
ជាក្រុមក្តីឱ្យបានជាប្រចាំនិងជារៀងរាល់ថ្ងៃ។
៥-
ចំពោះក្មួយៗជាសមាជិកកាយរឹទ្ធិជាតិកម្ពុជា
ចូរក្មួយៗបង្កើនស្មារតីចូលរួមក្នុងចលនាកាយរឹទ្ធិ
ដោយផ្តោតការការយកចិត្តទុកដាក់និងខិតខំប្រឹងប្រែងអនុវត្ត
វិធីកាយរឹទ្ធិឱ្យ បានខ្ជាប់ខ្ជួន
ដើម្បីឱ្យកាយរឹទ្ធិគ្រប់រូបទទួលបាននូវការអភិវឌ្ឍខ្លួនឯងទាំងផ្នែកបញ្ញា
និងស្មារតី តាមរយៈការបោះជំរំ និងការប្រព្រឹត្តអំពើល្អជាប្រចាំ
ឱ្យទៅជាទម្លាប់នៅក្នុងជីវភាពរស់នៅ
ព្រមទាំងបានយល់ច្បាស់អំពីតម្លៃនៃការងារ និងផលប្រយោជន៍សមូហភាព
ចេះស្រឡាញ់ ខ្លួនឯង និងចេះគោរពអ្នកដទៃ
ជាពិសេសត្រូវប្រកាន់ខ្ផាប់នូវការគោរពច្បាប់ គោរពសិទ្ធិអ្នកដទៃ
និងអនុវត្តគោលការណ៍លទ្ធិប្រជាធិបតេយ្យក្នុងកិច្ចការអភិវឌ្ឍប្រទេសជាតិ។
៦-
កាយរឹទ្ធិជាតិកម្ពុជារាជធានី-ខេត្ត ត្រូវផ្តល់របាយការណ៍ប្រចាំខែ
ប្រចាំត្រីមាស និងប្រចាំឆ្នាំ ព្រមទាំងព័ត៌មានពាក់ព័ន្ធទាំងឡាយ
ទៅអគ្គលេខាធិការដ្ឋានកាយរឹទ្ធិជាតិកម្ពុជា ឱ្យបានទៀងទាត់
ដើម្បីផ្តល់នូវភាពងាយស្រួលក្នុងការគ្រប់គ្រង និងរៀបចំរបាយការណ៍ជូនរាជ
រដ្ឋាភិបាល
និងអង្គការពិភពលោកនៃចលនាកាយរឹទិ្ធប្រចាំតំបន់អាស៊ីប៉ាស៊ីហ្វិក ។
- ព្រះថេរានុត្ថេរៈគ្រប់ព្រះអង្គ
- ឯកឧត្តម លោកជំទាវ លោកឧកញ៉ា លោក លោកស្រី និងក្មួយៗកាយរឹទ្ធិទាំងអស់
ជាការពិតណាស់ថា
ការងារពង្រឹងសកម្មភាពកាយរឹទ្ធិនៅទូទាំងប្រទេសកម្ពុជា គឺមិន
អាចប្រព្រឹត្តទៅបានដោយគ្មានការចូលរួមសហការពីសំណាក់ស្ថាប័នក្រៅរដ្ឋាភិបាល
ក៏ដូចជា ផ្នែកឯកជនបាននោះឡើយ។ ដូច្នេះ
ខ្ញុំសូមយកឱកាសនេះអំពាវនាវដល់សប្បុរសជនទាំងអស់ ទាំងផ្នែកឯកជន
អង្គការមិនមែនរដ្ឋាភិបាល ក៏ដូចជា ឯកឧត្តម លោកជំទាវ លោកឧកញ៉ា លោក
លោកស្រីទាំងអស់
សូមចូលរួមចំណែកជំរុញចលនាអប់រំតាមរយៈប្រព័ន្ធកាយរឹទ្ធិកម្មនេះ
ឱ្យកាន់តែមានភាពរស់រវើក
និងមានប្រសិទ្ធភាពខ្ពស់ដើម្បីជាប្រយោជន៍ដល់សង្គមជាតិយើង។
តាមរយៈសកម្មភាពខាងលើនេះ
ខ្ញុំព្រះករុណាខ្ញុំ ពិតជាមានជំនឿយ៉ាងមុតមាំថា ឯកឧត្តម លោកជំទាវ លោកឧកញ៉ា
លោក លោកស្រី និងក្មួយៗទាំងអស់ នឹងខិតខំពង្រឹង
ការងារកាយរឹទ្ធិជាតិកម្ពុជានៅគ្រប់លំដាប់ថ្នាក់ឲ្យសម្រេចបានលទ្ធផល
ល្អប្រសើរ
តាមរយៈការកសាងឱ្យបាននូវកម្លាំងកាយរឹទ្ធិមួយដ៏អង់អាចក្លាហាន
ជាពលរដ្ឋល្អ មានសមត្ថភាពគ្រប់គ្រាន់ មានស្មារតីទទួលខុសត្រូវខ្ពស់
ដើម្បីឱ្យកម្លាំងកាយរឹទ្ធិនេះក្លាយជាអ្នកបន្តវេនដ៏មានប្រសិទ្ធភាព
ក្នុងកិច្ចការអភិវឌ្ឍប្រទេសជាតិ។
ជាទីបញ្ចប់ ខ្ញុំព្រះករុណាខ្ញុំ
សូមប្រគេនពរថ្វាយព្រះថេរានុត្ថេរៈគ្រប់ព្រះអង្គ និង ជូនពរ ឯកឧត្តម
លោកជំទាវ លោកឧកញ៉ា លោក លោកស្រី និងក្មួយៗកាយរឹទ្ធិទាំងអស់
នូវពុទ្ធពរទាំង៤ប្រការ គឺអាយុ វណ្ណៈ សុខៈ និងពលៈ ព្រមទាំងទទួលបានជោគជ័យ
គ្រប់ភារកិច្ច និងមានសុភមង្គលនៅក្នុងក្រុមគ្រួសារគ្រប់ៗគ្នា។
សូមអរព្រះគុណ និងអរគុណ !