ដូចការគ្រោងទុក
នៅវេលាម៉ោង៦ព្រឹក នាថ្ងៃទី១ ខែ មេសា ឆ្នាំ ២០១២នេះ
ការិយាល័យបោះឆ្នោតនីមួយៗបានចាប់ផ្តើមដំណើរការ។
ការបោះឆ្នោតបំពេញបន្ថែមនេះប្រព្រឹត្តទៅចាប់ពីម៉ោង៦ព្រឹក ដល់ម៉ោង៤រសៀល
ដែលមានការិយាល័យបោះឆ្នោតសរុបចំនួន៨០០០ ស្ថិតនៅក្នុង៨មណ្ឌល
ដើម្បីជ្រើសរើសសមាជិកសភាជាន់ទាបចំនួន៣៧រូប
សភាជាន់ខ្ពស់ចំនួន៦រូប និងសភាប្រចាំតំបន់ចំនួន២រូប លើអាសនៈសរុបចំនួន៦៥៩។
គណបក្សចូលរួមប្រកួតប្រជែងមានចំនួន១៧
ហើយគណបក្សប្រឆាំងរបស់លោកស្រី អ៊ុង សានស៊ូជី ដែលមានឈ្មោះថា NLDP គណបក្សសម្ព័ន្ធជាតិដើម្បីប្រជាធិបតេយ្យ ឈរនៅលេខ រៀងលំដាប់ទី៨។
អ្នកបោះឆ្នោតសរុបមានចំនួនជាង៦លាននាក់
ស្មើនឹង៧ភាគរយនៃចំនួនប្រជាពលរដ្ឋដែលមានសិទ្ធិបោះឆ្នោត។
ឯកឧត្តម ឈាង វុន សមាជិកគណៈកម្មាធិការអចិន្ត្រៃយ៍
និងជាប្រធានគណៈកម្មាការកិច្ចការបរទេស សហប្រតិបត្តិការអន្តរជាតិ
និងព័ត៌មាននៃរដ្ឋសភា បានដឹកនាំគណៈប្រតិភូពីរ ក្រុមក្នុងនាមជាប្រធានអាស៊ាន និងក្នុងនាមជាសមាជិកអាស៊ានចំនួន៨រូប
បានចុះសង្កេតការណ៍នៅតាមការិយាល័យជាច្រើនក្នុងទីក្រុងយ៉ាំងហ្គូន
និងបានអះអាងជាបឋមថា ការបោះឆ្នោតនេះ គឺជាព្រឹត្តិការណ៍ប្រវត្តិសាស្ត្រ
ហើយឯកឧត្តម បាន
និងកំពុងបន្តតាមសង្កេតការណ៍ជុំវិញការរាប់សន្លឹកឆ្នោតជាបន្តទៀត
មុននឹងធ្វើសេចក្តីសន្និដ្ឋានជាក្រោយ។
នៅពេលជួបជាមួយមន្ត្រីនៃការិយាល័យបោះឆ្នោត
ក៏ដូចជាអ្នកបោះឆ្នោត ឯកឧត្តម ឈាង វុន បានថ្លែងនូវការកោតសរសើរចំពោះការបំពេញកាតព្វកិច្ចក្នុងនាមជាប្រជាពលរដ្ឋមីយ៉ាន់ម៉ា
និងបានអះអាងថា ការបោះឆ្នោតនេះ
គឺជាជោគជ័យមួយរបស់ប្រជាពលរដ្ឋដែលរស់នៅក្នុងសមាគមប្រជាជាតិអាស៊ីអាគ្នេយ៍
ដែលហៅកាត់អាស៊ានទាំងមូល។
ដោយឡែកមន្ត្រីអ្នកសង្កេតការណ៍ម្នាក់នៃសហគមន៍អ៊ឺរ៉ុប ដែលសុំមិនបញ្ចេញឈ្មោះបានលើកឡើងថា
លោកកំពុងអង្កេត និងវិភាគអំពីស្ថានការណ៍នៃការបោះឆ្នោតនាថ្ងៃទី១ ខែ មេសា
ឆ្នាំ២០១២នេះ ដោយមិនទាន់មានការអត្ថាធិប្បាយអ្វីនៅឡើយទេ។
ប៉ុន្តែ ទោះជាយ៉ាងណាក៏ដោយអ្នកបោះឆ្នោតមីយ៉ាន់ម៉ាម្នាក់បានឆ្លើយអះអាងថា ការបោះឆ្នោតនាឆ្នាំ២០១២នេះ គឺពិតជាខុសប្លែកពីការបោះឆ្នោតនាឆ្នាំ២០១០។
មានអ្នកបោះឆ្នោតជាច្រើនដែលយើងបានជួបផ្លាស់ប្តូរយោបល់គ្នា
បានអះអាងថា ដំណើរការនៃការបោះឆ្នោតនៅថ្ងៃនេះប្រព្រឹត្តទៅយ៉ាងរលូន។
ស្ត្រីមេផ្ទះ Myo Myo
Aye បានលើកឡើងថាការបោះឆ្នោតនៅពេលនេះ
គឺជាលើកទី២ ហើយសំរាប់រូបគាត់ និងបានប្រព្រឹត្តទៅដោយសេរី ហើយទទួលយកបាន។
គាត់សង្ឃឹមថា
ផ្លែផ្កាដែលគាត់ទទួលបានបន្ទាប់ពីការបោះឆ្នោតនេះ គឺការអប់រំល្អប្រសើរ
និងសុខុមាលភាពគ្រាន់បើសម្រាប់ក្រុមគ្រួសាររបស់គាត់
និងប្រជាពលរដ្ឋផ្សេងទៀត។ ដោយឡែក ការយល់ឃើញរបស់ពីរនាក់ប្តីប្រពន្ធលោក
MY Than Htut និង លោកស្រី Ma Su Su Wai វិញគឺ៖ ការវិនិយោគ សេរីភាពច្រើនជាងមុន
ការបង្កើតកាងារធ្វើ និងការអភិវឌ្ឍប្រទេស។
ជាចុងក្រោយ
ស្ត្រីវ័យ៧០ឆ្នាំ Dan San Nwe បានលើកឡើងថា
ក្នុងនាមជាប្រជាពលរដ្ឋ គាត់ត្រូវតែមកចូលរួមការបោះឆ្នោត
ហើយយល់ឃើញថា ការបោះឆ្នោតកន្លែងនេះប្រព្រឹត្តទៅបានយ៉ាងល្អត្រឹមត្រូវ។
ការិយាល័យបោះឆ្នោតនីមួយៗមានប្រជាពលរដ្ឋមីយ៉ាន់ម៉ាយ៉ាងច្រើនកុះករ
បានមកចូលរួមបំពេញកាតព្វកិច្ចក្នុងនាមជាប្រជាពលរដ្ឋក្នុងទឹកមុខរីករាយ ស្រស់ថ្លា ពោរពេញដោយក្តីសង្ឃឹមនាពេលអនាគត។
ការបោះឆ្នោតលើកនេះ
ពិតមែនតែមានអាសនៈចំនួន៤៥ ដើម្បីប្រកួតប្រជែងពិតមែន បើប្រៀបធៀបទៅនឹងអាសនៈសរុបចំនួន៦៥៩
ប៉ុន្តែ នេះជាការបើកទ្វារដ៏ពិតប្រាកដឱ្យសភាជាន់ទាប និងសភាជាន់ខ្ពស់មានសម្លេងរបស់គណបក្សប្រឆាំង
ជាពិសេសសម្លេងរបស់គណបក្សសម្ព័ន្ធជាតិដើម្បីប្រជាធិបតេយ្យរបស់លោកស្រី អ៊ុនសាន ស៊ូជី។
សំរាប់ក្រសែភ្នែករបស់សហគមន៍អន្តរជាតិ
នេះគឺជាការបោះជំហានវិជ្ជមានរបស់រដ្ឋាភិបាល ដែលកំពុងកាន់អំណាចនាពេលបច្ចុប្បន្ន
ដែលបានប្តេជ្ញាអនុវត្តផែនទីបង្ហាញផ្លូវត្រង់ចំនុចទី៧ ឱ្យខានតែបាន
គឺការកែទម្រង់ឱ្យមានប្រជាធិបតេយ្យសេរីពហុបក្សនៅប្រទេសមីយ៉ាន់ម៉ា៕
អត្ថបទៈ (ភ្នាក់ងារព័ត៌មាននៃក្រុមអ្នកសង្កេតការណ៍កម្ពុជាសំរាប់ការបោះឆ្នោតនៅភូមា)