បទអត្ថាធិប្បាយ
ដោយ ឧត្តម សក្តិ
ដោយ ឧត្តម សក្តិ
ហេតុអ្វី កឹម សុខា ទៅចងសម្ព័ន្ធមិត្តជាមួយ ទណ្ឌិត?
ក្នុងនាមជាគណបក្សនយោបាយស្របច្បាប់
ហើយថែមទាំងមានអាសនះក្នុងរដ្ឋសភាថែមទៀតនោះ លោក កឹម
សុខា ដែលគេស្គាល់ថា ជាមេបក្សសិទ្ធិមនុស្ស បែរជាបានប្រកាសជាសាធារណៈ តាមប្រព័ន្ធផ្សព្វផ្សាយនានា អំពីជំហររបស់ពួកគាត់ក្នុងការបង្រួបបង្រួមជាមួយគណបក្ស សម រង្ស៊ី ដែលមេបក្សមួយនេះជាអ្នកទោសនិរទេស ។
នរណាក៍បានដឹងដែរថា ដោយក្តីភ្លើតភ្លើននឹងនយោបាយប្រឆាំងផ្កាប់មុខ ជ្រុលនិយម បានបង្ករអោយ លោក សម រង្ស៊ី ក្លាយជាទណ្ឌិត ដែលសម្រេចដោយតុលាការកម្ពុជា លើបទចោទប្រកាន់បីករណីផ្សេងៗគ្នា មានស្ថានទំងន់ទោសដល់ទៅជាង ១០ ឆ្នាំ ។ យ៉ាងដូចនេះ
បើគេនាំគ្នាក្រឡេកមើលពីស្ថានភាពនយោបាយរបស់លោក សម
រង្ស៊ី ក្នុងពេលបច្ចុប្បន្នអោយបានច្បាស់នោះ គេនឹងឃើញថា បុគ្គលម្នាក់នេះកំពុងស្ថិតក្នុងស្ថានភាពដ៏យ៉ាប់យឺន
អាប់ឱនជាទីបំផុត
ដោយសព្វថ្ងៃការរស់នៅរបស់គាត់បានអោបក្រសោបតាមជាប់ជាមួយនូវទោសទណ្ឌ
ដែលជាហេតុធ្វើអោយបាត់សិទ្ធិនយោបាយទាំងស្រុង
។
បើលោក សម រង្ស៊ី ជាទណ្ឌិត ថែមទាំងបាត់អស់សិទ្ធិនយោបាយ ចុះហេតុអ្វីបានជា លោក កឹម សុខា ប្រកាសចងសម្ព័ន្ធមិត្តក្នុងការបង្រួបបង្រួមបក្សតែមួយជាមួយនិងអ្នកទោសនោះទៅវិញ?
ដោយមើលឃើញពីភាពចំណេញផ្នែកនយោបាយ ខណៈពេលដែលស្ថានភាពត្រដរខ្យល់របស់ សម
រង្ស៊ី កំពុងតែមានការបែកបាក់ជាទ្រង់ទ្រាយធំជាបន្តបន្ទាប់ បាត់បង់ការគាំទ្រតាំងពីលើដល់ក្រោម ឈានទៅរកការរលំរលាយគណបក្សនាពេលដ៏ខ្លីខាងមុខ មេបក្សឱកាសនិយមសិទ្ធិមនុស្ស កឹម សុខា បានឆ្លៀតពេលនេះដើម្បីលេបត្របាក់យកនូវ
កំអែល កំទេចកំទី ដែលនៅសេសសល់ ពីគណបក្ស សម រង្ស៊ី តាមរយៈនយោបាយ « ក្តៅស៊ីរាក់ ត្រជាក់ស៊ីជ្រៅ» ស្អីគេនោះ ។
ឥរិយាបទប្រែប្រួលមិនទៀងទាត់ របស់ កឹម សុខា បានធ្វើអោយមេបក្សប្រឆាំងរូបនេះនឹកឃើញនូវនយោបាយចាស់ដែលហៅថា (សម្ព័ន្ធភាពអ្នកប្រជាធិបតេយ្យ) ធ្លាប់បានបរាជយ័កាលពីប៉ុន្មានឆ្នាំកន្លងមក បន្ទាប់ពីលទ្ធផលនៃការបោះឆ្នោតជាតិ ឆ្នាំ២០០៨ បញ្ជាក់ថា គណបក្សប្រជាជនកម្ពុជា ឈ្នះភ្លូកទឹក ភ្លូកដីនោះ ។ ឥឡូវនេះដោយមើលឃើញពីភាពប្រាកដនូវបរាជ័យជាថ្មីទៀតក្នុងការបោះឆ្នោតក្រុមប្រឹក្សា ឃុំ-សង្កាត់ កាលពីថ្ងៃទី ០៣ មិថុនា ដែលបង្ហាញពីភាពខ្លាំង ឈ្នះដ៏លើសលុប របស់គណបក្សប្រជាជនកម្ពុជាដដែលនោះ បានធ្វើអោយអ្នកនយោបាយមុខចាញ់ដដែលៗ
ជ្រើសយកការបង្រួបបង្រួម ច្របាច់បញ្ចូលគ្នាដើម្បីបង្កើតបក្សតែមួយនេះមកអនុវត្តន៏ដដែល។
សម្ព័ន្ធភាពអ្នកប្រជាធិបតេយ្យ ដែលផ្តួចផ្តើមដោយ កឹម សុខា ធ្លាប់ទទូលរងនូវការប្រមាថពី សម
រង្ស៊ី កន្លងរួចមកហើយ ដែលកាលនោះ លោក សម រង្ស៊ី បានចាត់ទុកគណបក្ស សិទ្ធិមនុស្សថា ជាគ្រាប់ខ្សាច់ ដោយលើកតំកើងបក្សខ្លួនថា ជាភ្នំ ហើយថែមទាំងអះអាងថា ភ្នំមិនអាចច្របាច់បញ្ចូលជាមួយនឹងខ្សាច់បាននោះទេ ។ ចុះហេតុអ្វីនៅពេលនេះ ភ្នំរង្ស៊ី ព្រមប្រកាសទទួលយកការសុំបង្រួបបង្រួមពីខ្សាច់ កឹម សុខា នោះទៅវិញ? តើមានហេតុផលនយោបាយអ្វីខ្លះដែលនៅពីក្រោយខ្នងអ្នកនយោបាយ
ប្រជាភិថុតិទាំងពីរនេះ? តើការរួបរួមនេះអាចដំណើការទៅបានក្នុងកំរិតណា?
ជុំវិញការប្រកាសបង្កើតសម្ព័ន្ធភាពរបស់គណបក្សប្រឆាំងទាំងពីរ
ត្រូវបានអ្នកតាមដានស្ថានការណ៏នយោបាយកម្ពុជាវាយតម្លៃថា: "ជាសម្ព័ន្ធភាពទឹកកក កណ្តាលថ្ងៃត្រង់" បង្កើតដើម្បីតែការរលាយវិញតែប៉ុណ្ណោះ ព្រោះជាលក្ខណះសត្យានុមត័ ទឹកកក មិនអាចទប់នឹងកំដៅថ្ងៃបាន ហើយទឹក ក៏មិនអាចរលាយបញ្ចូលគ្នាជាមួយ និងប្រេងនោះដែរ យ៉ាងណាមិញ ជាលក្ខណះនៃចរិកធម្មជាតិរបស់លោក សម
រង្ស៊ី និង កឹម សុខា មិនអាចនិងចុះសំរុងគ្នាបាន ដោយអ្នកទាំងពីរជាអ្នកនយោបាយអាជីព មានជំនាញវិជ្ជាជីវៈច្បាស់លាស់ខាង បោកប្រាស់ ភូតភរ ដើម្បីលាបសក្ការៈ
ក្នុងមហិច្ឆិតា បំពេញក្តីសុបិន្តកណ្តាលថ្ងៃត្រង់ថា និងបានក្លាយជានាយករដ្ឋមន្រ្តី រៀងៗខ្លួននោះ។ បើម្នាក់ៗសុទ្ធតែចង់ធ្វើធំ ធ្វើជាមេបែបនេះ តើនណាជាមេបក្ស? តើកឹម សុខា អាចជ្រកក្រោមដំបូលផ្លាក គណបក្ស សម រង្ស៊ី បានដែរឬេទ? តើ សម រង្ស៊ី អាចដោះស្លាកបក្សដែលមានលក្ខណៈជារបស់បុគ្គលផ្ទាល់ខ្លួនបានដែរឬអត់?
ក្នុងភាពជាមនុស្ស
ដែលមានចរិតរឹងរូស មិនចេះទទួលស្គាល់ការពិត អត្តនោម័ត គ្រួសារ បក្សពួកជ្រុលនិយម របស់ លោក សម រង្ស៊ី បញ្ជាក់ច្បាស់ណាស់ថា មិនអាចនិងចុះសំរុងគ្នានិង ចរិតអំនួតក្អេងក្អាង ច្រលោងខាម មិនចុះញ៉ម របស់លោក កឹម
សុខា នោះបានទេ ។
បើយ៉ាងដូច្នេះ ការចងសម្ព័ន្ធភាព
ឬ ការបង្រួបបង្រួមបញ្ចូលគ្នាជាបក្សតែមួយនោះវាគ្រាន់តែជាលេស ដើម្បីតែការបោកបញ្ឆោតគ្នា ទាញយកផលចំណេញខាង នយោបាយរៀងៗខ្លួនតែប៉ុណ្ណោះ ។ តើក្នុងល្បែងនយោបាយ
លើវិថីដ៏ផុយស្រួយនេះ សម
រង្ស៊ី បោក កឹម សុខា ឬ កឹម សុខា ជាអ្នកបោក សម
រង្ស៊ី? ចំលើយនេះ
និងមានក្នុងពេលដ៏ខ្លីខាងមុខ!
សរុបសេចក្តីមក ទោះបីជាក្នុងលក្ខណៈដែលគណបក្ស
សម រង្ស៊ី និង សិទ្ធិមនុស្ស ឬ គណបក្ស ហ្វុនស៊ីនប៉ិច និង នរោត្តម រាណឬទ្ធិ ច្របាច់បញ្ចូលគ្នាយ៉ាងណាក៏ដោយ
ក៏លទ្ធផលបឋម ក្នុងការបោះឆ្នោតក្រុមប្រឹក្សា
ឃុំ-សង្កាត់ ក្នុងពេលថ្មីៗកន្លងទៅនេះបានបញ្ជាក់យ៉ាងច្បាស់ថា
គណបក្សប្រជាជនកម្ពុជា នៅតែរក្សាបានភាពឈ្នះដាច់ រហូតដល់ទៅ ១៥៩១ លើឃុំ-សង្កាត់សរុប ១៦៣៣នៅទូទាំងប្រទេស គឺឈ្នះស្នើនឹង៧៦%
ដែលលទ្ធផលនេះជាកញ្ចក់ធ្លុះបញ្ចាំងពីលទ្ធផលក្នុងការបោះឆ្នោតថ្នាក់ជាតិនាឆ្នាំ២០១៣ ខាងមុខនេះ៕