បទអត្ថាធិប្បាយ
តើនរណាជាអ្នកបញ្ចប់ជីវិតនយោបាយរបស់ សម រង្ស៊ី?
នៅទីបំផុត យុទ្ធសាស្ត្របំផ្លិចបំផ្លាញដ៏ជ្រុលនិយម
រួមផ្សំជាមួយនឹងភាពច្រឡោងខាមក្នុងអត្តភាពជាមេដឹកនាំបក្សប្រឆាំងដែលប្រកាន់ទម្លាប់យកច្បាប់ទ្រាប់អង្គុយ
និងការមិនបានផ្លាស់ប្តូរឥរិយាបថនៅពីក្រោយកំហុសដ៏ធំរបស់ខ្លួន
បាននាំឱ្យលោកសម រង្ស៊ី ដើរដល់ផ្លូវទាល់ច្រក ស្មើនឹងការសម្រេចចិត្តដាក់ខ្នោះជើងដោយខ្លួនឯង។
តើស្ថានភាពដ៏អាក្រក់នេះ នរណាជាអ្នកបិទផ្លូវមិនឱ្យលោក សម រង្ស៊ី ចូលស្រុក?
។
លោក សម រង្ស៊ី ត្រូវអវត្តមាននៅក្នុងប្រទេសរបស់ខ្លួន
បន្ទាប់ពីលោកបានកសាងនូវកំហុសព្រហ្មទណ្ឌក្នុងរឿងដកបំផ្លាញតម្រុយបង្គោលព្រំដែនកម្ពុជា‑
វៀតណាម ក្នុងអ្វីមួយដែលលោករំពឹងទុកថា
នឹងទទួលបាននូវផលប្រយោជន៍ត្រឡប់មកវិញ
គឺការគាំទ្រពីប្រជាពលរដ្ឋនៅទូទាំងប្រទេស ប៉ុន្តែ
ផ្ទុយទៅវិញសកម្មភាពបំពានផ្លូវច្បាប់នោះ បាននាំឱ្យមហិច្ឆិតារបស់គាត់ត្រូវបានកាច់បំបាក់។
ដោយមានទំនុកចិត្តលើខ្លួនឯងជ្រុលហួសហេតុ
មួយជីវិតនយោបាយរបស់លោក សម រង្ស៊ី
គ្មានអ្វីក្រៅពីការដើរអួតប្រាប់សហគមន៍អន្តរជាតិ
និងក្រុមអង្គការប្រឆាំងមួយចំនួននៅឯបរទេសដោយភាពជឿជាក់ថា
លោកប្រាកដជាមានសមត្ថភាពគ្រប់គ្រាន់ក្នុងការបណ្តេញសម្តេចតេជោ ហ៊ុន សែន ចេញពីដំណែងនាយករដ្ឋមន្ត្រីនៅថ្ងៃណាមួយដែលលោកអាចធ្វើទៅបាន។
ប៉ុន្តែ ម្តងហើយម្តងទៀត
បន្ទាប់ពីបរាជ័យនៅលើទីលានប្រជាធិបតេយ្យក្នុងប្រទេស តាមរយៈការបោះឆ្នោតដោយស្មើភាព
ដោយសេរី ត្រឹមត្រូវ យុត្តិធម៌ និងតម្លាភាព ក្នុងការដណ្តើមសម្លេងឆ្នោតពីប្រជាពលរដ្ឋអស់ពេល៣អាណត្តិកន្លងទៅ
លោក សម រង្ស៊ី បានរីងស្ងួតអស់នូវសារនយោបាយដែលធ្លាប់បានទទួលការទាក់ទាញសម្លេងគាំទ្រពីម្ចាស់ឆ្នោតបានមួយចំនួន
រហូតធ្លាក់មកដល់ការបាត់ទំនុកចិត្តស្ទើរតែទាំងស្រុង ដូចលទ្ធផលបណ្តោះអាសន្នត្រូវបានបង្ហាញក្រោយការបោះឆ្នោតជ្រើសរើសក្រុមប្រឹក្សាឃុំ‑សង្កាត់កាលពីថ្ងៃទី៣
ខែ មិថុនា ឆ្នាំ២០១២ គឺបក្សសម រង្ស៊ី ទទួលបានការគ្រប់គ្រងឃុំចំនួនតែ២៣ប៉ុណ្ណោះក្នុងចំណោមឃុំ
សង្កាត់១៦៣៣នៅទូទាំងប្រទេស។
ការដាំក្បាលចុះ និងការបាត់សិទ្ធិនយោបាយទាំងស្រុង
បានជម្រុញឱ្យលោក សម រង្ស៊ី ប្រើស្នៀតថ្មីៗជាច្រើនដ៏គ្រោះថ្នាក់សម្រាប់ជាតិ
គឺការប្រើយុទ្ធសាស្ត្រទាក់ទាញ ដោយញុះញង់ បង្កភាពចលាចលសង្គម
និងបំផុសឱ្យមានការងើបឡើងបះបោរដូចនៅពិភពអារ៉ាប់។
មួយថ្ងៃ មុនពេលបោះឆ្នោតជ្រើសរើសក្រុមប្រឹក្សាឃុំ សង្កាត់
លោកសម រង្ស៊ី បានផ្ញើសារបោកប្រាស់ម្ចាស់ឆ្នោតថា ក្រោយការបោះឆ្នោតនេះរួច
លោកនឹងត្រឡប់ចូលមកធ្វើនយោបាយក្នុងប្រទេសវិញដោយមិនចាំបាច់ចរចា និយាយជាមួយសម្តេចតេជោ
ហ៊ុន សែនទេ ដោយចាត់ទុកថា សម្តេចតេជោ ជាអាយ៉ងគេ គឺលោក សម រង្ស៊ី អះអាងថា
នឹងទៅនិយាយជាមួយចៅហ្វាយនាយរបស់ហ៊ុន សែន វិញដើម្បីឱ្យគេដាក់ការគាបសង្កត់មកលើសម្តេច។
គេបានកត់សម្គាល់ឃើញថា កន្លងមកសម្តេចតេជោ ហ៊ុន សែន
នាយករដ្ឋមន្ត្រី មិនដែលផ្ញើសារណាមួយបិទទ្វាការវិលត្រឡប់មកវិញរបស់លោក
សម រង្ស៊ីម្តងណាទេ។ ប៉ុន្តែ គេបានឃើញ និងឮជាបន្តបន្ទាប់ពីទណ្ឌិត សម រង្ស៊ី
ស្រែកពីក្រៅប្រទេសមកដើម្បីបិទបាំងកំហុសរបស់ខ្លួន ដោយព្រមានឥតឈប់ឈរថា
អន្តរជាតិ និងប្រទេសមហាអំណាចធំៗ គេនឹងដាក់ការគៀបសង្កត់មកលើរដ្ឋាភិបាលសព្វថ្ងៃ
។ សម្លេងនេះ វាពិតជាដូច «សត្វក្អាត់នៅក្នុងក្អមមែន» នេះ
គឺជាការប្រដូចរបស់សម្តេចតេជោហ៊ុន សែន ឆ្លើយតបចំពោះទង្វើរបស់ទណ្ឌិត សម
រង្ស៊ី ។
សម្តេចតេជោហ៊ុន សែន
បានសុំឱ្យមេដឹកនាំបក្សប្រឆាំងរូបនោះថត និងកត់ត្រាសម្តីខ្លួនឯងទុក
ហើយបានជម្រុញឱ្យទៅចរចាជាមួយវៀតណាម និងអ្នកដែលមានឥទ្ធិពលលើវៀតណាម
ដើម្បីដាក់សម្ពាធវៀតណាម។ សម្តេច ក៏បានប្រៀបប្រដូចសម្តីនេះទៅនឹងសម្តីរបស់លោក
ខៀវ សំផន ដែលបានប្រើនៅពេលដែលលោកជិតឈានជើងទៅចរចាជាមួយសម្តេចព្រះបាទនរោត្តម
សីហនុ សម្តេចថាលោក ខៀវ សំផន ក៏បាននិយាយដូចគ្នាថា មិនត្រូវទៅចរចាជាមួយអាយ៉ងភ្នំពេញទេ
ត្រូវចរចាជាមួយក្រុងហាណូយ។ សម្តេចបានមានប្រសាសន៍ថា ខ្ញុំអរគុណ
ព្រោះខ្ញុំក៏មិនចង់ឱ្យអ្នកណាម្នាក់មករំខានខ្ញុំទេ
កុំមកចរចាសម្របសម្រួលអីជាមួយខ្ញុំ អត់ទេ
ព្រោះខ្ញុំជាអាយ៉ងគ្មានសិទ្ធិ។បន្ថែមពីលើនេះ សម្តេច បានបញ្ជាក់ថា អ្នកដែលមានសិទ្ធិត្រួតត្រាហ៊ុន
សែន បាន គឺមានតែប្រជាជនខ្មែរប៉ុណ្ណោះ សំឡេងភាគច្រើននៃប្រជាជនខ្មែរ
ទើបមានសិទ្ធិត្រួតត្រា ហ៊ុន សែន ....។
ចំលើយរបស់សម្តេច គឺជាការវាយផ្ទប់
ទៅមេបក្សដែលមិនយល់ពីស្ថានការណ៍ ។ នេះ
គឺជាការធ្វើអត្តឃាតនយោបាយខ្លួនឯងរបស់មេបក្សប្រឆាំង សម រង្ស៊ី ។ តាមពិតលោក
សម រង្ស៊ី ដឹងច្បាស់ណាស់ថា
រាល់ការស្នើសុំព្រះរាជអន្តរាគមន៍លើកលែងទោសណាមួយ ជាពិសេសចំពោះអ្នកនយោបាយ
ទៅព្រះមហាក្សត្រ គឺទាល់តែមានចំណារឯកភាពពីសម្តេចតេជោនាយករដ្ឋមន្ត្រី។
ដូច្នេះ រាល់សកម្មភាពផ្គើន និងគំរាមម្តងហើយម្តងទៀតចំពោះសម្តេចតេជោ
ដោយបុគ្គល សម រង្ស៊ី តើមានតម្លៃអ្វីសម្រាប់បង្ខំការសម្រេចចិត្តរបស់សម្តេចឱ្យមកឱនលំទោនចំពោះទណ្ឌិតនោះ?
នយោបាយពឹងបរទេសដើម្បីឱ្យមកជួយអន្តរាគមន៍ការពារកំហុសរបស់ខ្លួន
គឺជាទង្វើទាបថោក ពុំសក្តិសមជាមេបក្សដែលធ្លាប់តែស្រែកថា
មិនរណបបរទេសណាទាំងអស់ ជាពិសេសប្រទេសវៀតណាម។ ចុះពេលនេះ លោក សម រង្ស៊ី
បំរុងនឹងធ្វើអ្វីនៅក្នុងដំណាក់កាលទាល់ច្រកនយោបាយនេះ? អ្វីទៅជាឧត្តមគតិរបស់សម រង្ស៊ី
ដែលធ្លាប់តែដើរស្រែកជេរប្រទេសវៀតណាមរាល់ថ្ងៃនៅឯក្រៅប្រទេស និងចោទប្រកាន់ដោយគ្មានការពិតថា
វៀតណាមបានរំលោភលើទឹកដីខ្មែរ ? ឬមួយក៏លោក សម រង្ស៊ី ធ្វើជាល្ងង់ខ្លៅ
ឆ្កួតវង្វេងបាត់សតិ?
ចរិតរឹងរូស អត្តនោម័តនិយមហួសហេតុ
និងការមិនផ្លាស់ប្តូរឥរិយាបថរបស់លោក សម រង្ស៊ី បានរុញវាសនារបស់លោក
សមរង្ស៊ី ឱ្យដើរទាល់ច្រកដោយខ្លួនឯង។ គេនៅចាំបានថា
កន្លងមកលោក សម រង្ស៊ី ក៏ធ្លាប់បានសរសេរលិខិតមកសម្តេចតេជោ ហ៊ុន សែន
ដោយបានសុំទោស និងសំដែងនូវការសោកស្តាយចំពោះការចោទប្រកាន់នានាមកលើសម្តេច
។ល។និង។ល។ ថាជារឿងដែលខ្លួនភូតកុហក និយាយមិនពិត ហើយសន្យាថា នឹងមិនឱ្យមាននូវកំហុសជាថ្មីទៀតទេ។
ដូច្នេះកំហុសដ៏ច្រើនរាប់មិនអស់របស់លោកសម រង្ស៊ី គឺមិនអាចលាក់បាំងពីក្រសែភ្នែកម្ចាស់ឆ្នោតបានឡើយ ហើយសូម្បីតែឈ្មោះរបស់លោក សម រង្ស៊ី មកដល់ពេលនេះ
គឺពលរដ្ឋជាច្រើនស្ទើរតែភ្លេច លែងនឹកនាំទៀត គឺគេបានស្គាល់លោក សម រង្ស៊ី
បច្ចុប្បន្នត្រឹមតែជាទណ្ឌិតដ៏ទន់ជ្រាយម្នាក់ និងគ្មានមនសិការជាតិ ពីព្រោះមជ្ឈដ្ឋានទូទៅគេដឹងថា
នៅក្នុងបេះដូង និងចិត្តគំនិតរបស់គាត់ ( សម រង្ស៊ី) គឺដក់ជាប់ដោយគំនុំនិងការសងសឹកគ្មានទីបញ្ចប់។
សម រង្ស៊ី
គឺជាមេបក្សនយោបាយមួយរូបដែលបាន និងកំពុងខិតខំពង្រីកបញ្ហាតូច
ឱ្យទៅជារឿងធំ និងគ្មានអ្វីក្រៅពីការប៉ុនប៉ងកំទេច បំផ្លាញសន្តិភាព និងរុញច្រានស្ថានការណ៍នៅកម្ពុជាឱ្យធ្លាក់ចូលក្នុងភាពអន្តរាយនោះទេ
។ បើនៅកម្ពុជាត្រូវវិនាសហិនហោច កាប់សម្លាប់គ្នា ខ្ទេចខ្ទីអស់
ឬមានសង្គ្រាមពេញផ្ទៃប្រទេស នោះទើបលោក សម រង្ស៊ី សប្បាយចិត្ត និងចាត់ទុកថាវាជាជោគជ័យរបស់ខ្លួន
សមដូចការវិភាគរបស់លោក Thomas
Mann Miller ដែលបានចុះផ្សាយនៅក្នុងទស្សនាវដ្តីនយោបាយការបរទេស កាលពីថ្ងៃទី១
ខែមិថុនា ឆ្នាំ ២០១២ អ្នកនិពន្ធរូបនេះបានទទួលស្គាល់ថា លោក សម រង្ស៊ី
គឺជាមនុស្សគ្រោះថ្នាក់បំផុត ក្នុងន័យថា ទណ្ឌិតសម រង្ស៊ី បាន និងកំពុងលេងល្បែងនយោបាយមួយដៃចុងក្រោយបំផុតរបស់លោក
ក្នុងការបំផុសឡើងនូវចលនាបះបោរប្រឆាំងជាមួយរដ្ឋាភិបាលសព្វថ្ងៃ ។
មហិច្ឆិតារបស់លោក សម
រង្ស៊ី ក្នុងការប៉ុនប៉ងទម្លាក់សម្តេចតេជោ ហ៊ុន សែន
គឺបានចាក់ឬសយ៉ាងរឹងមាំជាយូរមកហើយ។ ជាក់ស្តែង
គឺបានកើតមានឡើងបន្ទាប់ពីលោកសម រង្ស៊ី បានប្រកាសជាចំហរថា « បើមានសម
រង្ស៊ី គឺអត់ហ៊ុន សែន ហើយបើមានហ៊ុន សែន គឺអត់សម រង្ស៊ី»។
ទង្វើញុះញង់ឱ្យមានការងើបឡើងបះបោរនោះ នឹងមិនអាចកើតមានបានជាដាច់ខាតនៅកម្ពុជា។
ហេតុអ្វីបានជាទណ្ឌិត សម រង្ស៊ី នៅតែចចេះរឹងរូសចង់យកមកអនុវត្ត រំលោភលើឆន្ទះរបស់ប្រជាពលរដ្ឋម្ចាស់ឆ្នោត?
។ ទោះបីយ៉ាងណា រាជរដ្ឋាភិបាលមានកាតព្វកិច្ចពេញលេញក្នុងការចាត់វិធានការផ្លូវច្បាប់ដើម្បីការពាររដ្ឋធម្មនុញ្ញ
គឺនឹងមិនអនុញ្ញាតឱ្យមានការទម្លាក់ ឬដកហូតសិទ្ធិរបស់នាយករដ្ឋមន្ត្រីស្របច្បាប់ចេញពីដំណែង
ធ្វើឡើងតាមរបៀបបដិវត្តន៍ប្រជាជននោះឡើយ។
ដូច្នេះ គោលបំណងធំរបស់ទណ្ឌិត សម រង្ស៊ី គ្មានសុពលភាពដើម្បីយកមកអនុវត្តនៅក្នុងប្រទេសកម្ពុជា
ដែលកំពុងប្រកាន់ខ្ជាប់នូវលទ្ធិប្រជាធិបតេយ្យសេរីពហុបក្ស នោះទេ ហើយការប្រកាសថា « ខ្ញុំ សម រង្ស៊ី
នឹងវិលចូលស្រុកវិញដោយមិនត្រូវការនិយាយ ចរចាជាមួយសម្តេច ហ៊ុន សែន នោះ»
អ្នកដែលទៅជួបលោក សម រង្ស៊ី មុនគេនៅក្លោងទ្វារបស់ប្រទេស
គឺប្រាកដជាកម្លាំងសមត្ថកិច្ចជាអ្នកអនុវត្តនូវសេចក្តីសំរេចរបស់តុលាការ ដែលនឹងកាន់យកទៅជាមួយនូវខ្នោះសម្រាប់រង់ចាំទទួលស្វាគមន៍។
ផលកម្មនេះ តើនរណាជាអ្នកបញ្ចប់ជីវិតនយោបាយរបស់ សម រង្ស៊ី?
អត្ថបទដោយៈ គង់ សម្បត្តិ