នៅព្រឹកថ្ងៃទី២៤
ខែ មិថុនា ឆ្នាំ ២០១២ នាយករដ្ឋមន្ត្រីនៃប្រទេសកម្ពុជាសម្តេចតេជោហ៊ុន សែន និងនាយករដ្ឋមន្ត្រី
នៃសាធារណរដ្ឋសង្គមនិយមវៀតណាម ឯកឧត្តម ង្វៀន តាន់ យុង បានអញ្ជើញជាអធិបតី
សម្ពោធជាផ្លូវការបង្គោលព្រំដែនលេខ៣១៤ នៅក្នុងខេត្តកំពត និងគៀនយ៉ាង ដោយមានការចូលរួមពីមន្ត្រីជាន់ខ្ពស់របស់រដ្ឋាភិបាល មន្ត្រីការទូត មន្ត្រីសាលាខេត្ត អ្នកពាណិជ្ជករ អាជ្ញាធរ និងសិស្ស និស្សិតនិងប្រជាពលរដ្ឋនៃប្រទេសទាំងពីរ ព្រមទាំងអ្នកសារព័ត៌មានយ៉ាងច្រើនកុះករ។
ពិធីសម្ពោធជាផ្លូវការបង្គោលព្រំដែនលេខ៣១៤
នាពេលនេះ។ នេះជាពិធីលោកទី ២ ហើយបន្ទាប់ពីការសម្ពោធបង្គោលព្រំដែនលេខ ១៧១
នៅច្រកទ្វារព្រំដែនអន្តរជាតិ បាវិត ម៉ុកបាយ កាលពីឆ្នាំ ២០០៦ កន្លងទៅ។
សម្តេចតេជោ ហ៊ុន
សែន នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ថា ការសម្ពោធបង្គោលព្រំដែនលេខ៣១៤
នាពេលនេះពុំមានន័យថា ជាការសម្ពោធចាប់ផ្តើមបោះបង្គោល ហើយក៏មិនមែនជាការសម្ពោធបញ្ចប់ការបោះបង្គោល
និងខ័ណ្ឌសីមាព្រំដែនរវាងប្រទេសយើងទាំងពីរទាំងស្រុងនោះទេ ពីព្រោះយើងនៅមានការងារសេសសល់មួយចំនួនទៀត
ដែលត្រូវអនុវត្តបន្តរហូតដល់កិច្ចការទាំងអស់ត្រូវបានបញ្ចប់ជាស្ថាពរនាពេលខាងមុខ។
ការបោះបង្គោលព្រំដែន មិនត្រឹមតែរួមចំណែកយ៉ាងសំខាន់ដល់កិច្ចការពារបូរណភាពដែនដីនៃប្រទេសនីមួយៗនៅជិតខាងគ្នា
ឱ្យបានកាន់តែរឹងមាំប៉ុណ្ណោះទេ ប៉ុន្តែថែមទាំងរួមចំណែកដល់ការបង្កើនសុខភាព
ការជំរុញកំណើន សេដ្ឋកិច្ច ការអភិវឌ្ឍសង្គម លើកកម្ពស់ជីវភាពប្រជាពលរដ្ឋរស់នៅ និងការកាត់បន្ថយភាពក្រីក្រ របស់ប្រជាជនទៀតផង។
ជាមួយគ្នានេះ
សម្តេចនាយករដ្ឋមន្រ្តី បានធ្វើការកោតសរសើរ និងវាយតម្លៃខ្ពស់
ដល់គណៈកម្មកាចម្រុះខណ្ឌសីមា និងបោះបង្គោលព្រំដែនគោកកម្ពុជា-វៀតណាមដែលខំប្រឹងប្រែងធ្វើការងារបោះបង្គោលព្រំដែនបានប្រព្រឹត្តទៅដោយរលូន
និងមានការទទួលស្គាល់ពេញលក្ខណៈផ្លូវច្បាប់។
សម្តេចនាយករដ្ឋមន្ត្រីបានមានប្រសាសន៍បន្ថែមថា ចំពោះមុខ នេះដែរកម្ពុជាមានគោលដៅបន្តឆ្ពោះទៅកំណត់ព្រំដែនទឹកថែមទៀត
ដោយចាប់ផ្តើមពីការតភ្ជាប់ ព្រំដែន គោកនៃប្រទេសទាំងពីរដោយមានភាពពេញលេញ
ដោយគ្មានភាពលំអៀងឈរលើគោលការណ៏ នៃច្បាប់ និងក្របខ័ណ្ឌគតិយុត្តអន្តរជាតិ។
សម្តេចតេជោ ហ៊ុន
សែន បានប្រកាសជាឱឡារិកថា កិច្ចការកសាងព្រំដែននេះគឺ បានអនុវត្តដោយឈលើមូលដ្ឋានច្បាប់ជាតិ
និងច្បាប់អន្តរជាតិ និងការអនុវត្តជាអន្តរជាតិស្តីពីការទទួលស្គាល់ខ្សែព្រំដែន
ដែលអាណានិគមនិយមបារាំងបានបន្សល់ទុកឱ្យសម្រាប់ធ្វើជាឧបករណ៏នាំមុខ ដើម្បីឈានទៅដល់កាបញ្ចប់ទាំងស្រុងលើការងារខ័ណ្ឌសីមា និងបោះបង្គោលព្រំដែនគោករវាងប្រទេសទាំងពីរ។
ជាក់ស្តែងបង្គោលព្រំដែនលេខ៣១៤ នេះមានសារៈសំខាន់ណាស់ដោយទីតាំងបង្គោលនេះជាចំណុចមូលដ្ឋាននៃ
ការចាប់ផ្តើមគូសខ្សែព្រំដែនសមុទ្ររវាងប្រទេសទាំងពីរ ដែលជាភារកិច្ចរបស់គណៈកម្មការចម្រះព្រំដែននៃប្រទេសទាំងពីរត្រូវអនុវត្តបន្តនាពេលខាងមុខនេះ។
ចំពោះមុខរាជរដ្ឋាភិបាលកម្ពុជា និងរដ្ឋាភិបាលវៀតណាមនឹងខិតខំពុះពារគ្រប់ឧបសគ្គទាំងអស់
ធ្វើឱ្យប្រទេសយើងទាំងពីរមានខ្សែព្រំដែនសមស្របជាព្រំដែនអន្តរជាតិសម្រាប់ជាតិមាតុភូមិនៃយើងទាំងអស់គ្នាតរៀងទៅ
និងដើម្បីឱ្យប្រទេសយើងទាំងពីរមានខ្សែព្រំដែនមួយច្បាស់លាស់ស្តែងឡើង ដោយបង្គោលព្រំដែន
ដោយប្រែក្លាយខ្សែព្រំដែន ដែលមានតែនៅលើផែនទីឱ្យទៅជាបង្គោលព្រំដែននៅលើដីជាក់ស្តែង។
ព្រមជាមួយនេះនៅពេលដែលការងារបោះបង្គោល និងខ័ណ្ឌសីមាព្រំដែនត្រូវបានធ្វើរួចរាល់ហើយ
គឺខ្សែព្រំដែននេះ ត្រូវដើស្របគ្នាទៅនឹងការកាន់កាប់ជាក់ស្តែងរបស់ប្រជាជនដែលរស់នៅតាមបណ្តោយព្រំដែន
ហើយប្រែក្លាយព្រំដែនកម្ពុជា-វៀតណាមឱ្យទៅជាព្រំដែនសុខសន្តិភាព មិត្តភាព សហប្រតិបត្តិការ
និងការអភិវឌ្ឍន៏លើគ្រប់វិស័យ។
ជារួម ខ្សែព្រំដែនកម្ពុជា-វៀតណាមប្រវែងប្រមាណ
១.២៧០ គីឡូម៉ែត្រ ដែលត្រូវបោះបង្គោលព្រំដែនចំនួន ៣១៤ បង្គោល នេះមិនត្រឹមតែបានឆ្លើយតបដល់ការជំរុញកិច្ចសហប្រតិបត្តិការ
និងការអភិវឌ្ឍន៏ប្រទេសនៅក្នុងមហាអនុតំបន់មេគង្គប៉ុណ្ណោះទេ ប៉ុន្តែថែមទាំងរួមចំណែកបង្កើនកិច្ចសហការល្អក្នុងចំណោមប្រជាជាតិ-អាស៊ីអាគ្នេយ៍
ដើម្បីប្រែក្លាយខ្លួនស្របតាមបាវចនា «អាស៊ាន សហគមន៍តែមួយ-វាសនាតែមួយ» ផងដែរ។
សម្តេចតេជោ ក៏បានវាយតម្លៃខ្ពស់ ចំពោះគណៈកម្មការចម្រុះព្រំដែននៃប្រទេសទាំងពីរ
ដែលបានខិតខំប្រឹងប្រែងអស់ពីកម្លាំងកាយចិត្ត និងបានសហការគ្នាយ៉ាងជិតស្និទ្ធ
ដើម្បីសម្រេចបានដំណើរការបោះបង្គោល និងខ័ណ្ឌសីមាព្រំដែនគោករវាងប្រទេសយើងទាំងពីរ
ជាពិសេសការរៀបចំកសាងបង្គោលព្រំដែនលេខ៣១៤ ដែលជាបង្គោលចុងក្រោយបង្អស់នៃព្រំដែនគោកកម្ពុជា-វៀតណាមនៅចំណុចឆ្នេរសមុទ្រខេត្តកំពត
និងគៀនយ៉ាងនេះ។ ទន្ទឹមនេះដែរ សម្តេចក៏បានលើកឡើងផងដែរថា ការរៀបចំពិធីសម្ពោធការបោះបង្គោលព្រំដែននេះចំពេលជាមួយគ្នា
និងថ្ងៃខួបអនុស្សាវរីយ៍លើកទី ៤៥ឆ្នាំ នៃការបង្កើតទំនាក់ទំនងការទូតរវាងប្រទេសយើងទាំងពីរ ២៤ មិថុនា ១៩៦៧ - ២៤ មិថុនា ២០១២។ សម្តេចបានយកឱកាសនេះឧទ្ទេសពិធីសម្ពោធការបោះបង្គោលព្រំដែនកម្ពុជា- វៀតណាម លេខ៣១៤
ឱ្យក្លាយទៅជាយន្តការប្រកៀកស្មាគ្នាក្នុងស្មារតីភាតរភាពជាអមតៈ និងការបង្កើតនូវកិច្ចអភិវឌ្ឍគ្រប់វិស័យនៅតាមខ្សែបន្ទាត់ព្រំដែននៃប្រទេសទាំងពីរ។
សម្តេចក៏បានធ្វើការថ្លែងអណរគុណផងដែរចំបពោះឯកឧត្តមអភិបាល
ខេត្តគៀន យ៉ាងដែលបានសហការគ្នាររៀបចំពិធីសម្ពោធដ៏មហោឡារិកនេះ
ដើម្បីញុំាងឱ្យពិធីនេះប្រព្រឹត្តិទៅក្នុងបរិយាកាសរីករាយអធិកអធម និងជាមិត្តភាពរវាងប្រទេសទាំងពីរ។
ក្នុងនាមរដ្ឋាភិបាលកម្ពុជា សម្តេចក៏បានថ្លែងអំណរគុណចំពោះរដ្ឋាភិបាលវៀតណាមដែលបានជួយដល់រាជរដ្ឋាភិបាលកម្ពុជាលើការចំណាយមួយចំនួន
ដែលបម្រើដល់ដំណើរការខណ្ឌសីមា និងបោះបង្គោលព្រំដែនគោកនៃប្រទេសយើងទាំងពីរ
ជាពិសេសការជួយឧបត្តម្ភដល់ មន្រ្តីបច្ចេកទេសព្រំដែនកម្ពុជា-វៀតណាមដែលបានរួមសុខទុក្ខ
តស៊ូពុះពារការលំបាករួមគ្នានៅតំបន់ព្រៃភ្នំ តំបន់ដាច់ស្រយាល ដើម្បីបំពេញបានការងារជាប្រវត្តិសាស្ត្រដ៏មាន
សារៈដំខាន់សម្រាប់កូនចៅយើងទៅថ្ងៃក្រោយ។
នាយករដ្ឋមន្រ្តីវៀតណាម
បានមានប្រសាសន៍ថា នេះជាលើកទី២ហើយ ដែលបានរួមគ្នាសម្ពោធ បង្គោលព្រំដែន
ដែលលើកទី១ បានធ្វើឡើងនៅខេត្តស្វាយរៀងនោះ។
ឯកឧត្តម ង្វៀន
តាន់យ៉ុង បានមានប្រសាសន៍បន្តថា ការបោះបង្គោលព្រំដែនលេខ៣១៤ និងបង្គោលព្រំដែនដទៃទៀត
នៃប្រទេសទាំងពីរ មិនមែនបង្ហាញពីសន្តិភាព និងកិច្ចសហប្រតិបត្តិការ នៃការកំណត់ព្រំដែននោះទេ តែវាធ្វើឱ្យមានការជំរុញសេដ្ឋកិច្ច
ពាណិជ្ជកម្ម ទេសចរណ៍ នៃប្រជាជនតាមបណ្តោយព្រំដែនប្រទេសទាំងពីរ។ ឯកឧត្តម បន្តថា
បង្គោលព្រំដែន ៣១៤ ស្ថិតនៅជាប់មាត់សមុទ្រនៃប្រទេសទាំងពីរ ដែលមានខ្យល់អាកាសបរិសុទ្ធនេះ
ដែលអនាគតរំពឹងថា នឹងក្លាយជាតំបន់ទេសចរណ៍ ដ៏សំខាន់របស់ប្រជាជន នៃប្រទេសទាំងពីរ និងភ្ញៀវទេសចរអន្តរជាតិ
ហើយពេលនោះ នឹងបង្ហាញពីកិច្ចសហប្រតិបត្តិការកាន់តែខ្លាំងរវាងប្រទេសទាំងពីរ។
ឯកឧត្តម ង្វៀន
តាន់យុង បានកោតសរសើរ ដល់មន្រ្តីគណៈកម្មការព្រំដែន នៃប្រទេសទាំងពីរ
ហើយលោកជំរុញឲ្យមន្រ្តី នៃប្រទេសទាំងពីរបន្តបោះបង្គោល ព្រំដែនដទៃទៀត។
បន្ទាប់ពីថ្លែងសុន្ទរកថា នាយករដ្ឋមន្រ្តី នៃប្រទេសទាំងពីរ បានឡើងទៅទាញក្រណាត់គ្របបង្គោលព្រំដែន
សម្ពោធជាផ្លូវការរួមគ្នា៕
អត្ថបទ៖ អង្គភាពព័ត៌មាន និងប្រតិកម្មរហ័ស