ក្នុងឱកាសចូលជួបសម្តែងការគួរសម ជាមួយសម្តេចអគ្គមហាសេនាបតីតេជោ
ហ៊ុន សែន នៅ
វិមានសន្តិភាព នាថ្ងៃទី
២៦ ខែកក្កដា ឆ្នាំ
២០១២ ឯកឧត្តម Dinesh K. Patnaik ឯកអគ្គរដ្ឋទូតថ្មី នៃសាធារណរដ្ឋឥណ្ឌាប្រចាំព្រះរាជាណាចក្រកម្ពុជា
បានអះអាងអំពីការត្រៀមខ្លួនជានិច្ច ដើម្បីបំពេញបេសកកម្មការទូត ធ្វើឲ្យទំនាក់ទំនងរវាងប្រទេសទាំងពីរឥណ្ឌា-កម្ពុជា
ឈានដល់កម្រិតកំពូល។
ឯកឧត្តម
អ៊ាង សុផល្លែត ជំនួយការសម្តេចតេជោនាយករដ្ឋមន្រ្តីឲ្យដឹងថា
ឯកឧត្តម Dinesh K. Patnaik បានថ្លែងថា
លោកនឹងបង្កើនគម្រោងនៅកម្ពុជា ដូចជាជំរុញការបង្កើនសមត្ថភាពវិស័យកសិកម្ម ជំរុញឲ្យមានការហោះហើរត្រង់ពីឥណ្ឌាមកកាន់កម្ពុជា
ជំរុញទំនាក់ទំនងខាងវិស័យវប្បធម៌ ក៏ដូចជាការផ្សព្វផ្សាយអំពីកម្ពុជា ដើម្បីជាការទាក់ទាញទេសចរ
និងជំរុញឲ្យមានការវិនិយោគកាន់តែច្រើនឡើងថែមទៀតពីឥណ្ឌាមកកាន់កម្ពុជាផងដែរ។
សម្តេចតេជោនាយករដ្ឋមន្ត្រី
បានសម្តែងនូវការអបអរសាទរចំពោះឯកឧត្តម Dinesh K. Patnaik ដែលត្រូវបានតែងតាំងជាឯកអគ្គរដ្ឋទូតប្រចាំនៅព្រះរាជាណាចក្រកម្ពុជា និងបានជូនពរឲ្យបេសកកម្មការទូតរបស់លោកទទួលបានជោគជ័យ
។
សម្តេចតេជោ
មានប្រសាសន៍ថា ប្រទេសឥណ្ឌាបានដើរតួនាទីយ៉ាង សំខាន់នៅក្នុងការជួយកម្ពុជា ដើម្បីស្វែងរកដំណោះស្រាយនយោបាយ
ក៏ដូចជា ការអភិវឌ្ឍប្រទេសផងដែរ។
សម្តេចតេជោបានមានប្រសាសន៍ផ្តល់ជាអនុសាសន៍ថា ប្រទេសឥណ្ឌាគប្បីជំរុញទំនាក់ទំនង
ជាពិសេសលើវិស័យទេសចរណ៍ ព្រោះកម្ពុជា និងឥណ្ឌាមានទំនាក់ទំនងជាប្រវត្តិសាស្រ្ត
ហើយមានវប្បធម៌ប្រហាក់ប្រហែលគ្នា។ សម្តេចតេជោបញ្ជាក់ថា ការរៀបចំធ្វើជាខ្សែភាពយន្ត
ឬជាវីដេអូស្ពត ឆ្លុះបញ្ចាំងអំពីវប្បធម៌កម្ពុជា
ដែល ប្រហាក់ប្រហែលជាមួយឥណ្ឌា គឺជាការល្អណាស់។
ពាក់ព័ន្ធជាមួយការវិនិយោគ សម្តេចតេជោនាយករដ្ឋមន្រ្តីមានប្រសាសន៍ថា
ការវិនិយោគរបស់ឥណ្ឌាមកកាន់កម្ពុជា នៅមានកម្រិតនៅឡើយ ដែលគប្បីស្វែងរកទំនាក់ទំនងវិនិយោគលើវិស័យផ្សេងទៀត ដែលកំពុងតែមានសក្តានុពលខ្ពស់នៅកម្ពុជា។
ចំពោះវិស័យកសិកម្ម សម្តេចតេជោបានស្នើឲ្យឯកឧត្តមឯកអគ្គរដ្ឋទូតឥណ្ឌា ជួយជំរុញការវិនិយោគរបស់ឥណ្ឌាមកកាន់កម្ពុជា ជាពិសេស ការបង្កើតរោងចក្រម៉ាស៊ីនកិនស្រូវ
រោងចក្រកែឆ្នៃផលិតផលកសិកម្ម ដូចជាដំឡូងជាដើមព្រោះថា កម្ពុជា មានផលិតផលកសិផលជាច្រើន ដែលអាចកែឆ្នៃ ដើម្បីនាំចេញបាន៕
អត្ថបទអង្គភាពព័ត៌មាន
និងប្រតិកម្មរហ័ស