ឯកឧត្តម Yang Jiechi រដ្ឋមន្រ្តីក្រសួងការបរទេស
នៃសាធារណរដ្ឋប្រជាមានិតចិនបានជម្រាបជូនសម្តេចអគ្គមហាសេនាបតីតេជោ ហ៊ុន
សែន នាថ្ងៃទី ១០ ខែកក្កដា ឆ្នាំ២០១២ថា ប្រទេសចិននៅ តែបន្តជួយដល់កម្ពុជា
ក្នុងការផ្តល់ឥណទានជំរុញការទិញអង្ករ និងនាំផលិតផល កសិកម្មពីកម្ពុជា ទៅកាន់ប្រទេសចិន
ព្រមទាំងជួយជំរុញទេសចរណ៍ និងអ្នកវិនិយោគចិនមកកាន់ កម្ពុជាឲ្យកាន់តែច្រើនឡើងថែមទៀតផងដែរ។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្រ្តីបានឲ្យដឹងថា
នៅក្នុង ជំនួបនៅវិមានសន្តិភាពក្នុងរាជធានីភ្នំពេញ ឯកឧត្តមYang Jiechi បានជម្រាបជូនសម្តេចតេជោ នាយករដ្ឋមន្រ្តីថា លោកមានសេចក្តីសប្បាយរីករាយយ៉ាងខ្លាំង
ដែលបានមកចូលរួមក្នុងកិច្ចប្រជុំ រដ្ឋមន្រ្តីការបរទេសអាស៊ាននៅព្រះរាជាណាចក្រកម្ពុជា
ដែលនៅក្នុងដំណើរទស្សនកិច្ចនេះ លោក បានកត់សម្គាល់ឃើញថា កម្ពុជាមានការអភិវឌ្ឍយ៉ាងឆាប់រហ័ស
ដែលការនេះបានបង្ហាញឲ្យ ឃើញពីការដឹកនាំដ៏ឈ្លាសវៃរបស់សម្តេចតេជោ។ ដោយវាយតម្លៃខ្ពស់ចំពោះទំនាក់ទំនង
នៃ ប្រទេសទាំងពីរ កម្ពុជា-ចិន បានមានប្រសាសន៍ថា
កន្លងមកកម្ពុជាកើតមានជំងឺចម្លែកដែល បណ្តាលឲ្យកុមារកម្ពុជាប្រមាណជាង ៦០
នាក់បានស្លាប់ ហើយ ឯកឧត្តមYang Jiechi បានគោរព សុំការអនុញ្ញាតពីសម្តេចតេជោនាយករដ្ឋមន្ត្រីបញ្ជូនអ្នកឯកទេសចិន
និងជំនួយមកធ្វើការស្រាវជ្រាវដើម្បីស្វែងរកដំណោះស្រាយពីជំងឺរាត្បាតនេះ។
ឯកឧត្តម Yang Jiechi ថ្លែងថា ប្រទេសចិនក៏នឹងបន្តគាំទ្រជួយកម្ពុជា
ក្នុងការរៀបចំកិច្ចប្រជុំកំពូលអាស៊ាននៅក្នុងខែវិច្ឆិកា និងបានគោរពអញ្ជើញសម្តេចនាយករដ្ឋមន្រ្តី
ដើម្បីចូលរួមក្នុងការតាំង ពិព័រណ៍អាស៊ី-អឺរ៉ុប នៅប្រទេសចិននៅក្នុង
ខែកញ្ញា ខាងមុខនេះ។ សម្តេចតេជោនាយករដ្ឋមន្រ្តីបានថ្លែងថា សម្តេចនឹងពិនិត្យមើលពេលវេលាសមស្របព្រោះថា
នៅក្នុងខែនោះកម្ពុជាអាចនឹងមានគ្រោះទឹកជំនន់កើតឡើង។ សម្តេចតេជោនាយករដ្ឋមន្រ្តីបានថ្លែងអំណរគុណចំពោះ
ឯកឧត្តម Yang
Jiechi ដែលបានអញ្ជើញមកចូលរួមក្នុងកិច្ចប្រជុំជាមួយរដ្ឋមន្ត្រីការបទេសអាស៊ានលើកនេះ
ដែលជាកិច្ចប្រជុំមានសារសំខាន់ក្នុងការរៀបចំធ្វើឲ្យមានស្ថិរភាព និងសន្តិភាពដល់ប្រជាជន
រួមទាំងជំរុញដល់កិច្ចសហប្រតិបត្តិការក្នុងតបន់។ សម្តេចតេជោនាយករដ្ឋមន្រ្តីបានថ្លែងអំណរគុណ
ចំពោះការផ្តាំផ្ញើសាកសួរសុខទុក្ខពីថ្នាក់ដឹកនាំនៃសាធារណរដ្ឋប្រជាមានិតចិន
និងបានថ្លែងអំណរគុណ ចំពោះបំណងល្អក្នុងការជួយទប់ស្កាត់ ជំងឺចម្លែកដែលបណ្តាលឲ្យកុមារកម្ពុជាស្លាប់នាពេលថ្មីៗនេះ។សម្តេចតេជោក៏បានថ្លែងអំណរគុណដល់ប្រទេសចិនចំពោះការបន្តគាំទ្រផ្តល់ឥណទានជួយទិញអង្ករ
និងផលិតផលកសិកម្មពីកម្ពុជាទៅកាន់ប្រទេសចិន ក៏ដូចជា ការជំរុញទេសចរណ៍ និងវិនិយោគចិនមកកាន់កម្ពុជា
ផងដែរ៕
អត្ថបទអង្គភាពព័ត៌មាន
និងប្រតិកម្មរហ័ស