បទវិចារណកថា៖
ដល់ពេលដែល កឹម សុខា ចេញល្បិចដាក់ សម រង្ស៊ី ហើយ
យោងតាមខ្លឹមសារនៃបទវិចារណកថា ក្នុងកម្មវិធីពន្លឺភ្លើងទៀន របស់គណបក្ស សម រង្ស៊ី ដែលបានផ្សាយតាមវិទ្យុសំបុកឃ្មុំ កាលពីថ្ងៃទី២០ ខែសីហា ឆ្នាំ២០១២ នោះ ប្រជាពលរដ្ឋស្តាប់ទៅ គឺហាក់ដូចជាប្រទេសកម្ពុជា កំពុងថិតនៅមាត់ជ្រោះមរណៈ ដូចសម័យរបបប្រល័យពូជសាសន៍ទៅហើយ ពីព្រោះក្រុមប្រមូលផ្តុំជាគណបក្សសំបកនោះ បានស្រែកក្តែងៗថា « សង្គ្រោះជាតិៗ» មិនដាច់ពីមាត់សោះ។ ពួកគេអួតថាមានការចូលរួមពីប្រជាពលរដ្ឋ ពីមន្ត្រីជាន់ខ្ពស់របស់រដ្ឋាភិបាលទៅទៀត ចំណុចនេះគឺពួកគេបានភូតកុហកប្រជាពលរដ្ឋស្រស់ៗតែម្តង។ តើមានមន្ត្រីរដ្ឋាភិបាលជាន់ខ្ពស់មួយណាដែលសុខចិត្តចាក់អង្ករ ទៅយកអង្កាមនោះ?។
ក្រុមប្រមូលផ្តុំនេះ បានលើកទៀតថា មានប្រជាពលរដ្ឋរស់នៅក្រោមបន្ទាត់នៃភាពក្រីក្រ រហូតដល់ទៅ៤០% ជាដើម។ចរឹតភូតកុហករបស់ពួកគេនេះគឺនៅដដែល ដូចកាលពីនៅក្នុងគណបក្សចាស់ដូច្នោះដែរ ។ តាមការពិត ជារៀងរាល់ឆ្នាំ ប្រទេសកម្ពុជាបានសម្រេចកំណើនសេដ្ឋកិច្ចក្នុងអត្រាមួយខ្ពស់បង្គួរ គឺប្រហែលពី ៦% ទៅ៧% តាមរយះការពង្រីកយ៉ាងឆាប់រហ័សនៃវិស័យកម្មន្តសាលកាត់ដេរ កសិកម្ម សំណង់ និងវិស័យទេសចរណ៍ ។ល។ តាមរយៈសុចនាករនេះ រាជរដ្ឋាភិបាលកម្ពុជា គឺអាចឈានទៅសម្រេចគោលដៅនៃការកាត់បន្ថយភាពក្រីក្របានយ៉ាងតិច១%ក្នុងមួយឆ្នាំ។ យោងតាមតួលេខដែលបានផ្សព្វផ្សាយលើគេហទំព័ររបស់អង្គការកម្មវិធីអភិវឌ្ឍសហប្រជាជាតិ ( UNDP
) តួលេខនៃចំនួនប្រជាជនដែលស្ថិតនៅក្រោមបន្ទាត់នៃភាពក្រីក្របានថយចុះជាបន្តបន្ទាប់ពី ៤៧% នៅឆ្នាំ១៩៩៣ មក៣៥% នៅឆ្នាំ២០០៤ ហើយបន្តថយមកនៅត្រឹម៣០% នៅឆ្នាំ២០០៧។ ថ្មីៗនេះយោងតាមសេចក្តីរាយការណ៍នៅក្នុងកិច្ចប្រជុំពេញអង្គគណៈរដ្ឋមន្ត្រីកាលពីថ្ងៃទី២៥ ខែវិច្ឆិកា ឆ្នាំ២០១១ ក្រសួងពាណិជ្ជកម្ម បានរាយការណ៍ឲ្យដឹងថា ដោយសារកំណើនពាណិជ្ជកម្មកើនរហូតដល់៦៥% នៃ ផ.ស.ស (GDP) វិស័យនេះបានចូលរួមចំណែកយ៉ាងខ្លាំងក្នុងនយោបាយកាត់បន្ថយភាពក្រីក្រមកនៅត្រឹមតែ ២៦% ប៉ុណ្ណោះក្នុងឆ្នាំ២០១០។ ដូច្នេះការបំប៉ោងតួលេខរបស់ក្រុមសង្គ្រោះនេះ គឺមិនបានយោងទៅលើតួលេខជាក់ស្តែងណាមួយឡើយ ហើយគ្រាន់តែជាការស្រែកដើម្បីបំភ័ន្តមតិប្រជាពលរដ្ឋតែប៉ុណ្ណោះ។
តាមពិតក្រុមដែលគេដាក់ឈ្មោះជាបណ្តោះអាសន្នថា សង្គ្រោះជាតិនេះ គឺជាយុទ្ធសាស្ត្រ នយោបាយបោកប្រាស់គ្នារវាងគណបក្ស កឹម សុខា និងគណបក្ស សម រង្ស៊ី ខ្លួនឯងតែប៉ុណ្ណោះ ពីព្រោះសូម្បីតែសមាសភាពគណៈកម្មការរបស់គេ ក៏ជាសមាសភាពបណ្តោះអាសន្នដែរ គឺគ្មានអ្វីជាថិតថេរនោះទេ។ ជាក់ស្តែង កឹម សុខា ដែលមុននេះបន្តិចបានអួតក្អេងក្អាងទាំងនៅក្នុងស្រុក ក៏ដូចជានៅបរទេសថា ខ្លួនជាអនុប្រធានគណបក្សសំបកនេះឥឡូវមិនហ៊ានចូលរួមទេ ព្រោះដឹងច្បាស់ណាស់ថា គណបក្សសំបកនេះ នឹងប៉ើងតាមខ្យល់នាពេលដ៏ខ្លីខាងមុខជាក់ជាមិនខាន។
សម្រាប់គណបក្សប្រជាជនកម្ពុជា ប្រជាពលរដ្ឋតែងតែបានផ្តល់នូវសុភៈវិនិច្ឆ័យជាបន្តបន្ទាប់ ដោយសារកិច្ចខិតខំប្រឹងប្រែងរបស់រាជរដ្ឋាភិបាលដែលមាន សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី និងតែងតែឈរលើមូលដ្ឋាននៃការអភិវឌ្ឍ ដើម្បីឲ្យកម្ពុជាសម្រេចបាននូវជោគជ័យ ជាពិសេសគឺការធានានូវលំនឹងជីវភាពប្រចាំថ្ងៃរបស់ប្រជាជន និងការនាំប្រទេសជាតិឲ្យបានឆ្លងផុតស្ថានភាពលំបាកនានា ដើម្បីធានាឲ្យមានស្ថេរភាពសេដ្ឋកិច្ច និងមានកំណើនសេដ្ឋកិច្ចជាបន្តបន្ទាប់ ដើម្បីកាត់បន្ថយភាពក្រីក្ររបស់ប្រជាពលរដ្ឋ ស្របតាមគោលដៅអភិវឌ្ឍន៍សហស្សវត្សរ៍កម្ពុជាឆ្នាំ ២០១៥ នាពេលខាងមុខ។
ដូច្នេះការបោះឆ្នោតឆ្នាំ ២០១៣ ខាងមុខនេះ ប្រជាពលរដ្ឋនៅតែមានជំនឿជាក់ និងបន្តបោះឆ្នោតគាំទ្រ លើការដឹកនាំប្រទេសរបស់គណបក្សប្រជាជនកម្ពុជា ជាពិសេសការដឹកនាំប្រកបដោយគតិបណ្ឌិតរបស់ សម្តេចតេជោ ដើម្បីបានបន្តដើរតួនាទីយ៉ាងសកម្មក្នុងការធ្វើសមាហរណកម្មចូលទៅក្នុងតំបន់ និងពិភពលោក និងកិច្ចសហប្រតិបត្តិការនានា ក្នុងឋានៈជាសមាជិកស្មើភាព និងស្មើសិទ្ធិលើឆាកអន្តរជាតិ៕
អត្ថបទៈ ពង្ស សុក្រឹត