ឯកឧត្តម TSUYOSHI SAITO អនុរដ្ឋមន្រ្តីទីស្តីការគណៈរដ្ឋមន្រ្តី និងជាប្រធានក្រុម មិត្តភាពសភា ជប៉ុន-កម្ពុជាមានប្រសាសន៍ឱ្យដឹង នាថ្ងៃទី ៩ ខែតុលា ឆ្នាំ២០១២ថា នាយករដ្ឋមន្រ្តីជប៉ុន ឯកឧត្តម YOSHIHIKO NODAនឹងអញ្ជើញមកចូលរួមក្នុងកិច្ចប្រជុំកំពូលអាស៊ានបូកមួយ អាស៊ានបូកបី និងកិច្ចប្រជុំអាស៊ីបូព៌ា នៅពាក់កណ្តាល ខែ វិច្ឆិកាឆ្នាំ២០១២ខាងមុខនិងបានសន្យាថាជប៉ុន នឹងខិតខំជួយធ្វើយ៉ាងណាឲ្យកិច្ចប្រជុំ ដែលកម្ពុជាធ្វើជាម្ចាស់ផ្ទះ និងជាប្រធានអាស៊ានទទួលបានជោគជ័យ។
ឯកឧត្តម ស៊្រី ថាមរុង្គ រដ្ឋមន្រ្តីប្រតិភូអមនាយករដ្ឋមន្រ្តីបានឲ្យដឹងថា នៅក្នុងជំនួបសម្តែងការគួរសមចំពោះសម្តេចអគ្គមហាសេនាបតីតេជោ ហ៊ុន សែន នៅវិមានសន្តិភាព ឯកឧត្តម TSUYOSHI SAITOអនុរដ្ឋមន្រ្តីទីស្តីការគណៈរដ្ឋមន្រ្តី បានថ្លែងថា គោល បំណងនៃដំណើរទស្សនកិច្ចរបស់លោកនៅកម្ពុជាក្នុងពេលនេះ គឺដើម្បីពង្រីកថែមទៀតនូវទំនាក់ទំនងទ្វេភាគីនិងជាការត្រៀមរៀបចំសម្រាប់ ការប្រារព្ធខួបលើកទី ៦០ ឆ្នាំនៃទំនាក់ទំនងការទូតរវាងជប៉ុន និងកម្ពុជាដែលនឹងប្រព្រឹត្តទៅនៅឆ្នាំ ក្រោយនេះ ព្រមទាំងខួប លើកទី ៤០ ឆ្នាំនៃទំនាក់ទំនងជាដៃគូអាស៊ាន-ជប៉ុន ដែលនឹងធ្វើនៅ ប្រទេសជប៉ុននៅឆ្នាំក្រោយនេះផងដែរ។
ឯកឧត្តម SAITO បានថ្លែងអំណរគុណចំពោះសម្តេចតេជោនាយករដ្ឋមន្រ្តី និងប្រជាជនកម្ពុជា ដែលបានទទួលព្រះរជ្ជទាយាទជប៉ុនដែល បានយាងមកបំពេញទស្សនកិច្ចនៅកម្ពុជានាពេលកន្លងមក និងបានពាំនាំនូវការផ្តាំផ្ញើនូវការសាកសួរសុខទុក្ខពីឯកឧត្តមនាយករដ្ឋមន្រ្តី ជប៉ុនចំពោះ សម្តេចតេជោ នាយករដ្ឋមន្រ្តីផងដែរ។ ឯកឧត្តម TSUYOSHI SAITO អនុរដ្ឋមន្រ្តីទីស្តីការគណៈរដ្ឋមន្រ្តី ក៏បានថ្លែងអំណរគុណដល់ប្រទេសកម្ពុជា ដែលបានផ្តល់ ជំនួយដល់ជប៉ុន ក្នុងពេលដែលជប៉ុនបានជួបប្រទះនូវគ្រោះធម្មជាតិរលកយក្សស៊ូណាមី កាលពីខែ មីនាឆ្នាំ ២០១១ ដែលជាការ បង្ហាញពីការគាំទ្រ របស់សហគមន៍អន្តរជាតិ ក្នុងនោះមានព្រះរាជាណាចក្រ កម្ពុជាផងដែរ ចំពោះជប៉ុន ។ ឯកឧត្តម SAITOក៏បានថ្លែងស្ងើចសរសើរចំពោះការគាំទ្ររបស់សម្តេចតេជោ នៅពេលដែលលោកបានទៅ ធ្វើទស្សនកិច្ចនៅរោងចក្រមីនី បៀនៅតំបន់សេដ្ឋកិច្ចពិសេសរាជធានី ភ្នំពេញ ដែលផលិតម៉ូទ័រខ្នាតតូច និងបានថ្លែងអំណរគុណចំពោះសម្តេចតេជោដែលបានគាំទ្រ និង បានអញ្ជើញចូលរួមក្នុងពិធីសម្ពោធ និងបានគាំទ្រក្រុមហ៊ុនអ៊ីយ៉ុង ដែលនឹងកសាងផ្សារទំនើប ដែលសសម្តេចនាយករដ្ឋមន្រ្តីបាន ឯកភាពថា នឹងចូលរួមបើកការដ្ឋាននៅថ្ងៃទី ១០ ខែធ្នូ ឆ្នាំ២០១២នោះផងដែរ។
សម្តេចតេជោនាយករដ្ឋមន្រ្តីបានមានប្រសាសន៍ថ្លែងអំណរ គុណ ចំពោះលោក SAITO ដែលបានពាំនាំ នូវការផ្តាំផ្ញើសាកសួរសុខទុក្ខពីឯកឧត្តមនាយករដ្ឋមន្រ្តី ជប៉ុនចំពោះសម្តេច ហើយសង្ឃឹមសមភាគីទាំងពីរនឹងបានជួបគ្នានៅក្នុងកិច្ចប្រជុំកំពូលនា ខែ វិច្ឆិកាខាងមុខនេះ។
សម្តេចតេជោបានថ្លែងអំណរគុណចំពោះប្រទេសជប៉ុនផងដែរ ដែលបានផ្តល់ជំនួយនៅពេលដែល កម្ពុជាបានជួប ប្រទះគ្រោះទឹកជំនន់កាលពីពេលកន្លងមក និងបានឯកភាពទាំងស្រុងចំពោះការ ត្រៀមរៀបចំប្រារព្ធ ខួប ៦០ ឆ្នាំនៃទំនាក់ទំនងរវាង កម្ពុជា-ជប៉ុន ដោយបានស្នើឲ្យមានការពិនិត្យ មើលទំនាក់ទំនងដែល ប្រទេសទាំងពីរមានកន្លងមក និងរៀបចំចក្ខុវិស័យសម្រាប់ទំនាក់ទំនង ប្រទេសទាំងពីរនាពេលអនាគតផងដែរ។ សម្តេចនាយករដ្ឋមន្រ្តីបានស្នើឲ្យក្រសួងការបរទេស និងសហប្រតិបត្តិការអន្តរជាតិសិក្សាជាមួយស្ថាន ទូតជប៉ុន ដើម្បីរៀបចំកម្មវិធីនេះឲ្យបានល្អ។
សម្តេចនាយករដ្ឋមន្រ្តីបានសម្តែង នូវការពេញចិត្តយ៉ាងខ្លាំងចំពោះកិច្ចសហប្រតិបត្តិការទ្វេភាគី ដែលមានការរីកចម្រើន ជាពិសេសក្នុង ពេលថ្មីៗនេះ វិនិយោគជប៉ុនបានចាប់ផ្តើមចូលមកកាន់កម្ពុជា ដែលពីមុនមកកម្ពុជាបានទទួលតែជំនួយសព្វបែបយ៉ាងពីប្រទេសជប៉ុន តែប៉ុណ្ណោះ។សម្តេចតេជោបាន សម្តែងក្តីសង្ឃឹមថា ពីពេលនេះតទៅបន្ថែមលើកិច្ចសហប្រតិបត្តិការដ៏ល្អ ប្រសើររវាងប្រទេសទាំង ពីរ ខាងផ្នែកវិនិយោគ ក៏ដូចជាខាងផ្នែកទេសចរណ៍ក៏នឹងកើនឡើង ផងដែរ៕