ថ្លែងក្នុងពិធីបើកការដ្ឋានសាងសង់ស្ពានអាកាសស្ទឹងមានជ័យ សម្តេចតេជោនាយករដ្ឋមន្ត្រីបានសុំការយោគយល់ពីប្រជាពលរដ្ឋនៅក្នុងពេលសាងសង់ស្ពានអាកាសស្ទឹងមានជ័យ ដែលត្រូវចំណាយថវិការហូតទៅដល់១៩លានដុល្លារសហរដ្ឋអាមេរិក និងចំណាយពេលសាងសង់ជាង២ឆ្នាំ ពោលគឺ២៨ខែ។ សម្ដេចតេជោមានប្រសាសន៍ថា សូមបងប្អូនប្រជាពលរដ្ឋ «អត់ទ្រាំការលំបាកបន្តិចក្នុងរយៈពេលជាង២ឆ្នាំ បន្ទាប់មកប្រជាពលរដ្ឋទាំងអស់នឹងមានភាពងាយស្រួល មិនត្រឹមតែប្រជាពលរដ្ឋក្នុងរាជធានីភ្នំពេញ និងប្រជាពលរដ្ឋមកពីតាមបណ្តាខេត្តផ្សេងទៀត»។
ជាមួយនឹងការរំលឹកពីអតីតកាលក្រោយថ្ងៃរំដោះ ឆ្នាំ១៩៧៩ ដែលពេលនោះ
កម្ពុជាមានតែបាតដៃទទេ សម្តេចបានរំលឹកថា ពេលដែលសម្តេចចូលរាជធានីភ្នំពេញ
បានជួបមនុស្សតែ៧០នាក់ប៉ុណ្ណោះនៅសួនកាណាឌីយ៉ា។ តែពេលឥឡូវនេះ មានការរីកចម្រើន
ជាពិសេសចំនួនម៉ូតូ និងរថយន្តកើនឡើងជាបន្តបន្ទាប់ គ្រាន់តែនៅក្នុងរាជធានីភ្នំពេញ
មានម៉ូតូរហូតដល់ជាង១លានគ្រឿង ហើយរថយន្តវិញ មានជិត១លានគ្រឿង។ សម្តេចតេជោក៏បានសម្តែងការព្រួយបារម្ភពីការបាត់បង់នូវស៊ីក្លូ
ដែលជារបស់មួយដែលយើងត្រូវអភិរក្ស ហើយក៏មានអង្គការក្រៅរដ្ឋាភិបាលមួយចំនួនបានខិតខំថែរក្សាវា
ព្រោះវាក៏ជាទីចាប់អារម្មណ៍របស់អ្នកទេសចរផងដែរ។
ទាក់ទងនឹងការអភិវឌ្ឍន៍រាជធានីភ្នំពេញ ដើម្បីកាត់បន្ថយការកកស្ទះចរាចរណ៍ក្នុងរាជធានីភ្នំពេញ
ជាមួយនឹងការកសាងស្ពានមុនីវង្សថ្មី ស្ពានជ្រោយចង្វារ២ កំពុងត្រូវបានសាងសង់
សម្តេចនាយករដ្ឋមន្រ្តីបានមានប្រសាសន៍ឲ្យដឹងថា ស្ពានថ្មីមួយទៀត ស្ថិតនៅចន្លោះស្ពានជ្រោយចង្វារ
និងស្ពានព្រែកព្នៅក៏នឹងត្រូវសាងសង់ ដើម្បីធ្វើដំណើរឆ្ពោះទៅតំបន់អភិវឌ្ឍន៍ជ្រោយចង្វារ។
ពាក់ព័ន្ធនឹងការរំដោះភាពស្ទះចរាចរណ៍នៅតំបន់ស្ទឹងមានជ័យ សាលារាជធានីភ្នំពេញ
មន្ទីរសាធារណការ ក្រុមហ៊ុន OCIC
និងក្រុមហ៊ុនស៊ីណូប៉ាស៊ីហ្វិក បានសិក្សារកឃើញនូវដំណោះស្រាយមួយដ៏ប្រសើរ
ក្នុងចំណោមជំរើសចំនួន៦ គឺការសាងសង់ស្ពានអាកាសស្ទឹងមានជ័យ ស្ថិតនៅក្បែរស្តុបស្ទឹងមានជ័យ
ដែលជាចំណុចប្រសព្វស្ថិតក្នុងសង្កាត់ស្ទឹងមានជ័យ ខណ្ឌមានជ័យ សង្កាត់ទំនប់ទឹក
ខណ្ឌចំការមន និងសង្កាត់បឹងសាឡាង ខណ្ឌទួលគោក។
ស្ពានអាកាសស្ទឹងមានជ័យ ដែលជាស្ពានទី៣នេះ នឹងត្រូវគេធ្វើឡើងមានសណ្ឋាន
និងរូបរាងដូចជា សត្វមេអំបៅ ដែលកំពុងតែត្រដាងស្លាបហើរ ពោលគឺមានស្ពានទាំងអស់ចំនួន៥
ក្នុងនោះមានស្ពានមេចំនួន២ ស្ពានបែកខ្នែងចំនួន១ និងស្ពានឆ្លងកាត់ប្រឡាយ
ស្ទឹងមានជ័យចំនួន២។
ស្ពានអាកាសស្ទឹងមានជ័យ ដែលត្រូវបានសិក្សាប្លង់មេរួចរាល់នេះ មានលក្ខណៈបច្ចេកទេសដូចខាងក្រោម៖
- សាងសង់ស្ពានអាកាសធំ ពីបេតុងអារមេស្របពីលើផ្លូវលេខ២៧១ ត្រង់ចំណុចភ្លើងស្តុប មានទទឹង១៤,៨០ម៉ែត្រ សម្រាប់ចរាចរណ៍ទ្វេទិស ដោយមាន០២ខ្សែទៅ និង០២ខ្សែមក
- សាងសង់ស្ពានអាកាសតូចពីរឯកទិស ពីបេតុងអារមេមានទទឹង៦,៥០ម៉ែត្រ និងសាងសង់ស្ពានបេតុងមួយទៀតជំនួសស្ពានបាឡេ ដែលមានទទឹង៨ម៉ែត្រ។
- សាងសង់ស្ពានអាកាសធំ ពីបេតុងអារមេស្របពីលើផ្លូវលេខ២៧១ ត្រង់ចំណុចភ្លើងស្តុប មានទទឹង១៤,៨០ម៉ែត្រ សម្រាប់ចរាចរណ៍ទ្វេទិស ដោយមាន០២ខ្សែទៅ និង០២ខ្សែមក
- សាងសង់ស្ពានអាកាសតូចពីរឯកទិស ពីបេតុងអារមេមានទទឹង៦,៥០ម៉ែត្រ និងសាងសង់ស្ពានបេតុងមួយទៀតជំនួសស្ពានបាឡេ ដែលមានទទឹង៨ម៉ែត្រ។
- អ៊ុតកៅស៊ូអមសងខាងស្ពានទទឹងពី៥,៥០ម៉ែត្រ ទៅ៧ម៉ែត្រ និងចិញ្ចើម៣ម៉ែត្រ។
- កម្ពស់សុវត្ថិភាពក្រោមស្ពាន៥,២០ម៉ែត្រ។
- ក្រៅពីនេះការស្ថាបនាលូ ច្រាំងបេតុងប្រឡាយជើងទេរ
សួនច្បារ ខឿនបែងចែកទ្រូងស្ពាន ដំឡើងបង្គោលភ្លើង លាបគំនូសចរាចរណ៍ ដាក់ស្លាកចរាចរណ៍ជាដើម។
ប្រតិបត្តិការស្ថាបនានឹងបែងចែកជា ២ដំណាក់កាល ដែលក្នុងនោះមាន៖
- ដំណាក់កាលទី១ ៖ សាងសង់ស្ពានអាកាសមេ ០២ ស្ពានរូងក្រោមដី
០១
- ដំណាក់កាលទី២ ៖ សាងសង់ស្ពានបែកខ្នែងចំនួន ០១ និងស្ពានឆ្លងកាត់ប្រឡាយចំនួន
០២។
ស្ពានអាកាសស្ទឹងមានជ័យនេះ នឹងត្រូវចំណាយពេលសាងសង់២៨ខែ ចាប់ពីថ្ងៃទី២៦
ខែវិច្ឆិកា ឆ្នាំ២០១២ រហូតដល់ថ្ងៃទី២៦ ខែមីនា ឆ្នាំ២០១៥ ដោយចំណាយថវិកាសាងសង់
១៩លានដុល្លារ។ ដំណើរការសាងសង់ដោយក្រុមហ៊ុនវិនិយោគទុនអានិកជនកម្ពុជារបស់លោក
ពង្ស ឈីវសែ (OCIC)៕