សម្តេចតេជោនាយករដ្ឋមន្ត្រី
ហ៊ុន សែន ក៏បានអំពាវនាវឲ្យក្រុមហ៊ុនផលិតជីផ្កាយប្រាំ (ហ្វាយស្តារ អ៊ិនធើណេសិនណល ហ្វើថឺឡាយហ្សឺ ខេមបូឌា (Five Star International
Fertilizer (Cambodia) Co., Ltd) ឲ្យគិតគូលើគុណភាព និងតម្លៃ បើសិនជាចង់លក់ជីកសិកម្មឲ្យដាច់នៅកម្ពុជា។
មានប្រសាសន៍នៅក្នុងពិធីសម្ពោធដាក់ឲ្យដំណើរការរោងចក្រផលិតជីកសិកម្ម
PNK នៅស្រុកកៀនស្វាយ
ខេត្តកណ្តាល របស់ក្រុមហ៊ុនមកពីប្រទេសវៀតណាម សម្តេចតេជោសែនបានមានប្រសាសន៍បញ្ជាក់ថា
"បញ្ហាតម្លៃ ជាបញ្ហាមួយដ៏សំខាន់ ដែលខ្ញុំសូមអំពាវនាវចំពោះក្រុមហ៊ុន
គឺបើសិនចង់ឲ្យលក់ដាច់ ហើយកុំឲ្យមានការនាំចូលជីពីក្រៅប្រទេសនោះ ជម្រើសដ៏ល្អ
គឺគុណភាពឲ្យវាប្រាកដប្រជា បូកនឹងតម្លៃឲ្យវាថោក។ បើមិនដូច្នោះទេ
កុំមកពឹងពាក់រដ្ឋាភិបាលថាសុំជួយទប់ស្កាត់ការនាំចូល!។
រដ្ឋាភិបាលអត់មាននយោបាយបែបនេះទេ សូមបញ្ជាក់ជូនលោក ចិន ម៉ាខា
ដែលជាប្រធានសមាគមវិនិយោគវៀតណាមនៅកម្ពុជាឲ្យហើយស្រេច ព្រោះល្ងាចនេះ
ជួបគ្នា កុំលើកសំណូមពរថា សូមជួយទប់ស្កាត់
កុំឲ្យនាំចូលជីពីក្រៅប្រទេស!។ អារឿងនឹង រាជរដ្ឋាភិបាលកម្ពុជា
ធ្វើអត់បានទេ ព្រោះអានេះ គឺថាអង្គការពិភពលោកសុទ្ធ នៅទីនេះ សេរី
សេដ្ឋកិច្ចផ្សារ។ បើចង់លក់ដាច់ គុណភាពល្អ និងលក់ឲ្យថោក
អានឹងដាច់ហើយ!"។
ទោះបីយ៉ាងណាសម្តេចតេជោ
ក៏បានវាយតម្លៃខ្ពស់ចំពោះវត្តមានរបស់ក្រុមហ៊ុនផលិតជីវៀតណាមដ៏ធំលើកដំបូងនៅកម្ពុជា
ដែលមានទីតាំងនៅស្រុកកៀនស្វាយ ខេត្តកណ្តាល ពេលនេះ
ដោយសម្តេចបានចាត់ទុកថា រោងចក្រផលិតជីកសិកម្ម PNK បង្កើតបានជាមូលដ្ឋានសម្រាប់កសិកររបស់យើងក្នុងមួយចំណែក
ហើយកាត់បន្ថយបាននូវការនាំចេញរូបិយប័ណ្ណ ទៅនាំចូលជីកសិកម្មពីក្រៅប្រទេសតាមរយៈការផលិតក្នុងស្រុក
ហើយដែលមានការវិនិយោគពីខាងក្រុមហ៊ុនវៀតណាម មកក្នុងព្រះរាជាណាចក្រកម្ពុជា។
សម្តេចនាយករដ្ឋមន្ត្រី
ក៏បានផ្តល់ជាអនុសាសន៍ថា "អីចឹង ឥឡូវបញ្ហាការប្រកួតប្រជែង។ បើយើងចង់បានការលក់ផលិតដាច់
វាទាមទារឲ្យមានការតម្លៃរបស់យើង គឺថា ថោកដែរ ដើម្បីជំនួសឲ្យការនាំចូល
ហើយខ្ញុំសូមបញ្ជាក់ថា ខ្ញុំមិនអនុវត្តនូវនយោបាយគាំពារនិយមទេ... ការធ្វើដូច្នោះ
វាខុសពីគោលការណ៍របស់អង្គការពាណិជ្ជកម្មពិភពលោក។ ម្យ៉ាងទៀតរោងចក្រនេះ
ដើម្បីបានលក់ដាច់ ក៏ត្រូវមានការណែនាំពីរបៀបប្រើដែរ ព្រោះនៅទីកន្លែងខ្លះប្រជាពលរដ្ឋរបស់យើង
រោងចក្រ និងផ្នែកកសិកម្ម ត្រូវរួមគ្នា
ដើម្បីប្រាប់ពីរបៀបប្រើប្រាស់ជីកសិកម្ម..."។
ជាមួយគ្នានេះដែរ
សម្តេចតេជោ ក៏បានអំពាវនាវទៅកាន់ប្រជាកសិករ កុំភ្លេច ក្នុងការប្រើប្រាស់ជីសរីរាង្គ
ឬក៏ជីធម្មជាតិ ដែលផ្សំពីលាមកគោ មាន់ ជាដើម។ សម្តេចតេជោមានប្រសាសន៍ថា ខ្ញុំនៅតែមានមោទនភាពចំពោះប្រជាកសិករ ដែលបានប្រើប្រាស់ជីធម្មជាតិ
ឬបានប្រើប្រាស់ជីធម្មជាតិគួបផ្សំជាមួយជីគីមីនៅក្នុងការដាំដុះរបស់ខ្លួន
ដែលត្រូវតែបន្តការអនុវត្តរបៀបនេះតទៅទៀត។
ថ្លែងនៅក្នុងពិធីសម្ពោធដាក់ឲ្យដំណើរការជាផ្លូវការ
នូវរោងចក្រផលិតជីកសិកម្មនៅក្នុងស្រុក កៀនស្វាយ ខេត្តកណ្តាល នោះដែរ សម្ដេចតេជោនាយករដ្ឋមន្ត្រី
ក៏បានអំពាវនាវឲ្យអាជ្ញាធរមានសមត្ថកិច្ច និងស្ថាប័នពាក់ព័ន្ធត្រូវយកចិត្តទុកដាក់ដល់មនុស្សចាស់
និងកូនក្មេង នៅក្នុងរដូវរងានេះ ក៏ដូចជាបង្ការពីគ្រោះថ្នាក់
ដែលបង្កឡើងដោយអគ្គិភ័យផងដែរ។
សម្តេចតេជោបានមានប្រសាសន៍ថា ជាធម្មតាឆ្នាំរោងទឹកធំ
ប៉ុន្តែឆ្នាំនេះបែរជាទឹកតូច ឆ្នាំទៅម៉ិញរដូវត្រជាក់ នៅក្នុងខែតុលា ឆ្នាំនេះរដូវត្រជាក់នៅចុងខែធ្នូ
ដែលត្រូវមានការប្រុងប្រយ័ត្ន។ សម្តេចតេជោសែនមានប្រសាសន៍ថា ដោយសារមានការផ្លាស់ប្តូរអាកាសធាតុបែបនេះ
តម្រូវឲ្យមានការប្រុងប្រយ័ត្ននៅគ្រប់ទីកន្លែងទាំងអស់។ សម្តេចតេជោបានមានប្រសាសន៍ឲ្យដឹងដែរថា
សម្ដេចបានបញ្ជាឲ្យត្រៀមអាវរងាប្រមាណពី ៥ ទៅ ៦ម៉ឺនអាវ ដើម្បីបញ្ជូនទៅកងទ័ពនៅតាមតំបន់ព្រំដែនកម្ពុជា-ថៃ
និងតាមតំបន់កោះជាបន្ទាន់ បើទោះបីជាអាវរងាបានបើកជូនជារៀងរាល់ឆ្នាំក្តី
ក៏ត្រូវតែបើកបន្ថែមជូនកងទ័ពនគរបាល និងកងរាជអាវុធហត្ថរបស់យើង ដោយសង្ឃឹមថា
ការចែកអារងារនេះនឹងត្រូវបានធ្វើឡើងជាបន្ទាន់ និងដល់ដៃតែម្តង។
សម្តេចតេជោមានប្រសាសន៍ថា នេះជាអាវរងាស្តុកបម្រុងរបស់ខ្ញុំនៅក្នុងដៃ
ដើម្បីឧបត្ថម្ភជូន ចំពោះកងទ័ព នគរបាល និងអាវុធហត្ថ ដែលនៅតាមបន្ទាត់ព្រំដែនកម្ពុជា-ថៃ
ឲ្យបានឆាប់បំផុត។ សូមយកចិត្តទុកដាក់ និងប្រុងប្រយ័ត្នចំពោះមនុស្សចាស់
និងកូនក្មេង ជាពិសេសមនុស្សចាស់ដែលគ្មានអ្នកគាំពារ សូមអាជ្ញាធរនៅមូលដ្ឋានពិនិត្យ
និងយកចិត្តទុកដាក់ជាមួយមនុស្សចាស់ ដែលជួនកាលរងាពេកក៏ធ្វើឲ្យស្លាប់បានដែរ។
សូមមានការប្រុងប្រយ័ត្នផងដែរជាមួយនឹងភ្លើងឆេះផ្ទះ ដែលតែងកើតនៅក្នុងរដូវប្រាំងនេះ
ព្រោះភ្លើងឆេះផ្ទះបានកើតមានរួចមកហើយ។ សម្ដេចតេជោថ្លែងទៀតថា «ខ្ញុំសូមអំពាវនាវឲ្យប្រជាពលរដ្ឋយកចិត្តទុកដាក់ចំពោះបញ្ហាភ្លើងឆេះផ្ទះនេះ
ព្រោះវាអាក្រក់ណាស់»។
សម្តេចតេជោក៏បានអំពាវនាវចំពោះប្រជាពលរដ្ឋ សូមជួយទប់ស្កាត់នូវបញ្ហាភ្លើងឆេះព្រៃ
ដែលបណ្តាលមកពីការធ្វេសប្រហែសផងដែរ។ ការចូលរួមរបស់ប្រជាពលរដ្ឋ គឺមិនត្រូវបោះកន្ទុយបារីចោល
ឬបង្កាត់ភ្លើងដាំបាយហើយមិនបានពន្លត់ ដែលជាហេតុនាំឲ្យភ្លើងអាចឆេះបាននោះឡើយ។
សូមបញ្ជាក់ថា
ក្រុមហ៊ុនផលិតជីវៀតណាម PNK នៅក្នុងឃុំសំរោងធំ ស្រុកកៀនស្វាយ ខេត្តកណ្តាល តាមផ្លូវជាតិលេខ១ បានចាប់ផ្តើមកសាងកាលពីថ្ងៃទី២៤
ខែធ្នូ ឆ្នាំ២០០៩ ហើយបានបើកសម្ពោធដាក់ឲ្យដំណើរការនៅថ្ងៃទី២៥ ខែធ្នូ
ឆ្នាំ២០១២ នេះ។ ក្រុមហ៊ុនជីវៀតណាមថ្មីនេះ ផលិតក្នុងជំហ៊ានដំបូងចំនួន ៣៥ម៉ឺនតោន
ក្នុងមួយឆ្នាំ ដែលផ្តោតសំខាន់លើដំណាំស្រូវ។ នៅដំណាក់កាលទី២ ក្រុមហ៊ុនជីវៀតណាមនោះ
នឹងផលិតដល់ ៥០ម៉ឺនតោន។
ឯកឧត្តម
ចាន់ សារុន រដ្ឋមន្ត្រីក្រសួងកសិកម្ម រុក្ខាប្រម៉ាញ់ និងនេសាទ បានមានប្រសាសន៍ឲ្យអំពីនិន្នាការនៃការប្រើប្រាស់ជីកសិកម្មនៅកម្ពុជា
មានការកើនឡើង ចាប់តាំងពីឆ្នាំ១៩៦០ មកដល់ពេលបច្ចប្បន្ន រួមមាន៖
-ឆ្នាំ១៩៦០ ការប្រើប្រាស់ជីគីមី នាំចូល សរុបប្រមាណ ២.៧០០ តោន
-ឆ្នាំ១៩៦៦ ការប្រើប្រាស់ជីគីមីនាំចូលសរុប ៤.៥០០ តោន
ហើយផលិតជីផូស្វាត ក្នុងស្រុក បានប្រមាណ ៤.០០០ ទៅ ៧.០០០ តោនទៀត
-ឆ្នាំ១៩៦៨ ការប្រើប្រាស់ជីគីមីនាំចូលសរុប មានដល់ ៩.២០០ តោន
- ក្រោយឆ្នាំ១៩៧៩ អង្គការស្បៀងអាហារ និងកសិកម្ម
របស់អង្គការសហប្រជាជាតិ បានផ្តល់ជីសម្រាប់ធ្វើប្រពលវប្បកម្ម ដំណាំស្រូវ
ចំនួន ៥ ម៉ឺនហិកតា ហើយបន្ទាប់ទៅ បានកើនដល់ ៩០ ម៉ឺនហិកតា
នៅទស្សវត្សឆ្នាំ៩០។
-ការប្រើប្រាស់ជីគីមី មានការកើនឡើង ឆ្នាំ១៩៧០
ការប្រើប្រាស់ជីគីមីសរុប តាមរយៈជំនួយ មាន ២៧.៥០០ តោន
-១៩៨៦ ការប្រើប្រាស់ជីគីមីសរុប តាមរយៈជំនួយ ២៨.៥០០ តោន
-១៩៩៣ ការនាំចូលជីគីមី ៣៥.៥០០ តោន
-២០០៣ នាំចូលជីគីមី មកប្រើប្រាស់ ៤៣.៦២០ តោន
-២០០៨ នាំចូលជីគីមី មកប្រើប្រាស់សរុប ១៦២.១៤០ តោន
-២០០៩ នាំចូលជីគីមី មកប្រើប្រាស់ ១៧២.០២០ តោន
-២០១០ នាំចូលជីគីមី មកប្រើប្រាស់ ចំនួន ២៥០.៨៥៤ តោន
-២០១១ នាំចូលជីគីមី មកប្រើប្រាស់ចំនួន ៥១២.៩០០ តោន
-២០១២ ការនាំចូលជីគីមី បានកើនឡើងរហូតដល់ ៥៥៦.៤០០ តោន
ជាមួយនឹងនិន្នាការកើនឡើងនៃការប្រើប្រាស់ជីគីមីកសិកម្ម
សម្រាប់ផលិតផលកសិកម្ម នៅកម្ពុជាខាងលើនេះ សម្តេចតេជោនាយករដ្ឋមន្ត្រី ហ៊ុន សែន
ក៏បានប្រកាសពីការព្យាករណ៍ នៃតម្រូវការជីគីមីកសិកម្ម សម្រាប់កសិករកម្ពុជា
ដោយសម្តេចបានលើកឡើងថា សម្រាប់ផ្ទៃដីដាំដុះ ៤.១០០.០០០ ហិកតា
ដែលកសិករកំពុងប្រើប្រាស់ដាំដុះ សព្វថ្ងៃនេះ យើងត្រូវការជីកសិកម្ម
រហូតទៅដល់ ៦១៧.០០០ តោន ក្នុងមួយឆ្នាំ៕
អត្ថបទ
អង្គភាពព័ត៌មាន និងប្រតិកម្មរហ័ស