ឯកឧត្តម អ៊ាង សុផល្លែត ជំនួយការសម្តេចនាយករដ្ឋមន្ត្រីបានមានប្រសាសន៍ឲ្យដឹងថា
មន្ទីរពេទ្យចារី ដែលវិនិយោគដោយក្រុមហ៊ុនមកពីប្រទេសវៀតណាម នឹងបើកដាក់ឲ្យដំណើរការជាបណ្តើរៗនៅក្នុងអំឡុងខែមីនា
ឆ្នាំ២០១៣ ហើយនៅក្នុងអំឡុងខែវិច្ឆិកា ឆ្នាំ២០១៣ ខាងមុខនេះ មន្ទីរពេទ្យចារី
នឹងបើកដំណើរការពេញលេញទទួលគ្រប់សេវាកម្មទាំងអស់។
ឯកឧត្តម អ៊ាង សុផល្លែត បានឲ្យដឹងថា ក្នុងឱកាសចូលជួបសម្តែងការគួរសមកាលពីរសៀលថ្ងៃទី២៥
ខែធ្នូ ឆ្នាំ២០១២ នៅវិមានសន្តិភាព ចំពោះសម្តេចអគ្គមហាសេនាបតីតេជោ ហ៊ុន
សែន នាយករដ្ឋមន្ត្រីនៃព្រះរាជាណាចក្រកម្ពុជា លោក TRAN BAC HA ប្រធានសមាគមវិនិយោគិនវៀតណាមប្រចាំកម្ពុជា
បានថ្លែងអំណរគុណយ៉ាងជ្រាលជ្រៅ ចំពោះសម្តេចតេជោនាយករដ្ឋមន្ត្រី ដែលបានចូលរួមសម្ពោធដាក់ឲ្យប្រើប្រាស់រោងចក្រផលិតជីផ្កាយ៥
ដែលវិនិយោគដោយក្រុមហ៊ុនមកពីប្រទេសវៀតណាម។ លោក TRAN BAC HA បានមានប្រសាសន៍ជម្រាបសម្តេចតេជោថា ក្នុងរយៈពេល ៣ឆ្នាំ
ពីឆ្នាំ២០០៩ រហូតដល់ឆ្នាំ២០១២ នេះ ទំហំពាណិជ្ជកម្មទ្វេភាគីរវាងកម្ពុជា និងវៀតណាម
បានកើនឡើង ២៥០០លានដុល្លារសហរដ្ឋអាមេរិក។ ក្នុងនោះទេសចរវៀតណាមមកកាន់កម្ពុជា
គឺបានកើនឡើងចំនួន ៣៦%។ ដោយឡែកលើវិស័យកសិកម្មក៏មានការវិវឌ្ឍយ៉ាងល្អប្រសើរផងដែរ
ដូចជាការវិនិយោគលើម៉ាស៊ីន កិនស្រូវដើម្បីនាំអង្ករចេញ ការធ្វើរោងចក្រផលិតជី
ការវិនិយោគដាំដំណាំផ្សេងៗ ដូចជាកៅស៊ូជាដើម គឺស្របតាមគោលនយោបាយអាទិភាពរបស់រាជរដ្ឋាភិបាលកម្ពុជា។
ដោយឡែកទំហំវិនិយោគរបស់វៀតណាមមកកាន់កម្ពុជាគឺបានកើនឡើង
៤ដង ពោល គឺពីទំហំ ៥៦០លានដុល្លារសហរដ្ឋអាមេរិក ក្នុងឆ្នាំ២០០៩ កើនដល់ ២៥០០លានដុល្លារអាមេរិក
ក្នុងឆ្នាំ២០១២។
លោក TRAN
BAC HA ក៏បានជម្រាបជូនសម្តេចតេជោ អំពីគម្រោងវិនិយោគរបស់វៀតណាមចាប់ពីឆ្នាំ២០១២ទៅ
គឺធ្វើយ៉ាងណាឲ្យមានការកើនឡើងពី ២៥០០លានដុល្លារអាមេរិកទៅ ៣៥០០ លានដុល្លារអាមេរិក
ហើយទំហំពាណិជ្ជកម្មគឺធ្វើយ៉ាងណាឲ្យសម្រេចបាន ៥០០០ លានដុល្លារអាមេរិក តាមបំណងរបស់ប្រមុខរដ្ឋាភិបាលនៃប្រទេសទាំងពីរ
(វៀតណាម-កម្ពុជា)។
សម្តេចតេជោនាយករដ្ឋមន្ត្រី បានមានប្រសាសន៍ស្វាគមន៍
និងបានលើកទឹកចិត្ត ចំពោះគណៈប្រតិភូវិនិយោគវៀតណាមដែលមកវិនិយោគនៅកម្ពុជា
ហើយជំរុញឲ្យមានការវិនិយោគកាន់តែច្រើនឡើងថែមទៀត ដោយសម្តេចបានផ្តល់ការណែនាំឲ្យសហការជាមួយក្រុមប្រឹក្សាអភិវឌ្ឍន៍កម្ពុជា
ដើម្បីធ្វើយ៉ាងណាឲ្យការវិនិយោគនៅកម្ពុជាបានទទួលជោគជ័យ៕