សម្តេចអគ្គមហាសេនាបតីតេជោ ហ៊ុន សែន
នាយករដ្ឋមន្ត្រីនៃព្រះរាជាណាចក្រកម្ពុជា
បានមានប្រសាសន៍ឲ្យដឹងពីនយោបាយរបស់សម្តេច ក្នុងការជួយកសិករ
គឺរាជរដ្ឋាភិបាលមិនយកពន្ធដីពីប្រជាពលរដ្ឋទេ
ទាំងដីធ្វើកសិកម្ម
ក៏ដូចជាដីដែលបានបែងចែកជូនប្រជាពលរដ្ឋតាមរយៈយុវជនស្ម័គ្រ
សម្តេចតេជោ ទាំងនៅក្នុងអាណត្តិរបស់សម្តេច
ក៏ដូចជានៅពេលគណបក្សប្រជាជនកម្ពុជា នៅកាន់អំណាច។
ក្នុងពិធីចែកប័ណ្ណកម្មសិទ្ធិដីធ្លីដល់ប្រជាពលរដ្ឋ នៅភូមិឆ្នែង
ឃុំស្រែខ្ទុម ស្រុកកែវសីមា ខេត្តមណ្ឌលគិរី ចំនួន ១.២៩១គ្រួសារ
ក្បាលដីមានចំនួន ២.៥៧៣ក្បាលដី និងមានទំហំ ៣.៩៦៧ហិកតា
នាព្រឹកថ្ងៃទី១៦ ខែមករា ឆ្នាំ២០១៣ សម្តេចនាយករដ្ឋមន្ត្រី ហ៊ុន សែន
បានមានប្រសាសន៍ថា "ខ្ញុំសូមបញ្ជាក់ថា
ដរាបណាគណបក្សប្រជាជនកម្ពុជា នៅបន្តកាន់អំណាច ដរាបណាខ្ញុំ
នៅធ្វើជានាយករដ្ឋមន្ត្រី ហើយខ្ញុំជឿថា បន្ទាប់ពីខ្ញុំទៅ
នាយករដ្ឋមន្ត្រីក្រោយ ដែលជាមនុស្សរបស់គណបក្សប្រជាជន
នឹងបន្តគោលនយោបាយមិនយកពន្ធដី។ មិនទាន់ដល់ពេល
ដែលត្រូវយកពន្ធដីពីកសិករទេ។ ប្រឹងប្រែងរកពីប្រភពចំណូលផ្សេង។
យើងត្រូវជួយកសិករថែមទៀត អំពីបញ្ហា ដូចជា ផ្លូវថ្នល់ សាលារៀន
មន្ទីរពេទ្យ វត្តអារាម ឬក៏ការវិនិយោគដទៃទៀត រាប់ទាំងការខិតខំ
ដើម្បីរកទីផ្សារជូនប្រជាពលរដ្ឋរបស់យើង"។
សម្ដេចតេជោបានមានប្រសាសន៍ឲ្យដឹងថា បញ្ហាដីធ្លី
គឺស្ថិតនៅក្នុងកម្មវិធីនយោបាយរបស់រាជរដ្ឋាភិបាល
ក្នុងការគាំពារអ្នកក្រ។ ច្បាប់ពន្ធអាកររបស់រាជរដ្ឋាភិបាលកម្ពុជា
បានចេញថ្មីៗកន្លងមកនេះ
បានកំណត់អំពីការជាប់ពន្ធចំពោះការផ្ទេរកម្មសិទ្ធិដីធ្លី
ក៏ប៉ុន្តែចំពោះការផ្តល់ដីដោយរដ្ឋជូនប្រជាពលរដ្ឋ
គឺមិនជាប់ពន្ធទេ។
ចំពោះករណីឪពុកម្តាយផ្ទេរកម្មសិទ្ធិដីធ្លីជូនកូន
ហើយដីដែលមានតម្លៃក្រោម ១០០លានរៀល ក៏មិនយកពន្ធដែរ។
តែបើសិនតម្លៃដីនោះលើសដល់១២០លានរៀល
គឺត្រូវបង់ពន្ធក្នុងអត្រា៤ភាគរយ ដោយគិតពន្ធត្រឹមតែ
២០លានរៀលតែប៉ុណ្ណោះ។ ដោយឡែកក្នុងករណីឪពុកម្តាយស្លាប់
ហើយផ្ទេរដីឲ្យកូន គឺមិនជាប់ពន្ធប្រថាប់ត្រានោះទេ។
សម្ដេចតេជោបានមានប្រសាសន៍បន្ថែមថា នៅប្រទេសណាក៏គេយកពន្ធដែរ
ប៉ុន្ដែនៅប្រទេសខ្មែរមិនទាន់យកពន្ធទេ សូម្បីតែអត្ដសញ្ញាណប័ណ្ណ
រដ្ឋជួយធ្វើដោយឥតយកថ្លៃ,
រដ្ឋត្រូវទទួលចេញថ្លៃឱ្យប្រជាពលរដ្ឋច្រើនណាស់។
នៅប្រទេសគេដទៃទៀត គេយកពន្ធទាំងអស់នៅសល់ តែខ្យល់ដកដង្ហើមទេ
ប៉ុន្ដែគេយកបណ្ដើរៗ
ហើយគេបង្កប់នៅក្នុងដែនការពារបរិស្ថានរួចទៅហើយ។
សម្រាប់ព្រះរាជាណាចក្រកម្ពុជា
សម្តេចតេជោបានមានប្រសាសន៍បញ្ជាក់ថា
នេះគឺជានយោបាយគាំពារចំពោះអ្នកក្រ ហើយការធ្វើបែបនេះ
ក្នុងគោលបំណងកុំឲ្យអ្នកមានលួចជ្រកក្រោមស្លាកអ្នកក្រ
ដើម្បីគេចវេសពន្ធ។
ទាក់ទងការរិះគន់របស់គណបក្សប្រឆាំងលើបញ្ហាតម្លៃស្រូវអង្ករ
រហូតដល់ទាមទារឲ្យដករដ្ឋមន្ត្រីក្រសួងពាណិជ្ជកម្មចេញពីតំណែង
សម្តេចអគ្គមហាសេនាបតីតេជោ ហ៊ុន សែន
ដែលរួមដំណើរដោយលោកជំទាវកិត្តិព្រឹទ្ធបណ្ឌិត ប៊ុន រ៉ានី
បានចាត់ទុកសកម្មភាពរបស់គណបក្សប្រឆាំងនៅកម្ពុជាថា
ធ្វើអាជីវកម្មចំនួនពីរលើផ្លូវតែមួយ ទៅលើបញ្ហាតម្លៃស្រូវអង្ករ
ដែលមានតម្លៃធ្លាក់ចុះនាពេលបច្ចុប្បន្ន។
សម្តេចតេជោនាយករដ្ឋមន្ត្រីមានប្រសាសន៍ថា
នៅពេលដែលអ្នកប្រឆាំងទៅសួរអ្នកលក់អង្ករដែលឧទាហរណ៍ថា មានតម្លៃ
២,២ពាន់រៀល ក្នុងមួយគីឡូក្រាម គេស្រែកថា
ស្លាប់ហើយអង្ករថ្លៃណាស់
ដាច់ពោះស្លាប់អស់ហើយៗនៅពេលដែលគេទៅសួរប្រជាកសិករឧទាហរណ៍ថា
មួយគីឡូក្រាមមានតម្លៃ ៧០០រៀល ក្នុងមួយគីឡូក្រាមគេស្រែកថា
បងប្អូនអើយស្លាប់អស់ហើយស្រូវថោកណាស់ មិនរួចថ្លៃពលកម្ម
ថ្លៃភ្ជួររាស់ ថ្លៃជីទេ។ សម្តេចតេជោសែន មានប្រសាសន៍ថា
គេថារាជរដ្ឋាភិបាលអសមត្ថភាព នៅទីក្រុងមិនអាចបញ្ចុះថ្លៃអង្កបាន
ហើយគេថា
រាជរដ្ឋាភិបាលអសមត្ថភាពដោយនៅជនបទមិនអាចធ្វើឲ្យស្រូវឡើងថ្លៃ
បាន ដូច្នេះក្នុងមួយដំណើរផ្លូវ គេយកចំណេញបាន ២រឿង
ប្រសិនបើប្រជាពលរដ្ឋមិនបានយល់ទេ
ពិតជាជឿថាពួកប្រឆាំងនិយាយត្រូវ
ប៉ុន្តែប្រជាពលរដ្ឋរបស់យើងបានដឹងយ៉ាងច្បាស់អំពីពុតត្បុតរបស់ពួក
ប្រឆាំងទាំងនោះ។
សម្តេចតេជោនាយករដ្ឋមន្ត្រីបានមានប្រសាសន៍ឲ្យដឹងថា ឥឡូវនេះ
ប្រទេសឥណ្ឌា និងប៉ាគីស្ថានបានបញ្ចេញស្រូវស្តុករបស់ខ្លួន
ហើយប្រទេសមួយចំនួនក៏ទទួលបានបរិមាណស្រូវល្អដែរ ដែលកត្តាទាំងនេះ
ហើយបានជះឥទ្ធិពលដល់តម្លៃស្រូវអង្ករនៅកម្ពុជា។
ទាក់ទិននឹងសេចក្តីរាយការណ៍របស់ប្រជាពលរដ្ឋដែលចូលរួមក្នុងពិធី
នោះថា ទីផ្សារដំឡូងរបស់បងប្អូននៅប្រទេសវៀតណាម
សម្តេចតេជោបានមានប្រសាសន៍ពន្យល់ថា ពិតណាស់ទីផ្សារដំឡូងគឺ
ប្រទេសវៀតណាម និងប្រទេសចិន ប៉ុន្តែពួកប្រឆាំងបាននិយាយថា
បងប្អូនអើយរាជរដ្ឋាភិបាលអត់មានសមត្ថភាពទេ
នាយករដ្ឋមន្ត្រីអត់មានសមត្ថភាពទេ
ព្រោះមិនអាចរកទីផ្សារដំឡូងឲ្យបងប្អូនបាន បោះឆ្នោតឲ្យខ្ញុំមក
ខ្ញុំរកទីផ្សារឲ្យ។ បញ្ហានេះសម្តេចតេជោនាយករដ្ឋមន្ត្រីថ្លែងថា
ភាគច្រើននៃអ្នកដាំដំឡូងបានលក់ទៅវៀតណាម
ហើយវៀតណាមជាសត្រូវរបស់ពួកគាត់ ដូច្នេះបើពួកគាត់ឡើងកាន់អំណាច
ពួកគាត់ប្រហែលជាអាចបង្កើតសង្គ្រាមជាមួយវៀតណាម
អញ្ចឹងទេទីផ្សារដំឡូងក៏បាត់ដែរ។
ពាក់ព័ន្ធជាមួយបញ្ហាតម្លៃប្រេងវិញ
សម្តេចតេជោនាយករដ្ឋមន្ត្រីថ្លែងឲ្យដឹងថា
ឥឡូវនេះចូលដល់ដំណាក់កាលដេញថ្លៃប្រេងសាំងហើយ
ដែលកាលពីឆ្នាំ២០០៣ មានគណបក្សមួយបានឃោសនាថា
បើសិនជាឈ្នះឆ្នោតគេធ្វើឲ្យតម្លៃប្រេងសាំងឲ្យនៅតែ ១៧០០រៀលទេ
ក្នុងមួយលីត្រ ក្នុងពេលដែលតម្លៃប្រេងសាំងថ្លៃ ២,២ពាន់រៀល
ក្នុងមួយលីត្រ។ ចំណែកបក្សនយោបាយមួយទៀតបានឃោសនាថា
បើសិនជាបក្សគាត់ឈ្នះនឹងធ្វើឲ្យប្រេងសាំងស្ថិតក្នុងតម្លៃតែ
១៥០០រៀលប៉ុណ្ណោះ ក្នុងមួយលីត្រ។
សម្តេចតេជោមានប្រសាសន៍ពន្យល់ថា
ការពិតគណបក្សទាំងនោះដូចជាមានស្តុកប្រេងនៅក្នុងមហាសាគរសម្រាប់
យកមកប្រើ ហើយឥឡូវនេះបានចូលដល់ដំណាក់កាលដេញថ្លៃប្រេងសាំងទៀតហើយ
ព្រោះបក្សមួយថា បញ្ចុះថ្លៃសាំងឲ្យស្ថិតនៅត្រឹមប៉ុណ្ណេះ។
ខ្ញុំសួរថា សូម្បីតែប្រទេសអារ៉ាប៊ីសាអូឌីត ឬប្រទេសគុយវ៉ែត
ក៏ប្រទេសទាំងនោះគេតម្លើងថ្លៃប្រេងរបស់គេដែរ
ដើម្បីឲ្យស្មើជាមួយនឹងការផលិត
មិនមែនប្រទេសមានប្រេងហើយលក់ប្រេងថោក ឬឲ្យប្រេងប្រើទទេនោះទេ។
ឯកឧត្តម ចាន់ យឿន អភិបាលខេត្ដមណ្ឌលគិរី ក្នុងឱកាសគោរពស្វាគមន៍
និងរាយការណ៍ជូនសម្ដេចតេជោនាយករដ្ឋមន្ដ្រីបានឲ្យដឹងថា
នៅក្នុងការអនុវត្ដនយោបាយចាស់ សកម្មភាពថ្មីលើវិស័យដីធ្លី
ដែលជាអនុសាសន៍ដ៏ថ្លៃថ្លារបស់សម្ដេចតេជោហ៊ុន សែន
នៅថ្ងៃទី២៨ ខែមិថុនា ឆ្នាំ២០១២
ក្មួយៗវីរយុវនិស្សិតស្ម័គ្រចិត្ដសម្ដេចតេជោ ១០ក្រុម
បានមកដល់ទឹកដីខេត្ដ មណ្ឌលគិរី ហើយនៅថ្ងៃទី២៩ ខែវិច្ឆិកា
ឆ្នាំ២០១២ ក្រុមវីរយុវនិស្សិត២ក្រុម
បន្ថែមទៀតបានមកដល់ខេត្ដមណ្ឌលគិរី សរុបទាំងអស់ ១២ក្រុម
បានចុះអនុវត្ដការងារវាស់វែងដីធ្លីជូនប្រជាពលរដ្ឋនៅតាម
ភូមិសាស្ដ្រ ក្នុងស្រុកចំនួន២ គឺស្រុកកែវសីមា
និងស្រុកពេជ្រាដា។ លទ្ធផលគិតត្រឹមថ្ងៃទី២៥ ខែធ្នូ
ឆ្នាំ២០១២ បានប្រកាសតំបន់វិនិច្ឆ័យចំនួន ៥ឃុំ
ហើយជាមួយនឹងការងារដែលបានអនុវត្ដទៅតាមនីតិវិធីបានបិទផ្សាយ
រយៈពេល ៣០ថ្ងៃមានចំនួន ៣.២០៨ក្បាលដី ស្មើនឹង ៥.៨៧៧ហិកតា
សម្រាប់ប្រជាពលរដ្ឋ ១.៧៣៣គ្រួសារ
និងបានចែកប័ណ្ណកម្មសិទ្ធិបានចំនួន ៦៥៥ប័ណ្ណ។
ក្រៅពីភារកិច្ចស្នូល
ក្រុមវីរយុវនិស្សិតស្ម័គ្រចិត្ដសម្ដេចតេជោបានចូលរួមអនុវត្ដ
កិច្ចការសង្គមមួយចំនួនទៀត ដូចជាការ ជួយដល់ជនក្រីក្រ
ឧបត្ថម្ភវត្ដអារ៉ាម និង ការងារដាំដើមឈើជាដើម។ល។
ទាក់ទងនឹងបញ្ហានេះ
សម្ដេចតេជោនាយករដ្ឋមន្ដ្រីបានសម្ដែងនូវសុទិដ្ឋិនិយម និងមោទនភាព
ចំពោះការសំរេចបាននូវលទ្ធផលជាវិជ្ជមាន
នៃការអនុវត្ដនយោបាយចាស់ សកម្មភាពថ្មីលើវិស័យដីធ្លី
ហើយសម្ដេចក៏បានលើកឡើងនូវបញ្ហាផ្សេងៗមួយចំនួនទាក់ទិនទៅនឹងការ
អភិវឌ្ឍធ្វើឱ្យជីវភាពរស់នៅរបស់ប្រជាជននៅខេត្ដមណ្ឌលគិរីមានការរីក
ចំរើន ដែលការរីកចម្រើនទាំងនេះ គឺទាក់ទងទៅនឹងកត្ដាសន្ដិភាព
ហើយប្រសិនបើគ្មានសន្ដិភាពទេ ជាក់ស្ដែងដូចជានៅតំបន់នេះ
កាលពីមុនគឺមានតែកំលាំងធ្វើសមាហរណកម្មតែប៉ុន្មានគ្រួសារ
ប៉ុណ្ណោះ ប៉ុន្ដែ មណ្ឌលគិរីបច្ចុប្បន្ន
មិនដូចមណ្ឌលគិរីពីអតីតកាលឡើយ
ហើយឥឡូវនេះមណ្ឌលគិរីមានប្រជាពលរដ្ឋបានមករស់នៅយ៉ាងច្រើន
ដោយសារមានហេរដ្ឋារចនាសម្ព័ន្ធផ្លូវដ៏ងាយស្រួល។
អំពីការងារផ្ដល់ប័ណ្ណកម្មសិទ្ធិដីធ្លី
សម្ដេចតេជោក៏បានបង្ហាញនូវការសង្ឃឹមទុកចំពោះបេសកកម្មចុះអនុវត្ដ
ក្នុងជំហានទី២នេះ នឹងមានល្បឿនលឿនជាងមុន
ដោយសារយុវជនចុះអនុវត្ដលើកនេះបានចេញដំណើរព្រមគ្នាទាំង
១៦៨ក្រុម ហើយក្នុងនោះយុវជន និងមន្ដ្រីគឺ សុទ្ធតែមានចំណេះដឹង
និងបទពិសោធន៍រួចហើយ ពិតមែនតែមានយុវជនថ្មីមកចូលរួម
ក៏ប៉ុន្ដែយុវជនទាំងនោះ
គឺសុទ្ធតែបានធ្វើការបណ្ដុះបណ្ដាលបានយ៉ាងត្រឹមត្រូវខុសគ្នាពី
លើកទី១ ដែលនៅ ពេលនោះការចាប់ផ្ដើមដំបូងគឺមានតែ
៩១ក្រុមប៉ុណ្ណោះ ហើយទាំងយុវជន និងមន្ដ្រីនៅពេលនោះបទពិសោធន៍
គឺសុទ្ធតែថ្មីទាំងអស់គ្នា។ ម្យ៉ាងវិញទៀតប្រជាពលរដ្ឋ
ក៏មិនទាន់យល់ដឹងច្បាស់លាស់អំពីសកម្មភាពនៃកិច្ចការនេះ។
ជាមួយនេះសម្ដេចបានផ្ដាំផ្ញើទៅប្រជាពលរដ្ឋ
នៅតំបន់ផ្សេងទៀតដែលត្រូវធ្វើការងារនេះ
បើចង់បានឆាប់រហ័សត្រូវសំរួលគ្នា
ដោយធ្វើការបោះបង្គោលព្រំដីឱ្យហើយ ក៏ដូចជាការត្រៀមរូបថត
និងឯកសារផ្សេងៗសំរាប់ការចុះបញ្ជីដីធ្លីនេះ ៕