នៅ ទីស្តីការគណៈរដ្ឋមន្រ្តី នាព្រឹកថ្ងៃទី ១៥ ខែមករា ឆ្នាំ
២០១៣ ក្រុមការងារគ្រប់គ្រងព័ត៌មាន ផ្សព្វផ្សាយដែលមាន ឯកឧត្តម ស្វាយ ស៊ីថា រដ្ឋលេខាធិការនៃទីស្តីការគណៈរដ្ឋមន្រ្តី
ជាប្រធាន បានបើកកិច្ចប្រជុំត្រួតពិនិត្យការងារ និងពិភាក្សាកិច្ចការគ្រប់គ្រងព័ត៌មាន និងផ្សព្វផ្សាយអំពីព្រះរាជពិធីដង្ហែ និងថ្វាយព្រះភ្លើងព្រះបរមសពព្រះករុណាព្រះបាទសម្តេច ព្រះនរោត្តមសីហនុ ព្រះមហាវីរៈក្សត្រ ព្រះវររាជបីតាឯករាជ្យ បូរណៈភាពទឹកដី និងឯកភាពជាតិខ្មែរ ព្រះបរមរតនកោដ្ឋ ដែលនឹងប្រារព្ធធ្វើចាប់ពីថ្ងៃទី០១
ដល់ថ្ងៃទី ០៤ កុម្ភៈ ឆ្នាំ ២០១៣ ខាងមុខនេះ។
ឯកឧត្តម ស្វាយ ស៊ីថា ប្រធានក្រុមការងារគ្រប់គ្រងព័ត៌មាន
និងផ្សព្វផ្សាយបានមានប្រសាសន៍ឲ្យដឹងថា ដោយយោងតាមអនុសាសន៍ណែនាំរបស់ឯកឧត្តម បណ្ឌិត សភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការ គណៈរដ្ឋមន្រ្តី
និងជាប្រធានអនុគណៈកម្មការគ្រប់គ្រងព័ត៌មាន ផ្សព្វផ្សាយ និងកសាងព្រះបរមរូបព្រះមហាវីរៈក្សត្រ
កិច្ចប្រជុំថ្ងៃនេះគឺដើម្បីត្រៀម និងត្រួតពិនិត្យការងារ និងគ្រប់គ្រងព័ត៌មានផ្សព្វផ្សាយ
ធ្វើយ៉ាងណាឲ្យមានប្រសិទ្ធភាព ធានាបានសុវត្ថិភាព និងខ្លឹមសារឲ្យបានល្អ ដើម្បីផ្សព្វផ្សាយជូនប្រជាពលរដ្ឋបានដឹង
និងយល់ជ្រួតជ្រាបអំពីព្រះរាជពិធីដង្ហែ និងថ្វាយព្រះភ្លើងព្រះបរមសព និងព្រះរាជស្នាព្រះហស្ថរបស់ព្រះអង្គនាពេលកន្លងមក ក៏ដូចជាការខិតខំប្រឹងប្រែង
រៀបចំព្រះរាជពិធីដោយរបស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចអគ្គមហាសេនាបតីតេជោហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជា។
នៅក្នុងកិច្ចប្រជុំដែលមានរយៈពេលជិត០៥ ម៉ោង ក្រុមការងារគ្រប់គ្រងព័ត៌មាន
និងផ្សព្វផ្សាយអំពីព្រះរាជពិធីដង្ហែ និងថ្វាយព្រះភ្លើងព្រះបរមសពព្រះមហាវីរៈក្សត្រ ដែលតំណាងពីអង្គភាពព័ត៌មាន និងប្រតិកម្មរហ័ស ក្រសួងព័ត៌មាន សាលារាជធានីភ្នំពេញ ក្រសួងការបរទេស
និងកិច្ចសហប្រតិបត្តិការអន្តរជាតិ បណ្តាស្ថានីយ៍ទូរទស្សន៍ វិទ្យុនានា បានពិភាក្សាគ្នាលំអិត
អំពីកិច្ចការងារដែលត្រូវដោះស្រាយចំពោះមុខ និងបែងចែកការទទួលខុសត្រូវរៀងៗខ្លួន។ ជាមួយគ្មានេះអង្គប្រជុំក៏បានលើកអំពីការរៀបចំទីតាំងដាក់ប្រព័ន្ធឧឃោសនស័ព្ទ តាមបណ្តោយផ្លូវដែល ក្បួនដង្ហែរព្រះបរមសពឆ្លងកាត់
ចំនួន០៥ កន្លែង ដែលត្រូវសហការរៀបចំគ្រប់គ្រងដោយ ស្ថានីយ៍វិទ្យុជាតិ និងសាលារាជធានីភ្នំពេញ។ ការដាក់តាំងទូរទស្សន៍ LED ខ្នាតធំ ចំនួន ១៤ កន្លែង រៀបចំដោយក្រសួងព័ត៌មាន
និងស្ថានីយ៍ទូរទស្សន៍បាយ័ន សហការជាមួយសាលារាធានីភ្នំពេញ ក្រៅពីនេះគឺស្នើសុំឲ្យ បណ្តាញផ្សព្វផ្សាយពាណិជ្ជកម្មប្រភេទ LED របស់ឯកជនចូលរួមផ្សព្វផ្សាយបន្តផ្ទាល់ផងដែរ។ ស្ថានីយ៍ទូរទស្សន៍ វិទ្យុនានា អង្គភាពព័ត៌មាន
និងប្រតិកម្មរហ័សរៀបចំតាក់តែងជា បទវិចារណកថា ឬបទអត្ថាធិប្បាយនានា ស្តីពីស្នាព្រះហស្ថរបស់មហាវីរៈក្សត្រ និងការរួមចំណែករបស់រាជរដ្ឋាភិបាល។
កិច្ចប្រជុំក៏បានឯកភាពក្នុងការស្វះស្វែងរកទីតាំងឲ្យបានសមរម្យដើម្បីឲ្យអ្នកសារព័ត៌មានជាតិ
និងអន្តរជាតិអាចថត ផ្តិតយកព័ត៌មាន ពីទីតាំងប្រារព្ធព្រះរាជពិធីដង្ហែ និងថ្វាយព្រះភ្លើង
ព្រះបរមសពដើម្បីផ្សព្វផ្សាយឲ្យបានល្អ។ ក្រសួងព័ត៌មាន ក៏ជំរុញការអប់រំណែនាំ
ពិធីករ ពិធីការិនី ទូរទស្សន៍ វិទ្យុនានាឲ្យយល់ដឹងអំពីការប្រើប្រាស់ព្រះរាជស័ព្ទផងដែរ។
ឯកឧត្តមស្វាយ ស៊ីថា ក្នុងនាមជាប្រធានអង្គប្រជុំក៏បានជំរុញឲ្យអ្នកគ្រប់គ្រងស្ថានីយ៍ទូរទស្សន៍ វិទ្យុនានា បន្តផ្សព្វផ្សាយចរាចរណ៍របស់រាជរដ្ឋាភិបាលឲ្យបានច្រើនដងបន្ថែមទៀត ស្តីពីការត្រៀមរៀបចំពិធីបុណ្យដង្ហែ
និងថ្វាយព្រះភ្លើងព្រះបរមសព។
នៅក្នុងកិច្ចប្រជុំនេះដែរ ឯកឧត្តម ស្វាយ ស៊ីថា បានផ្តួចផ្តើមគំនិតបង្កើតក្រុមការងារ
តូចៗ មួយចំនួនដោយមានការឯកភាពពីអង្គប្រជុំ ដើម្បីតាមដានការងារគ្រប់គ្រងការផ្សព្វផ្សាយ
រួមមានទូរទស្សន៍ វិទ្យុ និងគេហទំព័រជាដើម ហើយថែមទាំងបានបង្កើតក្រុមការងារប្រចាំការដើម្បីគ្រប់គ្រងលើការងាររួមនៅអង្គភាពព័ត៌មាន
និងប្រតិកម្មរហ័សផងដែរ។
ដើម្បីបំរើឲ្យការផ្សព្វផ្សាយឲ្យមានប្រសិទ្ធភាព អង្គប្រជុំក៍បានលើកយកបញ្ហាមួយចំនួន ស្នើសុំយោបល់សម្រេចដ៏ខ្ពង់ខ្ពស់ពីឯកឧត្តម
បណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី
និងជាប្រធានអនុគណៈកម្មការគ្រប់គ្រងព័ត៌មាន និងផ្សព្វផ្សាយ និងកសាងព្រះបរមរូបព្រះមហាវីរៈក្សត្រ។
អង្គប្រជុំដែលប្រព្រឹត្តិទៅក្នុងបរិយាកាសស្និតស្នាល
និងក្នុងស្មារតីទទួលខុសត្រូវក្រោមអធិបតីភាព ឯកឧត្តម ស្វាយ ស៊ីថា បានសម្រេចយកព្រឹកថ្ងៃទី ២៩ ខែមករា
ឆ្នាំ ២០១៣ ធ្វើការត្រួតពិនិត្យ លទ្ធផលការងារដែលបានដាក់ចេញជាចុងក្រោយ។
អត្ថបទ៖
អង្គភាពព័ត៌មាន និងប្រតិកម្មរហ័ស