សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើការអំពាវនាវដល់ប្រជាពលរដ្ឋកម្ពុជាទាំង អស់ ឲ្យមានការឆ្វេងយល់ និងប្រុងប្រយ័ត្នអំពីអ្វីដែលជារបស់មាននៅក្នុងដៃ និងរបស់ខ្យល់ ដែលត្រូវបានសន្យាដោយក្រុមប្រឆាំង។ សម្តេចតេជោនាយករដ្ឋមន្ត្រីបានមានប្រសាសន៍បែបនេះ នៅក្នុងឱកាសអញ្ជើញជាអធិបតីក្នុងពិធីប្រគល់សញ្ញាបត្រជូនដល់និស្សិតសកលវិទ្យាល័យភ្នំពេញអន្តរជាតិ ចំនួន ១.៤៥៨ នាក់ នៅវិទ្យាស្ថានជាតិអប់រំ ក្នុងរាជធានីភ្នំពេញ នាថ្ងៃទី២៦ ខែកុម្ភៈ ឆ្នាំ២០១៣។
សម្តេចតេជោនាយករដ្ឋមន្ត្រីមានប្រសាសន៍ឲ្យដឹងថា យើងរងគ្រោះជាច្រើនដងរួចមកហើយ ដូចជា នៅថ្ងៃទី១៧ មីនា ជយោ! សម្តេចឪ នៅថ្ងៃទី១៨ មីនា ឆ្នាំ១៩៧០ បរាជ័យ សីហនុ។ បន្ទាប់ទៅជយោ! លោកសេនាប្រមុខ លន់ លន់ លុះស្អែកឡើង បរាជ័យ លន់ នល់។ សម្តេចតេជោនាយករដ្ឋមន្ត្រីបានមានប្រសាសន៍បញ្ជាក់ថា រឿងគ្រោះថ្នាក់ត្រូវតែប្រយ័ត្នប្រយែង ត្រូវតែដឹងឲ្យច្បាស់ថា របស់ដែលមានពិតនៅក្នុងដៃទើបវាប្រាកដ ប៉ុន្តែរបស់ខ្យល់ដែលគេសន្យាវាមិនដែលប្រាកដទេ។
សម្តេចតេជោនាយករដ្ឋមន្ត្រីបានមានប្រសាសន៍ថា ខ្ញុំសង្ឃឹមថា ទាល់តែយើងរួមគ្នាដើម្បីធ្វើកុំឲ្យពួកមនុស្សមួយក្រុមតូចបំផ្លាញនូវសន្តិភាព ស្ថិរភាពនយោបាយរបស់យើងបាន ព្រោះចលាចលសង្គម ការរត់លូន ដោយសារគ្រាប់បែករបស់អាមេរិក និង លន់ នល់ ទំលាក់ ដោយសារគ្រាប់ផ្លោងនៃភាគីទាំងសងខាងប្រយុទ្ធគ្នា ហើយជំនាន់ ប៉ុល ពត តើប្រជាពលរដ្ឋយើងវេទនាប៉ុណ្ណា?។ ក្រោយរបប ប៉ុល ពត សង្គ្រាមនៅតែបន្ត ទម្រាំតែយើងរកបានការឯកភាពជាតិបញ្ឈប់នូវជម្លោះប្រដាប់អាវុធតាមរយៈនយោបាយ ឈ្នះ ឈ្នះ បង្កើតបាននូវស្ថានភាពដូចសព្វថ្ងៃនេះ។ សម្តេចតេជោថ្លែងថា ខ្ញុំសូមអំពាវនាវឲ្យប្រជាពលរដ្ឋកម្ពុជាគ្រប់ស្រទាប់វណ្ណៈរួមគ្នាដើម្បីការពារសមិទ្ធផលនានារបស់សង្គមជាតិ ដោយមិនត្រូវទុកឲ្យមនុស្សមួយចំនួនធ្វើការបំផ្លិចបំផ្លាញនោះទេ។
សម្តេចតេជោនាយករដ្ឋមន្ត្រីបានមានប្រសាសន៍ឲ្យដឹងថា ទម្រាំតែយើងបង្កើតបាននូវស្ថានភាពដូចសព្វថ្ងៃនេះ វាទាមទាឲ្យយើងចូលរួមថែទាំទាំងអស់គ្នា ដែលខ្ញុំសង្ឃឹមថា ទាល់តែយើងរួមគ្នាធ្វើកុំឲ្យមនុស្សមួយក្រុមតូចបំផ្លាញនូវសន្តិភាព និងស្ថិរភាពនយោបាយ។ យើងត្រូវបន្តការខិតខំតទៅទៀត ដោយត្រូវចងចាំឲ្យច្បាស់ថា ការប្រកួតប្រជែងនៅក្នុងសេដ្ឋកិច្ចក្តី នយោបាយក្តី បញ្ហាធំជាងគេ គឺជំនឿ ដែលជំនឿទុកចិត្តរបស់យើងក៏ផ្តើមចេញពីកត្តាស្ថិរភាពផងដែរ។
ពាក់ព័ន្ធជាមួយនឹងបញ្ហាសេដ្ឋកិច្ច សម្តេចតេជោនាយករដ្ឋមន្ត្រីបានធ្វើការកត់សម្គាល់ថា សេដ្ឋកិច្ចផ្សារសេរី គឺគ្មានមនុស្សធម៌ទេ ហើយវាអយុត្តិធម៌ណាស់សម្រាប់អ្នកក្រ។ ដែលហៅថា សេដ្ឋកិច្ចទីផ្សារសេរី កត្តាចាំបាច់របស់វា គឺការប្រកួតប្រជែង ដែលវាខុសពីសេដ្ឋកិច្ចផែនការចាប់បង្ខំ ដែលទម្រង់សេដ្ឋកិច្ចនេះបានកើតឡើងនៅក្នុងដំណាក់កាលសង្គ្រាមត្រជាក់។ក្នុងដំណាក់កាលនោះ រដ្ឋហ៊ានលូកដៃកំណត់ថ្លៃទំនិញ ដែលនៅពេលខាត រដ្ឋជួយបំពេញខាតឲ្យសហគ្រាស ប៉ុន្តែយូរៗទៅរដ្ឋក៏អស់លុយ ដែលគេហៅថា «រដ្ឋក្ស័យធន»។ សម្តេចតេជោនាយករដ្ឋមន្ត្រីបានមានប្រសាសន៍បញ្ជាក់ថា នៅក្នុងវិបត្តិសេដ្ឋកិច្ចនៅសហរដ្ឋអាមេរិក និងនៅអឺរ៉ុប ម្ចាស់រោងចក្រ សហគ្រាសធំៗ គេបានកាត់ចោលបុគ្គលិក កម្មករ ដោយគ្មានចិត្តមេត្តានោះទេ។
ទាក់ទងទៅនឹងបញ្ហាអគ្គិភ័យនៅផ្សារក្នុងស្រុកកោះធំ ខេត្តកណ្តាល សម្តេចតេជោនាយករដ្ឋមន្ត្រីបានមានប្រសាសន៍ប្រាប់ក្រុមអាជីវករថា សូមបងប្អូនកុំភ័យ ព្រោះតាមរយៈការអំពាវនាវមានសប្បុរសជនបានបរិច្ចាគធនធានចំនួន ២៨ម៉ឺនដុល្លារអាមេរិក សម្រាប់ការកសាងផ្សារថ្មីឡើងវិញ។ សម្តេចតេជោបានមានប្រសាសន៍បញ្ជាក់ថា ក្រុមអាជីវករមិនត្រូវចាញ់ឧបាយកលពួកប្រឆាំងដែលបានទៅភូតកុហក់អំពីបញ្ហាផ្សេងៗនោះឡើយ។ ជាមួយគ្នានោះដែរសម្តេចតេជោបានធ្វើការអំពាវនាវកុំឲ្យមានការលួចដុតផ្សារ ហើយស្វែងរកជំនួយពីនាយករដ្ឋមន្ត្រី និងបានអំពាវនាវឲ្យមានការប្រុងប្រយ័ត្នចំពោះបញ្ហាអគ្គីភ័យផងដែរ។ ពាក់ព័ន្ធនឹងបញ្ហាអគ្គិភ័យនេះ សម្តេចតេជោនាយករដ្ឋមន្ត្រី ក៏បានរិះគន់ចំពោះក្រុមអ្នកដើរបំផុសរឿង បង្កចលាចល នៅពេលដែលកើតមានបញ្ហាដូចជាអគ្គីភ័យនេះ ដោយសម្តេចតេជោបានមានប្រសាសន៍បញ្ជាក់ថា ក្រុមនោះមានជំនាញតែដើរបំផុសបង្កចលាចល ដែលមិនអាចយកមកធ្វើការងាររដ្ឋបានទេ ព្រោះពួកគេមានជំនាញត្រឹមតែដើរភូតកុហក ញុះញង់ បង្កចលាចល។
លោកស្រី ទេព កូលាប សកលវិទ្យាធិការនៃសាកលវិទ្យាល័យភ្នំពេញអន្តរជាតិ មានប្រសាសន៍ឲ្យដឹងថា ចាប់តាំងពីឆ្នាំសិក្សា ២០០៦-២០០៧ រហូតមកដល់ឆ្នាំសិក្សា ២០១១-២០១២ កន្លងមកនេះ និស្សិតដែលបានបញ្ចប់ការសិក្សាមានចំនួន ២ ៨១៦ នាក់ និងសិស្សថ្នាក់វិជ្ជាជីវៈ និស្សិតថ្នាកបរិញ្ញាបត្រ ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិតកំពុងសិក្សាមានចំនួន ៧៦៣១ នាក់ និងមានគណៈគ្រប់គ្រងបុគ្គលិក សាស្ត្រាចារ្យ និងលោកគ្រូអ្នកគ្រូចំនួន ៤២៨នាក់ ក្នុងនោះមានជនជាតិបរទេស ១៦ នាក់៕