ឯកឧត្តម អ៊ីវ៉ាន់ ម៉ារកិច (Ivan Mrkic) រដ្ឋមន្ត្រីក្រសួងការបរទេសនៃសាធារណរដ្ឋស៊ែបី បានធ្វើការវាយតម្លៃខ្ពស់ចំពោះការអភិវឌ្ឍន៍យ៉ាងឆាប់រហ័សរបស់ព្រះរាជាណាចក្រកម្ពុជា ហើយលោកបានសម្តែងនូវការរីករាយ និងអបអរសាទរចំពោះការរីកចម្រើនរបស់ប្រទេសកម្ពុជា។ ឯកឧត្តម អ៊ីវ៉ាន់ ម៉ារកិច បានមានប្រសាសន៍បែបនេះ នៅក្នុងជំនួបសម្តែងការគួរសមជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាថ្ងៃទី២៦ ខែកុម្ភៈ ឆ្នាំ២០១៣ នៅវិមានសន្តិភាពនៃទីស្តីការគណៈរដ្ឋមន្ត្រី ក្នុងរាជធានីភ្នំពេញ។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីបានមានប្រសាសន៍ឲ្យដឹងថា ឯកឧត្តម អ៊ីវ៉ាន់ ម៉ារកិច (Ivan Mrkic) បានមានប្រសាសន៍ថា សាធារណរដ្ឋស៊ែប៊ីមានគោលបំណងចង់ពង្រឹងទំនាក់ទំនងជាមួយរាជរដ្ឋាភិបាលកម្ពុជា ដោយលោកបានស្នើសុំឲ្យមានការផ្លាស់ប្តូរដំណើរទស្សនកិច្ចរបស់ថ្នាក់ដឹកនាំ ក៏ដូចជាអធិការកិច្ចរវាងប្រទេសទាំងពីរ (ម្ពុជា-ស៊ែប៊ី) និងបានស្នើឲ្យមាននូវការចុះហត្ថលេខាបន្ថែមទៀត ជាពិសេសការចុះហត្ថលេខាពាក់ព័ន្ធនឹងការការពារអ្នកវិនិយោគ ជម្រុញលើវិស័យទេសចរណ៍ និងការលើកលែងទិដ្ឋាការសម្រាប់លិខិតឆ្លងដែនផ្លូវការ និងលិខិតឆ្លងដែនការទូត រួមទាំងបញ្ហាផ្សេងៗទៀតដែលបម្រើឲ្យផលប្រយោជន៍នៃប្រទេសទាំងពីរ។
សម្តេចតេជោនាយករដ្ឋមន្ត្រីបានសម្តែងនូវការគាំទ្រ និងយល់ស្របនូវអ្វីដែលឯកឧត្តម អ៊ីវ៉ាន់ ម៉ារកិច (Ivan Mrkic) រដ្ឋមន្ត្រីការបរទេសស៊ែប៊ី បានលើកឡើង ដោយសម្តេចតេជោបានមានប្រសាសន៍ថា កម្ពុជាស្វាគមន៍ដំណើរទស្សនកិច្ចរបស់គណៈប្រតិភូស៊ែប៊ី ហើយក៏ត្រូវឲ្យមានដំណើរទស្សនកិច្ចរបស់សភាពាណិជ្ជកម្មស៊ែប៊ី ក៏ដូចជាអ្នកវិនិយោគស៊ែប៊ី មកកាន់ព្រះរាជាណាចក្រកម្ពុជាដើម្បីធ្វើការស្វែងយល់ពីឱកាសវិនិយោគ និងការសហការគ្នាជាមួយនឹងកម្ពុជាផងដែរ។
សម្តេចតេជោនាយករដ្ឋមន្ត្រីបានយល់ស្របថា ភាគីទាំងពីរគប្បីគួរជម្រុញឲ្យមាននូវការចុះហត្ថលេខាលើកិច្ចព្រមព្រៀងគាំពារអ្នកវិនិយោគ ដើម្បីធ្វើយ៉ាងណាឲ្យមានជំនឿទុកចិត្តពីអ្នកវិនិយោគទុនទាំងសងខាង (កម្ពុជា-ស៊ែប៊ី) ហើយការចុះហត្ថលេខាលើការលើកលែងទិដ្ឋាការសម្រាប់លិខិតឆ្លងដែនផ្លូវការ និងលិខិតឆ្លងដែនការទូត គួរត្រូវបានចុះហត្ថលេខានៅពេលវេលាសមស្របណាមួយ។
សម្តេចតេជោនាយករដ្ឋមន្ត្រីបានមានប្រសាសន៍ថ្លែងអំណរគុណ ចំពោះរដ្ឋាភិបាលស៊ែប៊ី ដែលបានរៀបចំលុបចោលបំណុលដែលកម្ពុជាបានជំពាក់ចំនួនប្រមាណជាជាង ១លានដុល្លារអាមេរិក កាលពីឆ្នំា១៩៦៩ និងបានថ្លែងអំណរគុណផងដែរចំពោះរដ្ឋាភិបាលស៊ែប៊ី ដែលបានជួយដល់កម្ពុជាលើវិស័យអភិវឌ្ឍនធនធានមនុស្ស តាមរយៈការផ្តល់អាហារូបករណ៍ចំនួន៤ ដល់កម្ពុជា សម្រាប់ឆ្នាំ២០១៣-២០១៤៕