សម្តេចអគ្គមហាសេនាបតីតេជោ ហ៊ុន សែន
នាព្រឹកថ្ងៃទី៧ ខែមីនា ឆ្នាំ២០១៣
បានមានប្រសាសន៍នៅវិទ្យាស្ថានជាតិអប់រំ ដោយផ្តល់ជាដំបូន្មាន
ឲ្យក្រុមមន្ត្រីនៃមុខងារសាធារណៈនៃរាជរដ្ឋាភិបាលកម្ពុជាទាំងអស់
ត្រូវចាត់ទុកខ្លួនជាអ្នកបម្រើ
និងជាអ្នកផ្តល់សេវាដ៏ល្អជូនប្រជាជន គឺមិនមែនជាអ្នកត្រួតត្រា
ឬក៏ជាម្ចាស់របស់ប្រជាជនទេ។
ដំបូន្មានរបស់សម្តេចតេជោ
នាយករដ្ឋមន្ត្រីបានធ្វើឡើង
នៅក្នុងឱកាសអញ្ជើញជាអធិបតីក្នុងពិធីប្រគល់សញ្ញាបត្រ
ដល់សិស្សមន្ត្រីជាន់ខ្ពស់ជំនាន់ស្ថិរភាពសង្គម
សិស្សមន្ត្រីក្រមការជំនាន់សមធម៌សង្គម
និងវិញ្ញាបនបត្រដល់កម្មសិក្សាការីមន្ត្រីជាន់ខ្ពស់ មន្ត្រីមធ្យម
ឆ្នាំ២០១១-២០១២ និងបើកវគ្គបណ្តុះបណ្តាល និងវិក្រឹតការឆ្នាំ២០១៣
របស់សាលាភូមិន្ទរដ្ឋបាល។ សម្តេចតេជោមានប្រសាសន៍បញ្ជាក់ថា
ជាបឋមត្រូវនិយាយពីគុណធម៌ សីលធម៌ ឥរិយាបទរបស់មន្ត្រីរាជការរបស់យើង
ហើយត្រូវតែដឹងថា យើងមិនមែនជាអ្នកត្រួតត្រា ហើយក៏មិនមែន
ឬជាម្ចាស់របស់ប្រជាជនដែរ ប៉ុន្តែផ្ទុយទៅវិញយើងជាអ្នកបម្រើ
និងជាអ្នកផ្តល់សេវាជូនប្រជាជនហើយត្រូវចាំឲ្យច្បាស់លើចំណុច
នេះ។
“បើតែងតាំងជាមន្ត្រីហើយៗខ្លួនបែរជាតាំងខ្លួនជាចៅហ្វាយរបស់
ប្រជាជននោះ ជាការខុសឆ្គងដ៏ធ្ងន់ធ្ងរនៃសីលធម៌ របស់មន្ត្រី”។
សម្តេចតេជោបានមានប្រសាសន៍ថា
មន្ត្រីត្រូវតែដឹងថា ខ្លួនជាខ្ញុំបម្រើរបស់ប្រជាជន
ជាអ្នកបម្រើរបស់ប្រជាជន ជាអ្នកផ្តល់សេវាឲ្យប្រជាជន
ហើយប្រជាជនត្រូវទទួលបាននូវការដែលយើងគាត់បម្រើ និងសេវាឲ្យគាត់
មិនមែនតែងតាំងជាមន្ត្រីហើយ ហើយធ្វើជាម្ចាស់ប្រជាជននោះទេ
ហើយដើម្បីក្លាយខ្លួនជាមន្ត្រីល្អ ទោះជាពេលដេក ដើរ ឈរ
អង្គុយត្រូវគិតថា ខ្លួនគឺជាអ្នកបម្រើប្រជាជនដែរ។
មន្ត្រីដែលធ្វើការងារបានរយៈពេលវែងឬរយៈពេលខ្លីគឺវាចំណុះលើ
បញ្ហាថា តើយើងបម្រើប្រជាជនបានកម្រិតណា។
សម្តេចតេជោសែន មានប្រសាសន៍ឲ្យដឹងថា
មិនខ្វះទេមន្ត្រីដែលឡើងធ្វើការហើយបានធ្លាក់មកវិញ
មិនខ្វះទេបក្សនយោបាយដែលធ្លាក់មកវិញ។
បញ្ហាធំជាងគេគ្មានអ្វីក្រៅពីឥរិយាបទរបស់មន្ត្រីគណបក្សនោះទេ
ហើយបើនៅក្នុងរដ្ឋបាលវិញនៅបាន ឬមិនបាន គឺវាចំណុះទៅលើថា
តើយើងមានចរឹតស្លូតបូត សុភាពរាបសារ បម្រើប្រជាជន
ដោះស្រាយការងារជូនប្រជាជនបានប៉ុណ្ណា។
សម្តេចនាយករដ្ឋមន្ត្រីថ្លែងថា
ជាមួយប្រជាពលរដ្ឋយើងត្រូវធ្វើការឲ្យបានល្អ បម្រើពួគគាត់ឲ្យល្អ
នោះពួកគាត់ពិតជាផ្តល់នូវការតបស្នងត្រឡប់មកវិញដោយការស្រឡាញ់
រាប់អានជាមួយយើង
ហើយគ្មានអំពើអាក្រក់ណាមួយដែលឆ្លើយតបដោយទង្វើល្អពីសំណាក់
ប្រជាពលរដ្ឋចំពោះយើងវិញនោះទេ។
សម្តេចនាយករដ្ឋមន្ត្រីមានប្រសាសន៍ថា
យើងមិនអាចធ្វើការតម្រូវចិត្តមនុស្សទាំងអស់បានទេ
ប៉ុន្តែយើងត្រូវតម្រូវចិត្តឲ្យបានមនុស្សភាគច្រើន វាដូចគ្នានឹង
ចុងភៅម្នាក់ដែលមិនអាចធ្វើម្ហូបពេញចិត្តជាមួយនឹងមនុស្សដែលទទួលទាន
ក្នុងចំនួនដ៏ច្រើននោះទេ ព្រោះអ្នកខ្លះថាសាបពេក
អ្នកខ្លះថាប្រៃពេក អ្នកខ្លះថាជូរពេក អ្នកខ្លះថាផ្អែមពេក។
ប៉ុន្តែយកល្អយើងត្រូវខិតខំធ្វើយ៉ាងណាស្លតម្រូវចិត្តមនុស្ស
ភាគច្រើនទើបជាការប្រសើរ ហើយនៅលើលោកយើងនេះ
ដរាបណាយើងដើរកាត់ទឹកភ្លៀងមិនទទឹកទឹកភ្លៀងនោះទើបរួចចាកផុតពី
ការទិតៀនពីអ្នកដទៃ។ ប៉ុន្តែយើងត្រូវខិតខំថា
យើងមិនអាចដើរគេចផុតទឹកភ្លៀងបានទេ
ហើយដោយសារតែមិនអាចដើរគេចផុតពីទឹកភ្លៀងហ្នឹងហើយបានជាយើងត្រូវ
ដឹងថា យើងមិនអាចបំពេញចិត្តមនុស្សទាំងអស់បានទេ
ប៉ុន្តែយើងត្រូវបំពេញចិត្តមនុស្សភាគច្រើន
ឯមនុស្សភាគតិចដែលមិនពេញចិត្តជាមួយយើងក៏ត្រូវធ្វើយ៉ាងណាកុំឲ្យ
ក្លាយទៅជាសត្រូវស្លាប់រស់ជាមួយនឹងយើងដែរ។
សម្តេចតេជោមានប្រសាសន៍ថា
ក្នុងឋានៈជាមន្ត្រីត្រូវធ្វើអ្វីតាមច្បាប់កំណត់ ហើយក្រៅពីកិច្ច
ការរបស់រដ្ឋបើសិនជាយើងអាចជួយប្រជាពលរដ្ឋបានវាក៏កាន់តែប្រសើរ។
កិច្ចការនីមួយៗទាមទានូវការចូលរួមហើយបើចង់បានការចូលរួមយើងត្រូវតែ
ប្រមូលផ្តុំកម្លាំងមនុស្ស កម្លាំងបញ្ញាមករួមគ្នាដើម្បីធ្វើការ
ថ្វីត្បិតតែយើងមិនអាចបានទាំងអស់នោះទេ
ប៉ុន្តែយើងត្រូវតែប្រមូលកម្លាំងឲ្យបានច្រើន។
សម្តេចតេជោនាយករដ្ឋមន្ត្រីបានមាន
ប្រសាសន៍ឲ្យដឹងថា ឥឡូវនេះ
រាជរដ្ឋាភិបាលបានដាក់ចេញនូវតារាងតម្លៃសេវាសាធារណៈសម្រាប់ក្រសួង
ស្ថាប័ន ទាំងថ្នាក់ជាតិ និងទាំងនៅថ្នាក់ក្រោមជាតិ
ត្រូវអនុវត្តតាមតារាងនោះ។ បើគេឲ្យយក ១.០០០រៀល មន្ត្រីត្រូវយក
១.០០០ រៀលទៅ ហើយប្រឹងប្រែងធ្វើដូចជាមន្ត្រីអត្រានុកូលដ្ឋាន
ដែលប្រជាពលរដ្ឋត្រូវការសំបុត្រកំណើត ឬសំបុត្រអាពារហ៍ពិពារហ៍
ឬសំបុត្រមរណៈភាពត្រូវធ្វើហើយយកលុយតាមការកំណត់ ហើយអាចធ្វើរួចហើយ
យកទៅឲ្យប្រជាពលរដ្ឋផង។
សម្តេចតេជោបានផ្តល់ការណែនាំដល់ក្រុម
មន្ត្រីបញ្ចប់ការសិក្សាថា វិធីសាស្ត្រដឹកនាំ
និងរបៀបធ្វើការមានសារៈសំខាន់ណាស់សម្រាប់មន្ត្រី
មិនថាមន្ត្រីនៅក្នុងស្ថាប័នរដ្ឋ
នៅតាមអាជ្ញាធរថ្នាក់ក្រោមជាតិឬនៅក្នុងអង្គការក្រៅរដ្ឋាភិបាល
ឬបក្សនយោបាយមួយទេ
ហើយគ្រួសារមួយក៏មានចំណុចមិនខុសគ្នាប៉ុន្មានដែរ។
ជាបឋមត្រូវតែរៀបចំផែនការឲ្យបានជាក់លាក់មួយ
ហើយបើនិយាយឲ្យទូលាយជាង
នេះគឺត្រូវរៀបចំក្របខណ្ឌគោលនយោបាយឲ្យបានជាក់លាក់មួយឲ្យស្របទៅ
នឹងលទ្ធភាព សភាពការណ៍ឲ្យច្បាស់ពិតប្រាកដ ដាក់ចេញជាផែនការ
ឬក្របខណ្ឌគោលនយោបាយជាយុទ្ធសាស្ត្រ ឬយុទ្ធវិធីនៅក្នុងនោះ
ដែលកិច្ចការនេះយើងសម្រេចបាន ៣០%នៃផែនការ
ប៉ុន្តែ៣០%នេះមានសារៈសំខាន់ណាស់
ព្រោះវាជាផែនទីចង្អុលផ្លូវសម្រាប់ការធ្វើដំណើរ។
សម្តេចតេជោបានលើកជាឧទាហរណ៍ថា “មានអ្នកខ្លះបែរជានិយាយថា
នយោបាយល្អក៏ប៉ុន្តែអ្នកអនុវត្តន៍គឺខុស។ វាមិនដូច្នោះទេ។
បើសិនជានយោបាយត្រឹមត្រូវ
ការអនុវត្តកាប់សម្លាប់ប្រជាជនកើតឡើងយ៉ាងដូច្នេះ
គេយកកម្មវិធីនយោបាយ យកទៅវាស់ អ្នកឯងសម្លាប់ប្រជាជនគឺខុស
ធ្វើទារុណកម្មចំពោះប្រជាជនគឺខុស។ ប៉ុន្តែនេះនយោបាយ គឺខុសតែម្តង។
នយោបាយគឺអញ្ចឹង
ឲ្យជម្លៀសប្រជាជនចេញពីទីក្រុងពិតជានយោបាយរបស់អង្គការចាត់
តាំងនយោបាយ និងយោធារបស់ ប៉ុល ពត ឬរដ្ឋាភិបាលកម្ពុជាប្រជាធិបតេយ្យ”។
សម្តេចតេជោបានមានប្រសាសន៍ថា
នៅក្នុងជំហានបន្ទាប់ត្រូវចាត់តាំងអនុវត្តន៍
ព្រោះបើមានតែកម្មវិធីនយោបាយដាក់ចោលលើតុ
ឬក្នុងទូរវាគ្រាន់តែជាក្រដាសដែលអត់បានការតែប៉ុណ្ណោះ។
នៅពេលចាត់តាំងអនុវត្តន៍ គឺត្រូវតែមានធនធានមនុស្ស
ដោយត្រូវជ្រើសរើសមនុស្សដែលមានសមត្ថភាពតាមមុខជំនាញរបស់គេពិតៗ។
ការចាត់តាំងអនុវត្តនេះមានសារៈសំខាន់ ដែលធ្វើឲ្យសម្រេចបាន ៣០%ទៀត។
ប៉ុន្តែត្រូវឆ្លុះបញ្ចាំងមកវិញដែរថា
តើពេលដែលយើងអនុវត្តន៍នោះវាខុស ឬត្រូវ?
ដូច្នេះហើយទើបពេលអនុវត្តន៍ត្រូវតែមានការត្រួតពិនិត្យអំពី
ការចាត់តាំងអនុវត្តនោះ។
ប៉ុន្តែមានពេលខ្លះក៏តម្រូវឲ្យមានការកែលម្អខាងគោលនយោបាយដែរ។
សម្តេចតេជោបានមានប្រសាសន៍បន្តថា
ការដាក់ចេញផែនការ និងការចាត់តាំងអនុវត្តន៍ និង
ត្រួតពិនិត្យតាមដានផងនោះ ទើបតែសម្រេចបាន ៦០% ប៉ុណ្ណោះ ដូច្នេះនៅសល់
៤០%ទៀត ត្រូវចំណុះលើកត្តាចៃដន្យដែលលេចឡើងនៅក្នុងពេលដំណើរការនោះឯង
ព្រោះវាមិនដែលមានផែនការឬកម្ម វិធីណាមួយត្រឹមត្រូវឥតខ្ចោះ
ដោយមិនបានគិតបញ្ហាប្រធានស័ក្តកើតឡើងទេ។
សម្តេចតេជោបានលើកយកឧទាហរណ៍ជាក់ស្តែងមកបង្ហាញថា
តើអ្នកណាបានគិតថាឆ្នាំថោះទៅជាទឹកធំទេ?។ អត់ទេចៃដន្យមែនទែន
ហើយអ្នកណាបានគិតថា ឆ្នាំរោងបែរជាទឹកតូចទេ? អត់ទេ។
រឿងរ៉ាវយ៉ាងដូច្នេះ នេះហើយជាការលេចឡើងនៃកត្តាចៃដន្យក្នុងពេល
ដែលយើងអនុវត្ត។
សម្តេចតេជោបានមានប្រសាសន៍ឲ្យដឹងថា
តាំងពីឆ្នាំ២០០៤ រហូតដល់ឆ្នាំ២០០៧
កំណើនសេដ្ឋកិច្ចរបស់កម្ពុជាឡើងដល់ ២ខ្ទង់ ហើយនៅឆ្នាំ២០០៥
យើងឡើងដល់ ១៣,៣%។ ប៉ុន្តែ នៅលើពិភពលោកអ្នកណាបានគិតថា
មានវិបត្តិសេដ្ឋកិច្ចហិរញ្ញវត្ថុសកលវាកើតឡើង ហើយសេដ្ឋកិច្ចអាមេរិក
អឺរ៉ុបធ្លាក់ដាំក្បាលបែបនេះៗហើយជាកត្តាចៃដន្យ
ដែលត្រូវចល័តភ្លាម។
ឧទាហរណ៍សំណាញ់សុវត្ថិភាពសម្រាប់វិស័យធនាគារពីទុនបំរុង កាតព្វកិច្ច
៨% ឲ្យឡើងទៅដល់ ១៦%ភ្លាម
ដើម្បីធានាហានិភ័យនៃបញ្ហាការដួលរលំធនាគារ។
ការខ្ចីទិញអចលនទ្រព្យឲ្យខ្ចីបានត្រឹមតែ ១៥%ទេ។
យើងត្រូវផ្លាស់ប្តូរផែនការភ្លាម ហើយនេះជាសមត្ថភាពរបស់រដ្ឋ
ក្នុងការគ្រប់គ្រងសភាពការណ៍នាពេលនោះ។
ពេលតម្លៃប្រេងឡើងថ្លៃរដ្ឋបានបំពេញខាតមួយឆ្នាំ ២០លានដុល្លារ
នៅពេលនោះ។ ឆ្នាំ២០០៨ ដល់ឆ្នាំ២០១១ សង្គ្រាមជាយដែនផង
និងគ្រោះទឹកជំនន់ផង ដែលយើងត្រូវទប់ទល់ក្នុងពេលតែមួយ
ក្នុងពេលដែលវិបត្តិហិរញ្ញវត្ថុនៅមិនទាន់ចប់
ទាំងនេះសុទ្ធតែជាកត្តាចៃដន្យដែលអត់បានគ្រោងទុកទេ។
អ្នកណាបានគ្រោងទុកថា គេលើកទ័ពយកមកវាយយើង ព្រោះប្រទេសជិតខាងគ្នា
ទាំងអស់នេះហើយសុទ្ធសឹងតែជាកត្តាចៃដន្យ
ដែលបញ្ហានេះគឺត្រូវពឹងពាក់លើសមត្ថភាពដឹកនាំនោះ។
សម្តេចតេជោសែនមានប្រសាសន៍បញ្ជាក់ថា
អ្វីដែលខ្ញុំចង់បាន
គឺមន្ត្រីដែលមានសមត្ថភាពម្ចាស់ការដោះស្រាយបញ្ហានៅនឹងកន្លែង
ប៉ុន្តែខ្ញុំមិនចង់បានមន្ត្រីដែលមានបញ្ហាប្រធានស័ក្កកើតទី១
រាយការណ៍ ជូនថ្នាក់លើ ទី២ បន្ទោសថ្នាក់ក្រោមនោះទេ។
ក្រៅពីការផ្តល់ជាដំបូន្មានដល់
មន្ត្រីរាជការសាធារណៈឲ្យប្រកាន់ឥរិយាបថជាអ្នកផ្តល់សេវាល្អជូន
ប្រជាជន សម្តេចអគ្គមហាសេនាបតីតេជោ ហ៊ុន សែន
នាយករដ្ឋមន្រ្តីនៃព្រះរាជាណាចក្រកម្ពុជា
ក៏ណែនាំឲ្យអ្នកនាំពាក្យតាមក្រសួងស្ថាប័ននានារបស់រដ្ឋ
ក៏ដូចជាមន្រ្តីរាជរដ្ឋាភិបាលទាំងអស់ដែលមិនទាន់បានដឹងសាច់រឿង
ច្បាស់ មិនត្រូវនិយាយប្រាប់អ្នកសារព័ត៌មានឡើយ
កុំឲ្យមានការភ័ន្តច្រឡំណាមួយ កើតមានឡើង។
សម្តេចតេជោមានប្រសាសន៍បន្តថា
“ខ្ញុំគួរតែត្រូវបាននិយាយដោយចំហរតែម្តង…ពិតហើយយើងត្រូវតែផ្តល់
ព័ត៌មាន សិទ្ធិទទួលបានព័ត៌មាន ស្ថាប័ននីមួយៗ
អាជ្ញាធរថ្នាក់ក្រោមជាតិ សុទ្ធតែមានអ្នកនាំពាក្យ
ក៏ប៉ុន្តែសុំកុំតាំងខ្លួនធ្វើជាអ្នកចេះគ្រប់តែរឿង
ដែលនិយាយទៅកាន់មន្រ្តីនេះ ឬទៅកាន់សារព័ត៌មានតែងតែធ្វើឲ្យមានកំហុស ។
សម្តេចតេជោនាយករដ្ឋមន្ត្រីបានមាន
ប្រសាសន៍ថា មានអ្នកខ្លះគេសួរទៅមិនទាន់ដឹងរឿងស្អីផង
មិនថានៅក្នុងគណបក្សប្រជាជន ឬខាងរាជរដ្ឋាភិបាល
ឬខាងបក្សប្រឆាំងទេ។ ...ដូចជារឿងខ្លះអត់ទាន់ស្ដាប់ខ្ញុំនិយាយ
ពីព្រោះទូរទស្សន៍ និងវិទ្យុអត់ទាន់ចាក់ផ្សាយ
ធ្វើអត្ថាធិប្បាយអ៊ីចឹងទៅ លេងទៅ...
រួចហើយអ្នកសរសេរនោះក៏អញ្ចឹងដែរ ខ្ញុំមើលសារព័ត៌មាន...។
“ខ្ញុំនិយាយដាក់ទូរទស្សន៍ គេចាក់ផ្សាយគ្រប់ទូរទស្សន៍
កោតតែសរសេរខុសកើត។ អ៊ីចឹងបានជាខ្ញុំគ្រាន់តែផ្ដល់មតិទេ
សារព័ត៌មានបែបហ្នឹងលែងមានតម្លៃ”។
សម្តេចតេជោមានប្រសាសន៍បញ្ជាក់ថា
រឿងអីដែលអ្នកសារព័ត៌មានចង់បាន អ្នកនាំពាក្យត្រូវតែផ្តល់ហើយ
ប៉ុន្តែបើរឿងអីដឹងមិនច្បាស់មិនចាំបាច់និយាយទេ។
“បើមិនច្បាស់ព័ត៌មានហ្នឹងខ្ញុំអត់ទាន់ទទួលបានទេ
ដូច្នេះខ្ញុំក៏មិនទាន់ធ្វើអធិប្បាយបានទេ
សុំប៉ុណ្នឹងបានទេអ្នកនាំពាក្យ ទាំងឡាយអើយ
ហើយអ្នកមានខ្លះមិនទាន់ដឹងខ្យល់អីផងក៏និយាយ…អីចឹងយើងត្រូវម៉តចត់
អំពីប្រភពព័ត៌មាន យើងនិយាយចេញក៏ត្រូវប្រយ័ត្ន
យើងទទួលព័ត៌មានពីគេ ក៏ត្រូវប្រយ័ត្នឆែកមើលឲ្យបានសព្វគ្រប់
បើមិនចឹងផ្អែកទៅព័ត៌មានហើយ ធ្វើប្រតិកម្មទៅងាប់។
យើងគោរពសេរីភាពសារព័ត៌មាន យើងឲ្យតម្លៃសារព័ត៌មាន
ប៉ុន្តែត្រូវឆែកមើលតើដូចអ្វីពិតប្រាកដដែលគេចុះផ្សាយដែរ ឬអត់
ព្រោះវាជាជំនួយមួយផ្នែកឲ្យយើង ហើយតាមរយៈនោះយើង
ចាប់ផ្តើមធ្វើការស្រាវជ្រាវ”។
ទាក់ទងនឹងការវាយតម្លៃព័ត៌មានខុសដែលជា
កត្តានាំឲ្យអន្តរាយ សម្តេចតេជោបានធ្វើការរំលឹកឡើងវិញ
អំពីភាពជាប់គាំងនយោបាយកាលពីឆ្នាំ ២០០៣-២០០៤ ដែលពេលនោះ
គណបក្សពីរចងសម្ព័ន្ធភាពនឹងគ្នា គេបានវាយតម្លៃថា
គណបក្សប្រជាជនកំពុងបែកបាក់ ហើយសម្តេច ហ៊ុន សែន
ត្រូវបានគណបក្សផ្តួលរលំ ប៉ុន្តែផ្ទុយទៅវិញ គណបក្សប្រជាជន
មិនបានបែកបាក់នោះទេ បែរ ជាគណបក្សសម្ព័ន្ធភាពទាំងនោះ
បែកដោយខ្លួនឯង ហេតុដូច្នេះហើយ គឺជាវាយតម្លៃខុសនូវសភាពការណ៍ ដែល
កើតមានឡើង។
សម្តេចតេជោក៏បានលើកឡើងផងដែរពីករណី
លោក ស៊ូរិន្ទ ពិតសុវណ្ណ កាលនៅធ្វើជារដ្ឋមន្រ្តីការបរទេសថៃ
(អតីតអគ្គលេខាធិការអាស៊ាន) ក្នុងអំឡុងឆ្នាំ១៩៩៨
ដោយបានមកជម្រាបសម្តេចអំពីការសម្លាប់អ្នកនយោបាយនៅក្នុងប្រទេស
កម្ពុជា ដោយផ្អែកតាមសារព័ត៌មាន។ ទាក់ទងបញ្ហានេះ
សម្តេចតេជោបញ្ជាក់ថា ការឡើងតាមសារព័ត៌មាននោះ
មិនមែនជារឿងល្អសម្រាប់មេដឹកនាំប្រទេសមួយនោះទេ
ព្រោះព័ត៌មានតាមសារព័ត៌មាន ត្រូវបានសម្តេចចាត់ទុកថា
គ្រាន់តែជាសេចក្តីរាយការណ៍ព័ត៌មានតែប៉ុណ្ណោះ ប៉ុន្តែអ្វីដែលចាំបាច់នោះ
គឺត្រូវស្វែងប្រភពឱ្យបានច្បាស់។
ឯកឧត្តម ស៊ុំ ម៉ាប់
នាយកសាលាភូមិន្ទរដ្ឋបាលបានមានប្រសាសន៍នៅក្នុងពិធីចែកសញ្ញាប័ត្រ
នោះដែរថា រយៈពេលកន្លងមកសាលាភូមិន្ទរដ្ឋបាល
បានធ្វើការបណ្តុះបណ្តាលសិស្សមន្ត្រីជាន់ខ្ពស់ចំនួន ៦ជំនាន់
ស្មើនឹង ២២៥នាក់ សិស្សមន្ត្រីមធ្យមបាន ៣ជំនាន់ ស្មើនឹង ១៧៤ នាក់
សិស្សមន្ត្រីក្រមការបាន ៤ ជំនាន់ស្មើនឹង ២២២
នាក់ដោយឆ្លងតាមការបណ្តុះបណ្តាលក្នុងរយៈពេល ២ឆ្នាំ និង ១ ឆ្នាំ។
បច្ចុប្បន្ននេះ
សាលាភូមិនន្ទរដ្ឋបាលកំពុងបណ្តុះបណ្តាលសិស្សមន្ត្រីជាន់ខ្ពស់ជំនាន់ទី៧
ចំនួន ៦០នាក់ និងសិស្សមន្ត្រីក្រមការជំនាន់ទី៥ ចំនួន ៧១
នាក់តាមសេចក្តីសម្រេចរបស់ទីស្តីការគណៈរដ្ឋមន្ត្រី។
គិតមកដល់ឆ្នាំ២០១៣ នេះ សាលា
បានបើកវគ្គវិក្រិតការសុក្រិតការចំនួន ២០
វគ្គដែលមានសិក្ខាកាមចំនួន ៣៨៥នាក់។ ដោយឡែក
សម្រាប់វគ្គវិក្រិតការសុក្រិតការមន្ត្រីជាន់ខ្ពស់
និងមន្ត្រីមធ្យមឆ្នាំ២០១៣ នេះមានកម្មសិក្សាការីចំនួន ១៨០នាក់
ដែលបានចាត់តាំងមកពីស្ថាប័នក្រសួងមន្ទីរខេត្តក្រុងស្រុកខណ្ឌ
ទូទាំងប្រទេស៕