នៅក្នុងមិទ្ទិញ អបអរសាទរទិវាអន្តរជាតិនារី ៨ មីនា លើកទី១០២ ដែលប្រារព្ធធ្វើនាព្រឹកថ្ងៃទី៨ ខែមីនា ឆ្នាំ២០១៣ នៅវិមានសន្តិភាព សម្តេចអគ្គមហាសេនាបតីតេជោ ហ៊ុន សែន ដោយមានវត្តមានចូលរួមពីលោកជំទាវកិត្តិព្រឹទ្ធបណ្ឌិត ប៊ុន រ៉ានី ផងដែរ បានអំពាវនាវដល់គ្រប់គណបក្សនយោបាយឲ្យគិតគូរ ក្នុងការដាក់បេក្ខភាពនារីឲ្យចូលឈរឈ្មោះ សម្រាប់ការបោះឆ្នោតសកលជ្រើសរើសសមាជិករដ្ឋសភាសម្រាប់នីតិកាលទី៥ ដែលនឹងប្រព្រឹត្តទៅនៅថ្ងៃទី២៨ ខែកក្កដា ឆ្នាំ២០១៣ នាពេលខាងមុខនេះ។
សម្តេចតេជោមានប្រសាសន៍ថា
ខ្ញុំសូមអំពាវនាវដល់គ្រប់គណបក្សនយោបាយទាំងអស់ សូមយកចិត្ដទុកដាក់
និងគិតគូរលើបេក្ខភាពជានារីនៅក្នុងបញ្ជីបេក្ខជនឈរឈ្មោះបោះឆ្នោត
របស់គណបក្ស និងពិចារណាដាក់ស្ដ្រីនៅក្នុងលេខរៀងដែលអាចជាប់ឆ្នោត
និងសូមអំពាវនាវផងដែរដល់បងប្អូនប្រជាជនទាំងអស់ដែលមានសិទ្ធិ
និងឈ្មោះបោះឆ្នោត
ជាពិសេសបងប្អូនស្ដ្រីសូមអញ្ជើញទៅចូលរួមបោះឆ្នោតទាំងអស់គ្នា
ដើម្បីជ្រើសរើសគណបក្សដែលខ្លួនស្រឡាញ់ពេញចិត្ដ និងទុកចិត្ដ។
នៅក្នុងសុន្ទរកថា
ក្រៅពីការជម្រុញឲ្យលើកកម្ពស់តួនាទីរបស់ស្ត្រីក្នុងឆាកនយោបាយ
សម្តេចតេជោនាយករដ្ឋមន្ត្រីក៏បានមានប្រសាសន៍ឲ្យដឹងដែរ
អំពីការយកចិត្តទុកដាក់របស់រាជរដ្ឋាភិបាលក្នុងការលើកស្ទួយសិទ្ធិ
និងសុខុមាលភាព សុវត្ថិភាពរបស់នារីនៅក្នុងសង្គម។
សម្តេចតេជោបានមានប្រសាសន៍ថា
រាជរដ្ឋាភិបាលបានយកចិត្ដទុកដាក់ក្នុងការពង្រឹងការអនុវត្ដច្បាប់
ការងារដើម្បីការពារសិទ្ធិ និងផលប្រយោជន៍កម្មករ និយោជិត និយោជក
និងពង្រីក
វិសាលភាពនៃការបណ្ដុះបណ្ដាលវិជ្ជាជីវៈឆ្លើយតបតាមតម្រូវការទីផ្សារ
ការងារ តាមរយៈសកម្មភាពនៃមជ្ឈមណ្ឌលបណ្ដុះបណ្ដាលវិជ្ជាជីវៈ
និងមជ្ឈមណ្ឌលអភិវឌ្ឍន៍ស្ដ្រីនៅតាមរាជធានី-ខេត្ដជាដើម។
ទាក់ទងនឹងអំពើហិង្សាទៅលើស្ត្រី
សម្តេចតេជោនាយករដ្ឋមន្ត្រីបានមានប្រសាសន៍ថា
រាជរដ្ឋាភិបាលបានចាត់ទុកអំពើហិង្សាជាបទល្មើស
ត្រូវផ្ដន្ទាទោសដោយច្បាប់ព្រមទាំងបាន
និងកំពុងពង្រឹងការអនុវត្ដបទបញ្ញត្ដិនានា សំដៅការពារសិទ្ធិ
និងផលប្រយោជន៍របស់ស្ដ្រី និងជំរុញការផ្ដល់សេវាកម្មច្បាប់
និងសង្គមកិច្ច ជូនជនរងគ្រោះឱ្យទាន់ពេលវេលា។ ក្នុងន័យនេះ
ការអនុវត្ដគោលនយោបាយភូមិ-ឃុំមានសុវត្ថិភាព
គឺពិតជាបានរួមចំណែកយ៉ាងពិតប្រាកដក្នុងការពង្រឹងសណ្ដាប់ធ្នាប់
សង្គម និងធានាសុវត្ថិភាពជូនប្រជាជនជាពិសេស ស្ដ្រី
និងលើកកម្ពស់សីលធម៌សង្គមតម្លៃស្ដ្រី និងគ្រួសារខ្មែរ។ កន្លងមកនេះ
រាជរដ្ឋាភិបាលបានបន្ដខិតខំប្រឹងប្រែងពង្រឹងឥតឈប់ឈរនូវស្ថានភាព
និងតួនាទីដ៏សំខាន់របស់ស្ដ្រីក្នុងសង្គម
សំដៅលើកកម្ពស់ការចូលរួមរបស់ស្ដ្រីឱ្យកាន់តែសកម្ម
និងទូលំទូលាយថែមទៀតក្នុងគ្រប់កិច្ចការ
ដើម្បីឱ្យសង្គមជាតិទាំងមូលមើលឃើញកាន់តែច្បាស់អំពីតួនាទី
និងគុណតម្លៃដ៏ចាំបាច់របស់ស្ដ្រីក្នុងការរួមចំណែកថែរក្សាការពារ
កសាង និងអភិវឌ្ឍមាតុភូមិកម្ពុជា ឆ្ពោះទៅរកវឌ្ឍនភាព និងវិបុលភាព។
សម្តេចតេជោបានមានប្រសាសន៍បញ្ជាក់ថា
រាជរដ្ឋាភិបាលមិនត្រឹមតែបានយកចិត្ដទុកដាក់ក្នុងការលើកកម្ពស់
សមភាពយេនឌ័រ និងតួនាទីរបស់ស្ដ្រី ក្នុងវិស័យសេដ្ឋកិច្ច
ដោយបានជំរុញការអនុវត្ដយុទ្ធសាស្ដ្រ
បញ្ជ្រាបយេនឌ័រក្នុងផែនការយុទ្ធសាស្ដ្រ
និងផែនការសកម្មភាពនៃការអភិវឌ្ឍសង្គម សេដ្ឋកិច្ចប៉ុណ្ណោះទេ
ប៉ុន្ដែថែមទាំងពង្រីកលទ្ធភាពរបស់ស្ដ្រី
និងកុមារីនៅជនបទឱ្យទទួលបានឱកាសចូលរៀននៅកម្រិតមធ្យមសិក្សា
ទុតិយភូមិ ឧត្ដមសិក្សា
និងការបណ្ដុះបណ្ដាលវិជ្ជាជីវៈឱ្យកាន់តែច្រើនឡើង
និងថែមទាំងទទួលបាននូវសេវាសុខាភិបាល ប្រកបដោយគុណភាព
និងធានាឱ្យមានការការពារខាងផ្លូវច្បាប់ដ៏មុតមាំទៀតផង។
រាជរដ្ឋាភិបាលក៏បានយកចិត្ដទុកដាក់លើការបង្កើនសមាមាត្រនៃ
ការចូលរួមរបស់ស្ដ្រី
នៅគ្រប់កម្រិតឱ្យបានជាអតិបរមាក្នុងស្ថាប័នជាតិ
និងអង្គការសង្គមផ្សេងៗ
សំដៅពង្រីកលទ្ធភាពឱ្យស្ដ្រីបានចូលរួមកាន់តែសកម្ម
និងទូលំទូលាយថែមទៀត នៅក្នុងតួនាទីកសាងផែនការអភិវឌ្ឍអភិបាលកិច្ច
និងធ្វើសេចក្ដីសម្រេចទាំងនៅថ្នាក់ជាតិ និងថ្នាក់ក្រោមជាតិ។
ជាមួយនេះរាជរដ្ឋាភិបាលបានជំរុញ
យ៉ាងខ្លាំងក្លាចំពោះកម្មវិធីអប់រំសីលធម៌សង្គមតម្លៃស្ដ្រី
និងគ្រួសារខ្មែរក្នុងចំណោមយុវជនយុវនារីក្នុងគោលដៅពង្រីកវប្បធម៌
អហិង្សា និងកសាងសង្គមគ្រួសារ និងសហគមន៍ដែលប្រកបដោយសុភមង្គល។
សម្តេចតេជោបានធ្វើការអំពាវនាវដល់
គ្រប់ក្រសួង ស្ថាប័ន ពាក់ព័ន្ធ និងដៃគូអភិវឌ្ឍន៍ជាតិ និងអន្ដរជាតិ
និងសង្គមស៊ីវិលទាំងអស់ឲ្យបន្ដលើកកម្ពស់កិច្ចសហការល្អ
និងរួមគ្នាជំរុញការអនុវត្ដឱ្យមានប្រសិទ្ធភាពនូវគោលនយោបាយសមភាព
យេនឌ័ររបស់រាជរដ្ឋាភិបាល
ដើម្បីពន្លឿនការឈានទៅសម្រេចបាននូវគោលដៅអភិវឌ្ឍន៍សហស្សវត្សរ៍
របស់កម្ពុជា។ បន្ដផ្សព្វផ្សាយ និងបំផុសចលនាប្រជាជន យុវជន
និងយុវនារីឱ្យចូលរួមជាមួយអាជ្ញាធរមូលដ្ឋានក្នុងការអនុវត្ដគោលន
យោបាយភូមិ-ឃុំ មានសុវត្ថិភាព លើកកម្ពស់សីលធម៌សង្គម ថែរក្សា ប្រពៃណី
ទំនៀមទម្លាប់ វប្បធម៌ និង អារ្យធម៌ដ៏ល្អរបស់ដូនតាយីង
ចៀសវាងឱ្យផុតពីគ្រឿងញៀន អំពើអនាចារគ្រប់ប្រភេទ
អំពើហិង្សាក្នុងគ្រួសារ និងសង្គម
និងការរើសអើងគ្រប់ប្រភេទចំពោះស្ដ្រី
ព្រមទាំងលើកកម្ពស់វប្បធម៌ចែករំលែក ដូចជា
ការគិតគូរដល់មនុស្សចាស់គ្មានទីពឹង និងជនពិការជាដើម។ល។
ការអនុវត្ដគោលនយោបាយនេះ ជាប្រចាំនឹងជួយបង្កើននូវសន្ដិសុខ សុវត្ថិភាព
និងសណ្ដាប់ធ្នាប់សង្គម ដែលជាកត្ដាចម្បង
ដើម្បីធ្វើឱ្យស្ដ្រីអាចរស់នៅមានសុវត្ថិភាព
និងសុភមង្គលនៅគ្រប់ទីកន្លែងទូទាំងប្រទេស។ បន្ដអភិវឌ្ឍធនធានស្ដ្រី
និងបុរសឱ្យយល់ដឹងអំពីសិទ្ធិ តួនាទី ការទទួលខុសត្រូវ
និងកាតព្វកិច្ចរបស់ខ្លួន ព្រមទាំងបន្ដ
អប់រំស្ដ្រីឱ្យមានចំណេះដឹងកម្រិតខ្ពស់
និងមានជំនាញវិជ្ជាជីវៈឱ្យបានសមស្របទៅតាមតម្រូវការទីផ្សារ
ដើម្បីស្វែងរកការងារឱ្យបានសមរម្យមានប្រាក់ឈ្នួលខ្ពស់
ឬបង្កបង្កើនផល និងបង្កើតធុរកិច្ចវិនិយោគខ្នាតតូចឬមធ្យមរបស់ខ្លួន
ដែលធ្វើឱ្យសេដ្ឋកិច្ចគ្រួសារមានលក្ខណៈកាន់តែប្រសើរឡើងថែមទៀត។
បន្ដអប់រំស្ដ្រីឱ្យយកចិត្ដទុកដាក់ថែរក្សាសុខភាពផ្ទាល់ខ្លួន
និងគ្រួសារ និងមានអនាម័យក្នុងការរស់នៅ ធានាបរិស្ថានស្អាតល្អ
ដើម្បីគេចចៀសពីជំងឺឆ្លង ដែលនាំឱ្យខាតបង់ប្រាក់កាសពេលវេលា
និងកម្លាំងផលិតកម្មនៅក្នុងគ្រួសារ និងក្នុងសង្គម។
សម្តេចតេជោមានប្រសាសន៍ថា
ក្រសួងកិច្ចការនារី និងក្រសួងស្ថាប័នពាក់ព័ន្ធទាំងអស់ត្រូវ
បន្ដពង្រីកការផ្ដល់សេវាសាធារណៈរបស់ខ្លួន
ឱ្យបានកាន់តែទូលំទូលាយថែមទៀតឆ្លើយតបទៅនឹងតម្រូវការរបស់ក្រុមគោលដៅ
ងាយរងគ្រោះនានា ដូចជាស្ដ្រីពិការជនចាស់ជរាទីទាល់ក្រ
ស្ដ្រីមេម៉ាយ ដែលក្រីក្រ
ដើម្បីឱ្យបងប្អូនអាចទ្រទ្រង់ជីវភាពរស់នៅរបស់ខ្លួនបានកាន់តែ
ប្រសើរ។
លោកជំទាវ វេជ្ជបណ្ឌិត អ៊ឹង កន្ថាផាវី
រដ្ឋមន្ត្រីក្រសួងកិច្ចការនារី មានប្រសាសន៍ថា
ដូចជារៀងរាល់ឆ្នាំការប្រារព្ធពិធីអបអរសាទរទិវានារីអន្តរជាតិ៨មីនា
គឺត្រូវបានធ្វើឡើងក្នុងបុព្វហេតុដំបូងដើម្បីរំលឹកអំពីការតស៊ូ
របស់ស្ត្រី ឲ្យទទួលបាននូវការគោរពសិទ្ធិ
និងការទទួលស្គាល់នូវតម្លៃ នៃការចូលរួមដោយស្មើភាព
ក្នុងការអភិវឌ្ឍគ្រួសារ និងប្រទេសជាតិ។
តាមរយៈការប្រារព្ធពិធីអបអរសាទរទិវានារីអន្តរជាតិ៨មីនាខួប
អនុស្សាវរីយ៍លើកទី១០២ ក្រសួងកិច្ចការនារី
និងគណៈកម្មការរៀបចំបានសម្រេចលើកយក ប្រធានបទមួយសម្រាប់ឆ្នាំ២០១៣
នេះពាក់ព័ន្ធនឹងការបន្តបង្កើនសក្តានុពលរបស់ស្ត្រី គឺសិទ្ធិស្មើគ្នា ឱកាសដូចគ្នា ដើម្បីពន្លឿនកិច្ចអភិវឌ្ឍន៍
ក្នុងគោលបំណងជំរុញការកែលម្អផ្នត់គំនិតសង្គម ដែលមានទៅលើស្ត្រី
និងបុរស ដើម្បីលើកកម្ពស់តម្លៃរបស់មនុស្ស
សិទ្ធិនិងឱកាសចូលរួមដូចគ្នាក្នុងកិច្ចអភិវឌ្ឍន៍ប្រទេស។