គណបក្សប្រឆាំងបានចាញ់នៅក្នុងការបោះឆ្នោតសកលចំនួន ៣ អាណត្តិ
ជាប់ៗគ្នាមកហើយ បើគិតតាំងពីឆ្នាំ១៩៩៧
មកដល់បច្ចុប្បន្ន។ ម្ល៉ោះហើយ
គណបក្សប្រឆាំងនេះ ខិតខំរកមធ្យោបាយគ្រប់បែបយ៉ាងដើម្បីដណ្តើមយកជ័យជំនះ
ពីរាជរដ្ឋាភិបាលដែលដឹកនាំដោយគណបក្សប្រជាជនកម្ពុជា ប៉ុន្តែគោលបំណងនេះ នឹងមិនអាចទទួលបានជោគជ័យនោះទេ។
តាមរយៈការផ្សាយកម្មវិធីសំឡេងប្រជាធិបតេយ្យ(VOD)
កាលពីថ្ងៃទី០៩ ខែ មេសា ឆ្នាំ២០១៣ អ្នកតំណាងរាស្ត្រ គួយ
ប៊ុនរឿន នៃគណបក្សប្រឆាំងបានព្រមានថា« នឹងធ្វើបាតុកម្មដើម្បីទាមទារឲ្យគណៈកម្មាធិការជាតិរៀបចំការបោះឆ្នោតផ្អាកការបោះឆ្នោត
និងធ្វើវិសោធនកម្មលើបញ្ជីឈ្មោះអ្នកបោះឆ្នោតឡើងវិញ»។
វាគ្មានអ្វីជាការចំឡែកទេ
ដែលគណបក្សប្រឆាំងព្រមានធ្វើបាតុកម្ម
ពីព្រោះបក្សប្រឆាំងបានប្រកាន់យកនូវវប្បធម៌បែបនេះជាយូរយាណាស់មកហើយ
ដែលគេនៅចងចាំជាប់រហូតមកថា មេបក្សប្រឆាំង
គឺ សម រង្ស៊ី បានធ្វើជាដង្ខៅបាតុកម្មជាប់រហូតមក ។
ការព្រមានអោយពន្យាពេលបោះឆ្នោតក៏ត្រូវបាន លោក
សម រង្ស៊ី យកធ្វើជាលេសដើម្បីប្រយោជន៍នយោបាយរបស់ខ្លួន បន្ទាប់ពី លោក
សម រង្ស៊ី បាននិយាយថាយុទ្ធសាស្ត្រឈ្នះ‑ឈ្នះ
គឺលោកនឹងមិនចូលរួមបោះឆ្នោតទេនាពេលខាងមុខ។
គេបានកត់សំគាល់ឃើញថា
លោក សម រង្ស៊ី សំបូរដោយភាពក្រឡិចក្រឡុចបំផុតដែលមិនអាចទុកចិត្តបានឡើយ
គឺមិនបានប៉ុន្មានថ្ងៃផង ម្តងនិយាយថា នឹងមកចូលរួមបោះឆ្នោត បន្ទាប់មក ថា
មិនមកទេ នឹងថ្មីៗនេះ ប្រកាសពន្យាពេលបោះឆ្នោត ។
ការពិត គ្មានបញ្ហាណាមួយដូចការចោទប្រកាន់របស់បក្សប្រឆាំង អំពី
បញ្ជីឈ្មោះអ្នកបោះឆ្នោតថាមានភាពមិនប្រក្រតីនោះទេ។
គណៈកម្មាធិការជាតិរៀបចំការបោះឆ្នោត
បាននិងកំពុងបំពេញការងាររបស់ខ្លួនដោយឯករាជ្យ ក្នុងស្មារតីទទួលខុសត្រូវ
ដោយអនុវត្តតាមច្បាប់បោះឆ្នោត ប្រព្រឹត្តទៅដោយសេរី ស្មើភាព
និងយុត្តិធម៌បំផុត។
ដូច្នេះ ការលើកឡើងរបស់បុគ្គល សម រង្ស៊ី និងក្រុមប្រឆាំងអំពីការព្រមានធ្វើបាតុកម្ម
ពាក់ព័ន្ធ នឹងបញ្ជីឈ្មោះបោះឆ្នោត គឺមិនអាចទៅរួចនោះទេ
ពីព្រោះគណបក្សនយោបាយជាច្រើនរួមទាំងគណបក្សខ្លួនឯងផងដែរ
រូបភាពជាក់ស្តែង គឺ បាននិងកំពុងតែមមាញឹកខ្លាំងណាស់ក្នុងការរៀបចំបញ្ជីឈ្មោះបេក្ខជនតំណាងរាស្រ្ត
តាមមណ្ឌលនីមួយៗ និងបានត្រៀមបណ្តុះបណ្តាលអ្នកសង្កេតការណ៏ និងបានធ្វើសកម្មភាពយ៉ាងសកម្មនៅតាមមូលដ្ឋានក្នុងការដណ្តើមយកអ្នកគាំទ្ររបស់គណបក្សនយោបាយរៀងៗខ្លួន
តាមលក្ខណៈប្រជាធិបតេយ្យ។ ហេតុអ្វី បានជា បក្សប្រឆាំងបោកប្រាស់ខ្លួនឯង
និងប្រជាពលរដ្ឋ ថា ពួកគេមិនចូលរួមបោះឆ្នោត និងស្នើសុំពន្យាពេល?ពីព្រោះកាលណាមានការពន្យាពេលលោក
សម រង្ស៊ី នៅមានសង្ឃឹម ហើយ លោក សម
រង្ស៊ី បានដឹងច្បាស់ថា រូបលោក មិនអាចចូលមកបានទេគឺអ្វីៗស្ថិតនៅក្នុងដៃលោក
កឹម សុខា ។
ការភូតកុហកនេះ
មិនដូចអ្វីដែលពួកគេទើបនឹងបានផ្គូផ្គងនូវតំណែង បេក្ខជនសម្រាប់ដឹកនាំក្នុងស្ថាប័ននិតិប្រតិបត្តិ
និងបញ្ញត្តិ និងកាលពីថ្ងៃទី០៧ ខែមេសា ឆ្នាំ២០១៣អំឡុងពេល សមាជរបស់គណបក្សសង្រ្គោះជាតិកន្លងមកនេះ។
ដូច្នេះ កាលបរិច្ឆេទការបោះឆ្នោតសកល
និងនៅតែប្រព្រឹត្តទៅមុខជាធម្មតា គ្មានការពន្យាពេលបាននោះទេ។ ក្នុងន័យថា
ដំណើរការប្រជាធិបតេយ្យ និតិរដ្ឋ និងការបោះឆ្នោតនៅកម្ពុជា
មិនត្រូវបានអនុញ្ញាតិអោយក្រុមបក្សប្រឆាំងយកធ្វើជាចំណាប់ខ្មាំងបានឡើយ។
ផ្ទុយទៅវិញ បើបក្សប្រឆាំងពិតជាមានបំណងចង់ដឹកនាំធ្វើបាតុកម្មប្រឆាំងមែននោះ
គ្រាន់តែបន្លឺសំលេងដើម្បីទាក់ទាញការចាប់អារម្មណ៏មតិជាតិ អន្តរជាតិ
ដែលជាការយកលេសបិទបាំងនូវភាពបរាជ័យរបស់ខ្លួនពេលបោះឆ្នោតខាងមុខ។
អត្ថបទដោយៈ រួម ជាតិ