រាជរដ្ឋាភិបាល នៃព្រះរាជាណាចក្រកម្ពុជា មានសេចក្តីរីករាយសូមជូនដំណឹងថា ការចោទប្រកាន់ និងការ ទាមទារសំណងពីសំណាក់ក្រុមហ៊ុន Cambodia Power Company ត្រូវបានទាត់ចោលទាំងស្រុង ដោយអង្គជំនុំជំរះក្តីមជ្ឈត្តកម្មបង្កើតឡើងក្រោមឆត្រ័ នៃមជ្ឈមណ្ឌលអន្តរជាតិសម្រាប់ការដោះស្រាយទំនាស់ វិនិយោគ (International Center for the Settlement of Investment Disputes ឬ ICSID)។ Cambodia Power Company ជាក្រុមហ៊ុនអនុវត្តគម្រោងរបស់ក្រុមហ៊ុនដើមឈ្មោះ Beacon Hill Associates Inc. មកពីក្រុង Delaware នៃសហរដ្ឋអាមេរិក។
ក្រុមហ៊ុន Cambodia Power Company បានចោទប្រកាន់ថា ព្រះរាជាណាចក្រកម្ពុជា និងអគ្គិសនី កម្ពុជា (EDC) បានរំលោភកិច្ចព្រមព្រៀងដែលបានចុះហត្ថលេខាជាមួយ Beacon Hill Associates Inc. នៅឆ្នាំ ១៩៩៦ ដែលកិច្ចព្រមព្រៀងនោះ គឺសម្រាប់ការផ្តល់ហិរញ្ញប្បទាន សាងសង់ និងដំណើរការ រោងចក្រអគ្គិសនីដែលមានអានុភាព ៦០ មេហ្គាវ៉ាត់ នៅរាជធានីភ្នំពេញ។ ក្រុមហ៊ុន Cambodia Power Company ទាមទារសំណងជាទឹកប្រាក់ជិត ៣០០ លានដុល្លាសហរដ្ឋអាមេរិក។
នៅគ្រាដំបូងនៃដំណើរការមជ្ឈត្តកម្ម អគ្គិសនីកម្ពុជាត្រូវបានគេអូសបញ្ចូលជាភាគីចុងបណ្តឹងមួយ ប៉ុន្តែអង្គជំនុំជំរះក្តីមជ្ឈត្តកម្មរបស់ ICSID បានបដិសេធដោយលើកថា អគ្គិសនីកម្ពុជាមិនស្ថិតក្រោម យុត្ថាធិការរបស់ ICSID ទេ។ ដូចនេះដំណើរការមជ្ឈត្តកម្មត្រូវបន្តតែជាមួយភាគីរាជរដ្ឋាភិបាលកម្ពុជាតែ មួយប៉ុណ្ណោះ។
ក្រោយពីការបកស្រាយក្នុងសវនាការនៅទីក្រុងប៉ារីស ប្រទេសបារាំងកាលពីខែកញ្ញា ឆ្នាំ២០១២ អង្គជំនុំជំរះក្តីមជ្ឈត្តកម្ម ICSID បានផ្តល់ការកាត់សេចក្តីចុងក្រោយ ថ្ងៃទី២២ ខែមេសា ឆ្នាំ២០១៣។ ការ សម្រេចនេះបានបញ្ជាក់ថា ព្រះរាជាណាចក្រកម្ពុជា ពុំបានរំលោភកិច្ចព្រមព្រៀងទាល់តែសោះ ទោះផ្ទាល់ ឬមិនផ្ទាល់ក្តីតាមរយៈសកម្មភាពនានារបស់អគ្គិសនីកម្ពុជា។ ហើយអង្គជំនុំជំរះក្តីមជ្ឈត្តកម្មបានទាត់ចោល ការចោទប្រកាន់ និងការទាមទារសំណងទាំងអស់របស់ក្រុមហ៊ុន Cambodia Power Company ។ លើសពីនេះទៅទៀត អង្គជំនុំជំរះក្តីមជ្ឈត្តកម្មបានតម្រូវឲ្យក្រុមហ៊ុន Cambodia Power Company បង់ សំណងជាប្រាក់ជាង ៥,៦ លានដុល្លាសហរដ្ឋអាមេរិក ជូនភាគីព្រះរាជាណាចក្រកម្ពុជា សម្រាប់ប៉ះប៉ូវការ ចំណាយផ្លូវច្បាប់ និងដំណើរការមជ្ឈត្តកម្មអស់រយៈពេលជិត ៤ឆ្នាំមកនេះ។
ព្រះរាជាណាចក្រកម្ពុជា និងអគ្គិសនីកម្ពុជា ត្រូវបានតំណាងដោយក្រុមហ៊ុនមេធាវី Freshfields Bruckhaus Deringer LLP នៅទីក្រុងប៉ារីស ដឹកនាំដោយលោក Peter Turner និងលោកស្រី Bellie Jean Slott ពីក្រុមហ៊ុនមេធាវី Sciaroni & Associates នៅរាជធានីភ្នំពេញ។ អ្នកសម្របសម្រួលនាំមុខ របស់ភាគីរាជរដ្ឋាភិបាលកម្ពុជា និងអគ្គិសនីកម្ពុជា គឺឯកឧត្តម កែវ រតនៈ ប្រតិភូរាជរដ្ឋាភិបាលកម្ពុជា ទទួលបន្ទុកជា អគ្គនាយកអគ្គិសនីកម្ពុជា ។
រាជរដ្ឋាភិបាលកម្ពុជាមានសេចក្តីរីករាយដោយឃើញថា ព្រះរាជាណាចក្រកម្ពុជាបានទទួលការផ្តល់ យុត្តិធម៌ត្រឹមត្រូវ និងពេញលេញ ហើយមានមោទនភាពចំពោះលទ្ធផលល្អ របស់ក្រុមអ្នកច្បាប់តំណាង ភាគីរាជរដ្ឋាភិបាល ហើយក៏មានមោទនភាពចំពោះការប្តេជ្ញាចិត្តរបស់រាជរដ្ឋាភិបាល ក្នុងការគោរពនិតិរដ្ឋ ស្របតាមស្តង់ការអន្តរជាតិពិតប្រាកដ។
សម្រាប់ព័ត៌មានបន្ថែមសូមទំនាក់ទំនងលោក Peter Turner និងឯកឧត្តម កែវ រតនៈ។
រាជធានីភ្នំពេញ,ថ្ងៃទី ២៦ ខែ មេសា ឆ្នាំ២០១៣