នាព្រឹកថ្ងៃទី៥
ខែឧសភា ឆ្នាំ២០១៣ ជាមួយនឹងការប្រកាសឲ្យដឹងថា រាជរដ្ឋាភិបាលកម្ពុជាក្រោមការដឹកនាំរបស់សម្តេចតេជោនាយករដ្ឋមន្ត្រី
ដែលនៅតែបន្តប្រកាន់យកគោលជំហរ បើកទូលាយនូវសេរីភាពខាងជំនឿសាសនាសម្រាប់ប្រជាពលរដ្ឋ សម្តេចអគ្គមហាសេនាបតីតេជោ ហ៊ុន សែន
បានមានប្រសាសន៍ចាត់ទុកបងប្អូនប្រជាជនឥស្លាមដែលចាប់កំណើតនៅកម្ពុជា គឺជាប្រជាជនដែលមានភ័ព្វសំណាង។
ក្នុងពិធីបិទសូត្រគម្ពីរអាល់គួរអានុលការីម
ទូទាំងប្រទេសលើកទី២២ នៅសាលសន្និសីទ ចតុម្មុខ សម្តេចតេជោនាយករដ្ឋមន្រ្តីបានមានប្រសាសន៍ថា
បើយើងកុំនិយាយពីរបប ប៉ុល ពត ដែលបានបំផ្លាញគ្រប់សាសនានៅកម្ពុជា បងប្អូនឥស្លាមដែលចាប់កំណើត
ហើយរស់នៅកម្ពុជា គឺមានភ័ព្វសំណាងណាស់ ព្រោះនៅទីនេះមិនមានការរើសអើង ហើយក៏មិនមានការកាប់សម្លាប់បែងចែកក្នុងក្របខ័ណ្ឌសាសនានោះទេ។
សម្តេចតេជោបានមានប្រសាសន៍បញ្ជាក់ថា
នៅកម្ពុជាមាននយោបាយយោគយល់អធ្យាស្រ័យ ហើយភាពសុខដុមរមនា ក៏បានកើតទៅជាមួយគ្នាដែរ
ហើយអ្វីដែលខ្ញុំមានមោទនភាពបំផុតនោះ គឺនៅត្រង់ថា នៅពេលដែលមានសម្ពោធវិហារឥស្លាមយើងឃើញមានផ្នែកខាងព្រះពុទ្ធសាសនាក៏បានទៅចូលរួម
ហើយនៅពេលបញ្ចុះខ័ណ្ឌសីមាព្រះវិហារ ព្រះពុទ្ធក៏មានឥស្លាមមកចូលរួមដែរ។ បញ្ហាជាតិសាសន៍ខុសគ្នា
ឬសាសនាខុសគ្នា មិនមែនជាឧបសគ្គរារាំងនូវការរួមគ្នាអភិវឌ្ឍន៍ការរីកចម្រើនរបស់ប្រទេសជាតិនោះទេ
ហើយរឿងនេះក៏បានចាប់ផ្តើមតាំងពីជំនាន់អតីតកាលមកម្លេះ។
សម្តេចតេជោមានប្រសាសន៍ថា
នៅក្នុងឆន្ទៈជំរុញដល់ការរីកចម្រើន ទន្ទឹមគ្នាការអភិវឌ្ឍរួមគ្នា និងបំពេញដល់គ្នាទៅវិញទៅមក
នៅក្នុងថ្ងៃអនាគតទៀតនោះ រាជរដ្ឋាភិបាលនឹងនៅតែបន្ដប្រកាន់យកគោលជំហបើកទូលាយនូវសិទ្ធិសេរីភាពខាងជំនឿសាសនា
ជូនដល់ប្រជាពលរដ្ឋកម្ពុជាទាំងអស់ ក្នុងលក្ខខណ្ឌមិនប៉ះពាល់ដល់សាសនាដទៃ។
“យើងអាចយល់បានយ៉ាងច្បាស់ថា ជំនឿសាសនា និងជីវភាពរស់នៅ គឺវាមានសម្ព័ន្ធភាពផ្សារភ្ជាប់គ្នាមិនអាចបំបែកបានឡើយ”។
សម្តេចតេជោបានមានប្រសាសន៍អំពាវនាវថា
ខ្ញុំសូមបន្ដជំរុញឱ្យគ្រប់សាសនាទាំងអស់នៅកម្ពុជាត្រូវចេះរួមរស់នៅជាមួយគ្នា
និងចូលរួមជាមួយផ្នែកអាណាចក្រ ដើម្បីអភិវឌ្ឍកម្ពុជាឱ្យឈានឡើងបន្ថែមទៀតទាំងបច្ចុប្បន្ន
និងតទៅថ្ងៃអនាគតទៀត។
សម្តេចតេជោនាយករដ្ឋមន្រ្តីក៏បានផ្ដល់ជាអនុសាសន៍មួយចំនួន
ដែលទាក់ទងនឹងសហគមន៍ឥស្លាម និងការរក្សាប្រពៃណី សាមគ្គីភាព និងការសូត្រគម្ពីរអាល់គួរអានុលការីម
ដែលរួមមាន៖
ទី១-ក្រសួងធម្មការ
និងសាសនា ត្រូវសហការជាមួយស្ថាប័ននៃគណៈដឹកនាំជាន់ខ្ពស់នៃសាសនាឥស្លាមកម្ពុជា
ដែលមានរចនាសម្ព័ន្ធគ្រប់គ្រងនៅតាមរាជធានី ខេត្ដ-ក្រុង-ស្រុក-ខណ្ឌ និងមូលដ្ឋាន
និងត្រូវរិះរកគ្រប់មធ្យោបាយពង្រីកទំនាក់ទំនងជាតិ និងអន្ដរជាតិ ដើម្បីទទួលបាននូវការឧបត្ថម្ភគាំទ្រទាំងស្មារតី
សម្ភារៈ និងធនធានមនុស្សដើម្បីបម្រើការងារពង្រឹង និងពង្រីកប្រពៃណី
សូត្រគម្ពីរអាល់គួរអានុលការីមនេះ នៅគ្រប់ទីកន្លែងដែលមានបងប្អូនឥស្លាមកម្ពុជារស់នៅគួរចាត់ឱ្យមានការរៀនសូត្រគម្ពីរអាល់គួរអាន
សម្រាប់ជាការប្រតិបត្ដិជាប្រចាំរបស់ខ្លួនផង និងជាការត្រៀមចូលរួមក្នុងការជ្រើសរើសករី-ករីអះ
សម្រាប់សូត្រយកជ័យលាភីប្រចាំថ្នាក់ជាតិ និងថ្នាក់ក្រោមជាតិ ជាអាទិ៍
ថ្នាក់ភូមិ ថ្នាក់ឃុំ-សង្កាត់ ថ្នាក់ក្រុង ស្រុក-ខណ្ឌ ថ្នាក់ខេត្ដ រាជធានី។
ទី២-ដើម្បីជាប្រយោជន៍សម្រាប់សហគមន៍ឥស្លាម
ក៏ដូចជាវិស័យនយោបាយជាតិនៅរៀងរាល់ឆ្នាំ ត្រូវប្រែក្លាយខ្លឹមសារនៃការសូត្រគម្ពីរអាល់គួរអាននៅថ្នាក់ជាតិទៅជាសកម្មភាពជាក់ស្ដែង
ដែលមានខ្លឹមសារប្រកបដោយសារៈសំខាន់បំផុតសម្រាប់សាសនាឥស្លាម។ ក្រសួងធម្មការ
និងសាសនា រួមជាមួយស្ថាប័នគណៈដឹកនាំជាន់ខ្ពស់នៃសាសនាឥស្លាមកម្ពុជាគួរចាត់ឱ្យមានជាប្រធានបទស្នូល
ហើយផ្លាស់ប្ដូរជារៀងរាល់ឆ្នាំស្របនឹងស្ថានភាព និងកាលៈទេសៈនៃប្រទេសជាតិ។ ឧទាហរណ៍ឥស្លាម
និងសន្ដិភាព ឬឥស្លាម និងការអភិវឌ្ឍជាដើម។ លើសពីនេះទៀតគឺជាការល្អណាស់ប្រសិនបើមានការបង្កើតជាសិក្ខាសាលា
ការផ្សាយតាមវិទ្យុ ឬយ៉ាងហោចណាស់ចេញជាអត្ថបទសរសេរជាឯកសារ ឬជាសៀវភៅដែលទាក់ទងនឹងប្រធានបទស្នូលសម្រាប់បេក្ខជន
បេក្ខនារី ដល់អ្នកស្ដាប់ និងអ្នកចូលរួម ដើម្បីជាមូលដ្ឋាន ឬគំរូសម្រាប់ថ្នាក់ក្រោមជាតិអនុវត្ដបន្ដឱ្យមានប្រសិទ្ធភាព។
ទី៣-ចំពោះបេក្ខជន-បេក្ខនារី
(ករី-ករីអះ) ដែលត្រូវបានជាប់ជម្រើសជ័យលាភីទៅចូលរួមក្នុងការសូត្រលើឆាកអន្ដរជាតិ
ទាំងក្នុងក្របខណ្ខអាស៊ានសូមយកចិត្ដទុកដាក់ថា ខ្លួនជាតំណាងឱ្យប្រទេសជាតិកម្ពុជាយើង
ដូច្នេះកិត្ដិយស និងកិត្យានុភាពរបស់ប្រទេសជាតិ និងទទួលបាននូវភាពថ្លៃថ្នូរ
ពីសំណាក់ប្រជាជាតិនានា ដែលបានចូលរួមជាពិសេសប្រទេសជាម្ចាស់ផ្ទះរៀបចំពិធីនេះ។
លើសពីនេះទៅទៀត សូមបងប្អូនបន្ដអនុវត្ដនូវទំនាក់ទំនងល្អជាមួយប្រទេសម្ចាស់ផ្ទះ
និងប្រទេសនានាដែលបានចូលរួម ដែលនឹងនាំមកនូវផលប្រយោជន៍ជូនសហគមន៍ឥស្លាម និងសង្គមជាតិកម្ពុជាផងដែរ។
ទី៤-តាមរយៈក្រសួងធម្មការ
និងសាសនាគណៈដឹកនាំជាន់ខ្ពស់នៃសាសនាឥស្លាមកម្ពុជា ត្រូវបន្ដការខិតខំប្រឹងប្រែងថែមទៀត
ក្នុងការចូលរួមអភិវឌ្ឍវិស័យសង្គមកិច្ច ជាពិសេសផ្នែកអប់រំ សុខាភិបាល និងវិស័យសេដ្ឋកិច្ច
ដែលជាការរួមចំណែកពិតប្រាដក ក្នុងការកាត់បន្ថយភាពក្រីក្រនៅកម្ពុជា។ ក្នុងស្មារតីនេះ
សូមបន្ដទំនាក់ទំនងការងារជាមួយប្រទេសឥស្លាមជាមិត្ដ រួមទាំងអង្គការ សមាគម
និងសប្បុរសជន ដើម្បីស្វែងរកជំនួយ និងការឧបត្ថម្ភនានាដល់ការអភិវឌ្ឍសហគមន៍ឥស្លាមកម្ពុជា
ជាពិសេសរកអាហារូបករណ៍ជូនសិស្សនិស្សិតមូស្លិម ដើម្បីបន្ដការសិក្សាទាំងកម្រិតទូទៅ
ទាំងឯកទេសក្នុងវិស័យនានាឱ្យបានកាន់តែច្រើន។
ទី៥-ថ្នាក់ដឹកនាំឥស្លាម
និងសាសនិកឥស្លាមទាំងអស់ត្រូវរួមសហការគ្នា សាមគ្គីគ្នា និងឯក ភាពផ្ទៃក្នុងនៅសហគមន៍ឥស្លាមកម្ពុជា
ហើយប្រឆាំងជាដាច់ខាតនូវគំនិតបំបែកបំបាក់ និងយកសាសនាឥស្លាមធ្វើជាខែលបម្រើមហិច្ឆតាផ្ទាល់ខ្លួន
ដែលខុសពីច្បាប់សាសនាឥស្លាម។
ទី៦-សហគមន៍ឥស្លាមកម្ពុជាត្រូវមានទំនាក់ទំនង
និងសហប្រតិបត្ដិការល្អ សហការគ្នា និង សាមគ្គីគ្នាជាមួយសហគមន៍សាសនាដទៃទៀតទាំងក្នុងថ្នាក់ជាតិ
និងអន្ដរជាតិ ដើម្បីសុខសន្ដិភាព និងការអភិវឌ្ឍនៅកម្ពុជាយើង។ ដោយបានប្រកាសផ្តល់ថវិកាផ្ទាល់ខ្លួនចំនួន
៥ ០០០ ដុល្លារក្នុងមួយឆ្នាំសម្រាប់ទ្រទ្រង់មូល និធិនៃការប្រឡងសូត្រគម្ពីរអាល់គួរអានុលការីមជារៀងរាល់ឆ្នាំនោះ
សម្តេចតេជោ មានប្រសាសន៍ថា ជាការពិត ការអនុវត្ដបានតាមគោលគំនិតទាំងនេះនឹងរួមចំណែកធ្វើឱ្យសាសនាទាំងអស់ទាំងព្រះពុទ្ធសាសនា
ឥស្លាមសាសនា គ្រិស្ដសាសនា និងនិកាយផ្សេងៗគ្នាអាចរួមរស់នៅជាមួយគ្នាប្រកបដោយភាពសុខដុមរមនា
ការធានារក្សាបាននូវសុខ សន្ដិភាព ស្ថិរភាពនយោបាយ និងការអភិវឌ្ឍ និងការធ្វើឱ្យប្រសើរឡើងជាលំដាប់នៃជីវភាពរបស់ប្រជាជនយើង។
ក្នុងនោះដែរ យើងក៏ត្រូវបន្ដជំរុញដល់ការផ្ដល់ និងការទទួលយកនូវចំណេះដឹងសកលឱ្យបានទូលំទូលាយនៅគ្រប់មូលដ្ឋាន
និងសហគមន៍ និងត្រូវបន្ដជំរុញដល់ការងារចែករំលែកគ្នាឱ្យបានកាន់តែច្រើនឡើង
អំពីវិស័យវប្បធម៌ប្រពៃណី និងសិល្បៈ នៅក្នុងចំណោមប្រជាជនយើង ដើម្បីឱ្យបានស្វែងយល់ពីគ្នាទៅវិញទៅមក
និងដើម្បីកសាងសមិទ្ធផលរួមគ្នានៅក្នុងសង្គមជាតិយើង៕