ប្រភព : Channel News Asia ចុះថ្ងៃទី២៩ ខែមិថុនា ឆ្នាំ២០១៣
កាលពីថ្ងៃសុក្រកន្លងទៅនេះ សហរដ្ឋអាមេរិកបានរិះគន់យ៉ាងខ្លាំងទៅលើការបិទផ្សាយរបស់វិទ្យុបរទេសដោយរដ្ឋាភិបាលកម្ពុជា នៅមុនពេលការបោះឆ្នោតក្នុងខែក្រោយនេះ ថាជា «ការរំលោភបំពានយ៉ាងខ្លាំង»ទៅលើសេរីភាពសារព័ត៌មាន។
លោក Patrick Ventrell អ្នកនាំពាក្យរងរបស់ក្រសួងការបរទេសសហរដ្ឋអាមេរិកបានមានប្រសាសន៍ថា ក្រសួងព័ត៌មានរបស់កម្ពុជាបានចេញផ្សាយនូវបទបញ្ជាមួយ ដែលបិទការផ្សាយកម្មវិធីវិទ្យុ ដែលបង្កើតដោយបរទេសសំរាប់រយៈពេល ៣១ថ្ងៃ មុនពេលការបោះឆ្នោតក្នុងថ្ងៃទី២៨ ខែកក្កដា ខាងមុននេះ។
លោកបានប្រាប់អ្នកព័ត៌មានថា «នេះជាបទបញ្ជាមួយ ដែលរំលោភបំពានយ៉ាងខ្លាំងទៅលើសេរីភាពសារព័ត៌មាន និងសេរីភាពនៃការបញ្ចេញមតិ ហើយផ្ទុយទៅនឹងដំណើរការប្រជាធិបតេយ្យ»។
«យើងមានការព្រួយបារម្ភយ៉ាងខ្លាំងចំពោះសកម្មភាពបែបនេះ ហើយក៏បានជំរុញឲ្យរដ្ឋាភិបាលកម្ពុជាធ្វើការពិចារណាឡើងវិញចំពោះសេចក្តីសម្រេចនេះ»។
វិទ្យុអាស៊ីសេរី(Radio Free Asia-RFA)បានរាយការណ៍កាលពីថ្ងៃសុក្រនេះថា កម្មវិធីខ្មែររបស់ពួកគេ ព្រមទាំងកម្មវិធីខ្មែររបស់វិទ្យុអាមេរិក និងអូស្ត្រាលី (Voice of American and Radio Australia) នឹងត្រូវបានបិទផ្សាយ ក្រោមបទបញ្ជានេះ។
លោក Ventrell បានព្រមានទៅលើសេចក្តីសម្រេចរបស់រដ្ឋាភិបាលកម្ពុជាដែលបានបង្កឲ្យមានភាពងឿយឆ្ងល់ទៅលើ«បំណងប្រាថ្នា និងការជឿជាក់នៃដំណើរការណ៍បោះឆ្នោត បើទោះបីជាមន្ត្រីកម្ពុជាបានចុះផ្សាយជាសាធារណៈថា ពួកគេមានបំណងចង់ឲ្យមានការបោះឆ្នោតដោយភាពសេរី និងយុត្តិធម៌ក៏ដោយ។
យុទ្ធនាការបោះឆ្នោតជាផ្លូវការសំរាប់ការបោះឆ្នោតជាសកលក្នុងខែក្រោយនេះ ដែលគេរំពឹងថា នឹងត្រូវទទួលជ័យជំនះដោយបុរសខ្លាំង លោក ហ៊ុន សែន នាយករដ្ឋមន្ត្រី បានចាប់ផ្តើមកាលពីថ្ងៃព្រហស្បតិ៍ ហើយ។
ខណៈដែលគណបក្សនយោបាយទាំងអស់បានទទូចសុំសន្លឹកឆ្នោតពីអ្នកបោះឆ្នោត ហើយបានបង្កើតព្រឹត្តិការណ៍ជាសាធារណៈនោះ អ្នកសង្កេតការណ៍មួយចំនួន បានមានប្រសាសន៍ថា មានឱកាសតិចតួចណាស់ចំពោះការរបូតចេញនូវកៅអីរបស់លោក ហ៊ុន សែន នឹងគណបក្សប្រជាជនកម្ពុជា ដែលបានឈ្នះឆ្នោតពីរលើកយ៉ាងភ្លូកទឹកភ្លូកដី បើទោះបីជាមានការចោទប្រកាន់ថា មានភាពមិនប្រក្រតី និងការបន្លំសន្លឹកឆ្នោតក៏ដោយ។