ដោយៈ រួម ជាតិ
ទោះបីដឹងថាគណបក្សប្រជាជនកម្ពុជាទទួលបានសម្លេងនាំមុខ និងគណបក្សសង្រ្គោះជាតិទទួលបានសម្លេងជាប់លំដាប់លេខរៀងទី២ និងគណបក្សនយោបាយ៦ទៀតមិនទទួលបានអាសនៈនៅក្នុងរដ្ឋសភាជាតិ យ៉ាងណាក៏ដោយ ក៏គណបក្សសង្រ្គោះជាតិបានធ្វើសន្និសិទកាសែត យ៉ាងតក់ក្រហល់ជំទាស់ទៅ នឹងលទ្ធផលបណ្តោះអាសន្នដែលបានប្រកាស ដោយ គ.ជ.ប កាលពីថ្ងៃទី១២ ខែសីហា ឆ្នាំ២០១៣។
គណបក្សសង្រ្គោះជាតិយកលេសទម្លាក់កំហុសទៅលើ គ.ជ.ប និងបានយកប្រជាពលរដ្ឋធ្វើជាចំណាប់ខ្មាំង ដើម្បីបំរើនយោបាយប្រជាភិថុតរបស់ខ្លួន។ ការពិត ប្រជាពលរដ្ឋមិនមែនជាចំណាប់ខ្មាំងរបស់អ្នកចាញ់នោះទេ គួរណាស់គណបក្សដែលចាញ់ឆ្នោតត្រូវទទួលស្គាល់ការពិត ហើយព្រមទទួលនូវលទ្ធផលនេះ មិនត្រូវ យកប្រជាពលរដ្ឋធ្វើជាចំណាប់ខ្មាំងនោះទេ ។
ក្រោយពីការប្រកាសលទ្ធផលឆ្នោតបណ្នោះអាសន្នរបស់ គ.ជ.ប មិនបាន២ម៉ោងផង លោក កឹម សុខាប្រធានស្តីទីគណបក្សសង្រ្កោះជាតិ បានធ្វើសន្និសីទកាសែតជំទាស់ទៅនឹងលទ្ធផលរបស់គជប កាលពីថ្ងៃទី១២ ខែសីហា ឆ្នាំ២០១៣។ សកម្មភាពនេះសបញ្ជាក់ឲ្យឃើញ ថា គណបក្សសង្រ្គោះជាតិមានចេតនាចង់ទម្លាក់កំហុស និងការទទួលខុសត្រូវមកលើ គ.ជ.ប ទាំងស្រុងចំពោះការកើតឡើងនូវការតវ៉ា ដែលអាចនាំឲ្យអស្ថិរភាពនយោបាយ អសន្តិសុខ ដែល បង្កឡើងពីសំណាក់ប្រជាពលរដ្ឋជាម្ចាស់ឆ្នោត។ ការលើកឡើងរបស់គណបក្សសង្រ្គោះជាតិរបៀបនេះ គឺជាការដោះដៃមួយ ដោយយកប្រជាពលរដ្ឋធ្វើជាចំណាប់ខ្មាំងរបស់ខ្លួន។ គួរណាស់យើងនាំគ្នាកោតសរសើរចំពោះការខិតខំប្រឹងប្រែងរបស់ គ.ជ.ប ដែលបានរៀបចំដំណើរការបោះឆ្នោតជ្រើសតាំងតំណាងរាស្រ្តនីតិកាលទី៥ ដែលមានលក្ខណៈរលូន ដោយសេរី ត្រឹមត្រូវ យុត្តិធម៌ និងគ្មានអំពើហិង្សា តាំងពីថ្ងៃបើកយុទ្ធនាការ រហូតដល់ថ្ងៃ រាប់សន្លឹកឆ្នោត ដែលគណបក្សនយោបាយនីមួយៗបានប្រើប្រាស់សិទ្ធិរបស់ខ្លួនដោយសេរី ក្នុងការឃោសនានូវគោលនយោបាយរៀងៗខ្លួន ដោយគ្មានការគំរាមកំហែងពីគណបក្សនយោបាយណាមួយឡើយ។
បើយើងពិនិត្យមើលនូវទិដ្ឋភាពថ្ងៃបោះឆ្នោតថ្ងៃអាទិត្យទី២៨ ខែកក្កដា ឆ្នាំ២០១៣ គេបានកត់ សំគាល់ឃើញប្រជាពលរដ្ឋខ្មែរបានទៅចូលរួមការបោះឆ្នោតដោយទឹកមុខស្រស់បស់ រីករាយពេញចិត្តក្នុងការសម្រេចចិត្តជ្រើសរើសតំណាងរបស់ខ្លួនដោយសេរីត្រឹមត្រូវ យុត្តិធម៌ និងតម្លាភាព។
យោងតាមការផ្សាយរបស់វិទ្យុដែលគាំទ្រនិន្នាការបក្សប្រឆាំង កាលពីថ្ងៃទី១៣ ខែសីហាឆ្នាំ២០១៣ វេលាម៉ោង១៣ រសៀល បានចាក់ផ្សាយការចុះជួបប្រជាពលរដ្ឋ របស់មេដឹកនាំគណបក្សសង្រ្គោះជាតិ កាលពីថ្ងៃទី៤ ខែសីហា ឆ្នាំ២០១៣ នៅស្រុកស្រីសន្ធរ ខេត្តកំពង់ចាម កន្លងមកបានបំផុស និងបំភ្លើសថា «ការពិតយើងឈ្នះហើយបងប្អូន កុំជឿលើព័ត៌មានអកុសល ថាគេ ឈ្នះ តាមពិតយើងទេជាអ្នកឈ្នះ សូមបងប្អូនត្រៀមលក្ខណៈស្ថានការណ៍អាចប្រែប្រួលប៉ុន្មាន ថ្ងៃឬ ប៉ុន្មានសប្តាហ៍យ៉ាងយូរ យើងនឹងធ្វើមហាបាតុកម្មឲ្យញ័រផែនដី ហើយបងប្អូនអ្នកខេត្ត កណ្តាល អ្នកកំពង់ស្ពឺ អ្នកកំពង់ចាម និងអ្នកភ្នំពេញ ត្រៀមខ្លួនរំដោះជាតិឲ្យបានឆ្នាំ២០១៣ នេះ អញ្ចឹងត្រៀមខ្លួនទាំងអស់គ្នា»។ នេះ គឺជាការបំផុសចលនាមហាជនដើម្បីបង្កភាពច លាចល វឹកវ ក្នុងសង្គម ដែលត្រូវបានប្រកាសដោយថ្នាក់ដឹកនាំគណបក្សសង្គ្រោះជាតិ ដែលជាអ្នកផ្តើមការអុចអាល។ ទង្វើនេះ គឺជាចេតនាយ៉ាងពិតប្រាកដក្នុងការរៀបចំផែនការផ្តួលរំលំរាជរដ្ឋាភិបាលស្របច្បាប់តាមរយៈមហាជន មិនមែនតាមបែបលទ្ធិប្រជាធិបតេយ្យនោះទេ ។
ការគំរាមកំហែងដោយប្រើប្រាស់មហាបាតុកម្មរបស់មេដឹកនាំគណបក្សសង្រ្គោះជាតិតាំងពីក្រោយថ្ងៃបោះឆ្នោតពីថ្ងៃទី២៨ខែកក្កដាឆ្នាំ២០១៣ មកដល់សព្វថ្ងៃ ដែលជាហេតុនាំឲ្យមានការ អស្ថិរភាព នយោបាយ បង្កើតបញ្ហាសង្គម ដែលជាហេតុធ្វើឲ្យមុខទំនិញ គ្រឿងឧបភោគ បរិភោគ គ្រប់បែបយ៉ាងឡើងថ្លៃ។ ម្យ៉ាងវិញទៀតបានធ្វើឲ្យវិនិយោគិនមួយចំនួន ពិចារណាក្នុងការផ្អាក ឬបង្វែរការដាក់ទុនការរកស៊ីខ្លួនទៅប្រទេសផ្សេង បើសិនជាស្ថានការណ៍នយោបាយនៅកម្ពុជា មិននឹងន។ ដូចនេះការខាតបង់ដ៏ធំធេង គឺប្រជាជន និងប្រទេសកម្ពុជាទាំងមូល។
ដើម្បីបន្ធូរបន្ថយស្ថានការណ៍នយោបាយឲ្យវិលទៅរកភាពប្រក្រតីឡើងវិញនោះ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ទ្រង់បានអំពាវនាវចំពោះគណបក្សទាំងពីរ ដែលទទួលបានអាសនៈក្នុងរដ្ឋសភាជាតិ ខិតខំដោះស្រាយទំនាស់ដោយសន្តិវិធី និងតម្កល់ផលប្រយោជន៍ជាតិជាធំ និងចំពោះប្រជាពលរដ្ឋគ្រប់ស្រទាប់វណ្ណៈ ឲ្យបន្តប្រកបមុខរបរចិញ្ចឹមជីវិតរបស់ខ្លួន ដោយស្ងៀមស្ងាត់ តាមរយៈព្រះរាជសាររបស់ព្រះអង្គ ចុះថ្ងៃទី០៧ ខែសីហា ឆ្នាំ២០១៣។
ដោយឡែកគណបក្សសង្រ្គោះជាតិ នៅតែបំផុសបំផុលឲ្យប្រជាពលរដ្ឋត្រៀមធ្វើបាតុកម្ម ដែលបានផ្សាយតាមកម្មវិធីសម្លេងសង្រ្គោះជាតិ នៅវិទ្យុសំបុកឃ្មុំរៀងរាល់ថ្ងៃដែលផ្ទុយពីព្រះរាជ សាររបស់ ព្រះមហាក្សត្រ ដែលអំពាវនាវឲ្យប្រជាពលរដ្ឋប្រកបមុខរបរចិញ្ចឹមជីវិត ដោយសុខសាន្ត និងរក្សានូវភាពស្ងៀមស្ងាត់ ប៉ុន្តែគណបក្សសង្រ្គោះជាតិបានយកប្រជាពលរដ្ឋធ្វើជាចំណាប់ខ្មាំង ទៅវិញ។ ចំណុចនេះត្រូវអ្នកវិភាគឯករាជ្យបានផ្តល់អនុសាសន៍ថា ប្រជាពលរដ្ឋមិនមែនជាចំណាប់ខ្មាំងរបស់អ្នកចាញ់ឆ្នោតនោះទេ។