សម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីព្រះរាជាណាចក្រកម្ពុជានាព្រឹកថ្ងៃទី១១ ខែតុលា ឆ្នាំ២០១៣ បានអំពាវនាវ និងធ្វើការផ្តាំផ្ញើទៅដល់អ្នកជំនាន់ក្រោយ ដែលត្រូវបន្តវេនដឹកនាំរាជរដ្ឋាភិបាលកម្ពុជា ត្រូវចាំទុកថា ព្រះបិតាជាតិ ជាព្រះបិតា ជារៀងរហូត និងសូមរក្សាទុកថ្ងៃទី១៥តុលា ជារៀងរាល់ឆ្នាំ ដើម្បីបង្កើតឱកាសសម្រាប់ប្រជាពលរដ្ឋ គោរពព្រះវិញ្ញាណក្ខន្ធព្រះបិតាជាតិ។
នៅក្នុងសុន្ទរកថាថ្លែងនៅចំពោះព្រះភ័ក្រ្ត ព្រះមហាក្សត្រ និងហ្លួងម៉ែ ក្នុងពិធីសម្ពោធវិមានព្រះបរមរូប សម្តេចព្រះ នរោត្តម សីហនុ ព្រះបរមរតនះកោដ្ឋ សម្តេចតេជោនាយករដ្ឋមន្ត្រី បានមានប្រសាសន៍ថា៖ “ខ្ញុំព្រះករុណាខ្ញុំ សូមធ្វើការអំពាវនាវ និងធ្វើការផ្តាំផ្ញើទៅដល់អ្នកជំនាន់ក្រោយ ដែលត្រូវបន្តវេនដឹកនាំរាជរដ្ឋាភិបាលថា ព្រះបិតាជាតិរបស់យើងមិនគ្រាន់តែជាព្រះបិតានៅក្នុងបច្ចុប្បន្ននេះទេ ផឹកទឹកនឹកដល់ប្រភពទឹក ទទួលទានផ្លែឈើ នឹកដល់អ្នកដាំ ព្រះបិតាជាតិរបស់យើង ទ្រង់ជាព្រះបិតាជាតិ ជារៀងរហូត”។
សម្តេចតេជោបានមានប្រសាសន៍ដោយទទូចថា៖ “ដូច្នេះទូលព្រះបង្គំ ខ្ញុំព្រះករុណាខ្ញុំ សូមអំពាវនាវចំពោះអ្នកជំនាន់ក្រោយ សូមមេត្តារក្សាទុក ថ្ងៃ១៥ ខែតុលា ជារៀងរាល់ឆ្នាំ ដើម្បីបង្កើនឱកាសសម្រាប់ប្រជាពលរដ្ឋ គោរពព្រះវិញ្ញាណក្ខន្ធព្រះបិតាជាតិ។ យើងជំនាន់នេះ កំពុងតែត្រួសត្រាយផ្លូវ សម្រាប់អ្នកជំនាន់ក្រោយ សង្ឃឹមថា អ្នកបន្តវេនរាប់សិបឆ្នាំ រាប់រយឆ្នាំតទៅទៀត នៅតែបន្តរក្សាថ្ងៃទី១៥ ខែតុលា ជារៀងរាល់ឆ្នាំ សម្រាប់ប្រជាពលរដ្ឋ មកគោរពព្រះវិញ្ញាណក្ខន្តព្រះវររាជបិតាជាតិខ្មែរ”។ ជាមួយនេះ យើងទាំងអស់គ្នានៅក្នុងទីនេះ ក៏ដូចជាទៅអនាគតក្រោមបាវចនា ជាតិ សាសនា ព្រះមហាក្សត្រ រាជាណាចក្រកម្ពុជា និង បន្តស្ថិតស្ថេរជាអមតៈ ដែលយើងត្រូវមើលឃើញដើម្បីការពាររាជានិយម ការពាររាជបល្ល័ង្គ ការពារព្រះមហាក្សត្រជាទីគោរពសក្ការៈ ក៏ដូចជាសម្តេចម៉ែ ដែលកំពុងគង់ប្រថាប់។ រាស្ត្រខ្មែរ និងដើម្បីចារឹកព្រះអង្គក្នុងប្រវត្តិសាស្ត្រជាតិយើងជារៀងរហូត។
រាជរដ្ឋាភិបាលកម្ពុជាអាណត្តិទី៤នៃរដ្ឋសភា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន បានសម្រេច និងប្រកាសឱ្យសាងសង់វិមានព្រះបរមបដិមានៃព្រះបរមរតនកោដ្ឋ ដើម្បីជានិម្មិត្តរូបនៃការដឹងព្រះគុណសម្តែងនូវកតញ្ញូតាធម៌ និងចងចាំនូវព្រះរាជជីវប្រវត្តិព្រះរាជបូជនីយកិច្ច និងស្នាប្រហស្តដ៏មហិមា របស់ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ចំពោះជាតិមាតុភូមិ និងប្រជារាស្ត្រ។
ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអនុគណៈកម្មការព័ត៌មានផ្សព្វផ្សាយ និងសាងសង់ព្រះបរមរូប ក្នុងព្រះរាជពិធីសម្ពោធវិមានព្រះបរមរូប ព្រះករុណា ព្រះបរមរតនកោដ្ឋ បានធ្វើរបាយការណ៍ អំពីការសាងសង់វិមានព្រះបរមបដិមានៃព្រះបរមរតនកោដ្ឋឲ្យដឹងថា វិមានព្រះបរមបដិមា ព្រះបរមរតនកោដ្ឋ ត្រូវបានបញ្ចុះបឋមសិលាសាងសង់ កាលពីថ្ងៃទី២០ ខែកុម្ភៈ ឆ្នាំ២០១៣ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា។
ការសាងសង់វិមាន និងព្រះបរមបដិមា ចាប់ផ្តើមអនុវត្តពីថ្ងៃទី៧ ខែមីនា ដល់ថ្ងៃទី៨ ខែតុលា ឆ្នាំ២០១៣ មានរយៈពេល ៨ខែ ដោយក្រុមសិលានៃក្រសួងវប្បធម៌ និងវិចិត្រសិល្បៈ ដោយមានសិល្បករ វិចិត្រករស្មូនរូប និងអ្នកជំនាញខាងស្ថាបត្យកម្ម សរុបចំនួន ១១៧ នាក់ ចែកចេញជា ៩ក្រុម និងចំណាយថវិកាសរុបចំនួន ១.២២៩.៨២០ដុល្លាអាមេរិក។ ចំពោះការរៀបចំបរិវេណជុំវិញវិមានព្រះបរមបដិមា សាលារាជធានីភ្នំពេញ ជាអ្នករៀបចំចាត់ចែង។ បន្ទាប់ពីបានប្រារព្ធពិធីក្រុងពាលីតាមវិធីសាសនានារសៀលថ្ងៃទី១០ ខែតុលា ឆ្នាំ២០១២ ដោយមានការយាងចូលរួមពីសម្តេចព្រះសង្ឃរាជ និងឯកឧត្តមបណ្ឌិតសុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីសម្តេចជហ្វាវាំង គង់ សំអុល ឧបនាយករដ្ឋមន្ត្រីព្រះបរមរាជវាំង ព្រមទាំងសមាជិកសមាជិការនៃរាជរដ្ឋាភិបាលជាច្រើនរូបរួចមកនៅព្រឹកថ្ងៃទី១១ ខែតុលា ឆ្នាំ២០១៣ ព្រះរាជពិធីសម្ពោធវិមានព្រះបរមបដិមានៃព្រះបរមរតនកោដ្ឋ ត្រូវបានប្រារព្ធឡើង ក្រោមព្រះរាជអធិបតីភាពដ៏ខ្ពង់ខ្ពស់របស់ព្រះករុណា ជាអម្ចាស់ជីវិតលើត្បូង ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត និងសម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត រួមជាមួយវត្តមានរបស់សម្តេចអគ្គមហាពញាចក្រី ហេង សំរិន ប្រធាន រដ្ឋសភានៃព្រះរាជាណាចក្រកម្ពុជា និងលោកជំទាវ ,សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេច ព្រះអង្គម្ចាស់ ទ្រង់ លោកឧកញ៉ា អស់លោក លោកស្រី ភ្ញៀវកិត្តិយសជាតិ និង អន្តរជាតិ ព្រមទាំងមន្ត្រីរាជការយ៉ាងច្រើនកុះករ។
ព្រះករុណាព្រះមហាក្សត្រព្រះបរមនាថនរោត្តមសីហមុនី និងសម្តេចម៉ែ រួមដំណើរដោយថ្នាក់ដឹកនាំជាន់ខ្ពស់រាជរដ្ឋាភិបាល រដ្ឋសភា ព្រឹទ្ធ សភាបានយាងចុចប៊ុតុង បញ្ជាបើកសម្ពោធព្រះបរមរូបជាផ្លូវការ បន្ទាប់មកព្រះមហាក្សត្រ និងសម្តេចម៉ែ បានយាងអុជធូប និងដាក់កម្រងផ្កា ព្រមទាំងថ្វាយបង្គំ ចំពោះព្រះបរមរូប ព្រះបរមកោដ្ឋ។ ពិធីសម្ពោធបានបញ្ចប់នៅវេលាម៉ោង ៩ និង៣០នាទី៕