ការបន្តជំរុញទំនាក់ទំនងកិច្ចសហប្រតិបត្តិការលើវិស័យជាច្រើន ជាពិសេសលើវិស័យពាណិជ្ជកម្ម វិនិយោគ និង សេដ្ឋកិច្ចរវាងព្រះរាជាណាចក្រកម្ពុជា និងព្រះរាជាណាចក្រស៊ុយអែត គឺជាបំណងដែល សម្តេចអគ្គមហាសេនាបតីតេជោ ហ៊ុន សែន បានស្នើទៅលោកជំទាវ Anna Maj Hultgard ឯកអគ្គរាជទូត ថ្មីនៃព្រះរាជាណាចក្រស៊ុយអែត ប្រចាំព្រះរាជាណាចក្រកម្ពុជា។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីឲ្យដឹងថា នៅក្នុងឱកាសទទួលជួបសវនាការ នៅវិមានសន្តិភាពនាថ្ងៃទី១៤ ខែវិច្ឆិកា ឆ្នាំ២០១៣ សម្តេចតេជោនាយករដ្ឋមន្ត្រីបានសំដែងនូវការពេញចិត្តចំពោះកិច្ចសហប្រតិបត្តិការ និងវឌ្ឍនភាពរវាងប្រទេសទាំងពីរ។ សម្តេចតេជោបានមានប្រសាសន៍វាយតម្លៃថា កិច្ចសហប្រតិបត្តិការ និងវឌ្ឍនភាពនៃទំនាក់ទំនងរវាងប្រទេសទាំងពីរមានស្ថិរភាពល្អផង និងមានវឌ្ឍនភាពផង ហើយរាល់គម្រោងទាំងឡាយដែលជាកិច្ចសហប្រតិបត្តិការ រវាងព្រះរាជាណាចក្រកម្ពុជាជាមួយស៊ុយអែត គឺបានដំណើរការទៅមុខយ៉ាងរលូន។
សម្តេចតេជោបានសំដែងនូវអំណរគុណ ចំពោះព្រះរាជាណាចក្រស៊ុយអែត ដែលបានជួយកម្ពុជាលើវិស័យដោះមីន និងយុទ្ធភ័ណ្ឌមិនទាន់ផ្ទុះ និងបានស្នើសុំឲ្យស៊ុយអែតបន្តពិចារណាជួយដល់កម្ពុជា ជាពិសេស គឺមជ្ឈមណ្ឌលមីនអាស៊ាននៅកម្ពុជាដើម្បីបណ្តុះបណ្តាល ធនធានមនុស្សសម្រាប់បម្រើកិច្ចសហប្រតិបត្តិការក្រោមឆ័ត្ររបស់អង្គការសហប្រជាជាតិនោះ។
លោកជំទាវ Anna Maj Hultgard បានគោរពជម្រាបជូនសម្តេចតេជោនាយករដ្ឋមន្ត្រីថា លោកជំទាវនឹងប្រឹងប្រែងឲ្យអស់ពីសមត្ថភាពដើម្បីពង្រឹងនូវទំនាក់ទំនង ដែលមានស្រាប់រវាងប្រទេសទាំងពីរកម្ពុជា-ស៊ុយអែត សម្រាប់ពេលបច្ចុប្បន្នក៏ដូចជាទៅអនាគត ហើយការអភិវឌ្ឍ និងកិច្ចសហប្រតិបត្តិការគឺជាទិសដៅដ៏សំខាន់របស់ព្រះរាជាណាចក្រស៊ុយអែត និងកម្ពុជានោះហើយ។ លោកជំទាវទូត Anna Maj Hultgard បានមានប្រសាសន៍ថា លោកជំទាវមានមហិច្ឆតាជំរុញកិច្ចសហប្រតិបត្តិការលើវិស័យពាណិជ្ជកម្មវិនិយោគ និងលើកស្ទួយវិនិយោគមកកាន់ព្រះរាជាណាចក្រកម្ពុជា ជាងនេះទៀតនឹងពង្រឹងនូវរូបភាពនៃព្រះរាជាណាចក្រស៊ុយអែត ក៏ដូចជាទំនាក់ទំនងរវាងប្រទេសទាំងពីរ ដោយផ្តោតក្តីសង្ឃឹមថា វត្តមានរបស់លោកជំទាវនៅកម្ពុជានឹងជួយជំរុញរួមចំណែកក្នុងការ អភិវឌ្ឍកម្ពុជា រួមទាំងវិស័យច្បាប់ផងដែរ ដោយព្រះរាជាណាចក្រស៊ុយអែត បានយកចិត្តទុកដាក់យ៉ាងខ្លាំងទៅលើបញ្ហាតុលាការកាត់ទោសអតីតមេដឹកនាំខ្មែរក្រហម ហើយស៊ុយអែត កំពុងតែពិចារណាដើម្បីផ្តល់ជំនួយទៅលើតុលាការខ្មែរក្រហមនេះ។ សម្តេចតេជោនាយករដ្ឋមន្ត្រីបានស្វាគមន៍ និងសំដែងនូវការអបអរសាទរជូនចំពោះលោកជំទាវ Anna ដែលត្រូវបានតែងតាំងជាឯកអគ្គរាជទូតប្រចាំនៅព្រះរាជាណាចក្រកម្ពុជា ដោយសម្តេចបានមានប្រសាសន៍បញ្ជាក់ថា អ្វីដែលលោកជំទាវ Anna Maj Hultgard បានលើកឡើងគឺជារបៀបវារៈនៃកិច្ចសហប្រតិបត្តិការរ វាងប្រទេសយើងទាំងពីរនោះហើយ៕