នាព្រឹកថ្ងៃទី១៨ ខែមករា ឆ្នាំ២០១៤ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសម្ពោធដាក់ឲ្យប្រើប្រាស់ ភូមិកុមារ SOS ក្រចេះ ស្ថិតនៅក្នុងសង្កាត់អូរឫស្សី ក្រុងក្រចេះ ខេត្តក្រចេះ ដែលជាសមិទ្ធផលទី៩ នៃកិច្ចសហប្រតិបត្តិការរវាងក្រសួងសង្គមកិច្ច អតីតយុទ្ធជន និងយុវនីតិសម្បទាជាមួយអង្គការភូមិកុមារ SOS អន្តរជាតិ។
ក្នុងឱកាសនោះ សម្ដេចតេជោនាយករដ្ឋមន្ត្រី បានថ្លែងអំណរគុណចំពោះសប្បុរសជនទូទៅ ដែលបានបរិច្ចាគធនធានឧបត្ថម្ភដល់អង្គការភូមិកុមារ SOS អន្តរជាតិ និងក្នុងនាមរាជរដ្ឋាភិបាលកម្ពុជា សម្តេចតេជោបានឯកភាពផ្ដល់ទីតាំងសម្រាប់កសាងភូមិកុមារ SOS ចំនួន២ កន្លែងទៀត នៅខេត្តកំពត និងខេត្តព្រៃវែង។ សម្រាប់គម្រោងនៅខេត្តកំពត ដែលជាគម្រោងទី១០ ក្រសួងសង្គមកិច្ច អតីតយុទ្ធជន និងយុវនីតិសម្បទាបានត្រៀមទីតាំង ដែលមានផ្ទៃដីទំហំ ៣ហិកតា ក្នុងភូមិរលួស ឃុំបឹងទូក ស្រុកទឹកឈូ ដែលនឹងត្រូវចាប់ផ្តើមសាងសង់នាដើមឆ្នាំ២០១៤នេះ។
ដោយឡែកសម្រាប់ ភូមិកុមារ SOS ក្រចេះ ដែលបានប្រកាសដាក់ឲ្យប្រើប្រាស់ជាផ្លូវការដោយសម្តេចតេជោ ត្រូវបានសាងសង់លើទីតាំងដីរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា ដែលមានទំហំ១០ ២៣០ ម៉ែត្រក្រឡាស្ថិតនៅក្នុងសង្កាត់អូរឫស្សី ក្រុងក្រចេះ ខេត្តក្រចេះ។ ភូមិកុមារ SOS ក្រចេះ បានចាប់ផ្តើមសាងសង់ នៅថ្ងៃទី ២៥ មករា ឆ្នាំ ២០១២ និងបានបញ្ចប់គម្រោងសាងសង់នៅថ្ងៃទី៩ ខែមិថុនា ឆ្នាំ ២០១៣។ ភូមិកុមារ SOS ក្រចេះមាន អាគារចំនួន១៨ ក្នុងនោះមានផ្ទះគ្រួសារចំនួន១២ ផ្ទះសហគមន៍១ ផ្ទះភ្ញៀវស្នាក់នៅ១ ផ្ទះបុគ្គលិក១អាគារការិយាល័យ១ ផ្ទះមេភូមិ១ និងសាលាមត្តេយ្យចំនួន១។ ភូមិនេះអាចទទួលកុមារស្នាក់នៅបាន ១៣០នាក់ និងអាចទទួលសិស្សចូលរៀនសាលាមត្តេយ្យសិក្សាចំនួន ១២០នាក់។
ឯកឧត្តម វង សូត្រ រដ្ឋមន្ត្រីក្រសួងសង្គមកិច្ច អតីតយុទ្ធ និងយុវនីតិសម្បទាបានឲ្យដឹងថា តម្លៃលើការសាងសង់ និងបំពាក់សម្ភារសម្រាប់ភូមិកុមារ SOS ក្រចេះ ចំណាយថវិកាសរុបជាង ១ ៣៣៣ ៤៨៤ ដុល្លារអាមេរិក ជាថវិការបស់អង្គការភូមិកុមារ SOS អន្តរជាតិ ដែលជាថវិកាឧបត្ថម្ភដោយ លោក ស្ទីហ្វិន (Mr.Stefam) និងលោកស្រី គ្រីស្ទីន បេងសុន(Mrs.Kristin Bengtsson) ជនជាតិស៊ុយអែត។
សូមបញ្ជាក់ថា អង្គការភូមិកុមារ SOS អន្តរជាតិ ជាអង្គការមនុស្សធម៌អន្តរជាតិ មួយដែលបម្រើឲ្យវិស័យសុខុមាលភាពកុមារ មានទីស្នាក់ការនៅប្រទេសអូទ្រីស និងបានបង្កើតឡើងដោយលោកបណ្ឌិត ហ័រម៉ាន ម៉ៃន័រ នៅឆ្នាំ ១៩៤៩ ដោយបានធ្វើសកម្មភាពនៅក្នុងប្រទេសចំនួន១៣៣ នៅលើសកលលោក។ សមិទ្ធផលធំៗដែលអង្គការនេះបានរួមចំណែកជាមួយរាជរដ្ឋាភិបាលកម្ពុជា រួមមានការបង្កើតភូមិកុមារកម្មវិធីផ្ទះ សម្រាប់ផ្តល់សេវាសង្គមកិច្ចផ្ទះសម្រាប់យុវជន មត្តេយ្យសាលា សាលារៀនហ័រម៉ានម៉ៃន័រ មជ្ឈមណ្ឌលបណ្តុះបណ្តាលវិជ្ជាជីវៈ មជ្ឈមណ្ឌលវេជ្ជសាស្ត្រ និងមជ្ឈមណ្ឌលសង្គ្រោះបន្ទាន់ជាដើម។
ក្នុងរយៈពេលជាង ១០ឆ្នាំ គិតពីឆ្នាំ១៩៩៩ មកដល់ពេលនេះ អង្គការភូមិកុមារ SOS អន្តរជាតិបានអនុវត្តន៍គម្រោងចំនួន៩ នៅ៥ រាជធានី-ខេត្ត គឺគម្រោងទី១ គឺភូមិកុមារ SOS ភ្នំពេញថ្មី ទី២ភូមិកុមារ SOS អង្គរសៀមរាប ទី៣សាលារៀន SOSហ័រម៉ានម៉ៃន័រសៀមរាប ទី៤ ភូមិកុមារ SOS បាត់ដំបង ទី៥ សាលារៀន SOSហ័រម៉ានម៉ៃន័របាត់ដំបង ទី៦ សាលារៀន SOS ហ័រម៉ានម៉ៃន័រ បាត់ដំបង,ទី៧.ភូមិកុមារ SOSរតនគិរី ទី៨មជ្ឈមណ្ឌលបណ្តុះបណ្តាលថ្នាក់ជាតិភ្នំពេញ និងគម្រោងទី៩ ភូមិកុមារ SOS ក្រចេះ ដែលបានដាក់សម្ពោធនាថ្ងៃនេះ។ សរុបគម្រោងទាំង ៩ គឺបានផ្តល់ការងារដល់អ្នកគ្រប់គ្រង បុគ្គលិក អ្នកម្តាយថែទាំងកុមារ លោក គ្រូ អ្នកគ្រូចំនួន ៣៤៥នាក់ ដែលផ្តល់សេវាកំពុងស្នាក់នៅ ៧០៤នាក់ និងផ្តល់ឱកាសឲ្យសិស្សបានចូលសិក្សា ចំនួន ១.៥៩៩នាក់ ដោយបានចំណាយថវិកាសរុបជាង ១២លានដុល្លារអាមេរិក។ លើសពីនេះទៀត អង្គការបានចំណាយសម្រាប់ប្រតិបត្តិការទាំងភូមិ និងទាំងសាលារៀន ប្រមាណ ២ លានដុល្លារអាមេរិក ក្នុង១ឆ្នាំ៕