សម្តេច
អគ្គមហាសេនាបតីតេជោ ហ៊ុន សែន
នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី១៨ ខែមីនា
ឆ្នាំ២០១៤ បានអនុញ្ញាតឲ្យ ឯកឧត្តម វីលៀម ចេសស៊ី (William Jesse)
ឯកអគ្គរាជទូតថ្មីចក្រភពអង់គ្លេសប្រចាំកម្ពុជា
ចូលជួបសម្តែងការគួរសម នៅវិមានសន្តិភាព
ទីស្តីការគណៈរដ្ឋមន្ត្រី។
ឯកឧត្តម
អ៊ាង សុផល្លែត
ជំនួយការផ្ទាល់សម្តេចតេជោនាយករដ្ឋមន្ត្រីបានឲ្យដឹងថា
ឯកឧត្តមវីលៀម ចេសស៊ី អគ្គរាជទូតចក្រភពអង់គ្លេស
បានជំរាបជូនសម្តេចតេជោថា
នេះជាពេលវេលាដ៏ល្អបំផុតសម្រាប់ឯកឧត្តមមកបំពេញបេសកកម្មការទូត
នៅកម្ពុជា។
ឯកឧត្តម
វីលៀម ចេសស៊ី
បានចាប់អារម្មណ៍យ៉ាងខ្លាំងចំពោះកំណើនសេដ្ឋកិច្ចនៅកម្ពុជា
ដោយឯកឧត្តមបានមានប្រសាសន៍ថា
ទេសចរណ៍របស់ចក្រភពអង់គ្លេសមកកាន់កម្ពុជាមានការកើនឡើង
ហើយទំហំពាណិជ្ជកម្មវិនិយោគរបស់អង់គ្លេសនៅកម្ពុជា
ក៏កំពុងមានការកើនឡើងផងដែរ។ ឯកឧត្តមបញ្ជាក់ថា
អ្វីដែលឯកឧត្តមនឹងធ្វើនោះ គឺបន្តការគាំទ្រដល់កម្ពុជា
ពិសេសលើវិស័យដោះមីនជាដើម។
សម្តេច
តេជោនាយករដ្ឋមន្ត្រីបានមានប្រសាសន៍ឲ្យដឹងថា
ទំនាក់ទំនងរវាងប្រទេសទាំងពីរ (កម្ពុជា-អង់គ្លេស)
កំពុងមានការកើនឡើងជារៀងរាល់ថ្ងៃ ហើយអ្វីដែលកម្ពុជាសប្បាយចិត្ត
និងមានមោទនភាពនោះ
គឺកំណើននៃអ្នកវិនិយោគមកពីចក្រភពអង់គ្លេសមានកើនឡើង
ទាំងផ្នែកពាណិជ្ជកម្ម និងទេសចរណ៍ជាដើម។
ទេសចរណ៍ចក្រភពអង់គ្លេសមកកាន់កម្ពុជា
មានចំនួនប្រមាណ១២ម៉ឺននាក់ក្នុងមួយឆ្នាំ។
សម្តេច
តេជោបានមានប្រសាសន៍បញ្ជាក់ថា ការប្រឹងប្រែងរបស់កម្ពុជា
គឺបន្តជំរុញកម្ពុជា ចេញពីប្រទេសទទួលជំនួយ
ឲ្យទៅជាប្រទេសសហប្រតិបត្តិការសេដ្ឋកិច្ចជាមួយប្រទេសដទៃទៀត
ក៏ដូចជា ប្រទេសក្នុងតំបន់ផងដែរ។
សម្តេច
តេជោនាយករដ្ឋមន្ត្រីក៏បានមានប្រសាសន៍ថ្លែងអំណរគុណ
ចំពោះជំនួយទាំងឡាយដែលចក្រភពអង់គ្លេសផ្តល់ជូនកម្ពុជា
រួមទាំងជំនួយដែលផ្តល់ដល់សាលាក្តីខ្មែរក្រហមផងដែរ។
បន្ទាប់
ពីទទួលជួបសម្តែងការគួរសម
ជាមួយឯកអគ្គរាជទូតថ្មីចក្រភពអង់គ្លេសប្រចាំនៅកម្ពុជា
នៅព្រឹកដដែលនោះ សម្តេចអគ្គមហាសេនាបតីតេជោ ហ៊ុន សែន
ក៏បានអនុញ្ញាតឲ្យ ឯកឧត្តម DINESH K.PATNAIK
ឯកអគ្គរដ្ឋទូតថ្មីឥណ្ឌាប្រចាំនៅកម្ពុជាចូលជួបសម្តែងការគួរសមផង
ដែរ។
នៅ
ក្នុងជំនួបសម្តែងការគួរសមនោះ ឯកឧត្តម DINESH K.PATNAIK
ឯកអគ្គរដ្ឋទូតថ្មីឥណ្ឌាក៏បាននាំមកនូវវត្ថុសក្តិសិទ្ធិមួយចំនួន
ជូនសម្តេចតេជោនាយករដ្ឋមន្ត្រី ក្នុងនោះរួមមាន៖ ស្លឹកពោធិ
និងដីដែលនាំមកពីតំបន់ដ៏ពិសិទ្ធិចំនួន ៣កន្លែងផ្សេងគ្នា
គឺតំបន់ពុទ្ធគយា តំបន់សារនាថ និងតំបន់កុសិនារា
ដែលជាទីស្ថានមានប្រវត្តិទាក់ទងនឹងព្រះពុទ្ធជាអង្គម្ចាស់។
ឯកឧត្តម
DINESH K.PATNAIK បានមានប្រសាសន៍ជំរាបជូនសម្តេចតេជោថា
ពុទ្ធគយា គឺមានន័យថា ជាទីកន្លែងដែលព្រះសម្មាសម្ពុទ្ធបានត្រាស់ដឹង
សារនាថជាទីកន្លែងដែលព្រះសម្មាសម្ពុទ្ធទ្រង់សំដែងព្រះធម៌,
និងកុសិនារាជាទីកន្លែងដែលព្រះសម្មាសម្ពុទ្ធ ចូលព្រះបរិនិព្វាន។
ឯកឧត្តម DINESH K.PATNAIK ក៏បានជំរាបជូនសម្តេចដែរថា
វត្ថុសក្តិសិទ្ធិនេះ គឺជូនសម្តេចអគ្គមហាសេនាបតីតេជោ ហ៊ុន សែន
និងក្រុមគ្រួសារ ដើម្បីបានទទួលនូវសិរីមង្គល វិបុលសុខ
និងសំណាងល្អ។
សម្តេចតេជោនាយករដ្ឋមន្ត្រីបានមានប្រសាសន៍ថ្លែងអំណរគុណ ចំពោះឯកឧត្តម
DINESH K.PATNAIK ដែលបាននាំមកនូវវត្ថុដ៏មានតម្លៃ ជាទីសក្ការៈ
បូជានេះ មកជូនចំពោះសម្តេច៕