រសៀលថ្ងៃទី ១១ ខែ កក្កដា ឆ្នាំ ២០១៤ ត្រូវនឹងថ្ងៃ ១៥ កើត ពេញបូរមី ខែ អាសាធ ឆស័ក ព.ស ២៥៥៨ ឯកឧត្តម ផៃ ប៊ុនឈឿន អភិបាលនៃគណៈអភិបាលខេត្តកណ្តាល និងលោកជំទាវ ឯកឧត្តម ជាវ តាយ ឯកឧត្តម នូ សាខន អភិបាលរងខេត្ត និងលោកជំទាវរួមជាមួយពុទ្ធបរិស័ទ ប្រធាន អនុប្រធានមន្ទីរនានាជុំវិញខេត្តបានអញ្ជើញនាំទៀនព្រះវស្សា និងទេយ្យវត្ថុជាច្រើនមុខ និងបច្ច័យទៅវេរប្រគេនព្រះសង្ឃដែលគង់ចាំព្រះវស្សាក្នុងពុទ្ធសីមាវត្តប្រជុំនទី ហៅវត្តក្រពើហារ ស្ថិតក្នុងសង្កាត់ព្រែកឬស្សី ក្រុងតាខ្មៅ ខេត្តកណ្តាល ។
លុះព្រឹកឡើងថ្ងៃទី ១២ ខែ ឆ្នាំ ដដែល ឯកឧត្តម លោកជំទាវ រួមជាមួយពុទ្ធបរិស័ទជិតឆ្ងាយបាននិមន្តព្រះសង្ឃចំនួន ១៤៥ អង្គ រាប់បាត្រប្រគេនភោជនាហារ និងបង្សុកូលដើម្បីឧទ្ទិសដល់ដួងព្រះវិញ្ញាណក្ខន្ធព្រះអដ្ឋិព្រះបាទសម្តេចព្រះនរោត្តម សីហនុ ដែលព្រះអង្គបានយាងសោយទីវង្គត់ កាលពីថ្ងៃទី ១៥ ខែ តុលា ឆ្នាំ ២០១២ ក្នុងព្រះជន្ម ៩០ ព្រះវស្សា និងក្នុងពេលដែលព្រះបាទសម្តេច ព្រះនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនីនាថ សីហនុ ព្រះវរៈរាជមាតាជាតិខ្មែរ និងថ្នាក់ដឹកនាំព្រឹទ្ធសភា រដ្ឋសភា រាជរដ្ឋាភិបាលកម្ពុជា រួមជាមួយមន្ត្រីរាជការគ្រប់លំដាប់ថ្នាក់ និងប្រជាពលរដ្ឋជាកូនចៅ ចៅទួតរបស់ព្រះអង្គកំពុងប្រារព្ធព្រះរាជពិធីដង្ហែព្រះបរមអដ្ឋិស្តេចយាងចូលឧបោសថរតនារាម និងព្រះរាជពិធីបញ្ចុះព្រះបរមអដ្ឋិក្នុងព្រះចេតិយដែលមានទីតាំងក្នុងព្រះបរមរាជវាំង ។