សម្ដេចអគ្គមហាសេនាបតីតេជោ ហ៊ុន
សែន នាយករដ្ឋមន្ត្រីនៃព្រះរាជាណាចក្រកម្ពុជាបានអញ្ជើញជាអធិបតី ក្នុងពិធីប្រគល់សញ្ញាបត្រ និងប្រកាសដាក់ឱ្យប្រើប្រាស់ជាផ្លូវការនូវអគារសាកលវិទ្យាល័យ ប៊ែលធី អន្តរជាតិ
ដែលមានកម្ពស់១៥ជាន់ ដែលប្រារព្ធធ្វើឡើងនៅ វិទ្យាស្ថានជាតិអប់រំ នាព្រឹកថ្ងៃទី២១ ខែសីហា ឆ្នាំ២០១៤
។
យោងតាមរបាយការណ៍ ស្ដីពីសកម្មភាពបណ្ដុះបណ្ដាល របស់ ឯ.ឧ លី ឆេង សាកលវិទ្យាធិការ នៃសាកលវិទ្យាល័យ ប៊ែលធីអន្តរជាតិ បានឱ្យដឹងថា មាននិស្សិតជ័យលាភី ថ្នាក់បរិញ្ញាបត្ររង
ថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់
ផ្នែកភាសាអង់គ្លេស ចំនួន ៧៣៥នាក់ ដែលបានទទួលសញ្ញាបត្រ ជាលើកទី១ក្រោមអធិបតីភាពដ៏ខ្ពង់ខ្ពស់របស់សម្ដេចតេជោនាយករដ្ឋ មន្ត្រី ។ច្ចុប្បន្ននេះ សាលាប៊ែលធីអន្តរជាតិ
មាន ១៤ទីតាំងក្នុងនោះ
១៣ទីតាំងនៅរាជធានីភ្នំពេញ និង១ទីតាំងកំពុងសាងសង់នៅទីក្រុងតាខ្មៅ ខេត្តកណ្ដាល។ ក្នុងឆ្នាំសិក្សា ២០១៣-២០១៤
មានសិស្សានុសិស្ស កំពុងសិក្សា សរុបចំនួន ២៧.៤៤៧នាក់ ។ ចាប់ពីឆ្នាំសិក្សា ២០០៥-២០០៦ មកដល់ឆ្នាំសិក្សា ២០១៣-២០១៤នេះ
សិស្សានុសិស្ស បានបញ្ចប់ការសិក្សាសរុប
១៤.៥០៤នាក់ ។
សម្ដេចតេជោ ហ៊ុនសែន នាយករដ្ឋមន្ត្រី
បានអបអរសាទរនិងសរសើរ ចំពោះវឌ្ឍនភាពទាំងឡាយ របស់គ្រឹះស្ថានសិក្សាប៊ែលធី ហើយក្នុងនេះដែរ សម្ដេចតេជោ រម្លឹកជាថ្មីម្ដងទៀត ដោយបង្ហាញនូវមោទនភាព
និងសុទិដ្ឋិចំពោះនយោបាយបើកឱ្យវិស័យឯកជន ចូលរួមវិនិយោគ ក្នុងសេវាអប់រំ នៅប្រទេសកម្ពុជា ហើយក្នុងនេះសម្តេចក៏សង្កត់ធ្ងន់ជាថ្មីដែរថា បញ្ហាគុណភាពនៅតែជាបញ្ហាសំខាន់
ដែលត្រូវប្រឹងប្រែងបន្តទៀត។ ទាក់ទិននឹងបញ្ហាក្រៅប្រទេស សម្តេចតេជោ នាយករដ្ឋមន្ត្រី បានចូលរួមជាមួយលោកប្រធានាធិបតី
អាមេរិក អូបាម៉ា ,ប្រជាជនអាមេរិក និងក្រុមគ្រួសារ,ក៏ដូចជាប្រជាជនស្នេហាសន្តិភាព នៅក្នុងពិភពលោក
ថ្កោលទោសចំពោះ អំពើកាចសាហាវ
ព្រៃផ្សៃរបស់ពួក អាយស៊ីស ដែលជារដ្ឋឥស្លាមនៅអីរ៉ាក់ និងស៊ីរីដែលបានកាត់កសម្លាប់អ្នកកាសែតអាមេរិក ។ ដោយរួមទាំងរូបភាពនៃការបាញ់សម្លាប់មនុស្សទាំងហ្វូងៗដែលបាន ធ្វើឡើងពួកអាយស៊ីសនោះ។ សម្តេចតេជោបានលើកឡើងថា អំពើឃោរឃៅបែបនេះមិនអាចអត់ឱនបានទេ
ហើយសម្តេចគូសបញ្ជាក់ថា ទោះបីជាក្រុមឥស្លាមនិយមនោះ ទទួលជោគជ័យ បង្កើតរដ្ឋបានក៏ដោយ ក៏គ្មានអ្នកណាទៅទាក់ទងដែរ ។ ទាក់ទងនឹងបញ្ហានោះដែរសម្តេចតេជោនាយករដ្ឋមន្ត្រីបានថ្លែងថា យើងត្រូវតែប្តេជ្ញាថែមទៀតក្នុងការប្រឆាំងភេរវកម្មបែបនេះ
។
សូមរំលឹកថា ពួកសកម្មប្រយុទ្ធអ៊ីស្លាមនៃក្រុមឧទ្ទាមមកពីរដ្ឋអ៊ីស្លាមនិយម នៅអីរ៉ាក់ និងស៊ីរីបានបញ្ចេញវីដេអូមួយកាលពីថ្ងៃអង្គារ ទី១៩ សីហា ដោយបង្ហាញអំពី សកម្មភាពដ៏ព្រៃផ្សៃ ដោយកាត់កអ្នកកាសែតអាមេរិកម្នាក់គឺលោក James Foley ដែលបានបាត់ខ្លួនអស់រយៈពេលជិត២ឆ្នាំមកហើយនោះ។
នៅក្នុងឱកាសនេះ សម្តេចតេជោនាយករដ្ឋមន្ត្រីបានសំដែងនូវការមិនពេញចិត្ត និងប្រតិកម្មទៅនឹងអ្នកបកស្រាយខុស ចំពោះអង្គការក្រៅរដ្ឋាភិបាលមួយដែលទាក់ទងទៅនឹងសំដីដែលសម្តេច បានលើកឡើងអំពីបញ្ហាដីធ្លី ដែលមន្ត្រី អាជ្ញាធរ បានបណ្តែតបណ្តោយមិនដោះស្រាយ ដោយទុកឱ្យប្រជាពលរដ្ឋឡើងមកដាក់ញាតិ ស្វែងរកការអន្តរាគមន៍ពីសម្តេចនោះ៕
S…thy