ភ្លាមៗបន្ទាប់ពីឯកឧត្តម ឧត្តមសេនីយ៍ ប្រាយុទ្ធ
ច័ន្ទអូចា នាយករដ្ឋមន្ត្រីថៃ និងគណៈប្រតិភូ បានធ្វើ
ដំណើរមកដល់ព្រលានយន្ដហោះអន្ដរជាតិភ្នំពេញ នៅវេលាម៉ោង ២ និង៥០នាទីរសៀល ថ្ងៃទី៣០
ខែតុលា ឆ្នាំ២០១៤ ក៏បន្ដដំណើរទៅកាន់វិមានសន្ដិភាព ទីដែលសម្ដេចតេជោ ហ៊ុន សែន
ចាំទទួលអមដោយកងកិត្ដិយសនៅក្នុងវិមានសន្ដិភាព មុនពេលចូលទៅជួបពិភាក្សាគ្នានៅក្នុងបន្ទប់។
ប្រមុខនៃរាជរដ្ឋាភិបាលកម្ពុជា សម្ដេចតេជោ ហ៊ុន សែន និងសមភាគី ឯកឧត្តមឧត្តមសេនីយ៍ប្រាយុទ្ធ ច័ន្ទអូឆា បានជួបពិភាក្សាការងារ នៅវិមានសន្ដិភាព ក្នុងឱកាសនៃដំណើរទស្សនកិច្ចរបស់នាយករដ្ឋមន្ដ្រីថៃ និងគណៈប្រតិភូ ជាលើកដំបូងរយៈពេល២ ថ្ងៃនៅកម្ពុជា ។
យោងតាមសេចក្តីជូនព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជាកាលពីពេលថ្មីៗនេះបានឲ្យដឹងថា គឺក្រោយបញ្ចប់កិច្ចពិភាក្សា ប្រមុខនៃរាជរដ្ឋាភិបាលទាំងពីរនឹងធ្វើជាសាក្សី លើពិធីចុះហត្ថលេខាកិច្ចព្រមព្រៀងមួយចំនួនលើការពង្រឹងកិច្ចសហប្រតិបត្ដិការ កម្ពុជា-ថៃ កាន់តែប្រសើរទ្វេរឡើង ហើយលទ្ធផលនៃជំនួប នឹងត្រូវផ្តល់ជូនដល់អ្នកសារព័ត៌មានក្នុងសន្និសីទកាសែត នៅវិមានសន្ដិភាព។