បន្ទាប់ពីសារព័ត៌មានភ្នំពេញប៉ុស្តិ៍ចុះផ្សាយកាលពីថ្ងៃទី០៨ ខែមករា ឆ្នាំ២០១៥ នៅលេខ១៣៥៣ ក្រោមអត្ថបទមួយមានចំណងជើងថា "ហូ សិទ្ធី នាយកខុទ្ទកាល័យនាយករដ្ឋមន្ត្រី ហ៊ុន សែន បានជំរុញជាដដែលទៅក្រសួងរៀបចំដែនដី នគរូបនីយកម្ម និងសំណង់ ឲ្យអ្នកស្រី សារុំ ធ្វើការសាងសង់នៅលើដីនោះ និងសរសេរទៅលោក ប៉ា សុជាតិវង្ស អនុញ្ញាតឲ្យអ្នកស្រី សារុំ ជាតំណាងប្រជាពលរដ្ឋ១៦៣គ្រួសារ ចាក់ដីនៅលើដីទំហំ៩.៩៩២ម៉ែត្រក្រឡា ដើម្បីសាងសង់ផ្ទះ" រួចមក ឯកឧត្តម ហូ សិទ្ធី នាយកខុទ្ទកាល័យសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជារដ្ឋមន្ត្រីប្រតិភូអមនាយករដ្ឋមន្ត្រី បានសម្តែងនូវប្រតិកម្មយ៉ាងខ្លាំងក្លា ហើយបានចោទប្រកាន់ការចុះផ្សាយរបស់កាសែតភ្នំពេញប៉ុស្តិ៍នេះ ជាការបំភ្លៃការពិត គ្មានសុចរិតភាព ធ្វើឲ្យប៉ះពាល់ដល់កិត្តិយសរបស់ឯកឧត្តម ។
ជាមួយនឹងប្រតិកម្មភ្លាមៗនោះ ឯកឧត្តម ហូ សិទ្ធី បានចេញលិខិតផ្លូវការចុះថ្ងៃទី០៨ ខែមករា ឆ្នាំ២០១៥ ជម្រាបជូនលោកនិពន្ធនាយកសារព័ត៌មានភ្នំពេញប៉ុស្តិ៍ ដោយបានបញ្ជាក់ថា ឯកឧត្តមមិនមានសមត្ថកិច្ចទៅបញ្ជាក្រសួងរៀបចំដែនដី នគរូបនីយកម្ម និងសំណង់ ឬក៏អាជ្ញាធររាជធានីភ្នំពេញដើម្បីឲ្យធ្វើកិច្ចការបែបនេះទេ ហើយខុទ្ទកាល័យសម្តេចតេជោនាយករដ្ឋមន្ត្រីមានសមត្ថកិច្ចត្រឹមតែចេញលិខិតទៅស្ថាប័នពាក់ព័ន្ធដើម្បីពិនិត្យ ឬបើចាំបាច់សុំឲ្យលើកយោបល់ជូនសម្តេចតេជោនាយករដ្ឋមន្ត្រីពិនិត្យសម្រេចដ៏ខ្ពង់ខ្ពស់ ។ លើសពីនេះ ឯកឧត្តមស្នើឲ្យលោកនិពន្ធនាយកសារព័ត៌មានភ្នំពេញប៉ុស្តិ៍នេះមានសេចក្តីក្លាហានចុះផ្សាយនូវលិខិតរបស់ឯកឧត្តមនៅលើទំព័រកាសែតទៀតផង ។
នៅថ្ងៃទី០៨ ខែមករា ឆ្នាំ២០១៥នោះដែរ ឯកឧត្តម ហូ សិទ្ធី បានចេញលិខិតលើកទី២របស់ឯកឧត្តមជម្រាបជូនលោកនិពន្ធនាយកសារព័ត៌មានភ្នំពេញប៉ុស្តិ៍ ដោយផ្ញើជូននូវច្បាប់ចម្លងនៃលិខិតរបស់ឯកឧត្តមដែលបានផ្ញើជូនឯកឧត្តម ប៉ា សុជាតិវង្ស អភិបាលនៃគណៈអភិបាលរាជធានីភ្នំពេញ កាលពីថ្ងៃទី០៥ ខែមករា ឆ្នាំ២០១៥ ដែលកាសែតភ្នំពេញប៉ុស្តិ៍បានចុះផ្សាយបំភ្លៃថា ឯកឧត្តមបានចេញបញ្ជាដល់ឯកឧត្តម ប៉ា សុជាតិវង្ស ដើម្បីឲ្យលោកនិពន្ធនាយកពិនិត្យពិចារណាលើលិខិតទី២នេះ តើវាជា"បញ្ជា"ឬជា"ដីកាបញ្ជូន" ។
ដោយសារលោកនិពន្ធនាយកសារព័ត៌មានភ្នំពេញប៉ុស្តិ៍ខកខានមិនបានចុះផ្សាយតាមសំណូមពរ នូវលិខិតទី២របស់ឯកឧត្តម ហូ សិទ្ធី នោះ ទើបឯកឧត្តម ហូ សិទ្ធី បានចេញលិខិតសាជាថ្មីទៀតចុះថ្ងៃទី១២ ខែមករា ឆ្នាំ២០១៥ ដោយបានចោទប្រកាន់ថា ការចុះផ្សាយរបស់សារព័ត៌មានភ្នំពេញប៉ុស្តិ៍ គឺជាការមួលបង្កាច់ដោយចេតនាមកលើរូបឯកឧត្តម ប៉ុន្តែឯកឧត្តមបានបញ្ជាក់ថា ឯកឧត្តមនឹងមិនប្តឹងផ្តល់ទៅស្ថាប័នតុលាការទេ ដោយឯកឧត្តមយល់ឃើញថា វាងាយពេកសម្រាប់ជ័យជម្នះរបស់ឯកឧត្តមនៅក្នុងរឿងក្តីមួយនេះ ដ្បិតព័ស្តុតាងដែលឯកឧត្តមអាចនឹងបង្ហាញជូនតុលាការវាច្បាស់លាស់រហូតដល់លោកនិពន្ធនាយកមិនអាចប្រកែកបាន ។ ប៉ុន្តែអ្វីដែលឯកឧត្តមចង់បាន គឺសុំឲ្យលោកនិពន្ធនាយកសារព័ត៌មានភ្នំពេញប៉ុស្តិ៍ធ្វើការសុំទោសដល់សាធារណមតិកម្ពុជា និងអន្តរជាតិ ដោយអំពើបំភ្លៃភូតកុហកបោកប្រាស់របស់សារព័ត៌មានភ្នំពេញប៉ុស្តិ៍ ។
មជ្ឈដ្ឋានអ្នកតាមដានសេរីភាពបញ្ចេញមតិតាមរយៈសារព័ត៌មាននៅកម្ពុជា បានសម្តែងនូវការភ្ញាក់ផ្អើលដែរថា ច្បាស់ណាស់ជំហរនយោបាយរបស់កាសែតភ្នំពេញប៉ុស្តិ៍ គឺមានទំនោរគាំទ្រទៅលើគណបក្សប្រជាជនកម្ពុជា ដែលជាគណបក្សនយោបាយកាន់កាប់អំណាចនៅកម្ពុជា ដែលក្នុងនោះឯកឧត្តម ហូ សិទ្ធី ក៏ជាសមាជិកគណៈកម្មាធិការកណ្តាលគណបក្សប្រជាជនកម្ពុជាមួយរូបដែរ ក្រៅពីបានកាន់តំណែងជារដ្ឋមន្ត្រីប្រតិភូអមនាយករដ្ឋមន្ត្រី និងជានាយកខុទ្ទកាល័យនាយករដ្ឋមន្ត្រី តើចុះហេតុអ្វីឯកឧត្តម ហូ សិទ្ធី មានប្រតិកម្មខ្លាំងក្លាដល់ថ្នាក់ហ្នឹងទៅលើកាសែតភ្នំពេញប៉ុស្តិ៍ ឬក៏ការចុះផ្សាយរបស់កាសែតភ្នំពេញប៉ុស្តិ៍ពិតជាមានកំហុសធ្ងន់ធ្ងរប៉ះពាល់ដល់កិត្តិយសរបស់ឯកឧត្តម ហូ សិទ្ធី ប្រាកដមែន ? ៕