វិស័យវប្បធម៌ គឺជាគ្រឹះយ៉ាងសំខាន់ដែកអាចស្រូបទាញកំណើនទេសចរណ៏បានយ៉ាងច្រើនឲ្យមក
ទស្សនាកម្ពុជា ដោយបាននាំមកនូវចំណូលសេដ្ឋកិច្ចជាតិរាប់ពាន់លានដុល្លារ
ក្នុងមួយឆ្នាំៗ។
ថ្លែងបិទសន្និបាតបូកសរុបលទ្ធផលការងារវប្បធម៌ឆ្នាំ
២០១៤ របស់ក្រសួងវប្បធម៌ និងវិចិត្រសិល្បៈ នៅសាល សន្និសីទចតុមុខ ព្រឹកថ្ងៃទី២២ មករា
ឆ្នាំ២០៥ នេះ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី
មានប្រសាសន៏ថា សម្បត្តិវប្បធម៌ដ៏សម្បូរណ៍បែប ដែលកម្ពុជាមានសព្វថ្ងៃ បានចូលរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចសង្គមដោយបាននាំមកនូវចំណូលរាប់ពាន់លានដុល្លារទៅក្នុង ចរន្តសេដ្ឋកិច្ចជាតិ តាមរយៈទេសចរណ៍បេតិកភណ្ឌនិងវប្បធម៌គឺ ។
ឯកឧត្តមបណ្ឌិតសភាចារ្យ
បានគូសបញ្ចាក់ថា
ដោយសារកម្ពុជាមានសក្តានុពលខ្លាំងខាងវប្បធម៌បានធ្វើឲ្យវិស័យទេសចរណ៏នៅ
កម្ពុជាទាំងមូលបានក្លាយជាក្បាលម៉ាស៊ីននៃកំណើនសេដ្ឋកិច្ច
ដោយបានរួមចំណែករហូតដល់ប្រមាណជា ១៦% នៃផលិតផលក្នុងស្រុកសរុប (GDP) និងបានបង្កើតការងារជូនប្រជាជនដោយផ្ទាល់ជាង
៥០០ពាន់ និងដោយប្រយោលរាប់សិបពាន់ផ្សេងទៀត ក្នុងពីឆ្នាំ២០១៤កន្លងមកនេះ។
ឯកឧត្តម
មានប្រសាសន៏បន្តថា រាជរដ្ឋាភិបាលបានយកចិត្តទុកដាក់ណាស់នៅក្នុងវិស័យបេតិកភណ្ឌវប្បធម៌នេះ
ដោយបានដាក់ចេញនូវគោលនយោបាយផ្សេងៗ ដើម្បីប្រែក្លាយកម្ពុជាដែលគេធ្លាប់ស្គាល់ថាជាវាលពិឃាត
មកជាព្រះរាជាណាចក្រនៃវប្បធម៌ ជាតួអង្គមួយដ៏លេចធ្លោនៅលើវេទិកាបេតិកភណ្ឌពិភពលោក។
ដើម្បីឲ្យការថែរក្សាអភិរក្ស
និងអភិវឌ្ឍបេតិកភណ្ឌវប្បធម៌
កាន់តែទទួលបានប្រសិទ្ធផល ឯកឧត្តម បានផ្តល់នូវអនុសាសន៏មួយចំនួន ដោយជំរុញឲ្យធ្វើការបណ្តុះបណ្តាល
និងអភិវឌ្ឍសមត្ថភាពធនធានមនុស្សក្នុងវិស័យវប្បធម៌និងវិចិត្រសិល្បៈ ដោយយកចិត្តទុកដាក់ទាំងបរិមាណ និងគុណភាពនៃការបណ្តុះបណ្តាល
។
ក្រៅពីនេះ
ឯកឧត្តម បានស្នើឲ្យយកចិត្តទុកដាក់បន្តពង្រឹងការគ្រប់គ្រង និងការរៀបចំតំបន់បេតិកភណ្ឌវប្បធម៌ រមណីយដ្ឋានវប្បធម៌និងប្រវត្តិសាស្ត្រឱ្យបានកាន់តែប្រសើរឡើងបន្ថែមទៀត
សំដៅថែរក្សាអភិរក្សនូវមរតកវប្បធម៌ដ៏មានតម្លៃរបស់ជាតិផង
និងប្រែក្លាយជាគោលដៅទេសចរណ៍វប្បធម៌ផង។
ឯកឧត្តមក៏បានជម្រុញឲ្យបន្តយកចិត្តទុកដាក់បង្កើនធនធានមនុស្សសម្រាប់ការគ្រប់គ្រង និងលើកស្ទួយសកម្មភាពវប្បធម៌របស់ជនជាតិភាគតិច និងជនជាតិដើមភាគតិច និងភាពផ្សេងគ្នានៃវប្បធម៌ ជាពិសេសនៅតាមតំបន់ដាច់ស្រយាល។ជំរុញការបង្កើតមជ្ឈមណ្ឌលវប្បធម៌នៅតាមរាជធានី
ខេត្ត ដើម្បីបង្ហាញពីប្រពៃណី ទំនៀមទំលាប់ និងរបៀបរបបរស់នៅរបស់ប្រជាជនខ្មែរ ក៏ដូចជាភាពសម្បូរណ៍បែបនៃវប្បធម៌ខ្មែរ ពិសេសគឺការពង្រីកសកម្មភាពវប្បធម៌នៅតាមវត្តអារាម ដូចជាចំណេះដឹងអំពីល្បែងនិងរបាំប្រជាប្រិយ ប្រពៃណី
និងសកម្មភាពវប្បធម៌នានា ពីព្រោះទីវត្តអារាមបានដើរតួនាទីយ៉ាងសំខាន់នៅក្នុងសង្គមខ្មែរ ជាមជ្ឈមណ្ឌលនៃការផ្សព្វផ្សាយ
និងថែរក្សាអភិរក្សវប្បធម៌របស់ជាតិ តាំងពីយូរលង់ណាស់មកហើយ និងបន្តយកចិត្តទុកដាក់បង្កើនការផលិត
និងការផ្សព្វផ្សាយផលិតផលវប្បធម៌
តាមរយៈការជំរុញការរៀបចំមហោស្រព ការតាំងពិព័រណ៌
និងការបង្ហាញស្នាដៃថ្មីឱ្យបានច្រើន ទាំងកម្រិតជាតិនិងអន្តរជាតិ ដោយខិតខំបង្កើនគុណភាពស្នាដៃ និងផលិតផលសិល្បៈវប្បធម៌ឱ្យកាន់តែមានលក្ខណៈទាក់ទាញ
និងមានគុណភាពប្រកួតប្រជែងខ្លាំងឡើងៗ ក្នុងគោលដៅកាត់បន្ថយការនាំចូលសិល្បៈ និងភាពយន្តបរទេស។
ជាមួយគ្នានេះ ឯកឧត្តមឧបនាយករដ្ឋមន្ត្រី សុខ អាន បានជម្រុញឲ្យបន្តសិក្សាស្រាវជ្រាវអំពីបេតិកភណ្ឌវប្បធម៌ទាំងរូបីនិងអរូបី ដែលកំពុងប្រឈមនឹងការបាត់បង់ ដើម្បីចងក្រងទុកជាឯកសារ
និងពង្រឹងការអនុវត្តច្បាប់ និងបទដ្ឋានគតិយុត្តដែលមានស្រាប់ និងកសាងបទដ្ឋានគតិយុត្តថ្មីដែលចាំបាច់បន្ថែមទៀត
ដើម្បីធានាដល់ការអភិរក្ស និងអភិវឌ្ឍវប្បធម៌ជាតិប្រកបដោយចីរភាព៕
