- ជាផ្ទាំងទឹកកកដ៏ធំបំផុតមួយនៅក្នុងកំណត់ត្រា
- ទំហំស្មើទីក្រុងភ្នំពេញ ៨ដង
- ផ្ទាំងទឹកកកនោះត្រូវគេឲ្យឈ្មោះថា A68
បន្ទាប់ពីការរំពឹងទុកអស់រយៈពេលជាច្រើនខែមក ផ្ទាំងទឹកកកដ៏ធំបំផុតមួយនៅក្នុងកំណត់ត្រា បានបាក់ចេញពីតំបន់ផ្ទាំងទឹកកក Larsen C នៅភាគខាងលិចនៃតំបន់អង់តាកទិចហើយ។
ផ្ទាំងទឹកកកទម្ងន់រហូតដល់រាប់ពាន់លានតោននោះ មានទំហំ ៥ ៨០០ គីឡូម៉ែត្រការ៉េ ស្មើនឹងទំហំទីក្រុងភ្នំពេញ ៨ ដង (៦៧៨,៤៦ គីឡូម៉ែត្រការ៉េ - ទំហំនេះត្រូវបានបញ្ជាក់ដោយសាលារាជធានីភ្នំពេញ)។
វាត្រូវបានគេរកឃើញថា បានបាក់ចេញពីតំបន់ផ្ទាំងទឹកកកខាងលើ បន្ទាប់ពីក្រុមអ្នកវិទ្យាសាស្ត្រ បានត្រួតពិនិត្យមើល ទិន្នន័យផ្កាយរណបចុងក្រោយបង្អស់ពីតំបន់នោះ។ បច្ចុប្បន្ន តំបន់ផ្ទាំងទឹកកក Larsen C ត្រូវបានកាត់បន្ថយទំហំ ១០ ភាគរយ។
ប្រសិនបើផ្ទាំងទឹកកក ដែលបានបាក់ចេញពីតំបន់ខាងលើ ហូរចូលទៅមហាសមុទ្រអង់តាកទិច នោះវាអាចលើកកម្ពស់ទឹក នៅទូទាំងពិភពលោក ប្រមាណជា ១០ សង់ទីម៉ែត្រ។ គួរបញ្ជាក់ថា ផ្ទាំងទឹកកកដែលគេឲ្យឈ្មោះថា A68 នោះ ត្រូវបានព្យាករណ៍ថាជាផ្ទាំងទឹកកកធំបំផុតមួយ ក្នុងចំណោមផ្ទាំងទឹកកកធំបំផុតទាំង ១០ នៅក្នុងកំណត់ត្រា៕
