ឯកឧត្តម វូ ម៉ាវ
(VUMAO) ប្រធានសមាគមមិត្តភាពវៀតណាម-កម្ពុជា
បានមានប្រសាសន៍នារសៀលថ្ងៃទី ២២ ខែ វិច្ឆិកា ឆ្នាំ ២០១១ ថា
ចំពោះប្រជាជនវៀតណាម សម្តេចអគ្គមហាសេនាបតីតេជោ ហ៊ុន សែន ប្រៀបបាននឹងតារា ដែលកំពុងតែរះមានពន្លឺយ៉ាងត្រចះត្រចង់នៅលើផ្ទៃមេឃ។
ឯកឧត្តម វូ ម៉ាវ (VUMAO) មានប្រសាសន៍បែបនេះក្នុងឱកាសចូលជួបសម្តែងការគួរសម ចំពោះ សម្តេចអគ្គមហាសេនាបតីតេជោ ហ៊ុន សែន
នៅវិមានសន្តិភាព នារសៀលថ្ងៃទី ២២ វិច្ឆិកា ឆ្នាំ
២០១១ក្នុងខណៈដែលលោកដឹកនាំគណៈប្រតិភូសមាគមមិត្តភាពវៀតណាម
-កម្ពុជា មកបំពេញទស្សនកិច្ចនៅព្រះរាជាណាចក្រកម្ពុជា។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីបានបានឲ្យដឹងថា នៅក្នុងជំនួប នោះ ឯកឧត្តម វូ ម៉ាវ (VUMAO) បានជំរាបសម្តេចតេជោថា ចំពោះប្រជាជនវៀតណាម សម្តេចអគ្គមហា សេនាបតីតេជោ ហ៊ុន សែន នៅពេលនេះ
គឺ ប្រៀបបាននឹងតារា
ដែលកំពុងតែរះមានពន្លឺយ៉ាងត្រចះត្រចង់នៅលើផ្ទៃមេឃ។ ឯកឧត្តម VU MAO
ថ្លែងថា លោកបានតាមដានយ៉ាងសកម្មនៅលើទំព័រសារព័ត៌មានហើយ
លោកបានឈ្វេងយល់ថា សម្តេចនាយករដ្ឋមន្ត្រី ហ៊ុន សែន
មានកិត្តិស័ព្ទ និង កិត្យានុភាពទាំងនៅក្នុង តំបន់ក៏ដូចជាពិភពលោកដែរ។
ឯកឧត្តម VU MAO បានជម្រាបសម្តេចតេជោអំពី សកម្មភាពរបស់សមាគម
មិត្តភាពវៀតណាម-កម្ពុជា
ដែលក្នុងនោះរួមមានការយកចិត្តទុកដាក់ទៅលើការពង្រឹង និង ពង្រីកមិត្ត
ភាពកិច្ចសហប្រតិបត្តិការដែលមានស្រាប់រវាងប្រទេសទាំង ២
ការជំរុញទាក់ទាញឲ្យយុវជនចូលរួមនៅក្នុងសមាគម
ការសម្រេចចិត្តក្នុងការព្យាបាលភ្នែកជូនប្រជាជនកម្ពុជា
និងជួយឧបត្ថម្ភដល់សិស្ស និងនិស្សិតកម្ពុជា
ដែលកំពុងបន្តការសិក្សានៅប្រទេសវៀតណាម។លោកក៏បានបញ្ចាក់អំពីការ
យកចិត្តទុកដាក់របស់សមាគមទៅលើបញ្ហាវិនយោគទេសចរណ៍ និង
វប្បធម៌ផងដែរ ។
សម្តេចតេជោនាយករដ្ឋមន្ត្រីបាន
ថ្លែងអំណរគុណចំពោះ រដ្ឋាភិបាល និង ប្រជាជនវៀតណាម
ដែលបានយកចិត្តទុកដាក់ជួយប្រជាជនកម្ពុជា
ចាប់ផ្តើមតាំងពីការរំដោះកម្ពុជាចេញពីរបប
ប៉ុលពតរហូតមកដល់ដំណាក់កាលការអភិវឌ្ឍន៍កម្ពុជានាពេលបច្ចុប្បន្ននេះ។ សម្តេចតេជោ
បានមានប្រសាសន៍បន្ថែមថា
តុលាការកាត់ទោសអតីតមេដឹកនាំជាន់ខ្ពស់ខ្មែរក្រហម
គឺជាសច្ចៈធម៌ប្រវត្តិសាស្ត្រដែលវៀតណាមជួយដល់កម្ពុជា។ សម្តេចតេជោ
ក៏បានសម្តែងមោទនភាពទៅលើការរីកចម្រើននៃទំនាក់ទំនងរវាងប្រទេស
ទាំងពីរលើវិស័យសេដ្ឋកិច្ច និង ពាណិជ្ជកម្ម ហើយសម្តេចក៏បានគាំទ្រ និង
ជំរុញឲ្យកាន់តែប្រសើរឡើងនូវទំនាក់ទំនងរវាងរដ្ឋនិងរដ្ឋ
កងទ័ពនិងកងទ័ព ស្ថាប័ននិងស្ថាប័ន សមាគមនិងសមាគម យុវជនកូនសិស្ស
និស្សិតក៏ដូចជាវិស័យកីឡា
ជាពិសេសជម្រុញឲ្យមានទំនាក់ទំនងកាន់តែល្អប្រសើរឡើងថែមទៀតរវាងខេត្ត
និងខេត្តនៃប្រទេសទាំងពីរ៕