នៅពហុកីឡាដ្ឋានជាតិអូឡាំពិកនាព្រឹកថ្ងៃទី
២៩ ខែ វិច្ឆិកា ឆ្នាំ ២០១១ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី
បានអញ្ជើញជាអធិបតីក្នុងពិធីសច្ចាប្រណិធាន និងបំពាក់កន្សែងជូននវកាយរឹទ្ធិជាតិកម្ពុជារាជធានីភ្នំពេញលើកទី២ចំនួនជាង
១៣០០០ នាក់។
ឯកឧត្តម កែប ជុតិមា
អភិបាលនៃគណៈអភិបាលរាជធានីភ្នំពេញ បានមានប្រសាសន៍ថ្លែងអំណរគុណចំពោះឯកឧត្តមបណ្ឌិតសភាចារ្យ
សុខ អាន ដែលជានិច្ចកាលតែងយកចិត្តទុកដាក់ជួយឧបត្ថម្ភទាំងថវិកា
និងស្មារតី ពិសេសការរៀបចំផ្តល់គ្រឿងឥស្សរិយយស
ដល់សមាជិកកាយរឹទ្ធិជាតិកម្ពុជារាជធានីភ្នំពេញ ពិសេសចូលរួមរៀបចំពិធីបំពាក់កន្សែងជាលើកទី២
ជូនដល់កាយរឹទ្ធិមកពីទីស្តីការគណៈរដ្ឋមន្រ្តី សាលារាជធានីភ្នំពេញ
ក្រសួងសេដ្ឋកិច្ច និងហិរញ្ញវត្ថុ និងមន្ទីរអប់រំយុវជន និងកីឡា
រាជធានីភ្នំពេញ សរុបចំនួន ១៣១៣៨ នាក់ ដែលធ្វើឆ្នាំសិក្សា ២០១០-២០១១ នេះសមាជិកកាយរឹទ្ធិទូទាំងរាជធានីភ្នំពេញបានកើនដល់ចំនួន
១៨៩៣៣ នាក់ ក្នុងនោះមានកាយរឹទ្ធិស្រី ចំនួន ៨៩០៤ នាក់។ សមាជិកកាយរឹទ្ធិជាតិកម្ពុជារាជធានីភ្នំពេញ
បានចូលរួមសកម្មភាពសង្គមជាច្រើន ដូចជាជួយរៀបចំសណ្តាប់ធ្នាប់
និងផ្សព្វផ្សាយច្បាប់ចរាចរណ៍ និងជួយធ្វើការងារសង្គមនៅតាមសាលារៀនវត្តអារាមក្នុងរាជធានីភ្នំពេញ
ក្រោយពេលទឹកជំនន់បានស្រកចុះ។
ថ្លែងនៅក្នុងពិធីសច្ចាប្រណិធានបំពាក់កន្សែងជូននវកាយរឹទ្ធិជាតិកម្ពុជារាជធានីភ្នំពេញ
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ថា
ពិធីសច្ចាប្រណិធាន
និងបំពាក់កន្សែងនាពេលនេះមានអត្ថន័យយ៉ាងជ្រាលជ្រៅសម្រាប់លើកទឹកចិត្តក្មួយៗ
ជាសជិកសមាជិការកាយរឹទ្ធិជាតិកម្ពុជារាជធានីភ្នំពេញ
ឲ្យខិតខំប្រព្រឹត្តតែអំពើល្អ និងបង្កើនការអប់រំខ្លួនឯង
ដើម្បីរួមចំណែកលើកកម្ពស់កិត្យានុភាពរបស់ កាយរឹទ្ធិជាតិកម្ពុជាឲ្យកាន់តែល្បីរន្ទឺថែមទៀត។
ជាមួយនឹងការនាំមកនូវការផ្តាំផ្ញើសួរសុខទុកពីសម្តេចអគ្គមហាសេនាបតីតេជោ ហ៊ុន សែន
និងលោកជំទាវ កិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា
និងជាគរុគណនៃកាយរឹទ្ធិជាតិកម្ពុជាក៏ដូចជាកោតសរសើរ
និងថ្លែងអំណរគុណចំពោះឯកឧត្តម កែប
ជុតិមា ដែលបានរួមចំណែកទាំងធនធាន និងកម្លាំងកាយកសាង និងអភិវឌ្ឍន៍
កាយរឹទ្ធិជាតិកម្ពុជារាជធានីភ្នំពេញ ឯកឧត្តមបណ្ឌិតសភាចារ្យ សុខ អាន ដែលជាប្រធានកាយរឹទ្ធិជាតិកម្ពុជាផងដែរ
បានមានប្រសាសន៍ឲ្យដឹងថា សម្តេចតេជោ
ក្នុងនាមប្រមុខរាជរដ្ឋាភិបាលកម្ពុជា បានដាក់ចេញនូវគោលនយោបាយ
និងវិធានការ ដើម្បីទប់ស្កាត់នូវរាល់ទង្វើអសកម្មនានានៅក្នុងសង្គម
មានដូចជា ការសេពគ្រឿងញៀន គ្រឿងស្រវឹង ការលេងល្បែងស៊ីសង សកម្មភាពក្មេងទំនើង
និងសកម្មភាពចោរកម្មជាដើម។ នៅក្នុងឆ្នាំ ២០១១ នេះ រាជរដ្ឋាភិបាលបានអនុម័តគោលនយោបាយជាតិស្តីពីការអភិវឌ្ឍន៍យុវជនកម្ពុជា
ដើម្បីប្រមូលផ្តុំកម្លាំងពីក្រសួងស្ថាប័ន គ្រឹះស្ថានសាធារណៈ ផ្នែកឯកជន
អង្គការសង្គមស៊ីវិល និងអង្គការអន្តរជាតិនានា ឲ្យយកចិត្តទុកដាក់
លើកកម្ពស់ដល់ការអភិវឌ្ឍន៍យុវជន ដើម្បីឲ្យយុវជនគ្រប់ៗរូបទទួលបាននូវការបណ្តុះបណ្តាល
ទាំងសមត្ថភាព និងជំនាញសំដៅរួមចំណែកដល់ដំណើរការអភិវឌ្ឍន៍ប្រទេសជាតិ។
ទន្ទឹមគ្នានឹងការផ្តល់អនុសាសន៍ស្តីពីការពង្រឹង
និងអភិវឌ្ឍន៍កាយរឹទ្ធិជាតិកម្ពុជាឯកឧត្តមបណ្ឌិតសភាចារ្យ សុខ អាន ក៏បានអំពាវនាវដល់ឯកឧត្តម
លោកជំទាវ និងភ្ញៀវកិត្តិយលដែលចូលរួម ក៏ដូចជាសប្បុរសជននានាសូមឲ្យរួមគ្នាបង្កើនដល់ការពង្រឹង
និងពង្រីកចលនាកាយរឹទ្ធិជាតិកម្ពុជាឲ្យបានកាន់តែខ្លាំងក្លាជាងនេះថែមទៀត
ឲ្យសក្តិសមជាសមាជិកអង្គការពីភពលោកនៃចលនាកាយរឹទ្ធិ ដើម្បីជាការឆ្លើយតបទៅនឹងគុណូបការៈរបស់សម្តេចតេជោនាយករដ្ឋមន្រ្តី និងលោកជំទាវ
ដែលជាគរុគណនៃកាយរឹទ្ធិជាតិកម្ពុជាផងដែរ៕