សេចក្តីថ្លែងការណ៍
អ្នកនាំពាក្យក្រសួងការពារជាតិ នៃព្រះរាជាណាចក្រកម្ពុជា
- អ្នកនាំពាក្យក្រសួងការពារជាតិ ព្រះរាជាណាចក្រកម្ពុជា សូមធ្វើការ បំភ្លឺលើព័ត៌មានបំភ្លើស ដែលចុះផ្សាយក្នុងគេហទំព័រ ក្រុងថេបធុរកិច្ច នៅវេលាម៉ោង ២១:៥៧នាទី ថ្ងៃទី២១ ខែធ្នូ ឆ្នាំ២០១១ ដែលថា ក្រុមការងាររួមបង្កើតឡើងដោយគណៈកម្មាធិការព្រំដែនទូទៅ (GBC) “ នឹងមានការពិចារណា រឿងការ ដកសហគមន៍កម្ពុជា ចេញពីវត្តកែវសិក្ខាគីរីស្វារៈ ” ។
ដោយឡែកប្រភពសារព័ត៌មានបាងកកប៉ុស្តិ៍ ដែលផ្សាយវេលាម៉ោង ១២:០០នាទី ថ្ងៃទី២២
ខែធ្នូ ឆ្នាំ២០១១ បាននិយាយថា “ លោកឧត្តមសេនីយ៍ យុទ្ធស័ក្ត សាស៊ីប្រាផា
រដ្ឋមន្រ្តីក្រសួង ការពារជាតិ រាជាណាចក្រថៃឡងដ៏ បាននិយាយថា
ក្រុមការងាររួម Joint Working Group (JWG )
អាចនឹងជួបប្រជុំគ្នានៅទីក្រុងបាងកកនាខែក្រោយ ដើម្បីពិភាក្សាពិស្តារ
ពីការដកកងទ័ព ការដាក់ ពង្រាយអ្នកសង្កេតការណ៍
ការរៀបចំទីតាំងផ្សារកម្ពុជានៅកន្លែងថ្មី និងតាំងទីលំនៅថ្មីឲ្យសហគមន៍
កម្ពុជាចេញពីវត្តកែវសិក្ខាគីរីស្វារៈ ” ។
- អ្នកនាំពាក្យក្រសួងការពារជាតិ ព្រះរាជាណាចក្រកម្ពុជា សូមបញ្ជាក់ថា កិច្ចប្រជុំរបស់ គណៈកម្មាធិការព្រំដែនទូទៅ កម្ពុជា-ថៃ (GBC) លើកទី៨ ដែលបានប្រព្រឹត្តទៅ នៅរាជធានីភ្នំពេញ ថ្ងៃទី២១ ខែធ្នូ ឆ្នាំ២០១១នោះ ភាគីទាំងពីរ បានឯកភាពៈ
-អនុវត្តសាលដីកាបង្គាប់របស់តុលាការអន្តរជាតិ
(ICJ) ថ្ងៃទី១៨ ខែកក្កដា ឆ្នាំ២០១១ ស្តីពីវិធានការបណ្តោះអាសន្ន
ឲ្យមានតម្លាភាព ស្មើភាព និងមានភាពទៀតទាត់។
-សម្រេចបង្កើតក្រុមការររួម
Joint Working Group (JWG) ដែលក្រុមការងាររួមនេះ
នឹងធ្វើការពិភាក្សាតែលើបញ្ហាទាក់ទង ទៅនឹងការអនុវត្តន៍សាលដីកាបង្គាប់
របស់តុលាការយុត្តិធម៌ អន្តរជាតិ (ICJ)
នៅក្នុងតំបន់គ្មានកងទ័ពបណ្តោះអាសន្ន (PDZ)
ព្រមទាំងធ្វើការកែសម្រួលបុគ្គលិក យោធាចេញពីតំបន់គ្មានយោធាបណ្តោះអាសន្ន
(PDZ) ឲ្យបានឆាប់បំផុត ស្របពេលជាមួយគ្នា ប្រកប
ដោយតម្លាភាពស្ថិតក្រោមការត្រួតពិនិត្យ ក្រុមអ្នកសង្កេតការណ៍កម្ពុជា ថៃ
ឥណ្ឌូនេស៊ីតែប៉ុណ្ណោះ។
- អ្នកនាំពាក្យក្រសួងការពារជាតិ ព្រះរាជាណាចក្រកម្ពុជា សូមគាំទ្រយ៉ាងពេញទំហឹង ចំពោះ លទ្ធផលនៃកិច្ចប្រជុំគណៈកម្មាធិការព្រំដែនទូទៅ កម្ពុជា-ថៃ (GBC) លើកទី៨ ហើយសូមច្រានចោល នូវព័ត៌មានទាំងឡាយណាដែលផ្ទុយពីសេចក្តីថ្លែងការណ៍រួម នៃកិច្ចប្រជុំខាងលើ។
រាជធានីភ្នំពេញ,ថ្ងៃទី២២ ខែធ្នូ ឆ្នាំ២០១១