សម្តេចអគ្គមហាសេនាបតីតេជោ
ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាមានប្រសាសន៍នាថ្ងៃទី
២២ ខែធ្នូ ឆ្នាំ ២០១១ អំពីបំណងចង់ឲ្យលេខាធិការដ្ឋានអាស៊ាន និង អគ្គលេខាធិការអាស៊ានមានតួនាទីកាន់តែធំឡើងៗ
ដើម្បីជាផលប្រយោជន៍របស់អាស៊ាន។ សម្តេចតេជោ
មានប្រសាសន៍បែបនេះក្នុងឱកាសទទួលជួបសវនាការជាមួយលោក SURIN PITSUWAN
អគ្គលេខាធិការអាស៊ាន នៅវិមានសន្តិភាពរាជធានីភ្នំពេញ ។ សម្តេចតេជោនាយករដ្ឋមន្រ្តី បានផ្តល់អនុសាសន៍ឲ្យពង្រឹងតួនាទីរបស់លេខាធិការដ្ឋាននិង
អគ្គលេខាធិការអាស៊ាន និង បានស្នើឲ្យលោក SURIN PITSUWAN
នូវរៀបចំឯកសារពាក់ព័ន្ធនឹងតួនាទីរបស់លេខាធិការដ្នាន និង អគ្គលេខាធិការយកមកពិភាក្សា
ដើម្បីធ្វើយ៉ាងណាសម្រេចឲ្យមានតួនាទីកាន់តែធំឡើងនោះ។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីថា
នៅក្នុងជំនួប សំដែងការគួរសមនោះលោក SURIN PITSUWAN
អគ្គលេខាធិការអាស៊ានបានជំរាបជូនសម្តេចតេជោនាយករដ្ឋមន្ត្រីអំពីកិច្ចពិភាក្សាប្រកបដោយផ្លែផ្ការវាងរូបលោកជាមួយឯកឧត្តមឧបនាយករដ្ឋមន្ត្រី
ហោ ណាំហុង រដ្ឋមន្ត្រីក្រសួងការបរទេស
និង កិច្ចសហប្រតិបត្តិការអន្តរជាតិ កាលពីព្រឹកថ្ងៃទី ២២ ធ្នូ ឆ្នាំ
២០១១នេះផងដែរ។
លោក SURIN PITSUWAN បានជំំរាបជូនសម្តេចតេជោនាយករដ្ឋមន្ត្រីថា
ដៃគូសន្ទនារបស់ អាស៊ានបានសំដែងនូវការយកចិត្តទុកដាក់ និង
ការរីករាយយ៉ាងខ្លាំង និង បានសន្យានឹងជួយកម្ពុជា
នូវគ្រប់មធ្យោបាយទាំងអស់នៅពេលដែលកម្ពុជាធ្វើជាប្រធានអាស៊ាននៅឆ្នាំ ២០១២
ខាងមុខនេះ។ នៅក្នុងជំនួបនោះលោក SURIN PITSUWAN
បានគោរពសុំទស្សនៈអំពីសម្តេចប្រមុខរាជរដ្ឋាភិបាលកម្ពុជា
អំពីតួនាទីនៃលេខាធិការដ្ឋាន និង អគ្គលេខាធិការអាស៊ាន ដែលសម្តេចតេជោចង់បាននៅពេលដែលកម្ពុជាធ្វើជាប្រធានអាស៊ាន។