ឯកឧត្តម FAZA L_UK RAMAN KAZI
ឯកអគ្គរដ្ឋទូតថ្មីប្រទេសប៉ាគីស្ថានប្រចាំនៅព្រះរាជាជាចក្រកម្ពុជាបាន
ថ្លែងនាថ្ងៃទី ៥ ខែ ធ្នូ ឆ្នាំ ២០១១ នៅវិមានសន្តិភាពថា
ប្រទេសប៉ាគីស្ថានមានការរីករាយយ៉ាងខ្លាំងចំពោះទំនាក់ទំនងរវាងប៉ាគីស្ថាន
ជាមួយព្រះរាជាណាចក្រកម្ពុជា ហើយឯកឧត្តម FAZA L_UK RAMAN KAZI បានគូសបញ្ជាក់ថា
បេសកកម្មការទូតរបស់លោកនៅពេលនេះលោកនឹង ធ្វើយ៉ាងណាឲ្យទំនាក់ទំនងនេះកាន់តែមានភាពល្អប្រសើររឹងមាំថែមទៀត
ជាពិសេសជំរុញកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម
វប្បធម៌ ព្រមទាំងជួយដល់ការបណ្តុះបណ្តាលធនធានមនុស្សរបស់កម្ពុជាផងដែរ។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីឲ្យដឹងថា
នៅក្នុង ឱកាសចូលជួបសម្តែងការគួរសម ជាមួយសម្តេចអគ្គមហាសេនាបតីតេជោ ហ៊ុន សែន ជាលើកដំបូង ឯកឧត្តមឯកអគ្គរដ្ឋទូតថ្មី
នៃប្រទេសប៉ាគីស្ថានបានពាំនាំនូវការផ្តាំផ្ញើសាកសួរសុខទុក្ខពីសំណាក់ថ្នាក់នាំកំពូលរបស់ប្រទេសប៉ាគីស្ថាន
ជូនចំពោះសម្តេចតេជោនាយករដ្ឋមន្ត្រី និង បានអបអរសាទរផងដែរចំពោះរាជរដ្ឋាភិបាលកម្ពុជា
ដែលបានទទួលធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ាននៅឆ្នាំ ២០១២
ខាងមុខ នេះ។
សម្តេចតេជោនាយករដ្ឋមន្រ្តីបានថ្លែងអំណរគុណចំពោះ ឯកឧត្តម
FAZA L_UK RAMAN KAZI
ដែលបានពាំនាំការផ្តាំផ្ញើសាកសួរសុខទុក្ខរបស់ថ្នាក់ដឹកនាំប៉ាគីស្ថាន និង
បានអបអរចំពោះឯកឧត្តម FAZA L_UK RAMAN KAZI ដែលត្រូវបានតែងតាំងជាឯកអគ្គរដ្ឋទូតប៉ាគីស្ថានប្រចាំនៅកម្ពុជា។
សម្តេចតេជោក៏បានមានប្រសាសន៍ជម្រុញឲ្យឯកអគ្គរដ្ឋទូតថ្មី
នៃប្រទេសប៉ាគីស្ថានពិនិត្យមើលចំណុចដទៃផ្សេងទៀតលើអ្វីដែល ឯកឧត្តម FAZA
L_UK RAMAN KAZI បានលើកឡើង ដើម្បីធ្វើយ៉ាងណាជំរុញកិច្ចសហប្រតិបត្តិការរវាងប្រទេស
ទាំងពីរកម្ពុជា-ប៉ាគីស្ថានឲ្យកាន់តែស៊ីជំរៅ ហើយជាងនេះទៀតគប្បីធ្វើការឲ្យបានជិតស្និទ្ធិជាមួយនឹងមន្ត្រីកម្ពុជាគ្រប់
លំដាប់ថ្នាក់ទាំងអស់ក្នុងការលើកស្ទួយ និង ជំរុញកិច្ចសហប្រតិបត្តិការលើវិស័យដទៃទៀតផងដែរ៕