ដោយងប់ងុលនឹងនយោបាយប្រឆាំងផ្កាប់មុខ លាយឡំនិងគំនុំផ្ទាល់ខ្លួន
បានធ្វើឲ្យគណបក្សប្រឆាំងបាត់អស់នូវមនសិការជាតិសតិសម្បជញ្ញៈ សីលធម៌
ក្នុងភាពជាអ្នកនយោបាយ និងត្រូវបានចំណង់ពាលា នៃការកញ្រ្ជោល
និងភាពចង់បានជ័យជំនះ ហួសប្រមាណ ដោយមិនខ្វល់ពីបុណ្យ និងបាបសោះឡើយ។
ភាពអស់សង្ឃឹមក្នុងស្ថានភាពត្រដរខ្យល់ ខាងនយោបាយ ដែលពុំអាចស្រោចស្រង់បាន
របស់គណបក្សប្រឆាំងខណៈពេលរដូវកាល នៃយុទ្ធនាការឃោសនាបោះឆ្នោត បាន
និងកំពុងតែរង្កិលខ្លួនបន្តិចម្តងៗ ខិតកាន់តែជិតចូលមកដល់។
អ្វីដែលគេកំពុងតែមើលឃើញ គឺគណបក្សប្រឆាំង បានរិះរកគ្រប់កលល្បិច
នៃយុទ្ធសាស្ត្រនយោបាយថ្មីៗ ដែលនឹកស្មានពុំដល់
ដើម្បីជាការទាក់ទាញចំណាប់អារម្មណ៍ពីមជ្ឈដ្ឋានជាតិ និងអន្តរជាតិ
ក្នុងបំណងស្តាឡើងវិញនូវប្រជាប្រិយភាព
ដែលកំពុងដុនដាបបាត់បង់អស់ស្ទើតែគ្មានសល់។
តើយុទ្ធសាស្ត្រនយោបាយថ្មី ដែលគណបក្សប្រឆាំងបានប្រឌិត និងតាក់តែងឡើងនោះ
គឺជាយុទ្ធសាស្ត្របែបណា? តើវាបានផ្តល់ផលប្រយោជន៍អ្វីខ្លះ
សម្រាប់គណបក្សនេះ?
បើតាមក្រុមវាយតម្លៃនៃស្ថានការណ៍នយោបាយ នៅកម្ពុជាយល់ឃើញថា៖
បក្សប្រឆាំងមាននូវកម្មវិធីនយោបាយថ្មី ក៏ប៉ុន្តែ ការអនុវត្តជាក់ស្តែង
គឺតាមរបៀបចាស់ ដែលធ្លាប់មានជារឿយៗ ។
ស្តែងឡើងតាមរយៈការធ្វើយុទ្ធនាការឃោសនា ជាអកុសលកន្លងមក ពោល
គឺគណបក្សប្រឆាំងនេះ តែងតែធ្វើការញុះញុងបោកបញ្ឆោត បំភ្លៃការពិត
ប្រឌិតព្រឹត្តិការណ៍ ដើម្បីទំលាក់បញ្ហា ឲ្យគណបក្សប្រជាជន
ក៏ដូចជារដ្ឋាភិបាល តាមអ្វីដែលជាផែនការអាក្រក់ ដែលគេហៅថា លាបពណ៌
បំភ័នការពិត ដើម្បីជ័យជំនះ ស្អីគេនោះ។
ជាក់ស្តែងក្នុងពេលថ្មីៗនេះ ជុំវិញការស្លាប់របស់ស្ត្រីម្នាក់
ដែលរស់នៅតំបន់បឹងកក់ ឈ្មោះ ជា តារា កាលពីថ្ងៃទី ២២ ខែវិច្ឆិកា ឆ្នាំ ២០១១
កន្លងទៅនេះ គណបក្សប្រឆាំង រួមជាមួយសង្គមស៊ីវិល
ដែលមាននិន្នាការប្រឆាំង
មួយចំនួនបានយកព័ត៌មាននៃការស្លាប់របស់ស្ត្រីម្នាក់នេះ
ដើម្បីធ្វើអាជីវកម្មនយោបាយ ក្នុងចេតនាទាក់ទាញការគាំទ្រ ដោយបំភ័ន
បំផ្លើសពីការពិត នៃព្រិត្តិការ និងទម្លាក់បញ្ហាលើអាជ្ញាធរមូលដ្ឋាន
ក៏ដូចជា រដ្ឋាភិបាលថា ខកខានមិនបានដោះស្រាយជម្លោះនៅតំបន់បឹងកក់
ដែលជាដើមហេតុធ្វើឲ្យ លោកស្រី ជា ដារា បានស្លាប់នេះទៅវិញ។
ក៏ប៉ុន្តែ ភាពយុត្តិធម៌ និងសច្ចៈភាព ត្រូវបានផ្តល់ជូនរាជរដ្ឋាភិបាល
ក៏ដូចជា អាជ្ញាធរមូលដ្ឋាន
ស្តែងឡើងតាមរយៈការចេញមកធ្វើសន្និសីទសារព័ត៌មានរបស់ លោក ឌឿង ភូ
ដែលជាប្តីរបស់ លោកស្រី ជា តារា កាលពីថ្ងៃទី ២៩ ខែវិច្ឆិកា កន្លងទៅនេះ
ក្នុងប៉ុស្តិ៍នគរបាលរដ្ឋបាលស្រះចក ដែលក្នុងឱកាសនោះ លោក ភូ
បានបញ្ជាក់យ៉ាងច្បាស់ថា «ការស្លាប់របស់ប្រពន្ធគាត់ គឺមិនពាក់ព័ន្ធនឹងរឿងបឹងកក់នោះទេ» ។
ការបដិសេធដាច់អហង្ការរបស់ លោក ឌឿង ភូ សមល្មម
និងពញ្ញាក់ស្មារតីដល់ក្រុមប្រឆាំងទាំងអស់ ល្មមបញ្ឈប់ នូវសកម្មភាព
មួលព័ត៌មាន បំភ្លៃការពិតបែបនេះទៀត ព្រោះសកម្មភាពនេះ
វាមិនបានហុចផលចំណេញខាងនយោបាយអ្វីសម្រាប់ពួកគេទេ។ ប៉ុន្តែ
ផ្ទុយមកវិញពួកនេះ បានត្រឹមទទួលនូវការប្រមាថមាក់ងាយ ពីប្រជាពលរដ្ឋទូទៅ
ដែលស្នេហាយុត្តិធម៌ ស្រលាញ់ការពិតថា ជាមនុស្សមិនស្គាល់បុណ្យ មិនស្គាល់បាប
សូម្បីតែ មនុស្ស ដែលស្លាប់ទៅហើយ
ក៏ពួកគេយកទៅធ្វើអាជីវកម្មនយោបាយដែរ។
ជាការពិតណាស់ សម្តេចនាយករដ្ឋមន្ត្រី ហ៊ុន សែន បានចុះហត្ថលេខា
លើអនុក្រិត្យចុះថ្ងៃទី ១១ ខែសីហា ដើម្បីធ្វើប្រទានកម្មប្រគល់ដីទំហំ ១២.៤៤ ហិកតា ដល់អ្នកភូមិបឹងកក់ប្រមាណ ១.០០០ គ្រួសារ ដែលកំពុងរស់នៅក្នុងសហគមន៍បឹងកក់ សម្រាប់សាងសង់ផ្ទះសម្បែង តបតាមគម្រោងអភិវឌ្ឍនៅនឹងកន្លែង។
ការធ្វើប្រទានកម្មរបស់សម្តេច កន្លងមកក៏ត្រូវបានទទួលនូវការស្វាគមន៍
ពីធនាគារពិភពលោក អង្គការមិនមែនរដ្ឋាភិបាល
និងអ្នកភូមបឹងកក់ជាច្រើនគ្រួសារ។
លោកស្រី អាណិត ឌិកសុន (Annette Dixon)
អ្នកគ្រប់គ្រងធនាគាពិភពលោកប្រចាំកម្ពុជាបានបញ្ជាក់
ក្នុងសារអេឡិចត្រូនិចថា នេះជាការវិវត្តន៍វិជ្ជមាន ហើយសង្ឃឹមថា
នឹងនាំទៅរកលទ្ធផលដ៏ល្អសម្រាប់ប្រជាពលរដ្ឋ នៅតំបន់បឹងកក់។
សរុបមក ហេតុផលអម្បាលមាន ដែលបានអត្ថាធិប្បាយខាងលើ
គឺសមល្មមបញ្ចាក់ពីការពិត ជុំវិញការធ្វើអត្តឃាតរបស់ស្ត្រី
ដែលរស់នៅតំបន់បឹងកក់ មិនមែនមកពីវិបត្តិដីធ្លីនៅបឹងកក់នោះឡើយ
វាជាបញ្ហាផ្ទាល់ខ្លួនរបស់អ្នកស្រីជា ដារា
ដូច្នេះការស្លាប់នេះបានបង្ហាញអំពីសណ្ដានអគតិរបស់បក្សប្រឆាំងនៅ
កម្ពុជា ដែលប៉ុនប៉ងយកសាកសព ដើម្បីធ្វើនយោបាយ ប៉ុន្តែ កលល្បិចនេះ
គ្មាននណាម្នាក់លង់ជឿតាមការបោកបញ្ឆោត ប្រជាភិថុតិ
ដ៏គ្មានអំណោយទាន អសីលធម៌បែបនេះទៀតនោះទេ៕
ដោយ ឧត្តម សក្តិ