ក្នុងឱកាសអនុញ្ញាតឲ្យឯកឧត្តម ស៊ូរ៉ាពង់ តូវីចាក់ឆៃគុល (SURAPONG TOVICHAK CHAIKUL)
រដ្ឋមន្រ្តីក្រសួងការបរទេសថៃ ចូលជួបសំដែងការគួរសម នាថ្ងៃទី២៩ ខែធ្នូ
ឆ្នាំ ២០១១ នៅវិមានសន្តិភាពក្នុងរាជធានីភ្នំពេញ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា
បានជំរុញឲ្យប្រទេសទាំងពីរបន្តកិច្ចសហប្រតិបត្តិការល្អជាមួយគ្នាដោយសម្តេចមានប្រសាសន៍ថា
កម្ពុជា និងថៃប្រៀបដូចជា អណ្តាត និងធ្មេញ ដែលគេមិនអាចដកអណ្តាតទុកធ្មេញ ឬដកធ្មេញ
ទុកអណ្តាតនោះឡើយ ។
សម្តេចតេជោនាយករដ្ឋមន្រ្តីមានប្រសាសន៍ថា លោកបានធ្វើការជាមួយនាយករដ្ឋមន្រ្តីថៃចំនួន
១១ ហើយរាប់ទាំងលោកជំទាវ យីងឡាក់
ស៊ីណាវ៉ាត់ត្រា ផងនោះ ដូច្នេះអ្វីៗដែលប្រទេសទាំងពីរមានកន្លងមកនោះគឺត្រូវបន្តអនុវត្តដូចជាការធ្វើអាជីវកម្មនៅក្នុងតំបន់ត្រួតស៊ីគ្នាក្នុងសមុទ្រជាដើម។
បើយើងរង់ចាំដោះស្រាយបញ្ហាព្រំដែនឲ្យចប់សព្វគ្រប់គឺត្រូវរង់ចាំ២០០ឆ្នាំទៀត
មិនដឹងថាចប់ឬមិនចប់ផង ដូច្នេះនៅពេល ដែលយើងត្រូវការថាមពល ត្រូវការឧស្ម័នដែលចាំបាច់យើងគួរតែពិនិត្យមើល
ហើយអ្វីដែលជាសក្តានុពលរបស់ប្រទេសយើងទាំងពីរ យើងត្រូវតែរួមគ្នាអភិវឌ្ឍន៍។
ឯកឧត្តម ស្រ៊ី ថាមរុង្គ រដ្ឋមន្រ្តីប្រតិភូអមនាយករដ្ឋមន្រ្តីឲ្យដឹងថា
នៅក្នុងជំនួប នោះ សម្តេចតេជោបានហៅដំណើរទស្សនកិច្ចរបស់
ឯកឧត្តម ស៊ូរ៉ាពង់
តូវីចាក់ឆៃគុល (SURAPONG
TOVICHAK CHAIKUL) ក៏ដូចជាដំណើរទស្សនកិច្ចរបស់រដ្ឋមន្រ្តីក្រសួង ថាមពលថៃនៅកម្ពុជាថា
ទស្សនកិច្ចនេះនឹងពង្រឹងថែមទៀតនូវទំនាក់ទំនងរវាងប្រទេសទាំងពីរ ដែលបានប្រែមកជាល្អនៅក្នុងរយៈពេលប៉ុន្មានខែកន្លងមកនេះ
បន្ទាប់ពីគណបក្សភឿថៃ បានឈ្នះឆ្នោត។
ឯកឧត្តម ស៊ូរ៉ាពង់ តូវីចាក់ឆៃគុល (SURAPONG
TOVICHAK CHAIKUL) បានថ្លែងអំណរគុណជូនចំពោះ សម្តេចតេជោនាយករដ្ឋមន្រ្តី
ដែលបានផ្តល់ឱកាសឲ្យឯកឧត្តមដឹកនាំគណៈប្រតិភូក្រសួងការបរទេសថៃជួបសំដែងការគួរសម។
ឯកឧត្តមរដ្ឋមន្រ្តីក្រសួងការបរទេសថៃ ក៏បានពាំនាំនូវការផ្តាំសាកសួរសុខទុក្ខពីសំណាក់លោកជំទាវនាយករដ្ឋមន្រ្តីថៃ
ជូនចំពោះសម្តេចតេជោ ហើយបានអះអាងអំពីការផ្តោតការយកចិត្តទុកដាក់ក្នុងការបើកនូវទំព័រសករាជថ្មីមួយ
សម្រាប់ទំនាក់ទំនងរវាងប្រទេសទាំងពីរ និងបានប្តេជ្ញានឹងជំរុញទំនាក់ទំនងខាងវិស័យពាណិជ្ជកម្ម
វិនិយោគទេសចរណ៍ និងវិស័យផ្សេងៗទៀតផងដែរ។
ឯកឧត្តមរដ្ឋមន្រ្តីក្រសួងការបរទេសថៃមានប្រសាសន៍ថា
ប្រទេសថៃតែងតែចង់បានសន្តិភាពស្ថិតស្ថេរ ការរីកចំរើន ការអភិវឌ្ឍ និងការរស់នៅប្រកបដោយសុខដុមរមនាជាមួយកម្ពុជា
ក៏ដូចជានៅក្នុងតំបន់ផងដែរ ។
ឯកឧត្តម ស៊ូរ៉ាពង់ តូវីចាក់ឆៃគុល (SURAPONG
TOVICHAK CHAIKUL) ក៏បានសំដែងនូវការរីករាយចំពោះជោគជ័យនៃកិច្ចប្រជុំគណៈកម្មាធិការព្រំដែនទូទៅ
ដែលបានប្រព្រឹត្តទៅកាលពីថ្ងៃទី១៩ ដល់ថ្ងៃទី២១ ធ្នូ ឆ្នាំ ២០១១ កន្លងមកហើយ
ភាគីថៃនឹងជំរុញកិច្ចសហប្រតិបត្តិការ ដើម្បីកាត់បន្ថយភាពក្រីក្រ ក៏ដូចជាជំរុញ
កំណើនសេដ្ឋកិច្ច ជំរុញទំនាក់ទំនងរវាងប្រជាជន និងប្រជាជនព្រមទាំងត្រៀម
នឹងគាំទ្រកម្ពុជានៅក្នុងវិស័យសិក្សាធិការ វិស័យហេដ្ឋារចនាសម័្ពន្ធ សុខភាព
សាធារណៈ ការទប់ស្កាត់ការរាលដាលជំងឺឆ្លង។ ឯកឧត្តមរដ្ឋមន្រ្តីក្រសួងការបរទេសថៃបានកោតសរសើរ
ចំពោះសុន្ទរកថា របស់សម្តេចតេជោនៅក្នុងពិធីបើកសម្ពោធផ្លូវនៅខេត្តព្រះវិហារ
ដែលបានលើកឡើងអំពីជនជាតិខ្មែរ ដែលបានទៅកាប់ឈើនៅក្នុងទឹកដីថៃ ក៏ដូចជាឡាវ
ដែលបានបង្ហាញពីកិច្ចសហប្រតិបត្តិការរវាងប្រទេសទាំងពីរ ដើម្បីទប់ស្កាត់បទល្មើសនេះ
។
ឯកឧត្តម ស្រ៊ី ថាមរុង្គ បានឲ្យដឹងថា សម្តេចតេជោ
បានអបអរចំពោះកិច្ចប្រជុំរបស់គណៈ កម្មាធិការព្រំដែនទូទៅនាពេលកន្លងមក និងបានបង្ហាញនូវក្តីសង្ឃឹមថា
កិច្ចប្រជុំរបស់គណៈកម្មការ ចម្រុះព្រំដែនលើកទី ៨ ដែលដឹកនាំដោយរដ្ឋមន្រ្តីការបរទេសទាំងពីរនៅចុងខែកុម្ភះ
និងដើមខែមីនានឹងទទួលបានជោគជ័យជាមិនខាន ។
សម្តេចតេជោបានផ្តល់អនុសាសន៍ថា គម្រោងទាំងឡាយដែលមាន
ពីមុនមកគឺត្រូវតែរៀបចំពិនិត្យ ដើម្បីបន្តយន្តការទាំងអស់នេះជាបន្តទៀត។