ថ្លែងក្នុងសន្និសីទកាសែតដែលប្រារព្ធនៅទីស្តីការគណៈរដ្ឋមន្រ្តី
វេលាថ្ងៃត្រង់ ទី ១៦ ខែ មករា ឆ្នាំ ២០១២ ឯកឧត្តម កែវ រ៉េមី រដ្ឋលេខាធិការទីស្តីការគណៈរដ្ឋមន្រ្តី
និងជាអនុប្រធានអង្គភាពព័ត៌មាន និងប្រតិកម្មរហ័ស បានអះអាងថា
រាជរដ្ឋាភិបាលកម្ពុជា ជាពិសេសសម្តេចអគ្គមហាសេនាបតីតេជោ
ហ៊ុន សែន មិនមានការពាក់ព័ន្ធទៅនឹងការតែងតាំងសហចៅក្រមស៊ើបអង្កេតបរទេសនៅសាលាក្តីកាត់ទោសមេដឹកនាំខ្មែរក្រហមនោះទេ។
ដោយយោងតាមកិច្ចព្រមព្រៀងរវាងរាជរដ្ឋាភិបាលកម្ពុជា និងអង្គការសហប្រជាជាតិ
ទាក់ទងនឹងការកាត់សេចក្តីនៅក្រោមច្បាប់កម្ពុជានូវឧក្រិដ្ឋកម្ម
ដែលប្រព្រឹត្តឡើងនៅក្នុងរយៈកាលនៃកម្ពុជាប្រជាធិបតេ្យ ឯកឧត្តម កែវ រ៉េមី បានបញ្ជាក់ថា នេះជាសមត្ថកិច្ចពេញទីរបស់ឧត្តមក្រុមប្រឹក្សានៃអង្គចៅក្រម
ដែលមានព្រះមហាក្សត្រជាប្រធាន។
ប្រសាសន៍ប្រតិកម្មរបស់ឯកឧត្តម កែវ
រ៉េមី ខាងលើនេះបានធ្វើឡើងបន្ទាប់ពីកាសែតភ្នំពេញប៉ុស្តិ៍ (Phnom
Penh Post )និងព្រឹត្តិបត្រ ឌឺខាមបូឌៀដេលី (The Cambodia daily) ផ្សព្វផ្សាយមិនត្រូវនៅក្នុងព្រះរាជាណាចក្រកម្ពុជា
នាព្រឹកថ្ងៃទី ១៦ ខែ មករា ឆ្នាំ ២០១២ ក៏ដូចជាសេចក្តីថ្លែងការណ៍របស់គណៈកម្មការសិទ្ធិមនុស្សកម្ពុជា
របស់លោក អ៊ូ វិរៈ (CHR) និងអង្គការ OSJI អំពីការពាក់ព័ន្ធរបស់រាជរដ្ឋាភិបាលទាក់ទងនឹងការតែងតាំងសហចៅក្រមស៊ើបអង្កេតអន្តរជាតិនៅសាលាក្តីកាត់ទោសមេដឹកនាំខ្មែរក្រហម
គឺលោក ឡូរ៉ង់កាស្ពែរ(Laurent
Kasper-Anserment) ជំនួសលោកចៅក្រមជនជាតិអាល្លឺម៉ង់ ឈ្មោះ ស៊ែហ្គ ប្លុង (Siegfried Blunk)
ដែលបានលាចេញពីដំណែង ។ ឯកឧត្តម កែវ
រ៉េមី បានមានប្រសាសន៍ថា ខ្ញុំសូមច្រានចោលព័ត៌មានដែលផ្សព្វផ្សាយគ្មានមូលដ្ឋានច្បាស់លាស់
ខាងលើ។ ខ្ញុំសូមបញ្ជាក់ថា នៅក្នុងកិច្ចព្រមព្រៀងរវាងរាជរដ្ឋាភិបាលកម្ពុជា
និងអង្គការសហប្រជាជាតិបានចែងច្បាស់អំពីបញ្ហានេះ
ដោយមានការគោរពអធិបតេយ្យភាពគ្នាទៅវិញទៅមក។ ឯកឧត្តម កែវ រ៉េមី បានមានប្រសាសន៍ឲ្យដឹងថា
ក្នុងការតែងតាំងអង្គការសហប្រជាជាតិជាអ្នកស្នើបេក្ខភាព ហើយសមត្ថភាពអ្នកដែលត្រូវពិនិត្យមើលការតែងតាំងគឺឧត្តមក្រុមប្រឹក្សានៃអង្គចៅក្រម
ដែលជាស្ថាប័នកំពូលរបស់ជាតិ។ សម្តេចតេជោនាយករដ្ឋមន្រ្តី
លោកមិនបានទាក់ទងទាល់តែសោះក្នុងការតែងតាំងនេះ
ព្រោះជាសមត្ថកិច្ចរបស់ស្ថាប័នកំពូលនៃតុលាការខ្មែរ
ដែលមានព្រះមហាក្សត្រជាប្រធាន ហើយ ឧត្តមក្រុមប្រឹក្សានៃអង្គចៅក្រមមាននីតិវិធីធ្វើការងាររបស់គេ។
ឯកឧត្តម កែវ រ៉េមី បានចាត់ទុក ឃ្លាប្រយោគរបស់អង្គការ
OSJI និង CHR ហាក់បីដូចជាបញ្ជា
និងរំលោភអធិបតេយ្យភាព អំណាចកំពូលរបស់ជាតិ។
ក្នុងនាមជានាយករដ្ឋមន្រ្តី សម្តេចតេជោ
លោកដឹងច្បាស់អំពីការបែងចែកអំណាចរវាងស្ថាប័ន នីតិប្រតិបត្តិ តុលាការ
និងនីតិប្បញ្ញត្តិ។ ឯកឧត្តម កែវ រ៉េមី
បញ្ជាក់ថា ក្នុងនាមរាជរដ្ឋាភិបាលកម្ពុជា សម្តេចតេជោនាយករដ្ឋមន្រ្តី មានភារកិច្ចតាមដានត្រួតពិនិត្យ
និងរក្សាសុខសន្តិភាព និងស្ថិរភាពនយោបាយ
ដែលកម្ពុជាយើងកំពុងមាននាពេលសព្វថ្ងៃ
ដែលបង្កលក្ខណៈដល់ការវិនិយោគបរទេស ភ្ញៀវទេសចរណ៍
និងការរស់នៅរបស់ប្រជាពលរដ្ឋខ្មែរយើង
ក្នុងពេលដែលប្រទេសខ្លះនៅក្នុងពិភពលោកកំពុងមានអស្ថិរភាព។ ឯកឧត្តម កែវ រ៉េមី បានអំពាវនាវថា
ក្នុងនាមជាខ្មែរយើងត្រូវគិតពីបញ្ហានេះ
កុំធ្វើអ្វីឲ្យមានភាពច្របូកច្របល់។
ទាក់ទងនឹងកិច្ចសហប្រតិបត្តិការរវាងរាជរដ្ឋាភិបាលកម្ពុជា
និងអង្គការសហប្រជាជាតិលើដំណើរការនៃសាលាក្តីកាត់ទោសមេដឹកនាំខ្មែរក្រហមនេះ
ឯកឧត្តម កែវ រ៉េមី បានមានប្រសាសន៍ថា
យើងមានកិច្ចសហប្រតិបត្តិការល្អជាមួយគ្នា ព្រោះដំណើរការនៃការកាត់សេចក្តីបានជោគជ័យគឺជោគជ័យទាំងអស់គ្នា
ទាំងអង្គការសហប្រជាជាតិ រាជរដ្ឋាភិបាលកម្ពុជា ក៏ដូចមិត្តភ័ក្តិសាលាក្តីបានផ្តល់ជំនួយដល់ដំណើរការនៃសាលាក្តីនេះ។
ឯកឧត្តម កែវ រ៉េមី ក៏បានឲ្យដឹងដែរថា
កន្លងមករាជរដ្ឋាភិបាលមានទំនាក់ទំនងជាប្រចាំ
គឺមានលិខិតឆ្លើយឆ្លងគ្នា ចំនួន ១០ ទូរស័ព្ទចំនួន ៤ ដង
និងមានការជួបប្រជុំគ្នាផងដែរ ក៏ប៉ុន្តែការយឺតយ៉ាវគឺដោយសារតែយើងត្រូវប្រារព្ធបុណ្យឯករាជជាតិ
អន្តរជាតិត្រូវប្រារព្ធបុណ្យចូលឆ្នាំ សកល មិនមែនមានន័យថា គ្មានការយកចិត្តទុកដាក់នោះទេ។
ទាក់ទងនឹងការផ្សព្វផ្សាយគ្មានមូលដ្ឋានរបស់កាសែតភ្នំពេញប៉ុស្តិ៍
(Phnom Penh Post )និងព្រឹត្តិបត្រ ឌឺខាមបូឌៀដេលី (The Cambodia daily) ឯកឧត្តម
កែវ រ៉េមី បានមានប្រសាសន៍ថា
ឯកឧត្តមនឹងតាមដានពិនិត្យមើលឥរិយាបទរបស់បណ្តាញឃោសនាទាំងពីរនេះ
អំពីការកែតម្រូវនូវចំណុចខ្វះខាតរបស់ខ្លួន។