នៅព្រឹកថ្ងៃទី១៦ ខែ មករា
ឆ្នាំ២០១២ សម្តេចអគ្គមហាសេនាបតីតេជោ
ហ៊ុន សែន បានអនុញ្ញាតឲ្យឯកឧត្តម MARK DOOGING ឯកអគ្គរដ្ឋទូតថ្មី
នៃចក្រភពអង់គ្លេស ចូលជួបសំដែងការគួរសម និងពិភាក្សាការងារ ក្នុងឱកាសដែលឯកឧត្តម
ត្រូវបានតែងតាំងជាឯកអគ្គរដ្ឋទូតវិសាមញ្ញនិងពេញសមត្ថភាព របស់ប្រទេសចក្រភពអង់គ្លេស
នៅព្រះរាជាណាចក្រកម្ពុជា។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្រ្តី បានឲ្យដឹងថា
ឯកឧត្តម MARK DOOGING ឯកអគ្គរដ្ឋទូតថ្មីនៃចក្រភពអង់គ្លេសបានគោរពជំរាបជូនសម្តេចថា
ឯកឧត្តម ធ្លាប់បានមកធ្វើទស្សនកិច្ចនៅព្រះរាជាណាចក្រកម្ពុជា ហើយនៅពេលនេះឯកឧត្តម
បានឃើញប្រទេសកម្ពុជា មានការអភិវឌ្ឍរីកចំរើនយ៉ាងលឿនជាទីបំផុត។ ឯកឧត្តមឯកអគ្គរដ្ឋទូតថ្មីមានប្រសាសន៍បន្តថា
ដំណើរបេសកកម្មការទូតរបស់ ឯកឧត្តមមកកាន់ព្រះរាជាណាចក្រកម្ពុជានៅពេលនេះ
នឹងនាំមកនូវកិច្ចសហប្រតិបត្តិការរវាងប្រទេសទាំងពីរកម្ពុជា និងចក្រភពអង់គ្លេស
ឈានឆ្ពោះទៅមុខ ជាពិសេសលើវិស័យពាណិជ្ជកម្ម ,ទេសចរណ៍,និងវិស័យដោះមីន។
សម្តេចតេជោនាយករដ្ឋមន្រ្តីបានមានប្រសាសន៍ថ្លែងអំណរគុណចំពោះចក្រភពអង់គ្លេសដែលតែងតែបានជួយ
ដល់កម្ពុជា ហើយសម្តេចតេជោបានស្នើឲ្យឯកឧត្តម MARK DOODING បន្តកិច្ចសហប្រតិបត្តិការ ក្នុងការជួយដល់ប្រទេសកម្ពុជាជាបន្តទៀត
ជាពិសេសលើវិស័យបណ្តុះបណ្តាលធនធានមនុស្ស និងការដោះមីន៕