ឯកឧត្តម JOSE
RAMON.R.YARONA ឯកអគ្គរដ្ឋទូតថ្មីនៃប្រទេសគុយបាប្រចាំកម្ពុជាបានអះអាង
នៅពេលជួបសំដែងការគួរសមជាលើកដំបូងជាមួយសម្តេចអគ្គមហាសេនាបតីតេជោ ហ៊ុន សែន
នៅវិមានសន្តិភាពក្នុងរាជធានីភ្នំពេញ កាលពីថ្ងៃទី ១៧ មករា ឆ្នាំ
២០១២
ពីការប្រឹងប្រែងបំពេញការងារការទូតរបស់
លោកប្រយោជន៍ដើម្បីពង្រឹងទំនាក់ទំនងរវាងប្រទេសទាំងពីរកម្ពុជា-គុយបាឲ្យកាន់តែរឹមមាំថែមទៀត
ពិសេស លើវិស័យកសិកម្ម និង សុខាភិបាល។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីឲ្យដឹងថា
នៅក្នុងជំនួបនោះ ឯកឧត្តម JOSE RAMON.R.YARONA បានប្តេជ្ញាចិត្តថា
អំឡុងពេលបំពេញបេសកកម្មការទូតនៅក្ពុជា លោក នឹងខិតខំពង្រីក និង
ពង្រឹងទំនាក់ទំនងជាមិត្តភាព និង កិច្ចសហប្រតិបត្តិការរវាងប្រទេសទាំងពីរឲ្យ
កាន់តែប្រសើរឡើង ។ ឯកឧត្តម ឯកអគ្គរដ្ឋទូតថ្មីនៃប្រទេសគុយបាប្រចាំកម្ពុជាក៏បានគោរពអញ្ជើញសម្តេចតេជោនាយករដ្ឋមន្ត្រីឲ្យទៅបំពេញទស្សនកិច្ចផ្លូវ
ការនៅប្រទេសគុយបាផងដែរ។
ឯកឧត្តម JOSE
RAMON.R.YARONA បានជំរាបជូនសម្តេចតេជោថា
លោក ធ្លាប់បានមកធ្វើទស្សនកិច្ចនៅកម្ពុជាកាលពីឆ្នាំ ១៩៨៩
ដែលរហូតមកដល់ពេលនេះបានកត់សម្គាល់ ឃើញថា
កម្ពុជាមានការអភិវឌ្ឍយ៉ាងឆាប់រហ័សជាទីបំផុត និង
បានលើកឡើងពីលទ្ធភាពនៃកិច្ចសហ ប្រតិបត្តិការរវាងប្រទេសទាំងពីរ ជាពិសេសលើវិស័យកសិកម្ម
ថ្នាំសម្លាប់សត្វល្អិត វិស័យសុខាភិបាល និង
ថ្នាំការពារជំងឺមហារីកផងដែរ។
សម្តេចតេជោនាយករដ្ឋមន្ត្រីបានសំដែងនូវការស្វាគមន៍ និង
អបអរសាទរចំពោះលោក JOSE
RAMON.R.YARONA ដែលត្រូវបានតែងតាំងជាឯកអគ្គរដ្ឋទូតប្រទេសគុយបាប្រចាំកម្ពុជា។ពាក់ព័ន្ធ
នឹងកម្មវិធីបំពេញទស្សនកិច្ចផ្លូវការនៅប្រទេសគុយបា សម្តេចតេជោបានបញ្ជាក់ថា សម្តេចនឹងពិនិត្យ មើលនូវកម្មវិធីនេះ
និង បានស្នើឲ្យលោកទូតបន្តសហការជាមួយក្រសួងកសិកម្ម និង ក្រសួង
សុខាភិបាលលើបញ្ហាកិច្ចសហប្រតិបត្តិការក្នុងវិស័យកសិកម្ម និង
វិស័យសុខាភិបាលនេះផងដែរ៕